Tu Atu mo le Mea Moni

Elder Neil L. Andersen: Tatou amata i le tutu atu mo le mea moni. Pei ona outou iloa, i le faalogologo atu ia Peresitene Oaks i le aluga o tausaga, e le fefe o ia e tautala ma le alofa i le mea moni. Ou te faamemelo i lona lototoa. E agalelei lava o ia ma e faautauta i ana saunoaga, ae e tuusao lava lona fesoasoani ia i tatou ia iloa le mea tonu.

Matamata le tatou kilipi muamua e tasi le minute mai ia Peresitene Oaks, ona sosoo lea ma le tatou talanoaga ma nisi o talavou matutua o tatou faatasi iinei.

Peresitene Dallin H. Oaks (2024): Sa faamatala mai e Peresitene Dallin H. Oaks: “O le mulimuli ia Keriso e le o se faiga faasamasamanoa pe na o nisi taimi e fai ai. O se tautinoga faifaipea ma o se ala o le olaga lea e tatau ona taialaina ai i tatou i taimi uma ma i nofoaga uma. O Ana aoaoga ma Lana faataitaiga ua maioio ai le ala mo soo uma o Iesu Keriso.

Peresitene Dallin H. Oaks (2022): Ua tatou ola i taimi faigata, i le taimi ua ta’ua ai mea leaga o mea lelei, ae ta’ua mea lelei o mea leaga. E tatau ona tatou tutu mausali e faasagatau i mea ma faiga e tata’iese ai i tatou mai aoaoga a le Alii ma a tatou feagaiga, avanoa paia, ma matafaioi. E mafai ona tatou faia lenei mea ma le alofa.

Peresitene Dallin H. Oaks (2023): Ona faamanatu mai lea e Peresitene Oaks e mafai lava ona tatou alolofa i isi ma maua tulaga e tutusa ai e aunoa ma le taufetu’una’ia o upumoni ua tatou iloa.

Elder Neil L. Andersen: E te talitonu i lenei nofoaga matagofie? Ma o le a tatou talanoa e uiga i le tutu atu mo le mea moni.

Ua matou faatasi iinei ma ni talavou matutua ofoofogia mai iinei i le eria a Uosigitone D.C. O Zach, Sameeta; o Joy; ma Ethan. Ma o le a matou talanoa teisi e uiga i mea faatoa tatou vaaia i aoaoga a Peresitene Oaks.

O le a se mea na oo atu i lou mafaufau ina ua tatou faalogo i ana upu? O ai e manao e amata?

Ethan: E pei o se filifiliga mataala le faapea atu, “O le a avea a’u o se soo o Keriso. O le a ou filifilia Keriso tusa lava pe faigata, pe tusa foi pe o faalavelaveina a’u i o’u tulaga. Ou te iloa e mafai ona ia faatoilaloina lena mea ma fesoasoani ia te au.”

Zach: Mo a’u, e mafai ona faigata tele atu le filifili o Keriso pe a leai se isi o tilotilo mai. Ma e tatau ona ou filima’otia mo a’u lava pe faapefea ona ou faatumuina le taimi pe filifili e avea ma soo o Iesu Keriso i lena taimi?

Elder Neil L. Andersen: Ua tatou faatasi nei ma Chris, Olivia; o Lindsey, ma Kelson. Ma ua matou naunau e faalogo i tou manatu i mea faatoa tou faalogo i ai mai ia Peresitene Oaks. Lindsey, o le a se mea na oo atu i lou mafaufau ina ua e faalogo i nei upu?

Lindsey: Ua ou iloa o le tu atu mo le mea moni o se mea e mafai ona faigata i lenei lalolagi, ae ua e iloa e le o tuua na o oe. Ua ia te oe le Agaga, ma ou te fia fai atu, afai e te ole atu mo le Agaga ia faatasi ma oe i nei tulaga ma’ale’ale, o le a mafai e Ia ona taiala oe ma avatu ia te oe upu e moomia ona e faasoa atu aua e le o tuua na o oe, o oe o se vaega o le galuega sili i le lalolagi, o le avea ma se soo o Keriso ma avea Mona sui.

Chris: Ou te manatu o se mea taua i le fasifuaitau “tutu atu mo le mea moni” o le mea moni e i ai lava faigata, ma o le mea lena e faigata ai ona tu atu mo le mea moni i nisi taimi. Ae ou te manatu o se mea ua fesoasoani ia te a’u e manatua ai poloaiga sili e lua, o le tasi ia alofa i le Atua, lea tatou te faaali i le mulimuli i poloaiga, ma le alofa i o tatou tuaoi. Ou te manatu foi o le ala sili e tu atu ai mo le mea moni o le fatuina o se siosiomaga e valaaulia ai le Agaga e molimau i mea o loo e talanoa ai. Ma o le ala sili e valaaulia ai le Agaga o le faaali atu o le alofa.

Elder Neil L. Andersen: A o lei talanoa i la tatou autu lona lua, e i ai se isi faailoaga o le alofa mai se isi itu o le lalolagi?

Autalavou Matutua mai Mozambique: O loo matou i ai i Munhahva, Mozambique. Matou te alolofa ia te oe, Peresitene Oaks.

Talavou Matutua mai le BYU: Matou te alolofa ia te oe, Peresitene Oaks. Matou te faafetai tele mo lau faataitaiga o le faatuatua i lou soifuaga atoa. Matou te alolofa ia te oe, Peresitene Oaks.

Autalavou Matutua mai Sepania: Talofa, Peresitene ma Sister Oaks! Matou te o mai Madrid, Sepania. Faafetai atu mo a oulua aoaoga. Alofa atu! Sogi!