Taeka ni Kainiin

Unimwaane Neil L. Andersen: E kakukurei raonakimi ngkami ake kam raoniira n marooro aikai ao n unga nanou n ami kakaonimaki n riki bwa Ana reirei ngkami. Nakoimi ake kam tangiria n noori riki marooro aikai, a na katomaaki ma bwaai n reitaki ibukin te bootaki n taromauri aei.

Tariu ao mwaane, I kukurei ngkai ma Kathy n raonakimi n te tairiki aio. Kathy, ko kona ni tibwai tabeua am iango ngkana iai ngkai ti nang kaina te bootaki n taromauri aei?

Titita Kathy Andersen: Kam rabwa. I rangi ni kakaaitau ibukin rokora ikai ma kaainabau n te tairiki aei, ao n mena irarikimi ni kabane. Bon te tairiki ae onoti, ao ti a tia n namakinna anne i nanora.

I rangi ni kukurei ibukin reken te tai ni boong aika i mwaaira, tao n te maungatabu n te titeiki ke n matakuakina te maungatabu ni kabuta, are ti na kona iai n tabeka baira ao ni boutokaa Beretitenti Dallin H. Oaks bwa te burabeti, te tia mamata, ao te tia karekea te kaotioti, ao bwa ana beretitenti Ana Ekaretia Iesu Kristo Ibukiia Aika Itiaki ni Boong aika Kaitira.

Ao ni karokoa te tai anne are I kona ni katea baiu, n tabekiarake i nanou ao n au tataro, I karabwa Tamara are i Karawa ibukin te mmwane ae tangiraki aei are e a riki ngkai bwa ana burabeti te Atua. Iai te kibu ae I aki toki n maroroia ma kainnabau ngkana ti iangoa Beretitenti Oaks. Bon te kibu n Reirei ao Berita aika Tabu ike e taetae iai te Uea nakon Hyrum Smith.

E taku, “I … tangiria ibukin raoiroin nanona, ao bukina bwa e tangira te bwai ae e eti i matau.” Ao I taku bwa a mwaiti aika ti taekinna, a mwaiti ni maiura, bon nanon Beretitenti Dallin H. Oaks.

I tangira Tamau are i Karawa, ao I tangira au Tia Kamaiu Iesu Kristo. I tangiria n anga au koaua man taekan te anene ae tamaroa, n rangi n tamaroa ae ti ongo n te tairiki aei mairoun te kuaea: Karaoiroa te Uea, ae Akea Tokina, Uean te karikibwai.” Ao e a manga taku te kibu teuana: “Karaoiroa te Uea. O, kariaia bwaai ake i nanou n miiakinna.” I tangiria, I miiakinna ma nanou ao tamneiu ni kabanea. N aran Iesu Kristo, amen.

Unimwaane Neil L. Andersen: N a kairiko nako ikai.

I tangiri ngkami.

Ti kimwareirei n raoiroimi ao ami onimaki iroun te Uea Iesu Kristo. Ti tangira te bootaki ma ngkami ao ma aomata ni kabuta te aonaaba—ataeinimwaane ao ataeinnaine, natin te Atua mmwaane ao aine, ataein te berita ae tabu, ana reirei Iesu Kristo. Ti miimi n nanomi nakon te Tia Kamaiu, ao ti karabwa te Atua ngkai kam mena ikai ma ngaira ngkai ti katauraoi ibukin Kauaokin Okin te Uea.

Ti maeka n taai aika aki raraoi—taai are a korakora iai kariiri, ngke a kaokoro aron te aonaaba man aron ana tai ana euangkerio Iesu Kristo. Ti maeka n te tai are ti aki kona ni kabwarabae ibukin arora n riki bwa ana reirei Iesu Kristo. Ngke rorou ngkami, e taku ana burabeti te Uea, “[Ni kabane aomata aika taan onimaki] a boutokaaki man oon te onimaki, ao ikekei … e riai teuarei [ke neirei] n tei.” I ataa aei bwa e koaua.

E taku ana burabetei te Uea temanna, “E aki rairaki ni koaua te aomata ni karokoa e noora mwaakan te Atua n roko nako aoia taan kairiiri n ana Ekaretia, ao ni karokoa e rinnako i nanon teuarei [ke neieirei] n ai aron te ai.” E koaua naba aio.

E kairiira te burabeti ao te tembora nakon Iesu Kristo. Ao ana reirei n kabanea ni boong aikai, a katauraoi ibukin Okina, ti kakorakoraaki n anga aika a raka aroia man ara kakoaua irouia ana burabeti te Uea ao ana auti te Uea.

Irarikin mwaakan Tamneina, te burabeti ao te tembora bon ana kakabwaia te Uea aika a korakora ni kabomwi are e a tia n anganiira n ara aonaaba ae marebu n kamaenakoa te raoiroi man te buakaka, n mataata n rikira n te maiu ae mamate aei, ao riki ni koaua bwa Ana reirei.

I kaota au kakoaua iaon Beretitenti Dallin H. Oaks. E a tia ni katauraoaki ao ni karikaki n ain te kakaaitara, kaboouaki rabwatana ao ana iango ni kairiira n te tai aei n tataekina aran te Uea.

I kaota au kakoaua bwa te tembora ae i moara aei, ao ni kabane ana auti te Uea aika a tabu a onrake n te mwaaka, te rau, ao te kamanoaki, ao te kaotioti, ae rabwatanaki ma kiingin te nakoanibonga ake a karikii bwaai ake a kabaeaki i aon te aba ni kabaeaki i karawa. Ti karabwarabwara ibukin mwaitin tembora ake a kateaki ni kabuta te aonaaba.

Bon te tai ae moan te tamaroa n maekara, te tai ni kakorakora ao ni katauraoi ibukin okin te Tia Kamaiu. Ao E a tia ni kaungaira: “Kam na kukurei; I a tia n tokanikai i aon te aonaaba.”

Ma te kariaia n abotoro irou, I kakabwaiai ngkami ngkai kam ukora katauraoakimi ibukin okin Ara Tia Kamaiu, bwa kam na anganaki te kamatoaaki n kakoauaa ana burabeti te Uea, ao te mwaaka ae tabu n Ana auti ae tabu. I berita nakoimi bwa a na kakabwaiai ngkami ana anera karawa ngkai kam ukora aromi n riki bwa ana reirei ni koaua Iesu Kristo.

I kakoauaa bwa Iesu Kristo bon Natin te Atua, te Tia Kamaiu ao te Tia Kabooia botanaomata ni kabaneia. Aio au kakoaua, n aran Iesu Kristo, amen.