Saunoaga Amata

Ese le ofoofogia, matagofie, ma maoae. Ma ou te manatu i ai i i tonu, o i ai le ata matagofie o le Faaola, le Christus, ma ou te iloa o loo faaloaloa atu Ona aao ia te outou. Faafetai atu foi mo le faailoaga matagofie o le alofa mo le Faaola. Faafetai, faafetai tele lava.

Ou uso e ma tuafafine pele i le lalolagi atoa, e momoli atu o’u alofaaga ia te outou ma ou te aumaia alofaaga o le Au Peresitene Sili faatoa faatulagaina o le Ekalesia—Peresitene Dallin H. Oaks, Peresitene Henry B. Eyring, ma Peresitene D. Todd Christofferson.

E le gata i lea, ou te aumaia foi alofaaga a la’u korama, le Korama a Aposetolo e Toasefululua. Ma te faafetai tele ma Kathy—i le i ai iinei i le Nofoaga Autu mo Tagata Asiasi i le Malumalu o Uosigitone D.C., i le atalafoia o lenei maota matagofie o le Alii.

Ua ou matua fiafia lava e faatasi ma outou, o tatou talavou matutua matagofie, iinei ma le lalolagi atoa. Ma te alolofa ia te outou. Matou te faafetai tele i lo outou tuuto ia Iesu Keriso ma le avea ai ma Ona soo.

Ou te tatalo ma le faamaoni ia mafuta mai le Agaga o le Alii ma i tatou i le isi itula, ma ia faamalolosia ma faamautu ai lo tatou faatuatua i le Faaola ma i Lana talalelei toefuataiina. O le po nei, o le a ma talanoa atu e uiga i le perofeta ma le malumalu ma le ala e faasino atu ai i tatou i lo tatou Faaola, o Iesu Keriso.

Ae muamua, o se faailoaga o alofaaga ia Peresitene Oaks mai talavou matutua mai mea mamao ma iinei.

Autalavou Matutua mai Kanata i Matu: Talofa, Peresitene Oaks. Matou te fia faailoa atu o loo matou mafaufau atu ia te oulua ma Sister Oaks. Matou te auina atu a matou talosaga ma alofaaga ia te oulua mai Kanata i matu. Fa.

Vaega o Talavou Matutua mai le Kolisi o Ensign: Peresitene Oaks, matou te faafetai tele mo au faataitaiga ma mo au aoaoga. Matou te sagisagi fiafia e aoao mai ia te oe.

Autalavou Matutua mai Aferika i Saute: Talofa mai Johannesburg, Aferika i Saute. Matou te alolofa ia te oe, Peresitene Oaks.

Talavou Matutua mai Filipaina: Faafeiloai atu, Peresitene Oaks, mai Filipaina. Ua matou sagisagi fiafia lava e aoao mai au savali.

Elder Neil L. Andersen: I le lalolagi atoa. Ou te fia amata i le faamatala atu e uiga i le aafiaga paia i na o ni nai aso talu ai, Aso Lua, 14 o Oketopa.

Sa tupu i le aso lea na matou potopoto ai o Aposetolo faauuina e toa 14, na anapopogi ma tatalo mo faamanuiaga a le Alii i le toefaatulagaina o le Au Peresitene Sili fou. O se taimi e soofaatasi ai le lagi ma le lalolagi.

Oka so’u faafetai mo le molimau mamana ma le le mafaagaloina ma le faamautuuga lea na oo mai ia te au ma i matou taitoatasi, i le tagata lava ia ma autasi. Faatasi ma lima o Aposetolo uma e toa 13 i luga o le ao o Peresitene Dallin H. Oaks, sa vaetofia ai e Peresitene Jeffrey R. Holland le Aposetolo Sinia a le Alii e avea ma Peresitene o Le Ekalesia a Iesu Keriso o le Au Paia o Aso e Gata Ai.

Ou te tuu atu ia te outou la’u molimau paia ma le lotomaualalo, o ia o le perofeta a le Alii i le fogaeleele. Na te silafia le siufofoga o le Alii. O le a ia taiala i tatou i le mea moni ma faasino i tatou agai i le Alii o Iesu Keriso. A o tatou naunau, a o faigofie ona aoao i tatou, o le a faalauteleina o tatou mafaufau ma agaga, ma o le a faamanuia o tatou olaga e mana o le lagi.

Ua umia nei e Peresitene Dallin H. Oaks ki o le perisitua a le Atua i lo latou atoatoaga, faatasi ai ma le pule e faaaoga ai na ki. O le a outou manatua upu a Iesu ia Peteru, Lana Aposetolo.

Na Ia fetalai, “Ou te tuu atu ia te oe ki o le malo o le lagi: ma o soo se mea e te faamauina i le lalolagi, o le a faamauina foi lea i le lagi; ma o soo se mea e te tālā i le lalolagi, o le a tatalaina foi lea i le lagi.”

Na fetalai le Alii e uiga i le perofeta o Iosefa: “Ona o lana upu ia outou talia, e pei lava ua mai i lo’u lava gutu, i le onosai ma le faatuatua atoa.” E moni foi nei upu mo lo tatou perofeta, o Peresitene Dallin H. Oaks. Mafaufau i ai.

Mo le 41 tausaga i lenei valaauga paia, sa molimau atu ai Peresitene Oaks o se molimau faapitoa a le Alii o Iesu Keriso. Tatou matamata.

Peresitene Dallin H. Oaks (1984): O le konafesi faaleafatausaga lenei o lo’u avanoa muamua lea e lauga atu ai i le aofia aoao o le Ekalesia, e faailoa atu ai le taliaina o lo’u valaauga i le Aufono a le Toasefululua. … O le a ou tuuto atu lo’u loto atoa, mafaufau, ma le malosi atoa i le faamoemoega tele ua tuuina mai ia te a’u, aemaise lava i tiutetauave o se molimau faapitoa i le suafa o Iesu Keriso i le lalolagi uma.

Peresitene Dallin H. Oaks (1987): Tatou te alolofa i le Alii o Iesu Keriso. O Ia o le Mesia, o lo tatou Faaola ma lo tatou Togiola. Ua na o Ia le suafa e mafai ai ona laveaiina i tatou.

Peresitene Dallin H. Oaks (1994): O le faatuatua i le Alii o Iesu Keriso e saunia ai oe mo soo se mea e aumaia e le olaga. O lea ituaiga o faatuatua e tapena ai oe e taulima avanoa o le olaga—e faaaoga ai na avanoa e mauaina ma faaauau ai pea i faagaulemalie ona o i latou ua mou atu.

Peresitene Dallin H. Oaks (2000, “O Le Keriso Soifua”): Tatou te molimau atu o ana Aposetolo faauuina—o Iesu Keriso o le Keriso Soifua, o le Alo tino ola pea o le Atua. O Ia o le Tupu silisili o Emanuelu, o loo tu i le taimi nei i le itu taumatau o Lona Tama. O Ia o le malamalama, o le ola, ma le faamoemoe o le lalolagi.

Peresitene Dallin H. Oaks (2006): Ou te molimau atu ia Iesu Keriso, lo tatou Faaola, o lē na valaaulia i tatou uma ina ia o mai ia te Ia ma ia faaatoatoaina ia te Ia. O le a Ia fusifusia o tatou manu’a ma o le a Ia faamalolo i e o mafatia i avega.

Peresitene Dallin H. Oaks (2013): O le mulimuli ia Keriso e le o se faiga faasamasamanoa pe faavaitaimi, ae o se tautinoga e faifai pea ma o le ituaiga olaga e faaaoga i taimi uma ma i nofoaga uma.

Peresitene Dallin H. Oaks (2025): Ou te molimau atu i le Alii o Iesu Keriso, o le Alo Pele e Toatasi o le Atua, lo tatou Tama e Faavavau. Ua Ia valaaulia i tatou e mulimuli i le ala o feagaiga lea e tau atu i se faatasiga faaleaiga faalelagi. O mana o faamauga o le perisitua, e taitaia e ki na toefuatai mai i le Malumalu o Katelani, e aumaia faatasi ai aiga mo le faavavau. O loo faaaogaina i le taimi nei i se aofaiga faatupulaia o malumalu o le Alii i le lalolagi atoa. E moni lenei mea. Ia avea i tatou ma se vaega o lena mea.

Peresitene Dallin H. Oaks (2025): E matuai malosi atu lo’u iloa i lo se isi mea i lo’u olaga, o le Ekalesia lenei a Iesu Keriso o le Au Paia o Aso e Gata Ai. Ou te molimau atu e uiga i le Alii o Iesu Keriso, o le ao o lenei Ekalesia, ma talosagaina Ana faamanuiaga i luga o i tatou uma a o tatou saili e auauna atu ia te Ia. I le suafa o Iesu Keriso, amene.

Elder Neil L. Andersen: O le asō, ma te mananao e talanoaina nisi o aoaoga mamana ua tatou maua mai ia Peresitene Oaks, ma e ma te mananao e mafaufau pe mafai faapefea e nei aoaoga ona manuia ai o tatou olaga. Ma i lenei nofoaga paia o le malumalu, ma te mananao ai foi e talanoaina le ala e aumaia ai e le maota o le Alii le mana, filemu, ma faaaliga i lenei taimi taua tele o outou olaga.

Sa iai se aafiaga o Kathy i le taimi na faasilasila mai ai le Malumalu o Uosigitone D.C. ou te manao ia outou faalogo iai mai ia te ia. Kathy.

Sister Kathy Andersen: E ese le taua o lenei malumalu, o Uosigitone D.C. ia te a’u. A o ou teineitiiti, sa ou ola ae i Florida, lea e i le Itu i Saute o le Iunaite Setete, ma o le malumalu sa sili ona lata mai e 2,300 maila le mamao mai le Aai o Sate Leki.

Ina ua fa o’u tausaga, sa malaga lo matou aiga i le Aai o Sate Leki ina ia mafai ai ona faamauina faatasi i matou o se aiga. Ina ua 12 o’u tausaga, sa faia se faasilasilaga faapea o le a fauina le Malumalu o Uosigitone D.C. Sa matou matuai fiafia lava e mafaufau faapea, o le a na o le 900 nei maila le mamao o se malumalu mai ia i matou.

Ou te manatua lelei se Aso Sa ina ua talosaga mai le epikopo i matua uma e nonofo atu pe a uma le lotu mo se fonotaga faapitoa ma ia. Ma i le avea ai o se teineitiiti, sa na ona ou taumafaufau—pei sa ou fefe, pe aisea o le a fono ai le epikopo ma matua uma.

Ma ina ua taape mai le fono, sa matou feosofi i le taavale ma o i le fale, ma sa fai mai lo’u tama ma lo’u tina ia te au, “Na fesili mai le epikopo, ma ua talosagaina foi i tatou e taitai o le Ekalesia, e foai atu se aofaiga tele o tupe mo le fauina o le Malumalu o Uosigitone D.C.”

Sa lei tele ni tupe a lo’u aiga, ae na foliga mai e tele naua se tupe na talosagaina i latou e foai atu. Ae na fai mai Tina ma Tama, “O le a moomia ona tatou ositaulagaina o se aiga ni mea mo lenei faamoemoe. Ae pe mafai ona outou manatu o le a matuai faamanuiaina i tatou i le i ai o se malumalu i le na o le 900 maila le mamao?“ O lea malumalu o loo i ai se nofoaga faapitoa tele i lo’u loto ma lo’u aiga.

Elder Neil L. Andersen: Faafetai. Manaia. Faafetai, Kathy.

O le perofeta ma le malumalu e faasinoa i tatou i le Faaola. I se lalolagi o le gaogaosa, fememea’i, ma le anoanoai o mea faalavefau, o le perofeta ma le malumalu e taulaina i tatou i lo tatou faavae faaleagaga.

A o se’e atu le lalolagi mai ona taula faaleagaga, ua auina mai e le Alii ia te oe le mana e suitulaga ai, o Ona soo. O faamanuiaga silisili e lua e tauia ai ē amiotonu o aoaoga a perofeta ma meaalofa o le maota o le Alii.

Na faapolopoloina Peresitene Dallin H. Oaks, tapenaina, ma atia’eina lelei i le silia ma le ivasefulu tausaga. I le konafesi aoao i se masina talu ai, na ia saunoa ai i lona faanoanoa tele i le 7 o ona tausaga ina ua maliu lona tamā. Sa tausia o ia e se tina nofofua, o se faiaoga i le aoga a le malo i le lotoifale.

I lona talavou, sa ma’ati’ati lona mafaufau ma lona agaga ma sa taliaina o ia i se tasi o iunivesite lauiloa o le tulafono i le Iunaite Setete, le Iunivesite o Chicago. Sa oo le maualuga o ana taumafaiga i le tulaga na filifilia ai o ia e le Faamasino Sili o le Faamasinoga Maualuga a le Iunaite Setete, o Faamasino Earl Warren, lea sa umia le tofi aupito maualuga faalefaamasinoga i le atunuu atoa, mai le aoga faaloia e avea ma se fesoasoani ma ana failautusi.

O lea mea na amata ai se auala o le a tuuina atu ai i lenei alii talavou atamai ma le gafatia, ni avanoa maoae i le lalolagi. Sa lei tata’iesea Peresitene Oaks mai le fuafuaga a le Alii mo ia ona o le tele o le mau ofo o faamanuiaga tautupe ma viiga faalelalolagi.

Nai lo lena, sa mulimuli o ia i na uunaiga le leoa a o taitaia o ia e le Alii. Sa ia saunoa mai, “I lo’u olaga atoa, o lo’u faiaoga aupito sili o le leo filemu itiiti ma lagona na tuuina mai e le Agaga o le Alii.” I le 38 o ona tausaga, sa tofia ai o ia e avea ma peresitene o le Iunivesite a Polika Iaga.

Na aoao patinoina a’u, aoao faapitoa, ma tosinaina e Peresitene Oaks ma ana aoaoga mo le silia ma le 50 tausaga. O lo’u uluai fesootai ma Peresitene Oaks na maua ina ua ou foi mai la’u misiona ma o ia o le peresitene maoae ma le tofaloloto mo le BYU. Sa agaalofa ma tauagafau ma sa pele i tagata aooga.

O se ata puupuu lenei mai se saunoaga na ia saunoa i ai i le tausaga lava lea na ou faauu ai.

Peresitene Dallin H. Oaks (1975): I le aluga o le tausaga, sa tele ina ou asiasi i se tasi o faleaiga i lo matou lotoa, ave se fata, ma ’ai fiafia la’u meaai ma nisi o ni tagata aoga sa maofa. Na ou iloa ai o se tasi lenei o o’u avanoa sili e iloa ai pe o a mea o i mafaufau o tagata a’oga. I se tasi o tautoulu i ni nai tausaga ua mavae, sa ou faatasi atu ai i se laulau a tama tausaga muamua i le Cannon Center. E aunoa ma le faailoa atu o a’u lava ia, sa amata ona ou fesili i le vaega e uiga i o latou aafiaga ma manatu e uiga i le BYU. Sa lei pine, ae fai mai se tasi o alii talavou na fai si le fiafia i le fiaisuisu atu o se tagata na te le iloa, “E te faigaluega ii pe a?” Ina ua ou tali atu ioe, sa ia fai mai ni ana ia lava fesili: “O le a lau mea e fai?” “O au o le peresitene,” sa ou tali atu ai. O le le ano ai i le ’eu atu o lona tulilima e ona tuaoi, sa toe fai mai, “Peresitene o le a?” Sa ou faamatala atu i ai ma sa matou taufai taliē ai. Ona ia faaopoopo mai lea o se faamatalaga o le a le galo lava ia te au. “Oi,” na ia fai mai ai, “Ou te alu i faapotopotoga uma ma ou te vaai ai ia te oe iina, ae e te mamao ese tele e le mafai ai ona ou vaai i ou foliga.”

Ina ua fai mai e lenei taulealea tausaga muamua lena faamatalaga, sa tonu ia te a’u o le a ou taumafai e fesoasoani ia vaai mai le a’oga i o’u foliga. Sa faamalosia lena tonu mulimuli ane, ina ua ou ta’u atu i se tagata aoga sa tele ina matou o e tolauapi ma lo’u toalua ma le fanau, ma momoe ai i le po i lo matou faleie i luga o le palapala i setete eseese e luasefulu-lima o le iuni. Sa le talitonu o ia. “Tou te faia moni lena mea?” sa ia fesili mai ai. “Ou te le iloa pe mafai e se peresitene ona faia se mea faapena.”

Sa toe faamanatu mai ai ia te a’u e faapea, o le tauleleia ma le mamao o le tofi sa matuai maoae ma o lea sa le o ni tagata moni lo’u aiga ma a’u i le toatele. E oo lava i la’u fanau na lagonaina le vamamao i le mavae ai ona latou vaai mai ia te a’u o nofo i luga o le tulaga mo se tasi o a’u lauga. Na fai mai se tasi o o’u afafine matutua e toalua, “Daddy, na e foliga ita ma pāū. Ana faapea matou te le iloaina oe, semanu matou te faapea na e ita.” Na faamanatu mai ai ia te au e na o au paaga vavalalata lava na faalogo o o’u ata pe sa iloa foi e i ai o’u uiga malie e oo lava foi i le lotolotoi o ni tulaga faapopolevale. Sa ou manao e foia lenei mea ona o au o se faiaoga, ma e le o se mea atamai mo se faiaoga ona vavamamao mai isi ma lē avea ai o ia o se tagata moni ia i latou. E taua lo outou vaai mai i o’u foliga, e faapei foi ona ou taumafai e vaai atu i o tou foliga.

Elder Neil L. Andersen: A o ou i ai i le BYU, i se soloaiga o mea na tutupu, sa mafai ai i nisi o taimi, ona ma fegalegaleai patino ma ia. Sa ou vaaia lona faatuatua ma lona uiga o le lē faaitu’au, faautauta, ma le fiafia i tagata taitoatasi. E auai o ia, pe a mafai, i taumafataga o faaipoipoga a le toatele o tagata aoga i le iunivesite.

O ia lea ma Sister June Oaks i le taumafataga o la ma’ua faaipoipoga. E malie, ona sa toe o ni nai vaiaso a o lei fanau mai le pepe lona ono a le au Oaks, le tāvaiolini lauiloa o Jenny Oaks Baker.

I le mavae ai o le BYU, sa ou aoao mai ana lauga ma aoaoga. Ae i le 16 tausaga mulimuli ane, i le 1991, i le avea ai o se tasi o le Korama a le Toasefululua, o lona tofiga na malaga ai i Bordeux, Farani, i le mea sa avea ai au ma peresitene o le misiona.

I le 32 ai o tausaga o avea au o se Pulega Aoao, o a’u, pei foi o o’u uso, ua faamanuiaina i lona naunautaiga e aoao a’u, e faalogo mai ia te a’u, ma faasoa mai ia te a’u lona poto tulaga ese. O se ata lea o Peresitene ma Sister Kristen Oaks faatasi ai ma ma’ua ma Kathy i Amerika Latina i ni nai tausaga talu ai.

I le 93 tausaga o le soifua o Peresitene Oaks, ua ia silafia ai ni mea iloga maoae, faapea foi ni taimi o le faanoanoa ma le le fiafia. Sa ou iloa o ia a o avea a’u o se Fitugafulu, ma sa i ai o ia i le Toasefululua ina ua maliu lona faletua, o Sister June Oaks i le 27 tausaga talu ai. Sa ou matauina ona tiga ma le mafatia i masina na sosoo ai. Ina ia faamamaluina lana pele o June, sa ia tusia ai se tusi ofoofogia e uiga i lona soifuaga ma lona alofa ma manatunatuga e faasoa atu i lona aiga.

O le lua tausaga mulimuli ane, na faatoa ia tatala ai lona lotonutimomoia ma feiloai ai ma Sister Kristen McMain. Ua ia aumaia se alofa maoae ma le fiafia i lona soifuaga mo le 25 tausaga ua mavae. Kathy, e mafai ona fai sau faamatalaga e uiga ia Sister Kristen Oaks maoae?

Sister Kathy Andersen: E fia fai lava sa’u tala e uiga ia Sister Oaks. Ou te alofa ia Sister Kristen Oaks. Ma afai tou te lei iloa o ia, o le a outou alolofa foi ia te ia. Na sau lo’u toalua i le fale i ni nai aso talu ai, ma sa ou fai atu i ai, “Na e vaai i le vitio o Peresitene ma Sister Oaks?”

Ma—ou te le iloa pe na e ta’u mai ia te au, e ioe pe leai—ae ou fai atu, “Oka, e maoae, ma o le a fiafia foi i ai le au talavou matutua.” Sa ia fai mai, “Atonu foi ua uma ona vaai i ai le au talavou matutua.”

Sa ou fai atu, “e le afaina. O le a latou fiafia e toe vaai i ai, aua ou te fiafia lava e matamata ai i aso uma. E ese le matagofie.” Sa ia ioe i ai.

Peresitene Dallin H. Oaks: Na e faatupua lea mea?

Sister Kristen Oaks: Ou te lei faia.

Peresitene Dallin H. Oaks: I lou aso fanau, ou te manao e faafetai atu ia te oe i le faafiafiaina o a’u, faia o a’u o se tamaloa ua lelei atu, ma se taitai o le Ekalesia ua tele atu lona iloa, ma se tamāmatua, tamā o le tamāmatua, ma le tamā o le tamā o le tamāmatua sili ona mataalia. E toa 29 fanau a le ma fanau, ma le 75 fanau a fanau a le fanau ma e toalua—e le o toe mamao-ona toatolu lea o fanau a fanau a fanau a le fanau. O se tamaitai lenei, i le 28 o ona tausaga ua pulefaamalumalu ai i se faitau aofai toatele.

Sister Kristen Oaks: Ma o se avanoa mo a’u. Ou te manatu o le mea e sili ona matagofie mo a’u o le mafai lea ona i ai o se agia ma i ai se aiga vavalalata, ma avea ma au avā.

Peresitene Dallin H. Oaks: Faafetai.

Sister Kristen Oaks: Ou te ta’u sooa lava ia te ia, o ia o le tagata e sili ona ou fiafia i ai i le lalolagi atoa.

Peresitene Dallin H. Oaks: Ma o ia e a a’u.

Sister Kathy Andersen: E te lei fiafia i lena mea? Pe le matagofie ea lena? O Sister Kristen Oaks o se soo tuuto o Iesu Keriso. E matuai faatumulia lona soifua i le faatuatua ma le alofa. E ese le mu’amu’a o lona loto, ma ou te manatu o ia o se agelu lalelei i le lalolagi.

Elder Neil L. Andersen: E ese lo’u faafetai i le Alii i le faasaosaoina o Dallin Harris Oaks i lenei fiasefulu tausaga, i le aoaoina o ia, aoao faapitoa o ia, ma le tapenaina o ia mo nei tausaga faaiu o lona soifua.

I le popofou o lona soifuaga, sa ia faavaeina se mautauave patino e faapea o le a ia: “Muai saili le malo o le Atua, ma lana amiotonu; ona faaopoopo ai lea o nei mea uma ia te oe.”

Na ia faia lenei mea e aunoa ma se manatu i tulaga lauiloa po o oa o le lalolagi. Na mamanu e le Alii lona loto ma o le a faaaoga o ia e fesoasoani e mamanu i tatou taitoatasi a o auauna ai o ia o se perofeta a le Atua i le lalolagi.

Ina ia avatu ia te oe se lagona e uiga i lo tatou perofeta, o le atavali faagaeetia loto lenei na tusia e Maynard Dixon, ua silia ma le 40 tausaga o tautau i lona ofisa. O lona igoa o le Tamaloa na Galo.

O loo faaalia i le atavali se tamaloa i luga o se si’o o loo nofo ma le lotovaivai. I ona tua atu, o loo fesavalia’i ai le lalolagi, e leai se ano atu ia te ia.

E alofa Peresitene Oaks i atalii ma afafine uma o le Atua, ma o lenei atavali ua faamanatu ai ia te ia e ao ona ia aapa atu ia i latou o lagona le tuulafoaiina, i latou ua lotovaivai, i latou e moomia ona iloa lo latou lava taua, ma le alofa o lo latou Tama Faalelagi.

Na ta’ua patino e Peresitene Oaks e faapea, e ui ina lagona e le tamaloa i le ata ua galo o ia, ae o loo susulu ifo le la i luga o lona ulu, o lona uiga o loo silafia e le Tama Faalelagi ana tauiviga. Na saunoa Peresitene Oaks e uiga i le atavali e faapea, o loo talanoa atu ia te ia ma faamanatu atu ia te ia mea e moomia ona ia manatua. Ese lo’u fiafia i le loto o Peresitene Dallin H. Oaks.

Faatasi ai ma o tatou talavou matutua iinei i Uosigitone D.C, sa tatou talanoaina ai ni autu taua se tolu sa masani ona saunoa i ai Peresitene Oaks. Ae muamua, tatou faafeiloai atu i se isi faailoaga o le alofa mo Peresitene Oaks mai talavou matutua i le salafa o le lalolagi.

Vaega a Talavou Matutua mai Hawaii: Aloha, Peresitene ma Sister Oaks! Matou te matuai faafetai atu mo la oulua faataitaiga mo i matou ma le Ekalesia. Matou te alolofa ma lagolagoina oe.

Vaega o Talavou Matutua mai Ogden, Iuta: Talofa, mai Ogden, Iuta. Peresitene Oaks, faafetai tele mo au fautuaga, aemaise e uiga i le faaeaga o se mataupu faaleaiga. Matou te alolofa ia te oe ma lagolagoina oe.

Autalavou Matutua mai Roma, Italia: Talofa, Peresitene Oaks. O loo momoli atu o matou alofaaga mai Roma, Italia. Matou te fiafia i au aoaoga e uiga i le aiga faavavau, ma ua sagisagi e vaai ia te oe iinei i le Aai Faavavau. Tofa! Matou te alolofa ia te oe!

Elder Neil L. Andersen: O a tatou mataupu i le asō o le, muamua, tutu atu mo le mea moni; lua, aiga, faaipoipoga, ma fanau; ma le tolu, o faaaliga.