“Ngaahi Lofa ʻo e Toe Tuʻú,” Ko e Kaumeʻá, ʻEpeleli 2025, 4–5.
Ngaahi Lofa ʻo e Toe Tuʻú
Naʻe pehē ʻe ʻĀleki, “ʻOku fakamanatu mai ʻe he ngaahi lofa ʻi he ʻataá kuo toetuʻu ʻa Sīsū Kalaisi.”
Ko ha talanoa moʻoni mei Pēmiuta.
Naʻe haʻi fakataha ʻe Kōlini ha ongo vaʻakau lōloa ke ngaohi ʻaki ʻene lofá. Naʻá ne takaiʻi maʻu leva ʻa e afó ʻi he tafaʻaki ki tuʻa ʻo e lofá ke mālohi. Naʻe taimi leva ke tānaki atu ʻa e pepa lanu kehekehé.
Naʻe tuhu ʻa Leti ki he lofa pē ʻaʻaná. “ʻOku tonu nai ʻeku ʻai ʻení?”
Naʻe pehē ange ʻe Kōlini, “ʻIo. Fusi ʻi he taimí ni ʻa e ngaahi afó ke maʻu.”
Naʻe pehē ange ʻe ʻĀleki, ko e tehina ʻo Kōliní, “Pea fili ha konga tupenu ki he hikú.” Naʻá ne tuhu ki he ʻū kongokonga tupenu ʻi he funga tēpilé. “ʻOku tokoni ia ke puna [ʻa e lofá].”
Naʻe ngaohi ʻe Kōlini mo hono fāmilí ha ngaahi lofa ki he Falaite Leleí. Ko e Falaite Leleí ko ha ʻaho mālōlō lahi ia ʻi Pēmiuta. Ko e Falaite ia kimuʻa ʻi he Toe Tuʻú. Naʻe fakafiefiaʻi ʻe he taha kotoa ʻaki ʻenau ʻalu ki he matātahí ke fakapuna ʻenau lofá. Naʻe ʻaʻahi ʻa Leti ki he fāmili ʻo Kōliní. Naʻe teʻeki ke ne ngaohi ha lofa kimuʻa.
Naʻe fehuʻi ange ʻe Leti, “Ko e hā ʻokú ke fakapuna lofa ai ʻi he Falaite Leleí?” Naʻá ne fili ha pepa lanu kulokula mo e lanu pulū ki heʻene lofá.
Naʻe pehē ange ʻe Kōlini, “ʻOku fakamanatu mai ʻe he ngaahi lofa ʻoku puna ʻi he ʻeá naʻe toetuʻu ʻa Sīsū Kalaisi. Naʻá Ne hāʻele hake ke toe nofo fakataha mo e Tamai Hēvaní. Ko ia te tau toetuʻu kātoa ʻi ha ʻaho.”
Naʻe kamo pē ʻa ʻĀleki. “ʻOku fakapuna lofa ʻa e tokotaha kotoa pē ʻi Pēmiuta ke fakafiefiaʻi ia.”
Naʻe fehuʻi ange ʻe Leti, “Ko e hā ʻokú ke fakapuna lofa ai ʻi he Falaite Leleí?”
Naʻe fili ʻe Kōlini ha pepa lanu kehekehe. “ʻOku ou saiʻia ʻi heʻene ʻomi kitautolu ke tau ofi ange ki he ʻOtuá. Pea tau feohi mo e fāmilí mo e ngaahi kaungameʻá.”
Naʻe pehē ʻe ʻĀleki, “ʻOku ou saiʻia ʻi he fakafiefia fakataha ʻa e kakai tokolahí.”
ʻI he ʻaho Falaite Leleí, naʻe ʻalu ʻa Kōlini mo hono fāmilí ki he matātahí. Naʻa nau ʻave ʻenau lofá, keke ngaohi mei he iká, mo e pani kolosí.
Naʻe ʻosi tokolahi ha kakai ʻi he matātahí. Naʻe fonu ʻa e langí ʻi he ngaahi lofa lanu kehekehé. Naʻe puhi takai ʻe he havilí ʻa e laʻiʻulu ʻo e tokotaha kotoa pē, pea naʻe tatau ʻa e langi lanu pulū māmá mo e lanu ʻo e tahí. Ko ha ʻaho fakaʻofoʻofa ia ki he fakapuna lofá!
Naʻa nau tangutu ʻi he matātahí ke kai. Naʻe mafana ʻa e keke ngaohi mei he iká, pea naʻe molū ʻa e pani kolosí. Naʻe taʻataʻalo atu ʻa Kōlini mo ʻĀleki ki hona ngaahi kaungāmeʻa naʻa nau luelue haké.
Naʻá na lue atu leva mo Leti ʻi he matātahí. Naʻe puke maʻu ʻe Kōlini ʻene lofá. Naʻe pau ke ne lele ʻo feinga ʻi ha ngaahi taimi, kimuʻa pea puna ʻa e lofá ʻi he ʻataá. Naʻá ne siofi ʻa e puna ʻene lofa lanu kehekehé ʻi he havilí.
Naʻe pehē ange ʻe ʻĀleki, “ʻOku ou fiefia ʻoku toe moʻui ʻa Sīsū.”
Naʻe sio fakamamaʻu hake ʻa Kōlini ki heʻene lofá mo malimali. “Mo au pē.”
Ngaahi tā fakatātā ʻa Tatsiana Burgaud