iTinitini ni Vosa

Elder Neil L. Andersen: Au sa marautaka dina na tiko vata kei kemuni na vakaitavi ena veivosaki eso oqo ka qoroya na nomuni yalodina kei na nomuni ivakaraitaki vakatisaipeli. Vei ira era via raica e levu tale baleta na veivosaki oqo, sa na tiko na kena isema ena ilavelave vakalivaliva ni lotu oqo.

Kemuni na taciqu kei na ganequ, keirau sa marautaka dina kei Kathy na tiko kei kemuni ena bogi nikua. Kathy, e rawa beka mo wasea eso na itinitini ni vakasama ka a basika vei iko ni caka tiko na lotu oqo?

Sisita Kathy Andersen: Vinaka. Au vakavinavinaka vakalevu ni rawa meu tiko eke kei watiqu ena bogi oqo ka vakakina meu tiko vata kei kemuni kece. Sa dua na bogi taleitaki dina, ka keirau sa vakila vakatitobu sara e lomai keirau.

Au marautaka na madigi e tu e matada, se ena koniferedi ni iteki se ena saravi ni koniferedi raraba, me rawa niu laveta na ligaqu meu tokoni Peresitedi Dallin H. Oaks me dua na parofita, daurairai, ka daunivakatakila, ka peresitedi ni Lotu i Jisu Karisito ni Yalododonu Edaidai.

Ia me yacova na gauna oya meu na rawa ni laveta kina na ligaqu, ki cake sara e lomaqu kei na noqu masu, au sa vakavinavinakataka na Tamada Vakalomalagi ena vuku ni turaga lomani oqo ka sa mai parofita ni Kalou edaidai. E tiko edua na ivolanikalou keirau dau cavuta vakawasoma kei watiqu ni keirau dau vakasamataki Peresitedi Oaks. Oya na ivolanikalou ena Vunau kei na Veiyalayalati na vanua ka vosa tiko kina na Turaga me baleti Hyrum Smith.

A kaya o Koya, “Niu … sa lomani koya koi Au na Turaga ena vuku ni dina ni lomana, kei na nona dau taleitaka na veika e dodonu e mataqu.” Au kila ni keirau sa dau cavuta vakalevu sara oya, ena neirau bula, me baleta na yalo i Peresitedi Dallin H. Oaks.

Au lomana na Tamaqu Vakalomalagi, kau lomana na noqu iVakabula ko Jisu Karisito. Au via solia na noqu ivakadinadina ena vosa ni sereivakatagi totoka, eda rogoca ena bogi nikua mai na matasere: “Turaga me dokai, ni sa Tui ni dauveibuli.” Ka dua tale na qaqana e kaya: “Me sa dokai. Ka vakacaucautaki na Kalou.” Au lomani Koya, au rokovi Koya ena yaloqu kei na lomaqu taucoko. Ena yacai Jisu Karisito, emeni.

Elder Neil L. Andersen: Au na lako yani eke.

Au lomani kemuni.

Keirau marautaka na nomuni vinaka kei na nomuni vakabauta na Turaga o Jisu Karisito. Keirau taleitaka na sota kei kemuni kei ira kece mai na veiyasai vuravura—cauravou kei na goneyalewa, luvena tagane kei na luvena yalewa na Kalou, luve ni veiyalayalati, sa tisaipeli i Jisu Karisito. Keirau qoroya na nomuni yalodina vua na iVakabula, ka keirau vakavinavinaka vua na Kalou ni o ni tiko kei keirau ni da vakavakarau tiko kina iKarua ni Lako Mai ni Turaga.

Eda bula tiko ena veisiga rerevaki—sa sega ni tarovi rawa na veitemaki, na gauna e duidui vakalevu kina na ivakatagedegede ni vuravura kei na ivakatagedegede ni kosipeli i Jisu Karisito. Eda bula tiko ena dua na gauna eda na sega ni rawa ni vakaweleweletaka kina na noda bula vakatisaipeli. Niu se yabaki vata kei kemuni, edua na parofita ni Kalou a kaya, “[Na tamata vakabauta yadua] ena vakasosoqiti kina lalaga ni vakabauta, ka ekea … me na digia kina o [koya] se cava ena tutaka.” Au kila ni dina oqo.

E dua tale na parofita ni Kalou a kaya, “Ena sega ni saumaki vakaidina e dua na tamata me yacova ni sa raica na kaukauwa ni Kalou ni tiko vei ira na iliuliu ni Lotu oqo, ka yacova ni sa lutu sobu ki [yalona] me vaka na buka.” Oqo tale ga e dina.

Na parofita kei na valetabu e rau dusimaki keda vei Jisu Karisito. Vaka Nona tisaipeli ena iotioti ni veisiga oqo, nida vakavakarau tiko kina Nona lesu mai, eda sa vaqaqacotaki ena veisala e vuqa ena noda vakadinadinataka na parofita ni Turaga kei na Nona vale.

Salavata kei na kaukauwa ni Yalona, na parofita kei na valetabu e rua na veivakalougatataki mana sa solia tu vei keda na Turaga ena noda vuravura veilecayaki oqo meda kila kina na vinaka mai na ca, me kilai kina na inaki dina ni noda mai bula vakayago, ka yaco me Nona tisaipeli dina.

Au vakadinadinataki Peresitedi Dallin H. Oaks. Sa vakarautaki oti o koya ena veika dredre sa sotava, vakavoui ena yagona kei na nona vakasama me liutaki keda ena gauna oqo ka vosa ena yaca ni Turaga.

Au vakadinadinataka ni valetabu e tu e matada, kei na veivale tabu kece ni Turaga e tiko kina na kaukauwa, vakacegu, veivakacegui, kei na ivakatakila, ka ologi vata tu kei na idola ni matabete me vakatarai ira na veika era sa vauci e vuravura mera vauci mai lomalagi. Eda vakavinavinaka ena iwiliwili levu ni valetabu era sa tara tiko ena veiyasai vuravura.

Oqo e dua na gauna vinaka ni bula, na gauna ni nanamaki kei na vakavakarau kina lesu mai ni iVakabula. Ka sa vakauqeti keda o Koya: “Mo dou vakacegu; au sa vakamalumalumutaki vuravura.”

Ena noqu itutu vaka iapositolo, au vakalougatataki kemuni ni oni vakavakarau tiko kina lesu tale mai ni noda iVakabula, ka me na soli vei kemuni edua na ivakadinadina dei baleta na parofita ni Turaga kei na kaukauwa tabu ni Nona vale savasava. Au yalataka vei kemuni ni ra na vakalougatataki kemuni na agilosi mai lomalagi nio ni qara moni tisaipeli dina i Jisu Karisito.

Au vakadinadinataka ni o Jisu Karisito sa Luve ni Kalou, na iVakabula ka Dauveivueti ni kawatamata. Oqo na noqu ivakadinadina ena yaca i Jisu Karisito, emeni.