“Ko ha Fepōtalanoaʻaki mo Melivisi fekauʻaki mo e Sākalamēnití,” Ko e Kaumeʻá, ʻEpeleli 2025, 40–41.
Ko ha Fepōtalanoaʻaki mo Melivisi fekauʻaki mo e Sākalamēnití
ʻOku nofo ʻa Melivisi ʻi Kuala Lumupā, Malēsia. Naʻa mau ʻeke ange ha ngaahi fehuʻi fekauʻaki mo e meʻa ʻokú ne fai ke ʻuhingamālie ai ʻa e sākalamēnití.
Fakamatala mai fekauʻaki mo koe.
ʻOku ou taʻu hiva, pea ʻoku ou haʻu mei Naisīlia. ʻOku ou lea ʻi ha lea fakafonua ʻe ua, ko e lea faka-ʻIkipoú mo e faka-Pilitāniá. Ko e meʻa ʻoku ou saiʻia taha aí ko e soká mo e vaʻingá. ʻOku ʻi ai ha toko fā ʻi hoku fāmilí—ko au, ko ʻeku ongomātuʻá, mo hoku tuofefiné.
Ko e ngaahi meʻa ʻoku ou saiʻia taha ai fekauʻaki mo e nofo ʻi Malēsiá ko e meʻakaí mo e anga fakafonuá. Ko e meʻakai ʻoku ou saiʻia taha aí ko e nasi goreng (laise fakapaku (fried rice)). ʻOku mau fakamanatua ʻi hoku ʻapiakó ʻa e Taʻu Foʻou faka-Siainá mo ha ngaahi ʻaho mālōlō kehe mei ha ngaahi anga fakafonua kehekehe.
Ko e hā ʻoku mahuʻinga ai ʻa e maʻu sākalamēnití kiate koé?
ʻI heʻeku maʻu ʻa e sākalamēnití, ʻoku ou fakafoʻou ai ʻa e ngaahi fuakava mo e ngaahi palōmesi naʻá ku fai ki he Tamai Hēvaní. ʻOku ou ʻiloʻi ʻoku ʻomi ʻe hono maʻu ʻo e sākalamēnití mo hono tauhi ʻeku ngaahi fuakavá ʻa e ngaahi tāpuakí, hangē ko e ʻiate au hono Laumālié, tataki au, mo ʻomi ha fakafiemālie ke u fehangahangai mo e ngaahi faingataʻá.
Ko e hā ʻokú ke fai ke teuteu ai ki he sākalamēnití ʻi he uike takitaha?
ʻOku ou feinga ke muimui ʻia Sīsū pea moʻui ʻi ha founga faka-Kalaisi lolotonga ʻo e uiké. ʻOku ou saiʻia ke hivaʻi ʻa e ngaahi himí ʻi he houalotu sākalamēnití. Lolotonga ʻa e sākalamēnití, ʻoku ou fai ha lotu fakalongolongo ʻi hoku lotó, pea ʻoku ou feinga ke ʻapasia.
ʻOku ou fai hoku lelei tahá ke fanongo ki he ngaahi lea hili ʻa e sākalamēnití. ʻOku ou saiʻia ke hiki ha fakamatala lolotonga ʻeku fanongó. Hili ʻa e lotú ʻoku ou talanoa ki he meʻa naʻá ku akó mo ʻeku faʻeé mo hoku tuofefiné.
Ko e hā ʻokú ke fai ke muimui mo manatuʻi ai ʻa Sīsū Kalaisi ʻi he lolotonga ʻo e uiké?
ʻOku ou lotu pongipongi maʻu pē mo hoku fāmilí ʻi he ʻaho kotoa pē. ʻI he akó, ʻoku ou fakaʻatā hoku kaungāakó ke nau fakaʻaongaʻi ʻeku komipiuta toʻotoʻó lolotonga ʻa e kalasí ʻi he taimi ʻoku ngalo ai ʻenau komipiutá ʻi ʻapí. ʻOku ou vahevahe foki ʻeku fanga kiʻi meʻakaí mo e kaungāako ʻoku ʻikai ke ʻi ai haʻanau meʻakaí.
Ko e hā ha meʻa te ke talaange ki he niʻihi kehé fekauʻaki mo e tokanga taha ki he sākalamēnití?
Te u talaange ke fakatauʻatāinaʻi ʻenau fakakaukaú mei he ngaahi meʻa ʻoku nau hohaʻa ki aí mo e meʻa kehe kotoa pē. Fakakaukau pē ki he ngaahi tāpuaki mo e ʻofa ʻa e ʻOtuá ʻi heʻenau moʻuí.
ʻŪ Tā Fakatātā ʻa Miguel Angel Sánchez