Te Mare, Utu, ao Ataei
Unimwaane Neil L. Andersen: A riingaki nanora n ana rongorongo Beretitenti Oaks n tain te maungatabu ni kabuta ae nako. E taetae ma te mwaaka ae korakora ibukin te utu, te mare, ao ataei. Kam uringnga ngke e kangai, ”Ana Ekaretia Iesu Kristo e kinaaki n tabetai bwa te ekaretia ae boboto iaon te utu. Nngaia anne!” Ti a matakuakina te witeo ae uarereke aei ao ara marooro ma kairake ni ikawai.
Beretitenti Dallin H. Oaks (2025): Reitakira ma te Atua ao aron maiura aikai a kabwarabwaraaki n kainetaki ma te utu. … E bon rang kakawaki bwa Aika Itiaki n Boong aika Kaitira e na aki bua mai i rouia atakin kakawakin te mare ao kakawakiia naati. Anne kanoan boong aika i mwaaira ae ti uaiakin.
E boboto i aon te utu ana reirei Ana Ekaretia Iesu Kristo Ibukiia Aomata Aika Itiaki n Boong Aika Kaitira.
Beretitenti Dallin H. Oaks (2023): Te mare bon ngaia boton te kaantaninga n te maiu aei ao imwiina. Ngaira natin Tamara are i Karawa ae tatangira are e karikiira bwa ti na kawakina Ana tua ni karikaia natina ao kaonan te aonaaba. Te mwaaka ni kariki aomata bon teuana te bwai n tituaraoi ae rangi ni kakawaki ae reke iroura n te maiu aei. Ma ae kakawaki nakon te bwai n tituaraoi anne bon tuan te itiaki, te tua bwa mwakara ni kariki aomata e na karaoaki ti i nanon te mare i marenan te mwaane ao te aine. …
Iangoia bwa tera ae bua irouia kairake ni ikawai ni Boong aikai ngkai a rimwi aia mare n te tai ae abwaabwaki: a kabuai tibwangaia ae rang kakawaki ao n tataoni kakabwaia. Nanon aei bwa taonakin rikiraken temanna ae kakawaki are e riki n te reitaki imarenan te mwaane ao te aine, te buu te mwaane ao te buu te aine, rikirake n aroaro aika a rianako n aron te anganano ao te nanorinano. Are nanona bwa e kerikaaki te tai ae kakawaki ibukin katean abanuean te Atua. E rang kakawaki riki, are nanona bwa a karako ataei ake a bungiaki ao n ikawairake ma kakabwaia man te euangkerio.
Uringnga, iai ana babaire Tamare are i Karawa ae tatangira ibukimi Kairake ni ikawai, ao mwakoron te babaire anne bon te mare ao karikaia ataei.
Unimwaane Neil L. Andersen: Ko kona ni kakoaua tamaroan taraan te tabo aei ae te Washington D.C. Tembora? Ao ti mena ikai n marooroa taekan te utu, ibukin te mare, ao ibukiia ataei.
Ao iai irarikira Max ao Nicole, aika taanga. Ao iai irarikira mai ikai Chris ao Lindsay, aika taanga naba. Tera ae roko n am iango ngke ko ongo ana taetae Beretitenti Oaks n te maungatabu ni kabuta ae nako?
Max: I rangi ni kakaaitau ibukin Beretitenti Oaks ao ana reirei ibukin kakaawakin te utu. I bon irou ma Nicole, mareakiu ma Nicole bon teuana te kakabwaia n rinerine i nanon maiu. Ao riki, reken ara utu. Iai natira te mmwaane ae teniua ana ririki ae Enoch.
Nicole: I rangi ni kakaaitau ibukin aia reirei burabeti ao abotoro ibukin kakaawakin te utu. I taku bwa i nanon ara bong nako, e kona ni kangaanga ni kataia bwa a kanga aron taraan maiura ma ara mwakuri ao ara utu. I ataia irou, I ataia bwa I kan karekea au beebwa n reirei, te degree, ao I tangiria naba ni katea au utu. Ao karaoan kawain akanne ni kauoua a bon aki rangi ni matata nakoiu. Ma I kabanea te tai ae bati ma Max n aki mamatam ao n tataro ao n nanakon te tembora n reiakina aron kabaerantan bwaai aika uoua aikai. Ao ti namakina te wirikiriki bwa ngkana ti karimoaa ara utu, a na bane ni mwakuri bwaai ake i imwina.
Ao ti aki atai n tabetai kanoan te namwakaina teuana nakon teuana n aron waakin bwaai, ma a bon mwakuri. Ao iai au koaua ae matoatoa n kakaawakin te utu ao kamoanibwaiaan te utu.
Unimwaane Neil L. Andersen: Ngkai, Lindsay, tuangiira aron mareakim ma Chris.
Lindsay: Ti mareaki n te tembora aio. Ao karekean kabaeakiu ma Chris, bon te kakabwaia ae korakora mareakiu ma te aomata ae tamaroa man kakateke ae Chris ao n ataia bwa ti kaai ni boo nanora iai, ma tiaki ti ngaira uoman, bwa te utu ngaira ao ti kabotoira iroun Kristo, ao kangaanga ake a roko n kawaira, n aron kabwaraan ara taarau n te reirei ke ni karekean arora n te mwakuri, ti bon ataia bwa ti na kaai ni karaoia ma Kristo i rarikira.
Chris: Tao ti mareaki ngke ti a ikawai, ma I taku bwa e aki matebuaka kataakina. I taku bwa iai ana tai te Uea ibukin bwaai ni kabane, ao I taku bwa ngaira ni kauoman ti kakaonimaki ao n nanomatoa bwa iai ana babaire te Uea i bukira. Ao ngkana ti kawakina Ana tua ni koaua, a na bon roko ara tai n te tai teuana.
Unimwaane Neil L. Andersen: Iai ikai Ethan, Joy, Olivia, Zach, Sameeta, Lindsey, ao Kelson. Ao ti na marorooa teutana taekan teniua taeka aikai: te utu, te mare, ao ataei.
Kelson: I taku bwa a mwaiti aomata ake a kakaokoro aroia n aia utu. Ao I namakinna te kakabwaia ngkai I a tia n anganaki au utu are e a tia n anganai te kaetieti, kairiiri aika a mwaiti, oin bukina, te kikina, ao namakinan te mano.
I tangiria n uringi kakabwaia ake I a tia ni karekei ngkai ngai kaain te utu, ao n nooriia tariu ao mwaaneu ao aia utu, ao aron tamaroan te utu. I ataia aomata aika a mwaiti. I ataia bwa akea te utu ae kororaoi, ma a mwaiti—ngkana ko katoonga te kimwareirei ae kona n reke n te utu, e kona n kaunga nanom n tangiria naba.
Sameeta: I tuai mare, ma I rangi ni ingainga nakon te mare n te tembora. I ataia bwa e kakaawaki te mare n ana babaire te Atua, ao e reireia naba te euangkerio—e kakabwaiaira ao ni karietataira n akea tokina. N tabetai ti tangirii bwaai bwa a na mwakuri raoi, ma a aki.
Ma te bwai ae I a tia n reiakinna ni maiu bwa ko na onimakina ana tai te Atua. Ao I ataia bwa iai Ana babaire ibukira ngaira nako, ao E kinaira ao e tangiriira n tatabemaniira. Ao tao e na maanra te tai iai, ti onimakinna.
Ao te kauoua ni bwai ae I a tia n reiakinna bon katauraoau n tamnei ao i bon irou. Katauraoi nakon te mare ae akea tokina e aki moanaki ngke ko kunea toam. Ko kona ni moana mwanangam ngkai.
Unimwaane Neil L. Andersen: Ngkai, Joy, I taku bwa e tamaroa iroum ngkai I taekina aio. Ko kaaina te Ekaretia tabeua te ririki n nako imwiin rinanon am mare ae kananokawaki. E kanga ngkai am taratara i aon te utu, ao te mare ngkai? Ko tei iaa ngkai ngkoe kaain te Ekaretia?
Joy: Eng, I rangi n tangira are e taekinna Beretitenti Oaks nakoia aomata, ao I karekea ataakin are aki kakukurei ni kabane kanoan te waaki. Ao I rangi n tangira arona n taetae nakoia tiina, bukina te tina ngai man au mare arei ao iai natiu te mwaane ae uarereke ae aua ana ririki.
Ao I tangira aron are e taekinna, are ngkana ko tuai mare ngkai, ko kona n reireia natim bwa a na taraa te kakabwaia man te utu ao te kabaeaki n te tembora. I namakinna bwa e bon noorai ao n taekinna nakoia aomata n aro nako, n ai aroia tiina ake aki mare.
Unimwaane Neil L. Andersen: E tamaroa aron taekinana anne.
Ethan: Teuana te bwai ae taekinna Beretitenti Oaks ngkoa n te bootaki n taromauri n te BYU bwa ko aki kona ni kairoroi bwaai aika a tabu. Ao I wareka te taeka anne ao n rootaki iai ibukina bwa ti tangira te mare n te tamnei, ti tangira te utu n tamnei. Ti tangira te utu ae boboto i aon Kristo. Ti tangira toara ae iai ana onimaki bwa ti kona ni beku, bwa ti kona ni boutoka. Ao e ti kuneaki anne ngkana ti kabanei maiura i aon Iesu Kristo. Ao n tabetai I iangoia bwa iai te un ao te maraki n nano ngke ti kairake riki, ko ataia, bwa, “Oo, ngke ngkai I karaoa te bwai aio,” ke bwaai riki tabeua, ke tera riki. Ao ni koauana, ko aki kona ni kairoroi bwaai n tamnei.
Unimwaane Neil L. Andersen: I tangira are ko taekinna. N na kaewenakoko riki teutana. Ko aki kona ni kairoroi bwaai n tamnei, ma ko kona ni karekea riki te reitaki ma ataeinaine. Ko kangaa n karaoa anne?
Ethan: Eng, Ko ataia, a bati aanga ni karaoa anne. Ko ataia, n taai nako ao I kataia ni karekea ae Nna itaramata ma temanna. Tao teuana te app ke uoua. Ma ni koauana, I taku bwa te bwai ae moan te kakaawaki ae ko na ota iai bwa ara konabwai ni kataa te bwai teuana bon te bwai teuana ae kakawaki bwa e na iai iroura.
Ninikoriam ni kaotiko bwa antai ngkoe ao karekean te nanomatoa n taekina ae kaangai, ko ataia, Ngai natin te Atua, a bati tamaroau aika a na kona n kakukureiko. N na nako ao n kabwarabwaraai nakon temanna ao ni kinaiia ao n reiakina aroia ao n reiakinna riki bwa antai ngaiia, ao tera ae a kakoauaa ao tera ae a wakinna ni maiuiia. Ngke ko ukora aron te aomata temanna, ko kona n reiakina ae bati riki ibukim.
Unimwaane Neil L. Andersen: Olivia. Ngkana ko taratara temanna ae ko na konaa ni mareia, tera ngkoe ae ko taraia?
Olivia: I taku bwa te moan ao ae kakaawaki, I ukora temanna ae kawakina ana berita.
Unimwaane Neil L. Andersen: Zach, ko ataa te bwai are e kaokioka taekana Beretitenti Oaks bon te katanoata iaon te utu. Tera am namakin iaon tuua aika a kaokoro inanona? Ko a tia ni bon iangoi raoi n taai aikai?
Zach: I taku bwa iai uoua au iango. Te moan e bon kona ni kangaanga te ongoraa nakoia taan kairiiri n te Ekaretia ke ni wareka te katanoata iaon te utu ao n noria bwa maiu tao e na aki rinanon aikai n te tai aei, ao anne e na kona ni kangaanga. Ma ngkai tao e kangaanga ke ni matoatoa bon tiaki nanona bwa e aki eti ke koaua. Ao te kauoua ni iango, ngkai ti ongora n te witeo, e taekinna Beretitenti Oaks bwa te rikirake ae korakora e roko man te mare ao te reitaki n te mare, ao ataakina bwa e koaua—kakoauaa, n onimaki bwa e koaua—e aki anganai te inaomata, ngkai te aomata ae I tuai mareaki, man kabotoan au taratara iaon te berita are I a tia ni karaoi ao ni kataia n rikirake n anuan Kristo ni kawai nako are I konaa.
Unimwaane Neil L. Andersen: Ngaia raoi anne. Kam rabwa ibukin te nonori ae tamaroa.
E kona n reke riki teuana kaotan te tangira ibukin Beretitenti Oaks imwaain ae ti nakon ara kateniua n bwai?
Kairake n Ikawai mai Tonga: Ti tataro ibukim man te aba ae tamaroa ae Tonga.
Kairake n Ikawai mai Korea: Ti kanakoa ara tangira mai Korea! Ti tangiriko, Beretitenti Oaks!
Kairake n Ikawai mai Brigham Young Uniersity-Idaho: Bon ara kakaaitau ni kamatoako bwa te Burabeti n te Ekaretia n te tai ni kairiiri ae boou n te Ekaretia, Beretitenti Oaks. Ti ingainga n iriiriko ao ti kukurei ni boutokaiko ngaira aika kairake ni ikawai ni kabuta te aonaaba.