Faaaliga

Elder Neil L. Andersen: O le tatou mataupu lona tolu o faaaliga. O se mataupu e le gata ina saunoa ai Peresitene Oaks ae soifua ai foi. Pei ona ou ta’ua muamua, na ia saunoa mai, “I lo’u olaga atoa o lo’u faiaoga muamua ma le sili, o le leo filemu itiiti lea ma lagona na fesootai mai e ala i le Agaga o le Alii.”

I se lauga mamana na tuuina mai i le 1992, na ia faamatala ai se aafiaga na lamatia ai le ola, lea na laveaiina ai o ia ma se taulealea mai se mala patino, e le taitaiga mai le Agaga Paia. Sa nofo o ia i Chicago. I le mae’a ai o se fonotaga faaleEkalesia, sa latou tietie atu ai ma Sister Oaks ma se tuafafine o le uarota, sa nofo i se vaega matautia o Chicago. Sa fesoasoani o ia e ave le tuafafine i luma o lona faitotoa.

A o toefoi atu i le taavale, sa oso faafuasei mai se taulealea ma lana fana i lona lima, ma tuu atu i le puimanava o Elder Oaks. Sa fesili o ia mo ana tupe, ma le fana ua sunui atu i lona manava, ma i le mae’a ai o fetalia’iga lilivau, sa ta’ua e Elder Oaks se pasi na latalata atu ma sa oo mai ia te ia le musumusuga lenei. Tatou matamata.

Peresitene Dallin H. Oaks (1992): Ao tupu lenei mea i tua o le taulealea faomea, na oo ina meia o ia ma ua faalavelaveina. Na sipa ese lana fana mai lo’u manava ma faasaga teisi ese le gutu i lo’u itu agavale. Ua sii a’e teisi lo’u lima i luga, ma faatasi ai ma se gaoioiga vave e mafai ai ona ou se’ia le fana ma ma’ua tauivi ai e aunoa ma le pa o le fana. Ou te umī ma mamafa atu i lo le taulealea, ma o le taimi lena o lo’u olaga sa ou tinolelei. Sa leai so’u masalosalo e mafai ona ou manumalo i se tauiviga vave pe a mafai ona ou aveesea le fana mai le tauiviga.

I le taimi o le a fai ai la’u gaoioiga, sa ou maua se aafiaga tulagaese. Ou te lei vaai pe faalogo i se mea, ae na ou iloaina se mea. Na ou iloa le mea o le a tupu pe afai ou te aapa atu i lena fana. O le a ma tauivi, ma o le a ou faaū atu le fana i le fatafata o lena alii talavou. O le a pa, ma o le a oti ai o ia. Sa ou iloaina foi e le tatau ona i ai le toto o lena alii talavou i lo’u mafaufau i lo’u olaga atoa.

Sa ou to’a, ma a o aluese atu le pasi, sa ou mulimuli i se uunaiga e tuu lo’u lima taumatau i luga o lona tauau ma fai sona aoaoga. Sa i ai le ma fanau talavou ma June i le taimi lena, ma o le tuuina atu la o ni aoaoga na faigofie ona oo mai.

“Vaai oe,” na ou fai atu ai, “e le sa’o lenei mea. E le o sa’o lau mea o loo fai. O le isi taavale atonu o se leoleo, ma e ono fasiotia oe pe tuu i le falepuipui ona o lenei mea.”

Faatasi ma le fana ua toe tuu i lo’u manava, sa tali mai le taulealea i la’u aoaoga i lona toe faasoloa foi o ana faatonuga mo le taimi lona tolu. Ae o le taimi la lea ua faiifo lona leo. Ina ua ia tuu mai lana faamata’u mulimuli e fasioti a’u, sa lei faatauanau. Ina ua ou toe musu, sa ia faatalitali mo sina taimi, ona sulu lea o le fana i lana taga ma solaese. Sa tatala e June le faitotoa, ma ma o ese loa, ma fai se tatalo o le faafetai.

Elder Neil L. Andersen ma le Autalavou Matutua: Ma ua matou i ai iinei ma Joy, Lindsey, Nicole, ma Max. Ma o loo tatou talanoa e uiga i faaaliga. Ua tou faalogo ia Peresitene Oaks i lena mea na tupu. Fai mai a ia, “Ou te lei vaai i se mea. Ou te lei faalogo i se mea, ae sa ou iloaina se mea.” E iai se tasi o outou na oo i se mea faapena muamua po o se mea talitutusa?

Nicole: O le mea ua oo mai i le mafaufau o le faaiuga e filifili e fai se aiga. Ou te manatu sa tele ni tatalo sa fai ai ma se mau anapogi mo a’u. Sa ou manao e aumaia fanau i le lalolagi. Ou te lei iloa tonu pe o le a faapefea ona lelei mea uma, ma ou te manatua le aveina o o’u manao i le Alii, ma faailoa ia te Ia sa ou manao e fai sa’u fanau.

Ma o se manao lena sa iai i lo’u loto. Sa faatele ona ou lagonaina le filemu tele mai le Atua o loo Ia silafia lo’u loto, na Ia silafia mea na ou lagonaina, na Ia silafia o’u manao, ma o se manao alagatatau.

Elder Neil L. Andersen: Olivia, se a se mea e te faamatala mai ia i matou?

Olivia: Ou te manatu o taimi o faaaliga na ou maua e sili ona lalata i lo’u loto o totonu o le malumalu, ma ou te matua le malamalama lava i mea uma i le faaeega paia. Ou te manatu—nai lo le malamalama moni i itu uma o le faaeega paia, a o se malamalama po o se lagona o loo iai Iesu Keriso iina i le sauniga, o iai iina le atoaga o Lana perisitua, ma o Ia o loo faapaiaina a’u ma faatagaina a’u ia lagona lena malamalama.

O le viiga ou te fiafia i ai o le “My Shepherd Will Supply My Need.” Fai mai le fuaiupu mulimuli, “Ua le toe tagataese po o se malo, a o se tamaitiiti i le aiga.” Ua ou iloa foi o i tatou o ni malo i le malumalu. Ae ua ou malamalama moni i lagona o le avea o se tamaitiiti i le aiga. A o ou nofo i totonu o le malumalu ma taumafai e talanoa ma le Atua.

Elder Neil L. Andersen: Manaia.