Ngaahi ʻEkitivitī ʻo e Haʻu, ʻo Muimui ʻIate Aú

ʻOku akoʻi ʻe he folofolá ʻoku fakatefito ʻa e palani ʻo e fakamoʻui ʻa e ʻOtuá ʻia Sīsū Kalaisi mo tokoni ke tau foki ki ʻapi ki he Tamai Hēvaní (vakai, Tokāteline mo e Ngaahi Fuakava 29). Toʻo hake ha laʻipepa. Kosiʻi ha fakatātā ʻo e Fakamoʻuí mei he Ko e Kaumeʻá pea fakapipiki ia ʻi lotomālie. Tā ʻi he feituʻu ʻoku ʻataá ha ngaahi meʻa te ke lava ʻo fai ke ke foki ai kiate Ia. Kole tokoni ki ha taha lahi kapau ʻoku faingataʻa!

Naʻe folofola ʻa Sīsū Kalaisi ʻoku totonu ke tau langa hotau fakavaʻé ʻi Heʻene ongoongoleleí (vakai, Tokāteline mo e Ngaahi Fuakava 33:12–13). Taufetongi ʻi hono langa ha taua poloka ki he māʻolunga taha te ke lavá. Hili iá pea toʻo taha taha mei lotomālie pe konga ki lalo ʻo e tauá kae ʻoua kuo tō. ʻOku tokoniʻi fēfē koe ʻe he meʻa ko ʻení ke langa ho fakavaʻé ʻia Sīsū Kalaisí?

ʻI he ʻaʻahi ʻa Sīsū Kalaisi ki Selusalema lolotonga ʻa e uike fakaʻosi ʻo ʻEne moʻuí, naʻe taʻataʻalo ʻe he kakaí ha ngaahi vaʻa paame ke fakafiefiaʻi. Ko e ngaahi vaʻa pāmé ko ha fakataipe ia ʻo e moʻui taʻengatá. Koeʻuhí ko Sīsū Kalaisi, te tau toetuʻu kotoa pea lava ke maʻu ʻa e moʻui taʻengatá (vakai, Tokāteline mo e Ngaahi Fuakava 138:17). Tā ho ongo nimá ʻi ha pepa lanu mata pea kosi ʻo toʻo ʻa e ongo lauʻi nimá. Fakapipiki pe tepiʻi kinautolu ki ha fanga kiʻi vaʻakau papa ke ngaohi ha vaʻa paame.

Naʻe fakahā ʻe Sīsū Kalaisi ki he Kāingalotú ʻi he Tokāteline mo e Ngaahi Fuakavá, ke nau fakataha koeʻuhí ke Ne tāpuakiʻi kinautolu ʻaki ʻa e mālohi mei he langí (vakai, Tokāteline mo e Ngaahi Fuakava 38:31–32). Fakatahatahaʻi ha kulupu ʻo ʻoua naʻa toe siʻi hifo ʻi he toko faá ʻi ha siakale. Puke ʻa e nima ʻo ha ongo kakai kehekehe ʻoku tuʻu ʻo hanga mai kia koe ke faʻu ha foʻi fakapona fakaetangata. Feinga ke ke toe fakavetevete koe ki ha siakale ʻo ʻikai tukuange ha nima ʻo ha taha!