Saunoaga Faaiu

Elder Neil L. Andersen: Ua ou matuai fiafia lava e faatasi ma outou o e na saofaga i nei talanoaga ma ua matua faagaeetia lava i lo outou tuuto ma le avea o outou o ni soo. Mo i latou e mananao e matamata atili i nei talanoaga, o le a faafesootai i le lomiga faaeletonika o lenei faigalotu.

O’u uso e ma tuafafine pele, ua matuai o ma fiafia lava ma Kathy e mafuta ma outou i lenei po. Kathy, e mafai ona faasoa atu ni ou manatu faaiu atonu na e maua a o tatou faia lenei faigalotu?

Sister Kathy Andersen: Faafetai. Ou te faafetai lava mo lenei avanoa ua iai iinei ma lo’u toalua i lenei afiafi, ma le mafuta ai ma outou uma. Ua o se afiafi faapitoa, ma sa ma lagonaina loloto i o ma loto.

Ese lo’u fiafia mo le avanoa i aso oi luma, pe i se konafesi faalesiteki po o le matamata i le konafesi aoao, i le mafai ona sii lo’u lima ma lagolagoina Peresitene Dallin H. Oaks, o se perofeta, tagatavaai, ma talifaaaliga, ma le peresitene o Le Ekalesia a Iesu Keriso o le Au Paia o Aso e Gata Ai.

Ma seia oo i lena taimi e mafai ai ona sii ae lo’u lima ia matuai maualuga i lo’u loto ma a’u tatalo, ou te faafetai i lo’u Tama Faalelagi mo lenei alii pele, ua avea nei ma perofeta a le Atua. E iai se mau e tele taimi ma te ta’ua ma lo’u toalua pe a ma mafaufau ia Peresitene Oaks. O le mau i le Mataupu Faavae ma Feagaiga lea na fetalai ai le Alii e uiga ia Ailama Samita.

Na Ia fetalai, “Ua ou … alofa ia te ia ona o le faamaoni o lona loto, ma ona e fiafia o ia i mea ua sa’o i o’u luma.” Ma ou te manatu ua faatele ona ma ta’ua i o ma olaga, o le loto lea o Peresitene Dallin H. Oaks.

Ou te alofa i lo’u Tama Faalelagi, ma ou te alofa i lo’u Faaola o Iesu Keriso. Ou te tuuina atu la’u molimau i upu o le musika matagofie: na tatou faalogoina i le po nei mai le aufaipese lea: “Viia le Alii, le Silisiliese, le Tupu o le foafoaga.” Ona fai mai lea o le isi fuaiupu: “Viia le Alii. Ia tuu atu mea uma o i totonu ia te au e ifo atu ia te ia.” Ou te alofa ia te Ia, ou te ifo atu ia te Ia ma lo’u loto atoa ma lo’u agaga atoa. I le suafa o Iesu Keriso, amene.

Elder Neil L. Andersen: O le a ou faasavali atu oe ii.

Ou te alofa ia te outou.

Tatou te olioli i lo outou lelei ma lo tou faatuatua i le Alii o Iesu Keriso. Ma te fiafia tatou te mafuta ma faatasi ma tagata uma i le lalolagi atoa—alii ma tamaitai talavou, atalii ma afafine o le Atua, o fanau o le feagaiga, o soo o Iesu Keriso. Ma te maofa i lo tou tuuto i le Faaola, ma ma te faafetai i le Atua o loo tatou faatasi a o tatou tapena mo le Afio Mai Faalua o le Alii.

Ua tatou ola i taimi faigata—o taimi ua lauolaola ai faaosoosoga, i le taimi ua eseese tele ai tulaga faatonuina o le lalolagi mai tulaga faatonuina o le talalelei a Iesu Keriso. Ua tatou ola i se taimi e le mafai ai ona tatou faasamasamanoa e uiga i lo tatou lava avea ai ma soo. I le taimi a o’u pei o outou, na saunoa se perofeta a le Atua, “[O tagata taitasi o le faatuatua] e faalagolago i le papuipui o le faatuatua, ma o iina … e tatau ona faia ai lona tulaga.” Ou te iloa e moni lenei mea.

Na saunoa se isi perofeta a le Atua, “E le liua moni se tagata sei vagana ai ua ia vaaia le mana o le Atua o faapepepepe i luga o taitai o lenei Ekalesia, ma seia vagana ua gotouga ifo i lona loto e pei o se afi.” E moni foi lenei mea.

O le perofeta ma le malumalu e faasinoa atu i tatou ia Iesu Keriso. I le avea ai ma Ona soo i nei aso mulimuli, ma tapenapena mo Lona toe afio mai, e faamalolosia i tatou i ni ala e le mafuatiaina e ala i la tatou molimau e uiga i le perofeta a le Alii ma le maota o le Alii.

Faatasi ai ma le mana o Lona Agaga, o le perofeta ma le malumalu o faamanuiaga mamana tauia ia e lua ua tuuina mai e le Alii ia i tatou i lo tatou lalolagi pagatia e tuueseese ai le lelei mai le leaga, ia malamalama ai i lo tatou faamoemoega moni i lo tatou olaga faitino, ma avea moni ai ma Ona soo.

Ou te molimau atu ia Peresitene Dallin H. Oaks. Na tapenaina o ia ma faamomosiina i le afi o faigata, ua toefaafouina i lona tino ma lona mafaufau e taitai i tatou i lenei taimi e saunoa mai i le suafa o le Alii.

Ou te molimau atu o lenei malumalu ua i o tatou luma, ma maota paia uma o le Alii ua faatumulia i le mana, filemu, mafanafana, ma faaaliga, ua aofia ai ma ki o le perisitua ia e faatagaina ai na mea ua faamauina i le lalolagi ina ia faamauina i le lagi. Oka so tatou faafetai i le tele o malumalu ua fauina nei i le salafa o le lalolagi.

O se taimi matagofie e ola ai, o se taimi o faanaunauga ma tapenaga mo le toe afio mai o le Faaola. Ma ua Ia fautuaina i tatou: “Ia fiafia; ua Ou manumalo i le lalolagi.”

I la’u pule faaaposetolo, ou te faamanuia atu ai outou a o outou saili e tapena oe lava mo le toe afio mai o lo tatou Faaola, ia e maua se molimau mautu i le perofeta a le Alii ma e uiga i le mana paia o Lona maota paia. Ou te folafola atu o le a faamanuia oe e agelu o le lagi a o outou saili e avea ma soo moni o Iesu Keriso.

Ou te tautino atu o Iesu Keriso o le Alo o le Atua, o le Faaola ma le Togiola o tagata uma. O la’u molimau lea i le suafa o Iesu Keriso, amene.