Tutaka na Dina

Elder Neil L. Andersen: Meda tekivu mada ena noda tutaka na dina. Me vaka o ni sa kila ena nomuni dau rogoci Peresitedi Oaks ena veiyabaki, ni sega ni rere o koya me tukuna na dina ena yalo ni loloma. Au qoroya na nona yaloqaqa. E dau yalololoma ka veinanumi ena nona vosa, ia e dau vosa vakadodonu me vukei keda meda kila na ka dina.

Sarava na imatai ni noda iyaloyalo dua na-miniti mai vei Peresitedi Oaks kei na noda veivosaki kei na so na noda itabagone qase cake era tiko oqo vata kei keda.

Peresitedi Dallin H. Oaks (2024): Nida muria na Karisito e sega ni ka wale tu ga se ena so ga na gauna. Sai koya e dua na yalayala tomani tikoga ka ivakarau ni bula e dodonu me dusimaki keda tiko ena veigauna kecega kei na veivanua kecega. Na Nona ivakavuvuli kei na Nona ivakaraitaki e vakamacalataka na sala mera muria na tisaipeli kece i Jisu Karisito.

Peresitedi Dallin H. Oaks (2022): Eda bula tiko oqo ena gauna vakatani, ni veika ca sa tukuni me ka vinaka, kei na ka vinaka sa vakatokai me ka butobuto. E dodonu meda tudei ka vorata na veiyavunibula kei na ivakarau era vagolei keda tani mai na ivakavuvuli ni Turaga kei na noda veiyalayalati, ivotavota, kei na itavi. Eda rawa ni cakava oqo ena yalo ni loloma.

Peresitedi Dallin H. Oaks (2023): Eda se rawa tikoga ni lomani ira na tani ka kunea na yavunibula dei ka sega ni vakawalena na dina eda kila.

Elder Neil L. Andersen: E rawa beka ni o vakabauta na vanua totoka oqo? Eda sa na vakarau vosa me baleta na tutaka na dina.

Eratou tiko vata kei au eke e va na itabagone qasecake talei mai na iwasewase vaka Washington D.C. E tiko qo o Zack, Sameeta; tiko qo o Joy; vata kei Ethan. Eda na veivosakitaka vakalailai me baleta na veika keitou se qai raica ga mai na ivakavuvuli nei Peresitedi Oaks.

Na cava o vakasamataka ni da vakarorogo ki na nona vosa? E dua e via tekivutaki keda?

Ethan: Eda rawa ni kaya ni sa digidigi ni vakasama, “Au sa na yaco meu dua na tisaipeli i Karisito. Au na digitaki Karisito kevaka mada ga e dredre, ena gauna mada ga ni vakalatilati vei au na veika au sotava seu vakila tiko. Au kila nio Koya e rawa ni vakadruka ka vukei au.”

Zach: Vei au, e rawa ni dredre cake meu digitaki Karisito ni sega ni dua e raici au tiko. Kau na navuca vakai au, na sala meu vakatawana kina na gauna se digitaka meu dua na tisaipeli i Jisu Karisito ena gauna sara ga oya?

Elder Neil L. Andersen: E tiko qo kei keda nikua o Chris, Olivia; ka tiko qo o Lindsey, ka vakakina o Kelson. Keirau sa nanamaki me keirau rogoca na nomuni vakanananu me baleta na veika ni rogoca mai vei Peresitedi Oaks. Lindsey, na vakasama cava e votu mai vei iko ni ko rogoca na vosa oqo?

Lindsey: Au kila ni da tutaka na dina sa dua na ka, ena vuravura oqo, ena ka dredre, ia mo kila tiko ni ko sega ni tiko duadua. E tiko kei iko na Yalo, kau rawa ni tukuna ke o kerea na Yalo me tiko kei iko ena vei ituvaki dredre vakaoqo, ena qai rawa Vua me tuberi iko ka solia vei iko na vosa o gadreva mo wasea baleta ni o sega ni tu duadua; o tiki tiko ni cakacaka cecere duadua ena vuravura, oya mo tisaipeli i Karisito ka matataki Koya.

Chris: Au nanuma ni ka e vakatututaki tiko ena malanivosa na “tutaka na dina” sai koya ni na tiko na veisaqasaqa, ka oya na ka ena vakadredretaka na tutaka na dina ena so na gauna. Ia au nanuma ni dua na ka sa vukei au oya meu nanuma na rua na ivakaro levu: imatai mo lomana na Kalou, eda sa vakaraitaka ena noda muria na ivakaro, ka sa vakakina na noda lomani ira na wekada. Kau nanuma ni sala vinaka duadua ni tutaka na dina oya me tauyavutaki e dua na ituvaki ena kena sureti na Yalo me vakadinadinataka na ka o tukuna tiko. Ka sala vinaka duadua me sureti kina na Yalo oya me vakaraitaki na loloma.

Elder Neil L. Andersen: Ni bera nida veivosakitaka na ikarua ni noda ulutaga, e rawa beka ni dua e tukuna e dua na ivakaraitaki ni loloma mai na dua tale na vanua e vuravura?

iTabagone Qase cake mai Mozambique: O keimami oqo mai Munhahva, Mozambique. Keimami lomani kemuni, Peresitedi Oaks.

iTabagone Qase cake mai BYU: Keimami lomani kemuni, Peresitedi Oaks. Keimami vakavinavinaka ena nomuni ivakaraitaki ni vakabauta ena nomuni bula kece. Keimami lomani kemuni, Peresitedi Oaks.

iTabagone Qase cake mai Sipeni: Ni bula, Peresitedi kei Sister Oaks! Keimami oqo mai Madrid, Sipeni. Vinaka vakalevu na nomudrau veivakavulici. Keimami lomani kemuni! Na i regu!