Taeka ni Kaukuki
E rangi n rianako anne, tamaroa, riao tamaroana. Ao I iangoia n te tabo aei ma tamnein te Tia Kamaiu ae tamaroa, te Christus, ao I ataia bwa E taakinanako baina nakoim. Ko rabwa ibukin kaotan te tangira ae tamaroa anne ibukin te Tia Kamaiu. Ko rangi ni bati, n rabwa.
Tariu ao mwaaneu aika kam tangiraki ni kabuta te aonaaba, I kaota au tangira nakoimi, ao I uota nakoimi aia tangira te Moan Beretitentii are e a tibwa manga kateaki n te Ekaretia—Beretitenti Dallin H. Oaks, Beretitenti Henry B. Eyring, Beretitenti D. Todd Christofferson.
Ao I uota naba aia tangira, kaain au kooram, te Kooram n Abotoro n te Tengaun ma Uoman. Ti rangi ni kakaaitau—ngai ao Kathy ngkai ti mena ikai n te Visitors Center n te Washington D.C Tembora, n nuun ana auti te Uea ae tamaroa aio.
I rangi ni kukurei ni mena ibuakomi, ngkami ara kairake ni ikawai aika kam tamaroa, ikai ao n te aonaaba ni kabutaa. Ti tangirii ngkami. Ti rangi ni karabwarabwa ibukin ami kakaonimaki nakon Iesu Kristo n rikimi bwa Ana reirei.
I tataro ni koaua bwa i nanon te aoa aei e na mena iroura Tamnein te Uea ao a na kakorakoraaki man kamatoaaki ara onimaki iroun te Tia Kamaiu ao Ana euangkerio ae e a tia ni kaokaki. N te tairiki aei, ti na marooroa taekan te burabeti ao te tembora ao aroia ni kairiira nakon te Tia Kamaiu, Iesu Kristo.
Ma te moan moa, kaotan te tangira nakon Beretitenti Oaks mairouia kairake ni ikawai man taabo aika a raroa mai ikai.
Kairake n Ikawai mai Northern Canada: Mauri, Beretitenti Oaks. I tii tangiria ni kaongoingkami bwa ti iaiangoi ngkami ngkoe ao Titita Oaks. Ti kanakoa nakoimi ara tataro ma ara tangira mai Kanata meang. Tiabo.
Aia Kurubu Kairake n Ikawai mai Ensign College: Beretitenti Oaks, ti rangi ni kakaaitau ibukin am katooto ao am reirei. Ti ingainga ni kan reiakinaki mairoum.
Kairake n Ikawai mai Aberika Maiaki: Mauri mai Johanesburg, Aberika Maiaki. Ti tangiriko, Beretitenti Oaks.
Kairake n Ikawai mai Biribin: Mauri, Beretitenti Oaks, mai Biribin. Ti rangi ni kukurei n reiakinaki man am rongorongo.
Unimwaane Neil L. Andersen: Ni kabutaa te aonaaba. I tangiria ni moanna man kaotakin te bwai ae riki ae rangi n tabu tabeua te bong n nako, n te Kauabong, 14 Okitobwa.
N bon te bong anne are ti kaitibo iai ngaira 14 Abotoro aika a katabuaki, n aki mamatam ao n tataro mwaaka ibukin ana kakabwaia te Uea ni manga katean te Moan Beretitentii ae boou. Bon te tai are e katomaa karawa ma te aonaaba.
I rangi ni kakaitau ibukin te mwaaka ao te kakoaua n tamnei ae aki kona ni mwanuokinaki ao te kamatoa are e roko nakoiu ao nakoira n tatabemaniira, ao nakoira ni katiteuanaaki. Ni baia 13 Abotoro i aon atuun Beretitenti Dallin H. Oaks, Beretitenti Jeffrey R. Holland e kaokoroa Ana Mataniwi n Abotoro te Uea bwa te Beretitenti n Ana Ekaretia Iesu Kristo ibukiia Aika Itiaki ni Boong aika Kaitira.
I angani ngkami au kakoaua ae korakora ao n nanorinano bwa bon ngaia ana burabeti te Uea iaon te aba. E kinaa bwanaan te Uea. E na kairiira i nanon te koaua ao ni kairiira nakon te Uea ae Iesu Kristo. Ngkai ti kukurei, ao n tauraoi n reireiaki, a na karababaaki ara iango ao tamneira, ao a na kakabwaiaaki maiura n te mwaaka mai karawa.
Kingin te nakoanibonga mai iroun te Atua a tauaki mwiia ao bwaniniia, ma te kariaia ni kammwakuri kiing akanne ake a tauaki mwiia iroun Beretitenti Dallin H. Oaks. Kam na ururinga ana taeka Iesu nakon Betero, Ana Abotoro.
E taku, “N na anganiko kiingin abanuean karawa: ao ane ko na kabaea i aonaba e na kabaeaki i karawa: ao ane ko na kabwara i aonaba e na kabwaraaki i karawa.”
E taku te Uea nakon te burabeti Iotebwa Timiti: “Bwa ana taeka kam na karekei, n aron ae bon man oin wiiu, ma te taotaonakin nano ao te onimaki ni kabanea.” A koaua naba taeka aikai ibukin ara burabeti, Beretitenti Dallin H. Oaks. Iangoa anne.
I nanon 41 te ririki n weteana ae tabu, e a tia ni kakoaua Beretitenti Oaks bwa te tia kakoaua ae okoro iroun te Uea Iesu Kristo. Tia matakuakinna.
Beretitenti Dallin H. Oaks (1984): Te maungatabu ae te kauatai n te ririki aei bon au moan tai ni marooro nakoia kaain te Ekaretia, n kaota butimwaean weteakiu nakon te Kauntira n te Tengaun ma Uoman. … N na kabanea nanou, au iango, ma korakorau n te onimakinaki ae korakora ae I anganaki, riki ibukin taian tibwanga ibukin te tia kakoaua ae onoti ibukin aran Iesu Kristo n te aonaaba ae bwanin.
Beretitenti Dallin H. Oaks (1987): Ti tangira te Uea ae Iesu Kristo. Bon ngaia te Mesia, ara Tia Kamaiu, ao te Tia Kabooira. Bon ti ngaia te ara ae ti kona ni kamaiuaki iai.
Beretitenti Dallin H. Oaks (1994): E na katauraoiko onimakinan te Uea ae Iesu Kristo ibukin bwaai ake a na roko n te maiu. E na katauraoiko te aeka n onimaki aei inanon am waaki ni kabane i nanon te maiu—ni kabonganai ake ko a tia ni karekei ao n teimatoa ni waaki nako rinanon taai n nanokaawaki n aki reken ake tabeua iroum.
Beretitenti Dallin H. Oaks (2000 “Te Kristo ae Maiu”): Ti kaota ara kakoaua, ngkai Ana Abotoro aika ti katabuaki—bwa Iesu bon te Kristo ae Maiu, Natin te Atua ae aki mamate. Ngaia te Uea Imanuera, are e tei n angatain Tamana. Ngaia bon te oota, te maiu, ao te kantaninga n te aonaaba.
Beretitenti Dallin H. Oaks (2006): I kaota au koaua ibukin Iesu Kristo, ara Tia Kamaiu, are e kaoira ni kabane bwa ti na roko nakoina ao ni kakororaoaki i Rouna. E na kabaei ikoakira ao E na kamaoi nanora aika a rawawata.
Beretitenti Dallin H. Oaks (2013): Iriiran Kristo bon tiaki te kabwarabae ke te taina n tai karaoana ma bon te motinnano ae reitinako ao waakin te maiu ae na maiuakinaki n taai nako ao n taabo ni kabane.
Beretitenti Dallin H. Oaks (2025): I kakoaua te Uea Iesu Kristo, ae Ngaia te Rikitemanna iroun te Atua Tamara ae Akea Tokina. E kaoira bwa ti na toua kawain te berita are e na kairiira nakon te ikotaki ma ara utu i karawa. Mwaakan te nakoanibonga n kabaebae, ake a kairaki ma kaokan kiing n te Tembora i Kirtland, e na ikotiia utu n akea tokina. A teimatoa karaoakin aikai inanon ana tembora te Uea aika a rikirake mwaitiia n kabutaa te aonaaba. Aio e bon koaua. Tina ira buakona.
Beretitenti Dallin H. Oaks (2025): I ataia i aon bwaai ni kabane i nanon maiu bwa aio bon Ana Ekaretia Iesu Kristo Ibukiia Aika Itiaki ni Boong aika Kaitira. I kakoaua iroun Iesu Kristo, are bon Ngaia kautuun te Ekaretia, ao n anga Ana kakabwaia nakoia ake a ukoria ao ni beku i Bukina. N aran Iesu Kristo, amen.
Unimwaane Neil L. Andersen: N te bong aei, ti tangiria n marooroakin tabeua reirei aika a mwakaroiroi ake ti a tia ni karekei mairoun Beretitenti Oaks, ao ti tangiria ni iangoia bwa a na kanga reirei aikai ni kakabwaiai maiura. N te waaki n te tembora ae tabu, ti tangiria naba n marooroakin aron ana auti te Uea n uota te mwaaka, te rau, ao te kaotioti n te tai ae kakawaki aei i nanon maiura.
Iai te bwai ae rinanona Kathy n tain katanoataan te Washington D.C Tembora ae I tangiria bwa kam na ongo iai mairouna. Kathy.
Titita Kathy Andersen: E rangi n onoti irou te tembora aei, ae te Washington D.C Tembora. Ngke te tetei n aine ngai ae I uarereke, I ikawairake i Florida, ae mena i Maiakin te United States, ao te tembora ae te kabanea ni kaan nakoira bon 2,300 te maire raroana i Salt Lake City.
Ngke aua au ririki, a mwananga au utu nako Salt Lake City bwa ti aonga ni kabaeaki ni kabane bwa te utu. Ngke 12 au ririki, e katanoataaki bwa e na kateaki te Washington D.C Tembora. Ti rangi ni kukurei n iangoia ae e nang kaan ma ngaira te tembora n te raroa ae 900 te maire.
I rangi n uringnga raoi te Tabati ngke e tua te Bitiobi bwa a na tiku ni kabane kaaro imwiin te taromauri ao ni bootaki n te boowi ae onoti ma ngaia. Ngkai te ataei ngai, I ti iangoia—ao kanga I maaku, I iangoia bwa bukin tera e kan kaitiboo ma kaaro ni kabane te bitiobi.
Ngke a otinako man aia boowi, ti toka n te kaa ao ni buti nakon mwengara, ao a taku tinau ao tamau nakoiu, “E a tia n tuangira te bitiobi, ao ti a tia n tuangaki irouia taan kairiiri n te Ekaretia, n anganano te mwane ae riai ibukin kateakin te Washington D.C. Tembora.”
E aki bati n tau aia mwane au utu, ao taraan ae e na mwaiti te mwane ae a tia n tuangaki bwa a na anga. Ma a taku Tinau ao Tamau, “Ti na riai n anga tabeua bwaai ngaira ae te utu ibukin aei. Ma ko kona n iangoia bwa ti na rangi ni kakabwaiaaki n reken te tembora ae ti 900 te maire raroana mairoura?” E rangi n onoti inanou te tembora aei ao irouia au utu.
Unimwaane Neil L. Andersen: Kam rabwa. Tikiraoi. Kam rabwa, Kathy.
A kairiira nakon te Tia Kamaiu te burabeti ao te tembora. I nanon te aonaaba ae tabetabe, kamangaongao, ao ni katikitiki, te burabeti ao te tembora a kamatoaira nakon aan tamneira.
N tain mwaawan te aonaaba man aana n tamnei, e kanakoa mwaakana ni kabomwii te Uea nakoimi, Ana reirei. Uoua kakabwaia ni kabomwi aika a korakora ibukiia aika a raraoi bon aia reirei burabeti ao te bwaintituaraoi ae ana auti te Uea.
E a tia ni kawakinaki, katauraoaki ao ni wantongaaki raoi Beretitenti Dallin H. Oaks rinanon ae raka i aon ruaiua te ririki. N te maungatabu ni kabuta n te namwakaina ae nako, e taekina rawawatana ae korakora ngke 7 ana ririki, ngke e motirawa tamana. E kaikawaaki iroun tii tinana, ae te tia reirei n te tabo n reirei n aia tabo.
I nanon rikirakena, ana iango ma tamneina a rikirake n te aro ae tamaroa, ao e kariaiakaki rinna n teuana te kuura n reirei ae rietata ibukin te tua n te United States, te University i Chicago. E rangi n rianako n te aro are e a rineaki ngaia iroun te tia moti ae rietata n Ana Auti ni Kabowi te United States, te Tia Moti Earl Warren, are e taua te nakoa ae te kabanea n rietata n aobitin te kabowi i aon te aba ni kabane, bwa ana tia ibuobuoki ao ana kiraaka.
E moanaki ikai te kawai nakon te ateinimwaane ae wanawana aei ao reken te nakoa ae bubura irouna n te aonaaba. E aki katikakinako nanon Beretitenti Oaks man ana babaire te Uea man reken tamaroan te karekemwane irouna ao waakin te aonaaba.
Ma, e ririmwiin taian wirikiriki aika a maraara n kairakina i nanon maiuna iroun te Uea. E taku, “I nanon maiu, au tia reirei ni koaua bon te bwanaa ae maraara ao namakin ake a roko mairoun Tamnein te Uea.” Ngke 38 ana ririki, e aranaki bwa te beretitenti n te Kuura n Reirei ae Rietata ae Brigham Young.
I a tia n reiakinaki, ao n kairaki mairoun Beretitenti Oaks ao ana reirei ae raka i aon 50 te ririki maanna. Moan kaitiboou ma Beretitenti Oaks bon ngke I oki man au mition ao e riki ngaia ngkanne bwa te beretitenti n te BYU. E rangi ni tatangiraki anuana ao maiuna irouia ataein te reirei.
Aio te birim ae uarereke man ana tai ngkoa ngke e anga ana marooro n te ririki are I angabeebwa naba iai.
Beretitenti Dallin H. Oaks (1975): I nanon te ririki anne, I aki toki n kakawara te tabo n amwarake n ara kaawa n reirei, I anaa te turee, ao n unga n amwarake ma tabeman ataein te reirei aika a mimi n rokou. I kunea bwa aio te tai ae te kabanea n tamaroa ni kunea bwa tera raoi aia kantaninga ara ataei. N tain te fall tabeua te ririki n nako I tekateka ma tabeman ataeinimwaane n te taibora n te Cannon Center. I moana au titiraki nakon te kurubu teuana ibukin bwaai aika a tia n rinanona ao n nooria n te BYU, ao n aki moa kabwarabwaraai bwa antai ngai. N te tai ae tawe, temanna te kairake n ataeinimwaane ae tao e kakai nanona iroun te aomata ae aki kina ae rangi ni kau titiraki, e taku, “Ko mwakuri ikai ke tera ae ko karaoia?” Ngke I kaeka bwa I mwakuri, e tabeki tabeua ana titiraki: “Tera ae ko karaoia?” “Ngai te beretitenti,” I kaekaa. E reitianako n aki tabe ma boboana ni bubuani baia raona ake tabeman, “Ko beretitenti n tera?” I kabwarabwara raoi ao ti bane ni kaai ni ngare. Imwiina e taekina ana taeka ae N na bon aki kona ni mwaninga. “O,” e taku, “I kakaei taai ni ikoikotaki n te reirei ao I nonoriko ikekei, ma ko rangi n raroanako ao I aki nonora raoi ubum.”
Ngke e taekina aei te teteinimwaane ae boou aei, I kamatoa bwa n tabetai ao I kataia ni buokiia ataein te reirei bwa a na kinaa ubu. Te kamatoa anne e kakorakoraaki imwiina ngke I tuanga temanna ataein te reirei bwa ti na nako ni kaembing n angiin te tai ngai ma kainnabau ao natira, ao n tikunako ni matuu n ara auti ni kaembing i aon tano n uabwi ma nimaua taabo n ara ikoikotaki. E aki kakoauaa te bwai are I taekinna. “Ko bon kakaraoa annet?” e titiraki. “I aki kakoauaa ae kakaraoa ae aron anne te beretitenti.”
I a manga kauringaki riki, bwa a korakora tamaroan ao raroan te aobiti ao bwa ngai ma au utu ti taraa n aki aomata irouia aika a mwaiti. Natiu a namakina naba te raroa imwiin noorakiu irouia n tekateka mai moa ibukin au marooro are N anga. E taku temanna natiu mairouia uoman natiu ake a ikawai, “Tamau, ko taraa n ububu n un ao n aki kukurei. Ngke arona bwa ti aki kinako, ti na taku n ara iango bwa ko un.” E kauringai aei bwa bon ti raoraou ae I rangi ni kaan ma ngaia ae e a tia n ongo ngareu ao n ataia bwa I rangi ni maiuna te kukurei e ngae ngkana I rinanon taai ni karawawata. I tangiria ni katoka aio ngkai te tia reirei ngai ao e aki raoiroi iroun te tia reirei bwa e na taraa n teiraroa mairouia tabeman ao tiaki taraan te aomata raoi ngaia irouia. E rangi ni kakaawaki bwa kam na noora raoi ubuu, n aron ae I kataia n noori ubumii.
Unimwaane Neil L. Andersen: N tikura i BYU n tain waaki tabeua, I kona, n tabetai, n reitaki raoi ma ngaia. I noora ana onimaki ao arona ae tamaroa, mwamwannano, ao nanona ae bane irouia aomata. E kakaei, ngkana arona bwa e kona, aia bootaki ni mare ataein te kuura.
Aio ngaia ma Titita Jane Oaks n tain ara bootaki ni mare. Kakaongoraana, aio bon tii tabeua te wiiki imwain bungiakin natiia te kaonoman, ae te tia katanga te waioriin ae kinaaki Jenny Oaks Baker.
Imwiin kitanan BYU, I reiakinaki man ana marooro ao ana reirei. Ma 16 te ririki imwiina, n 1991, ngke ngaia kaain te Kooram n te Tengaun ma Uoman, e roko iaan katabeakina i Bordeaux, Buranti, te tabo are I beku iai bwa te beretitenti n te mition.
I nanon 32 te ririki ni mwakuri bwa te Mataniwi ni Kabuta, Ngai, n ai aroia taari mwaane, I kakabwaiaaki man nanona n reireiai, n ongora irou, ao n tibwa wanawanana ae riao ma ngai. Aio tamnein Beretitenti ao Titita Kristen Oaks ma Kathy ao ngai i Latin Amerika tabeua te ririki n nako.
I nanon 93 ana ririki ni maiu Beretitenti Oaks, e a tia n atai kororaoin mwioko aika bubura, n aron naba taai n rawawata ao n aki kukurei. I kinaa raoi ngke I mena n te Itingaun ao ngaia e mena n te Tengaun ma Uoman ngke e motirawa kainnabana, Titita June Oaks, 27 te ririki n nako. I noora marakina ao korakaina n namwakaina ake imwiina. Ni karinean June ae tangiraki irouna, e korea te boki ae rianako ibukin maiuna ao ana tangira ao ana ururing ibukina n tibwaia ma ana utu.
E kauka nanona uoua te ririki imwiina man uruakin nanona ao e kaitibo ma Titita Kristen MacMain. E a tia neiei ni uota te tangira ao te kimwareirei ae korakora nakon maiuna n te maan ae 25 te ririki ngkai. Kathy, ko kona n taekina tabeua rongorongon Titita Kristen Oaks?
Titita Kathy Andersen: I rangi ni kukurei n taekina tabeua taekan Sister Oaks. I tangira Titita Kristen Oaks. Ao ngkana ko tuai kina, ko na tangiria naba. E oki kainnabau tabeua te bong n nako, ao I taku, “Ko nora te witeo ae tamnein Beretitenti ao Titata Oaks?”
Ao ngaia—I aki ataia ngkana ko tuangai bwa ko a tia ke ko tuai—ma I taku, “Nooria, e rangi n tamaroa aio, ao a bon rangi n tangira aio kairake ni ikawai.” Ao e taku, “Nooria, a na bon bae ni kaman tia n nooria kairake ni ikawai.”
I taku, “E aoria. A na bon tangiria n manga nooria riki bukina I tangiria n tataraia ni katoa bong. E rangi n tamaroa.” Ngaia are e a kariaia.
Beretitenti Dallin H. Oaks: Kam tuangiia bwa a na karaoa aei?
Titita Kristen Oaks: I aki tuangiia bwa a na karaoia.
Beretitenti Dallin H. Oaks: N am koronririki, I tangiria ni karabwako ibukin kakukureiau iroum, karikai bwa te mwaane ae tamaroa riki, ao te tia kairiiri n te Ekaretia, ao riki te tibu, te tibutoru ao te tibu mwamwanu ae tamaroa riki. Iai 29 tibura ao 75 tibutorura ao uoman—iaon kawaina n reke bwa teniman—tibu mwamwanura. Ao aio te aine, n ana ririki ae 28, e tararua te mwaiti n aomata.
Titita Kristen Oaks: Ao bon te kakabwaia nakoiu. N au iango ao te kabanea n tamaroa ni bwai ibukiu bon reken au utu, ao n iai ara utu ae ikoikotaki, ao n riki bwa kainnabam.
Beretitenti Dallin H. Oaks: Ko rabwa.
Titita Kristen Oaks: I tutuanga n taainako bwa bon te aomata ae mamaten nanou ngaia n te aonaaba ae bwanin.
Beretitenti Dallin H. Oaks: Ao ngaia bon raou.
Titita Kathy Andersen: Kam aki ngkanne tangira anne? E aki rangi n tamaroa anne? Bon ana reirei Iesu Kristo ae kakaonimaki Titita Kristen Oaks. E onrake maiuna n te onimaki ao te tangira. E akoi ao n nanoanga, ao I taku bwa bon ngaia te anera ae tamaroa i aon te aba.
Unimwaane Neil L. Andersen: I rangi ni kakaitau ngkai e a tia te Uea n kawakina Dallin Harris Oaks rinanon bwii n ririki aika a bati, n reireinna, buobuokia, ao n katauraoia ibukin maiuna ae ngkai.
Ngkekei i nanon maiuna, e na katea te taeka ae na ururinnga ae na kangai: ‘“Ma kam na ukoukora moa uean te Atua ma ana raoiroi; ao a na bane n raonaki baikai nako imi.”
E a tia ni karaoa aio n akean te kan taraaki nakon tamaroan ma kaubwain te aonaaba. E a tia te Uea n karaoa nanona ao e na kabonganaa n kaetii nanora nako ngkai e beku bwa a na burabeti te Atua i aon te aba.
N anganiko kinaakin ara burabeti, te korobanna mairoun Maynard Dixon ae tine n ana aobiti ae kaan 40 te ririki manna. E atuunaki n ae kangai Te Mwaane ae Mwanuokinaki.
E kaotaki tamnein te mwaane n te korobanna ae tekateka ma te bwarannano. I akuuna, a nakonako aomata, n akea ae kan tabeakinna.
E tangiria natin te Atua aika mwaane ao aine Beretitenti Oaks, ao e kakauringnga te korobanna aei bwa e na karoko nakoia ake a namakina te maroaa, ake a bwarananoia, ake a tangiria n ataa bonganaia, ao tangiran Tamaia are i Karawa.
E kaotia Beretitenti Oaks bwa ngkai e namakina te mwanuokinaki te mmwaane are n te korobanna, e ota mwaaka taai i aon atuuna, nanona e atai korakaina nako Tamara are i Karawa. E taku Beretitenti Oaks bwa e taetae te korobanna nakoina ao e kauringnga ni bwaai ake e riai n ururingnga. I tangira te nano ae iroun Beretitenti Dallin H. Oaks.
Ma ara kairake ni ikawai ikai i Washington D.C, ti marooroa teniua atuun rongorongo aika a kakaawaki are e taetae iai Beretitenti Oaks. Ma te moan, ti na butimwaea kaotan tangiran Beretitenti Oaks mairouia kairake ni ikawai ni katobibia te aonaaba.
Kurubu ni Kairake n Ikawai mai Hawaii: Aloha, Beretitenti ao Titita Oaks! Ti rangi ni kakaaitau ibukin ami banna ni katooto nakoira ao te Ekaretia. Ti tangiriko ao ti kamatoako.
Kairake n Ikawai mai Ogden, Utah: Mauri, mai Ogden, Utah. Beretitenti Oaks, ti rangi ni kakaaitau ibukin am reirei, riki te karietataki ibukin te utu. Ti tangiri ngkami, ao ti kamatoako.
Kairake n Ikawai ma Rom, Itare: Mauri, Beretitenti Oaks. Ti kanakoa ara tangiria mai Rome, Itare. Ti tangira am reirei ibukin te utu ae akea tokina, ao ti ingainga nakon rokom ikai n te Eternal City. Tia boo! Ti tangirii ngkami!
Unimwaane Neil L. Andersen: Atuun te marooro n te bong aei te moan, teei ibukin te koaua, kauoua, te utu, te mare, ao ataei, ao te kateniua, te kaotioti.