iVakatakila

Elder Neil L. Andersen: Na ikatolu ni noda ulutaga sai koya na ivakatakila. Oqo e dua na ulutaga e sega walega ni dau tukuna o Peresitedi Oaks, ia e dua na ka e bulataka sara ga. Me vaka au sa vakamacalataka oti, a tukuna o koya, “Ena noqu bula taucoko, na noqu qasenivuli taumada sai koya na domo lailai malumu kei na veika au vakila ni tukuna vei au na Yalo ni Turaga.”

Ena dua na vosa veiuqeti a solia ena 1992, a tukuna kina e dua na ka rerevaki a sotava a qai vakabulai kina o koya mai vua na Yalo Tabu kei na dua na cauravou tawakilai mai na dua na leqa levu. E se tiko kina e Chicago. Ni oti na bose ni Lotu ena dua na bogi, erau a kauta kei Sisita Oaks i vale edua na sisita ena tabanalevu oya ka tiko ena dua na yasai Chicago voravora sara. A vukei na sisita oya ki na nona matanikatuba.

Ni lesu tiko kina nona motoka, a basika vakasauri mai edua na cauravou a tauri dakai tu, ka dodoka kina ketei Elder Oaks. A kerea na nona ilavo, ni dodo tu ga na dakai ki ketena, ni oti e vica na veitalanoa kaukauwa, a tukuna sara o Elder Oaks baleta edua na basi sa lako tiko mai ni vakamuria na veivakauqeti a yaco vua. Meda sarava mada.

President Dallin H. Oaks (1992): Ni sa yaco tiko oqo kivei cauravou daubutako oqo, ni vakasama tiko, sa vaka me taqaya ka vagolei. A gole tani nona dakai mai ketequ ka dodo tu na gusu ni dakai vakalailai ki yasaqu imawi. A sa lave cake tu vakalailai na ligaqu, keu vuki totolo ena rawa meu kovea na dakai ka veisolesole kei koya kau na sega ni rawa ni lauvana. Au balavu ka bibi cake mai vua na cauravou oqo kei na gauna oya a se tuvaki vinaka tu na yagoqu. Au sega ni vakatitiqataka ni rawa meu a qaqa ena dua na veisolesole totolo ke rawa meu kauta tani na nona dakai.

Niu vakarau sara ga meu yavala, a yacovi au edua na ka matalia. Au sega ni raica se rogoca e dua na ka, ia au a kila e dua na ka. Au kila na ka ena yaco keu kovea na dakai oya. Keirau na veisolesole, kau na vagolea na dakai oya kina serei koya na cauravou oya. Ena laugasau, ka na mate kina o koya. Au kila tale ga ni sega ni dodonu me na tiko ena noqu vakasama na dra ni cauravou oya ena vo kece ni noqu bula.

Au tu vakasuka, ia ni sa toso na basi au a muria edua na veiuqeti meu biuta na ligaqu imatau e tabana ka vosa vua. E a tiko eso na luvei keirau itabagone kei June ena gauna oya, ka sa matau tu na veivakavulici.

“Rai mai ke” au a kaya, “na ka qo e sega ni dodonu. Na ka o cakava qo e sega sara ga ni dodonu. Na motoka ka tarava e rawa ni ovisa, ka rawa nio vakamatei se vesu ena ka oqo.”

Ni dodoki tale na dakai ki ketequ, a sauma na cauravou daubutako na noqu veivakavulici ena nona tukuna tale na ka e vinakata ena ikatolu ni gauna. Ia ena gauna oqo na domona sa vaka e malumu. Ena gauna e tukuna kina na otioti ni nona via vakamatei au, a sega sara ni rogo kaukauwa. Niu sega ni via cakava, a tu vakasuka vakalailai, tawana na dakai e nona taga ka dro yani. A dolava na katuba o June, ka keirau gole yani, ka cavuti e dua na masu ni vakavinavinaka.

Elder Neil L. Andersen kei ira na iTabagone Qase Cake: Keirau mai tiko oqo kei Joy, Lindsey, Nicole, kei Max. Ka da veivosaki tiko me baleta na ivakatakila. Oni rogoci Peresitedi Oaks ena ka a yaco oya. A kaya o koya, “Au a sega ni raica e dua na ka. Au sega ni rogoca e dua na ka, ia au a kila e dua na ka.” E dua beka vei kemudou sa bau sotava oti e dua na ka vakaoya se tautauvata?

Nicole: E dua au nanuma rawa o ya na vakatulewa meda digitaka meda vakamatavuvale. Au nanuma ni oya a levu kina na noqu masu kei na lolo. Au vinakata meu vakasucuma mai e levu na gone ki vuravura. A sega sara ni matata vei au se na rawa vakacava, ia au nanuma na noqu a kauta ga na noqu gagadre vua na Turaga, ka tukuna Vua niu vinakata meu vakaluveni.

Ni oya e dua na gagadre a tiko e lomaqu. Kau dau vakila vakawasoma na vakacegu mai vua na Kalou ni raica o Koya na yaloqu, ni raica na veika au a vakila tiko, ka kila o Koya na noqu gagadre, ka oya e dua na gagadre vinaka.

Elder Neil L. Andersen: Olivia, na cava o rawa ni kaya vei keda?

Olivia: Au kila ni veigauna ni ivakatakila au sa ciqoma oti ka vakaibalebale vei au era a ciqomi ena valetabu, kau se bera ni kila vakavinaka sara na veika me baleta na edaumeni. Au kila ni a dua cake na—kena sega ni kilai vakamatata sara na veigacagaca kece ni edaumeni, ia na kena vakilai vakalevu cake ni o Jisu Karisito e tiko ena veicakacaka vakalotu oqori, ka tiko kina na taucoko ni Nona matabete, ka sai Koya e vakasavasavataki au tiko ka vakatara vei au meu vakila na veika oya.

E noqu serenilotu talei na “Na Noqui Vakatawa ena Solia na Ka Au Gadreva.” Ka vaqo na iotioti ni qaqana, “Niu sa sega ni kaitani se vulagi, ia sa vaka e dua na gone e vale.” Au kila nida vulagi ena valetabu. Ia au sa maikila vakavinaka sara se vakacava tu meu dua na gone e vale. Niu dabe e valetabu ka tovolea me veivosaki kei na Kalou.

Elder Neil L. Andersen: Totoka.