Faaipoipoga, Aiga, ma Fanau

Elder Neil L. Andersen: Sa tatou matua ootia uma i le savali a Peresitene Oaks i le konafesi aoao talu ai nei. Sa ia saunoa ma le mana tele e uiga i le aiga, faaipoipoga, ma fanau. Tou te manatua ina ua ia saunoa, “O Le Ekalesia a Iesu Keriso ua lauiloa i nisi taimi o se ekalesia e faatotonugalemu i le aiga. “O lea lava!” Tatou matamata i le vitio puupuu lea ma le matou talanoaga ma talavou matutua.

Peresitene Dallin H. Oaks (2025): O la tatou sootaga i le Atua ma le faamoemoega o lo tatou olaga faaletino o loo faamalamalama mai i tulaga o le aiga. … E taua tele i le Au Paia o Aso e Gata Ai le aua nei aveesea lo latou malamalamaaga i le faamoemoega o le faaipoipoga ma le taua o fanau. O le lumanai lena tatou te tauivi agai i ai.

O le aoaoga faavae autu a Le Ekalesia a Iesu Keriso o le Au Paia o Aso e Gata Ai e totonugalemu i le aiga.

O i tatou o se ekalesia faaleaiga.

Peresitene Dallin H. Oaks (2023): O le faaipoipoga e totonugalemu i le faamoemoega o le olaga faitino ma mea o loo mulimuli mai ai. O i tatou o fanau a se Tama Faalelagi agaalofa o lē na foafoaina i tatou ma se mana e mulimuli ai i Lana uluai poloaiga ia fanafanau ma uluuluola ia tumu ai le lalolagi. O lena mana o le foafoaga o se tasi o meaalofa aupito faapelepele ua tatou maua i le olaga faitino. Ae ua totonugalemu i lena meaalofa le tulafono o le ola mama, o le poloaiga ia faaaoga o tatou mana o le foafoaga i na o totonu lava o le faaipoipoga i le va o se alii ma se tamaitai. …

Mafaufau po o a mea e misi e talavou matutua o le Au Paia o Aso e Gata Ai pe a faatuatuai ma le loto i ai a latou faaipoipoga mo se taimi umi: o avanoa e le toe maua ma faamanuiaga tolopoina. O lona uiga o le faatuatuai i le tuputupu a’e taua faaletagata lava ia lea e tula’i mai i sootaga i le va o se alii ma se tamaitai, se tane ma se avā, tuputupu a’e i na ituaiga o uiga auaumama o se osigataulaga ma le lotomaualalo. O lona uiga o avanoa faaitiitia e galulue faatasi ai e fausia le malo o le Atua. Ma o le mea sili ona taua, o lona uiga ua laiti tamaiti e fananau mai e tuputupu ae faatasi ma faamanuiaga o le talalelei.

Tau ina manatua, o loo i ai se fuafuaga a se Tama Faalelagi alofa mo Ana talavou matutua, ma o se vaega o lena fuafuaga o le faaipoipoga ma fanau.

Elder Neil L. Andersen: E mafai ona e talitonu i lenei nofoaga matagofie tele ua i ai tonu i le vaaiga matilatila o le Malumalu o Uosigitone D.C? Ma ua tatou i ai iinei e talanoa e uiga i aiga, faaipoipoga, ma fanau.

Ua tatou faatasi ma Max ma Nicole, ua faaipoipo. Ua tatou faatasi foi i lenei itu ma Chris ma Lindsay, ia ua faaipoipo foi. Se a se mea na e mafaufau i ai ina ua e faalogo o saunoa Peresitene Oaks i le konafesi aoao ua te’a atu?

Max: Ou te faafetai lava mo Peresitene Oaks ma lana aoaoga i le taua o le aiga. Ou te manatu lava a’u ma mo Nicole foi, o le faaipoipo atu ia Nicole o se tasi o faamanuiaga silisili i lo’u olaga. Ma le iai foi o se aiga. E iai lo ma atalii e tolu tausaga, o Enoch.

Nicole: Ou te faafetai lava mo aoaoga a perofeta ma aposetolo e uiga i le taua o le aiga. Ou te manatu e mafai ona faigata mai lea aso i lea aso ona taumafai e fuafua pe o a foliga o o tatou olaga i galuega ma le fai o se aiga. Mo a’u lava ia, sa ou manao e tulimatai ni faailoga maualuluga, ma sa ou manao foi e fai se aiga. Ma o le ala e faia ai na mea uma sa le o se ala sa’o noa mo a’u. E tele taimi na ma faaaluina ma Max e anapopogi ma tatalo ai, ma o i le malumalu e taumafai ia iloa le ala e faapaleni ai na mea e lua. Ma sa uunaia i ma’ua a ma faamuamua le aiga, o le a lelei mea uma.

Ma te lei iloaina i nisi taimi i lea masina i lea masina pe o le a lelei faapefea, ae na lelei lava. Ma e iai la’u molimau malosi i le taua o le aiga ma le faamuamua o le aiga.

Elder Neil L. Andersen: O lea, Lindsay, ta’u mai ia i maua e uiga i le faaipoipo atu ia Chris.

Lindsay: Na ma faaipoipo i le malumalu lea iinei lava. Ma tau lava ina mafai ona faamau atu ia Chris, o se tagata maoae ma agaalofa, o se faamanuiaga sili le iloa sa ma lotofaatasi, ma e le na o i ma’ua, ae o se aiga sa taulai ia Keriso, ma po o a lava luitau e oo mai, pe o le totogiina o nonogatupe o le aoga po o le faavaeina o ni matātā, sa na ona ma iloa lava o le a matou faia faatasi lava ma Keriso.

Chris: Atonu na ma faaipoipo ua matutua atu, ae ou te manatu e le ona o le le lava o se taumafaiga. Ou te manatu o loo iai i le Alii se taimi mo mea uma, ou te manatu foi sa ma taufai faamaoni ma mautinoa sa iai se fuafuaga a le Alii mo i ma’ua. Ma afai ma te filiga i le tausiga o Ana poloaiga, o le a oo lava ina oo mai lo ma’ua taimi.

Elder Neil L. Andersen: Ua tatou faatasi ma Ethan, Joy, Olivia, Zach, Sameeta, Lindsey, ma Kelson. Ma o le a tatou talanoa teisi i upu nei e tolu: aiga, faaipoipoga, fanau.

Kelson: Te manatu e toatele tagata o i ai ni tulaga eseese o aiga. Ua ou lagona lava le faamanuiaina i le i ai o se aiga ua tuu mai ai le taiala tele mo au, le tele o taitaiga, faamoemoega, faasinomaga, ma se lagona o le saogalemu.

Ou te fia tomanatu i faamanuiaga uma ua ou mauaina i le avea ai o se vaega o se aiga, ma le vaai atu i o’u uso ma tuafafine ma o latou aiga, ma le matagofie e mafai ona i ai le olaga faaleaiga. E toatele tagata ua ou iloa. Ou te iloa e leai se aiga e atoatoa, ae e tele—e te tofo loa i le olioli lea e mafai ona i ai i se aiga, e mafai ona faaosofia oe ia e manao foi i ai.

Sameeta: Ou te lei faaipoipo lava, ae ua ou sagisagi atu i se faaipoipoga i le malumalu. Ou te iloa e taua le faaipoipoga i le fuafuaga a le Atua, ma o loo aoao mai le talalelei lava ia—tatou te manuia ai ma faaeaina i tatou e faavavau. O nisi taimi tatou te mananao i mea ia lelei, ae e leai.

Ae o se mea ua ou aoaoina i lo’u olaga o le faatuatua i le taimi a le Atua. Ua ou iloa e i ai Lana fuafuaga mo i tatou taitoatasi, ma Na Te silafia i tatou ma alofa ia i tatou taitoatasi. Po o le a foi le umi, tau lava o le talitonu ia te Ia.

Ma o le mea lona lua na ou aoaoina o le tapena o au lava ia faaleagaga. O le saunia mo se faaipoipoga faavavau, e le amataina pe a maua sau soa. E mafai ona e amata nei lau lava malaga patino.

Elder Neil L. Andersen: Joy, faamoemoe e le afaina ia te oe lo’u ta’ua o lenei mea. Na e auai i le Ekalesia i nai tausaga talu ai, i le mavae ai o sau faaipoipoga faanoanoa. O le a sau vaaiga i le aiga, ma le faaipoipoga i le taimi nei? O fea o e tu ai nei o se tagata o le Ekalesia?

Joy: Ou te fiafia lava i le auala na saunoa mai ai Peresitene Oaks i tagata uma, ma lona faailoa mai e le o tulaga uma e fiafia. Ese foi lo’u fiafia i le ala na ia saunoa mai ai i tina, aua o a’u o se tina mai lena faaipoipoga ma e i ai so’u atalii e fa tausaga.

Ou te fiafia i lana tala faapea, tusa lava pe e te le o faaipoipo i le taimi nei, e mafai lava ona e aoao lau fanau e vaavaai i faamanuiaga o le aiga ma faamauina i le malumalu. Ua ou lagona e pei o iloa mai e ia a’u ao ia saunoa i tagata e iai tulaga e le masani ai, po o tina e lei faaipoipo.

Elder Neil L. Andersen: Matagofie lau faamatalaga.

Ethan: O se tasi o mea na saunoa muamua ai Peresitene Oaks i se faigalotu a le BYU, e faapea e le mafai ona e faamalosia mea faaleagaga. Ma sa ou faitauina lena laina ma sa matua aafia ai lava a’u ona tatou te mananao i se faaipoipoga faaleagaga, tatou te mananao i se aiga faaleagaga. Tatou te mananao i se aiga e faaogatotonu ia Keriso. Tatou te mananao i se soa e faatuatua e mafai ona ma auauna atu, e mafai ona ma lagolago atu. Ma e maua i le na ona taulai o o tatou olaga ia Iesu Keriso. Ou te manatu foi o nisi taimi e i ai le faagaulemalie a o tatou laiti teisi, pe faapea, “Oi semanu e mafai ona ou faatupuina le mea lea,” po o le a lava. Ma o le mea moni, e le mafai ona e faamalosia mea faaleagaga.

Elder Neil L. Andersen: Ou te fiafia i mea o loo e fai mai ai. Se’i ou lu’ia teisi oe ii. E le mafai ona e faamalosia mea faaleagaga, ae e mafai ona e valaaulia ni fegalegaleaiga se tele ma tamaitai talavou. O faapefea oe i lena mea?

Ethan: Ia, e te silafia, e tele ituaiga metotia. Ou te taumafaia i taimi uma le vaai atu i le isi itu o le potu. Atonu o se polokalama [app] e tasi pe lua. Ae o le mea moni, ou te manatu e sili ona taua le malamalama o le tulimataiga o le mea aupito taua lea e mafai ona tatou maua.

O le tuu o oe lava iina, ma le mautinoa o le fai atu, o au o se atalii o le Atua, e tele mea lelei e mafai ona ou faia mo oe. O le a ou alu ma faailoa atu a’u lava i se tasi ma tau ina aoao e uiga ia i latou, ma aoao atili pe o ai i latou ma mea latou te talitonu i ai ma mea o latou faia i o latou olaga. A o e faia e uiga i le isi tagata, o le a mafai ai ona aoao atili e uiga ia te oe lava.

Elder Neil L. Andersen:: Olivia A o e tilotilo atu i se tasi e te ono faaipoipo i ai, o a mea e te vaavaai i ai?

Olivia: Ou te manatu o le mea muamua ma le sili, ou te vaavaai mo se tasi e tausia a latou feagaiga.

Elder Neil L. Andersen: Zach, e te iloa se mea na saunoa i ai Peresitene Oaks e uiga i sina vaega o le folafolaga i le aiga. O le a sou lagona e uiga i mataupu faavae eseese o i ai iina? Ma pe na e mafaufau i ai talu ai nei?

Zach: Ou te matea e lua o’u manatu. Ma o le numera tasi e mafai ona faigata ona faalogo i taitai o le Ekalesia pe faitau foi i le folafolaga i le aiga ma vaai po o fea atonu e le mafai ona fuaina ai lo’u olaga i lenei taimi, ma e mafai ona faigata tele lena mea. Ae ona e faigata pe le gafatia e le faapea ai e le moni pe o se upumoni. Ma ou te matea o le manatu lona lua, a o tatou faalogologo i le vitio, sa ta’ua ai e Peresitene Oaks e faapea, o le tuputupu ae silisili e oo mai i le faaipoipoga ma le sootaga faalefaaipoipoga, ma le iloaina e moni lena mea—talitonu, talitonu e moni lena mea—e le o se ‘alofaga lea ia te au, i le avea ai ma se tagata e lei faaipoipo, mai le taulai atu i feagaiga ua ou osia ma taumafai e tuputupu ae atili e faapei o Keriso i auala uma ou te mafaia.

Elder Neil L. Andersen: Sa’o lelei. Faafetai mo lena manatu matagofie.

E mafai lava ona fai se tatou faailoaga mulimuli o le alofa mo Peresitene Oaks a o lei talanoaina le tatou mataupu lona tolu?

Talavou Matutua mai Toga: O loo matou tatalo mo oe mai motu matagofie o Toga.

Autalavou Matutua mai Korea: Auina atu o le alofa mai Korea! Matou te alolofa ia te oe, Peresitene Oaks!

Talavou Matutua mai le Iunivesite o Polika Iaga–Idaho: O so matou avanoa e le laumaua le lagolago o oe o le Perofeta o le Ekalesia i le isi vaitau o lau taitaiga o le Ekalesia, Peresitene Oaks. Ua matou sagisagi fiafia atu e mulimuli ia te oe ma lagolago oe o ni talavou matutua i le lalolagi atoa.