iMatai ni Vosa

Sa vakasakiti, totoka, ka uasivi dina oya. Kau nanuma kina eke vata kei na ivakatakarakara totoka oqo ni iVakabula, na Karisito, kau kila ni dedeka tu yani na Ligana vei iko. Vinaka vakalevu na ivakaraitaki totoka oya ni nomuni loloma vua na iVakabula. Vinaka sara la vakalevu.

Kemuni na taciqu kei na ganequ ena veiyasai vuravura, au vakaraitaka na noqu lomani kemuni, au kauta mai na nodratou iloloma na Mataveiliutaka Taumada vou ni Lotu—o Peresitedi Dallin H. Oaks, Peresitedi Henry B. Eyring, kei Peresitedi D. Todd Christofferson.

Au kauta tale ga mai na nodratou iloloma, na noqu kuoramu, na Kuoramu ni Apositolo Le Tinikarua. O au vata kei Kathy—keirau marautaka vakalevu na mai tiko eke ena Vale ni Vulagi ni Valetabu e Washington D.C. ena iyaloyalo ni vale ni Turaga totoka oqo.

Au marautaka vakalevu meu tiko kei kemuni, oi kemuni na neimami itabagone qase cake talei, eke ka vakakina mai na veiyasai vuravura. Keitou lomani kemuni. Keitou vakavinavinakataka na nomuni yalodina vei Jisu Karisito kei na nomuni sa Nona tisaipeli.

Au masuta ena yalodina mena tiko vata kei keda ena loma ni aua ka tarava na Yalo ni Turaga me vaqaqacotaka ka vakadeitaka na noda vakabauta na iVakabula kei na Nona kosipeli vakalesui mai. Bogi nikua, eda na veitalanoataka na parofita kei na valetabu kei na sala erau na dusimaki keda kina vua na noda iVakabula, o Jisu Karisito.

Taumada, era sa vakaraitaka tiko na nodra lomani Peresitedi Oaks o ira na itabagone qase cake era yawa sara tu mai ke.

O ira na iTabagone Qasecake mai na Vualiku kei Kenada: Ni sa bula, Peresitedi Oaks. Keimami gadreva ga mo drau kila ni keimami nanumi kemudrau tiko kei Sisita Oaks. Keimami vakauta tiko yani vei kemudrau na neimami masu kei na iloloma mai na vualiku kei Kenada. Drau moce.

O ira na iLawalawa ni iTabagone Qasecake mai na Ensign College: Peresitedi Oaks, keimami vakavinavinakataka dina na nomuni ivakaraitaki kei na nomuni veivakavulici. Keimami vakanamata me vuli mai vei kemuni.

O ira na iTabagone Qasecake mai Sauca Aferika: Vakabula tiko mai Johannesburg, Sauca Aferika. Keimami lomani kemuni, Peresitedi Oaks.

O ira na iTabagone Qasecake mai na Yatu Filipaini: Kidavaka kemuni, Peresitedi Oaks, mai na Yatu Filipaini. E ka ni marau vei keimami me vuli mai na nomuni vosa.

Elder Neil L. Andersen: Kina veiyasai vuravura. Au via tekivu ena noqu tukuna vei kemuni e dua na ka tabu au a sotava ena vica na siga sa oti, ena Tusiti, ika 14 ni Okotova.

Oya na siga keimami a sota vata kina na 14 na Apositolo tabaki, me lolo ka masuta vagumatua na veivakalougatataki ni Turaga ena kena tuvai na Mataveiliutaki Taumada vou. O ya e dua na gauna a semati kina o lomalagi kei vuravura.

Au vakavinavinakataka na ivakadinadina vakayalo kaukauwa ka guilecavi dredre kei na veivakadeitaki a yaco vei au kei keitou vakayadua ena duavata. Ni vakatikori na ligadratou kece na 13 na Apositolo ena ulu i Peresitedi Dallin H. Oaks, a qai tabaka o Peresitedi Jeffrey R. Holland na Apositolo Qase Duadua ni Turaga me Peresitedi ni Lotu i Jisu Karisito ni Yalododonu Edaidai.

Au tukuna vei kemuni na noqu ivakadinadina ena yalodina kei na yalomalumalumu ni o koya na parofita ni Turaga ena dela ni vuravura. E kila o koya na domo ni Turaga. Ena tuberi keda o koya ena dina ka dusimaki keda yani vua na Turaga o Jisu Karisito. Ni da sa lomasoli, ka vakavulici vakarawarawa, ena vakarabailevutaki na noda vakanananu kei na yaloda, ka na vakalougatataka na noda bula na kaukauwa vakalomalagi.

Na idola ni matabete ni Kalou sa tiko tale na kena taucoko, vakakina na dodonu ni kedra vakayagataki na idola ka sa tiko oqori vei Peresitedi Dallin H. Oaks. O ni na nanuma na vosa i Jisu vei Pita, na Nona Apositolo.

A cavuta o Koya, “Au na solia tale ga vei iko na idola ni matanitu vakalomalagi; ia na ka kecega ko na vauca e vuravura, ena vauci mai lomalagi: ia na ka kecega ko na sereka e vuravura ena sereki mai lomalagi.”

Na Turaga a tukuna me baleta na parofita o Josefa: “Ni dou na rogoca na nona vosa, me vaka ga ni dou rogoca mai gusuqu, ena yalovosota kei na vakabauta.” Na veivosa oqo era dina tale ga me baleta na noda parofita, o Peresitedi Dallin H. Oaks. Vakasamataka mada oya.

Ena loma ni 41 na yabaki ni nona veikacivi tabu, sa dau vakadinadinataka kina o Peresitedi Oaks ni sa ivakadinadina digitaki ni Turaga o Jisu Karisito. Meda sarava mada.

Peresitedi Dallin H. Oaks (1984): Na koniferedi vakayabaki oqo ka dau yaco vakarua ena dua na yabaki e imatai ni noqu madigi meu vosa vei ira na lewe ni Lotu raraba, meu vakaraitaka na noqu ciqoma na veikacivi ki na Matabose ni Le Tinikarua. … Au na solia na yaloqu taucoko, igu, vakasama kei na kaukauwa ki na veinuitaki cecere sa vakacolati vei au, vakabibi ki na itavi ni ivakadinadina digitaki ni yaca i Jisu Karisito ki vuravura taucoko.

Peresitedi Dallin H. Oaks (1987): Eda lomana na Turaga o Jisu Karisito. O Koya na Mesaia, na noda iVakabula, ka noda Dauniveisereki. Na Yacana duadua ga eda na rawa ni vakabulai kina.

Peresitedi Dallin H. Oaks (1994): Na vakabauta na Turaga o Jisu Karisito ena vakarautaki iko ki na bula cava ga e kauta mai. Na mataqali vakabauta vakaoqo e vakarautaki iko mo vakayagataka vinaka na veimadigi kecega ni bula e ciqomi—ka rawata na kena era sa ciqomi ka gumatua yani ki na kena e rarawataki era sa yali.

Peresitedi Dallin H. Oaks (2000, “E Bula na Karisito“): Keimami sa vakadinadinataka oi keimami na nona iApositolo tabaki taumada—nio Jisu Karisito sa Bula, na Luvena tawamate rawa na Kalou. Sai Koya na Tui o Imanueli qaqa, sa tu nikua ena yasa imatau i Tamana. O koya na rarama, na bula, kei na inuinui kei vuravura.

Peresitedi Dallin H. Oaks (2006): Au vakadinadinataki Jisu Karisito, na noda iVakabula, o Koya e sureti keda kece meda lako mai Vua ka vakataucokotaki Vua. Ena vauca o Koya na noda mavoa ka vakamamadataka na icolacola bibi.

Peresitedi Dallin H. Oaks (2013): Na vakamuri Karisito e sega ni ka vakarairai se caka vagauna ia sa ka meda dau cakava tikoga ena yalodina ni sa ivakarau ni bula ka na dau caka ena veigauna kece kei na veivanua kece.

Peresitedi Dallin H. Oaks (2025: Au vakadinadinataka na Turaga o Jisu Karisito, ni sa Luvena Duabau Ga na Kalou, na Tamada tawamudu. E sureti keda o Koya meda muria na salatu ni veiyalayalati e veimuataki ki na vakasoqoni vata ni matavuvale vakalomalagi. Na kaukaua ni veivauci ni matabete, dusimaki ena idola a vakalesui mai ena Valetabu e Katiladi, e vakaduavatataka na matavuvale me tawamudu. Era sa cakacakataki tiko ena gauna oqo ena iwiliwili levu ni valetabu ni Turaga e vuravura raraba. Oqo na ka dina. Meda sa vakaitavi kina.

Peresitedi Dallin H. Oaks (2025): Au kila deivaki ka sega ni vakabekataki ena noqu bula ni oqo na Lotu i Jisu Karisito ni Yalododonu Edaidai. Au sa vakadinadinataka na Turaga o Jisu Karisito, o Koya na iliuliu ni Lotu, ka kaciva na Nona veivakalougatataki me sobuti keda kece nida saga meda qaravi Koya. Ena yacai Jisu Karisito, emeni.

Elder Neil L. Andersen: Nikua, e gadrevi meda veitalanoataka eso na ivakavuvuli kaukauwa eda sa ciqoma oti mai vei Peresitedi Oaks, ka vinakata meda vakananuma na sala era sa vakalougatataka kina na noda bula na veivakavuvuli oqo. Ni ena ituvaki tabu oqo ni valetabu, eda vinakata meda veitalanoataka tale ga na sala e kauta mai kina na vale ni Turaga na kaukauwa, vakacegu kei na ivakatakila ena gauna bibi oqo ni nomuni bula.

A sotava o Kathy edua na ka ena gauna a kacivaki kina na Valetabu e Washington D.C kau vinakata moni rogoca mai vua. Kathy.

Sister Kathy Andersen: Na valetabu oqo, e Washington D.C, e vakamareqeti sara vei au. Niu se goneyalewa, au a tubu cake mai Florida, ena Ceva kei Amerika, ka valetabu voleka duadua vei keitou e 2,300 na maile vakayawa mai Salt Lake City.

Niu se yabaki va, a gole na noqu matavuvale ki Salt Lake City me keitou lai vauci kina vakamatavuvale. Niu se qai yabaki 12, a kacivaki ni sa na vakarau tara na Valetabu e Washington D.C. Keitou marau vakalevu ka vakasamataka ni dua na valetabu sa na mai 900 ga na maile na kena yawa mai vei keitou.

Au nanuma vinaka e dua na Sigatabu a kerei ira kina na itubutubu kece o bisopi mera tiko mai ni oti na lotu me dua nodra bose vata kei koya. Niu a se gone, au a vakasamataka—kau a via rere vakalailai, niu nanuma, na vuna e via bose vata kina o bisopi kei ira kece na itubutubu.

Ni rau sa suka mai na bose, keitou a vodo ena motoka ka gole i vale, ka rau kaya vei au o ta kei na, “A kerea o bisopi, ka vakatale ga kina o ira na veiliutaki ena Lotu, me keimami solia e dua na isolisoli vinaka vakailavo me tara kina na Valetabu e Washington D.C.”

A sega ni levu na neitou ilavo vakamatavuvale, ka vaka me sa dua na wiliwili ni lavo vakaitamera a kerei me rau solia. Ia rau a kaya o Nana kei Tata, “E gadrevi medatou na solibula vakamatavuvale ena ka oqo. Ia e rawa beka ni tou vakasamataka na veivakalougatataki me tiko edua na valetabu ka 900 ga na maile na kena yawa mai vei kedatou?” Na valetabu oqo e vakamareqeti e yaloqu kei iratou noqu matavuvale.

Elder Neil L. Andersen: Vinaka vakalevu. Totoka. Vinaka vakalevu, Kathy.

Sa dusimaki keda na parofita kei na valetabu ki vua na iVakabula. Ena vuravura oqo ni yavavala, veilecayaki, ka levu na kena veivagolei tani, na parofita kei na valetabu erau itakele ni noda yavu vakayalo.

Ni sa vuki tani na vuravura oqo mai na kena iyaqa vakayalo, na Turaga e solia mai na veivaqaqacotaki vakayalo vei iko, na Nona tisaipeli. E rua vei ira na veivakalougatataki cecere vei ira na yalododonu sa ikoya na nodra ivakavuvuli na parofita kei na isolisoli ni vale ni Turaga.

E sa maroroi, vakarautaki, ka vakasavasavataki rawa tu mai o Peresitedi Dallin H. Oaks ena loma ni ciwasagavulu na yabaki sa oti. Ena koniferedi raraba ena vula dua sa oti, a vosa kina me baleta na nona rarawa bibi ena takali nei tamana ni se yabaki 7 kina. A susugi cake mai vua e dua na tina dawai, e dua na qasenivuli ena koronivuli ni vanua e kea.

Ni se itabagone, a vuavuai vinaka na nona vakasama kei na yalona, ka curu rawa kina kina dua na univesiti ni vuli loya rogo e Amerika, na Univesiti e Chicago. A rawata vinaka na nona vuli ka digitaki koya kina o Turaganilewa Earl Warren, na Turaganilewa Liu ena Mataveilewai e Cake e Amerika, ka taura tu na itutu cecere duadua ena tabana ni lawa e Amerika, me nona ivukevuke ka nona vunivola o Dallin Oaks.

Oqo a tekivu kina e dua na ilakolako ka me vakaraitaki kina vua na cauravou vuku ka kila ka oqo e levu sara na madigi e vuravura. A sega ni vagoleitani o Peresitedi Oaks mai na ituvatuva ni Turaga vua ena vei itutu ni rawa ka vakailavo kei na dokai ka a vakarautaka tu vua o vuravura.

Ia, a vakamuria o koya na veiuqeti malumu ni tuberi koya voli na Turaga. A tukuna o koya, “Ena noqu bula taucoko, na noqu qasenivuli taumada sai koya na domo lailai malumu kei na veika au vakila ni tukuna vei au na Yalo ni Turaga.” Ni sa yabaki 38, a taura na itutu vaka peresitedi ni Brigham Young University.

Au sa dau vakavulici, tuberi, ka vakauqeti mai vei Peresitedi Oaks kei na nona ivakavuvuli me sivia e 50 na yabaki. Na imatai ni noqu veitaratara kei Peresitedi Oaks a yaco ena noqu lesu mai na kaulotu ka sa peresitedi gugumatua ka rai yawa tiko kina e BYU. E a turaga yalovinaka ka dau veitokani vata ka taleitaki mai vei ira na gonevuli.

Oqo edua na iwase lekaleka ni nona vosa a solia ena yabaki vata ga au a qeretueti kina.

Peresitedi Dallin H. Oaks (1975): Ena loma ni yabaki, au dau sikova wasoma e dua na valenikana ena univesiti, taura edua na tere, ka marautaka na kequi vakasigalevu vata kei na so nai lawalawa gonevuli ka ra kurabui kina. Au raica ni oqo edua na gauna vinaka meu kila kina na cava e tiko ena nodra vakanananu na neimami gonevuli. Ena dua na vulai tubutubu ena vica na yabaki sa oti au a tomani ira eso na cauravou curuvou ena dua na teveli ena Cannon Center. Au a sega ni vakatakilai au, ia kau tekivu me taroga na ilawalawa baleta na veika era sotava kei na nodra rai me baleti BYU. Vakalailai ga, e dua vei ira na cauravou, ka kunei vua na cudruvaka na mataqali taro vakaoqo mai vua edua na vulagi, a kaya, “O cakacaka tiko eke se cava?” Niu tukuna io, a tarogi au ena so tale na nona taro: “A cava na nomu cakacaka?” “O au na peresitedi,” au sauma yani. A sega ni kauwaitaka na nodratou vacuki koya tiko na nona itokani, ka taroga, “O peresitedi ni cava?” Au vakamacalataka ka keimami veidredrevaki vinaka sara. A qai tomana o koya ka kaya oqo kau na sega ni guilecava rawa. “Oi,” a kaya, “Au dau lako ki na veisoqoni kece kau raici iko e kea, ia o tiko vakayawa sara kau sega ni raica vinaka kina na matamu.”

Ni cavuta na cauravou curuvou na vosa oya, au a navuca me dua na gauna au na tovolea meu vukei ira na gonevuli mera raica na mataqu. A vaqaqacotaki na navunavuci oya e muri niu tukuna vua edua na gonevuli ni o watiqu kei iratou na gone kei au keitou dau keba vakalevu, ka keitou dau moce ena bogi ena neitou valelaca ena qele, ena ruasagavulu ka lima na veiyasana duidui ni unioni. E a sega ni vakabauta o koya. “O dau cakava dina oya?” a taroga o koya. “Au sega ni vakasamataka rawa me dua na peresitedi me cakava rawa o ya.”

Kau vakavotui tale, ni ituvaki kei na yawa ni valenivolavola e levu sara ni noqu matavuvale kei au a sega ni tamata dina ki na vuqa na tamata. O iratou mada ga na luvei keirau eratou a vakila na veiyawaki oya ni oti nodratou raici au ena tavata ena dua na noqu vosa. Edua vei rau na luvequ goneyalewa qase a kaya, “Tata, o rairai matacudrucudru ka lomabibi tu. Ke keitou a sega ni kilai iko, keitou na rawa ni nanuma nio cudru tu.” Oqo e vakananumi au nio ira ga era voleka sara vei au era sa rogoca niu dredre se kila niu dau vakalasalasa ena loma ni so na ituvaki dredre sara. Au a vinakata meu walia qo baleta niu qasenivuli ka sega ni vinaka vua edua na qasenivuli me vakayawaki koya mai vei ira na tani mera sega ni kilai koya kina. E bibi mo raica na mataqu, me vaka ga na noqu saga meu raica na matamuni.

Elder Neil L. Andersen: Ena noqu tiko e BYU, ena vuku ni so na soqo a yaco, a rawa vei au, ena so na gauna, me veitaratara vakavoleka kina kei koya. Au a vakila na nona vakabauta kei na nona cakacaka vakadodonu, veinanumi, ka kauwaitaki ira na tamata yadua. Ena dau tiko, ke rawa vua, ena nodra soqo ni vakamau e vuqa na gonevuli ena univesiti.

Oqo o koya kei Sisita June Oaks ena soqo ni neirau vakamau. A matalia, ni oqo a vo tiko ga e vica na macawa me sucu kina na ika ono ni luvedrau na Oakses’ na dau ni vailini rogo o Jenny Oaks Baker.

Ni oti o BYU, au dau vuli mai na nona vosa kei na ivakavuvuli. Ena 1991, ni oti e 16 na yabaki na nona lewe ni Kuoramu ni Le Tinikarua, a kauti koya na nona ilesilesi ki Bordeaux, Varanise, na vanua au a veiqaravi tiko kina vaka peresitedi ni tabana ni kaulotu.

Ena loma ni 32 na yabaki vaka dua na Vakaitutu Raraba, au, me vakai iratou na veitacini, sa vakalougatataki ena nona lomasoli me vakavulici au, rogoci au, ka wasea na nona vuku vata kei au. Oqo edua na itaba kei Peresitedi kei Sisita Kristen Oaks vata kei Kathy kei au e Latin America ena vica na yabaki sa oti.

Ena loma ni 93 na yabaki ni bula nei Peresitedi Oaks, e sa kila o koya na rawaka vakaitamera, ka vakakina eso na gauna ni rarawa kei na lomabibi. Au kilai koya niu a tiko ena Vitusagavulu ka tiko o koya ena Tinikarua ena gauna a takali kina na watina, o Sisita June Oaks, ena 27 na yabaki sa oti. Au a raica na nona mosi kei na dredre a curuma ena vica na vula ka tarava. Me vakananumi nona daulomani o June, a vola kina o koya edua na ivola vakasakiti me baleta na nona bula kei na nona loloma kei na vakanananu baleti koya me wasea kei na nona matavuvale.

Sa oti e rua na yabaki ki muri a dolava na utona kavoro ka qai sotavi Sisita Kristen McMain kina. A kauta mai o koya na loloma kei na marau levu kina nona bula ena loma ni 25 na yabaki sa oti. Kathy, o via tukuna edua na ka vakasakiti me baleti Sisita Kristen Oaks?

Sister Kathy Andersen: Au taleitaka meu cavuta edua na ka me baleti Sisita Oaks. Au lomani Sisita Kristen Oaks. Ke o se sega ni kilai koya, ona taleitaki koya talega. A lesu mai i vale o na watiqu ena vica na siga sa oti, kau kaya, “O sa sarava beka na kedrau vidio o Peresitedi kei Sister Oaks?”

O koya—au sega ni kila se o a tukuna vei au nio sa sarava se sega—ia au a kaya, “Sa vakamatalau dina, era na taleitaka na ka oqo na itabagone qase cake” A qai kaya o koya, “Ia, era sa na sarava oti beka na itabagone qase cake.”

Au a kaya, “E sega ni dua na ka. Era na taleitaka mera sarava tale baleta niu taleitaka meu sarava e veisiga. E rui totoka dina.” A mani vakadonuya o koya.

Peresitedi Dallin H. Oaks: O a vakauqeti ira beka ena ka oqo?

Sister Kristen Oaks: Au a sega ni vakauqeti ira ena ka oqo.

Peresitedi Dallin H. Oaks: Ena nomu siganisucu, au vakavinavinakataka na nomu vakamarautaki au, meu tamata vinaka cake, ka iliuiliu ni Lotu kilaka, ka tukanigone kei na tukanigone vakarua kei na tukanigone vakatolu dauveivakayarayarataki. Sa 29 na makubui keirau ka 75 na makubui keirau vakarua ka rua—voleka ni tolu—me makubui keirau vakatolu. Oqo e dua na yalewa, ni se qai yabaki 28, a vakatulewataka tiko ena dua na ilawalawa levu.

Sisita Kristen Oaks: Ka sa noqu madigi oqo. Au nanuma na ka talei duadua vei au oya meu vakamatavuvale ka tiko edua noqu matavuvale veilomani, ka meu watimu.

Peresitedi Dallin H. Oaks: Vinaka vakalevu.

Sister Kristen Oaks: Au dau tukuna vua ni o koya e noqu tamata taleitaki duadua e vuravura taucoko.

Peresitedi Dallin H. Oaks: Ka sa noqu o koya.

Sisita Kathy Andersen: O sega beka ni taleitaka o ya? E sega beka ni totoka oya? O Sisita Kristen Oaks e dua na tisaipeli yalodina i Jisu Karisito. E vakasinaiti tu na nona bula ena vakabauta kei na loloma. E dau yalo veikauwaitaki, kau nanuma nio koya edua na agilosi vinaka e vuravura.

Peresitedi Dallin H. Oaks: Au vakavinavinakataka na Nona maroroi Dallin Harris Oaks tiko mai na Turaga ena loma ni vicasagavulu vata na yabaki, vakavulici koya, tuberi koya, ka vakarautaki koya kina vica na yabaki ni iotioti ni nona bula.

Ena itekitekivu ni nona bula, a navuca o koya e dua nona lalawa vakaikoya me: “Vakasaqara taumada na matanitu ni Kalou, kei na nona yalododonu; ia ena soli me kena ikuri vei kemudou na ka kecega oqo.”

Sa cakava tiko oqo o koya ka sega ni kauwaitaka na irogorogo se iyau vakavuravura. Na Turaga sa moica na lomana ka na vakayagataki koya me vukea me moici keda vakayadudua ni veiqaravi tiko vakaparofita ni Kalou e vuravura.

Meda kilai noda parofita vakavinaka cake, na droini matalia oqo mai vei Maynard Dixon a lili tu ena nona valenivolavola sa sivia e 40 na yabaki. Na kena ulutaga Na Tamata a Guilecavi.

Na droini e vakaraitaka e dua na tagane e dabe tiko ena bati ni dua na sala ena lomabibi. Mai dakuna, e tavali ko vuravura, ka sega ni kauwaitaki koya.

O Peresitedi Oaks e lomani ira vakayadua na luvena tagane kei na yalewa na Kalou, ka vakananumi koya na droini oqo me dau kauwaitaki ira era vakila na galili, o ira era lomabibi, era gadreva mera kila na kedra yaga kei na loloma nei Tamadra Vakalomalagi.

E tukuna o Peresitedi Oaks ni gauna e vakila tiko kina na tagane ena droini ni tawakauwaitaki, na siga e cilavi koya tiko, ka kena ibalebale ni Tamana Vakalomalagi e kila tiko na nona dredre. O Peresitedi Oaks a tukuna me baleta na droini ni vosa tiko vei koya ka vakananumi koya tiko ena veika e gadrevi vua me nanuma. Au taleitaka na yalo i Peresitedi Dallin H. Oaks.

Keimami veivosakitaka eke kei ira na neimami itabagone qase cake e Washington D.C., e tolu na ulutaga bibi ka dau vosa kina vakawasoma o Peresitedi Oaks. Taumada, meda ciqoma tale mada e dua na ivakaraitaki ni loloma vei Peresitedi Oaks mai vei ira na itabagone qase cake e veiyasai vuravura.

iLawalawa ni iTabagone Qase Cake mai Hawaii: Aloha, Peresitedi kei Sister Oaks! Keimami vakavinavinakataka na nomudrau ivakaraitaki vei keimami ka vakakina ki na Lotu. Keimami lomani ka tokoni kemuni.

iLawalawa ni iTabagone Qasecake mai Ogden, Utah: Vakabula tiko, mai Ogden, Utah. Peresitedi Oaks, keimami vakavinavinakataka na nomuni ivakasala, vakabibi baleta na bula vakacecerei ni sa cakacaka ni matavuvale. Keimami lomani kemuni ka tokoni kemuni.

O ira na iTabagone Qase cake mai Roma, Itali: Ni sa bula, Peresitedi Oaks. Keimami vakauta tiko yani na neimami iloloma mai Roma, Itali. Keimami taleitaka na nomuni ivakavuvuli me baleta na vuvale tawamudu, ka nanamaki me keimami sotavi kemuni eke ena Siti Tawamudu. Ni sa moce mada! Keimami lomani kemuni!

Elder Neil L. Andersen: Na noda ulutaga nikua e imatai, na tutaka na dina; ikarua, na matavuvale, vakawati, kei ira na gone; ka ikatolu, na ivakatakila.