Vakamau, Matavuvale, kei na Gonelalai

Elder Neil L. Andersen: A tarai keimami sara vakalevu na itukutuku nei Peresitedi Oaks ena koniferedi raraba se qai oti qo. A vosa ena kaukauwa levu o koya me baleta na matavuvale, na vakamau, kei ira na gonelalai. O nauma tiko ni a cavuta, “Na Lotu i Jisu Karisito e kilai ena so na gauna me lotu yavutaki-vakamatavuvale. “E dina!” Meda sarava mada na vidio lekaleka oqo kei na neimami veitalanoa kei ira na itabagone qase cake.

Peresitedi Dallin H. Oaks (2025): Na noda veiwekani kei na Kalou kei na inaki ni noda bula vakayago e vakamacalataki ena ituvaki ni matavuvale. Sa ka bibi me kakua ni yali vei ira na Yalododonu Edaidai na nodra kila vinaka na inaki ni vakamau kei na kedra bibi na gone. Oqori na noda sasaga ni veisiga ni mataka.

Na ivunau ni Lotu i Jisu Karisito ni Yalododonu Edaidai sa vakabibitaka na matavuvale.

Eda sa lotu ni matavuvale.

Peresitedi Dallin H. Oaks (2023): Na vakamau e usutu ni inaki ni bula vakayago kei na veika e muria mai. Eda luvena e dua na Tamada Vakalomalagi dauloloma ka a buli keda ka meda rawa ni muria na Nona ivakaro ka meda vakatubu kawa ka vakatawai vuravura. Na kaukauwa ni veibuli oya sa dua vei ira na isolisoli vakamareqeti ena noda bula vakayago. Ia e usutu ni isolisoli oya na lawa ni bula savasava, na ivakaro me vakayacori walega na kaukauwa ni noda vakatubu kawa ena loma ni vakamau, ni dua na tagane kei na dua na yalewa.

Vakananuma mada na veika era na calata na itabagone qasecake ni Yalododonu Edaidai ni nakiti me lokuyarataki na nodra vakamau me dua na gauna balavu: ena vakayali na madigi ka vakaberai na veivakalougatataki. Oqo e kena ibalebale na vakaberai na bibi ni tubu ni tamata yadua ka dau yaco ena nodrau veimaliwai e dua na tagane kei na dua na yalewa, tagane vakawati kei watina, na tubu ena ivakarau yaga me vaka na solibula kei na yalomalumalumu. E kena ibalebale sa lailai na madigi me rau cakacaka vata me tarai cake na matanitu ni Kalou. Ka kena bibi duadua, oya ni kena ibalebale ni na lailai na gone era sucu mera tubu vata kei na veivakalougatataki ni kosipeli.

Mo dau nanuma, ni Tamada Vakalomalagi dauloloma e tiko na Nona ituvatuva vei ira Nona itabagone qasecake, ka tiki ni ituvatuva oya na vakamau kei na vakaluveni.

Elder Neil L. Andersen: E sega beka ni vanua totoka vakaoti na vanua oqo, eda rawa ni raica kina na irairai totoka kilai levu ni Valetabu e Washington D.C.? Ka da tiko eke meda veitalanoataka na matavuvale, na vakamau, kei ira na gonelalai.

Ka rau tiko oqo kei keda o Max kei Nicole, e rau vakamau. Ka rau tiko talega ena yasana oqo o Chris kei Lindsay, ka rau vakamau talega. Na cava oni vakasamataka ena gauna o ni rogoci Peresitedi Oaks kina ni vosa ena koniferedi sa oti qo?

Max: Au vakavinavinaka vakalevu vei Peresitedi Oaks kei na nona vakavulica na bibi ni matavuvale. Au vakasamataki au mada ga kei Nicole, niu mai vakamautaki Nicole ni sa dua vei ira na veivakalougatataki cecere duadua ena noqu bula. Vakakina, niu sa mai vakamatavuvale. E tiko edua na luvei keirau tagane yabaki tolu, o Enoch.

Nicole: Au vakavinavinakataka vakalevu na nodra ivakavuvuli na parofita kei na iapositolo me baleta na bibi ni matavuvale. Au vakasamataka na noda veisiga, ena rawa ni dredre me vakasamataki se na vakacava tu na ituvaki ni noda bula ni tiko na cakacaka kei na matavuvale. Au kila vei au, au a vinakata meu saga meu qeretueti, meu qereueti vakadiqiri, kau a vinakata tale ga me dua noqu matavuvale. Kei na sala me rau rawati ruarua kina a sega ni rawarawa vei au. Ka keirau dau lolo ka masumasu vakalevu kei Max ka gole ki na valetabu me tovolea me vulica kina na vakatulewataki vakavinaka ni ka erua oya. Ka keirau a vakauqeti ni kevaka keirau na vakaliuca na matavuvale, ena vinaka na veika kece.

Ka keirau a sega ni kila se cava ena yaco ena so na gauna e veivula, ia a lako vinaka. Ka tiko edua na noqu ivakadinadina kaukauwa baleta na bibi kei na vakaliuci ni matavuvale.

Elder Neil L. Andersen: Io, Lindsay, tukuna mada vei keda na nomu vakamau tiko kei kei Chris.

Lindsay: Keirau a vakamau ena valetabu sara ga oqo. Kei na noqu rawa ni vauci vei Chris, e dua e totoka ka yalovinaka vakataki Chris, e veivakalougatataki cecere me kilai ni keirau na veitauriligataka na ka oqo, ia e sega nio keirau wale ga, ni keirau sa dua na matavuvale ka yavutaki vei Karisito, se bolebole cava ga ena takosovi keirau, me saumi na dinau ni vuli se vaqaqara se vakadeitaki na neirau cakacaka, keirau kila deivaki tu ni keirau na cakava vata kei Karisito.

Chris: Keirau a rairai vakawati bera beka, ia au kila nia sega ni baleta ni keirau a sega ni tovolea. Au kila ni Turaga e tiko na nona gauna ena veika kecega, kau nanuma ni keirau a yalodina ka nuidei ni Turaga a tiko na nona ituvatuva vei keirau. Ka kevaka keirau yalodina ni muria na Nona ivakaro, na madigi ni neirau gauna ena qai yaco ga mai.

Elder Neil L. Andersen: Sa tu vei keitou o Ethan, Joy, Zach, Sameeta, Lindsey, kei Kelson. Ka keitou na veitalanoa vakalailai me baleta na tolu na vosa oqo: matavuvale, vakamau, kei na gonelalai.

Kelson: Au nanuma ni levu na tamata e tiko vei ira na veituvaki duidui baleta na matavuvale. Kau vakila vakai au niu kalougata ni soli vei au edua na matavuvale e vakarautaka vei au e levu na veituberi, veidusimaki, lalawa, ivakatakilakila, kei na veitaqomaki.

Au via vakananuma na veivakalougatataki kece au sa ciqoma niu tiki ni dua na matavuvale, kei na noqu raici iratou na taciqu kei na ganequ kei na nodratou matavuvale, kei na kena talei na bula vakavuvale. Au kila e levu na tamata. Au kila ni sega ni dua na matavuvale e sa uasivi sara, ia e levu—ni ra tovolea na reki e rawa ni tiko ena dua na matavuvale, ena rawa me uqeti iko mo vinakata tale ga.

Sameeta: Au se bera ni vakawati, ia au nanamaki tiko meu laki vakamau e valetabu. Au kila ni vakawati e bibi ena ituvatuva ni Kalou, ka vakavulica vei keda na kosipeli—ni vakalougatataki keda ka vakacerecerei keda me tawamudu. So na gauna eda vinakata me vinaka na veika kece, ia e sega ni dau vakakina.

Ia edua na ka au sa vulica ena noqu bula oya meu vakabauta na gauna ni Kalou. Kau kila ni tiko na Nona ituvatuva baleti keda yadua, ka kilai keda ka lomani keda vakayadudua. Se na mani vakacava na kena dede, mo vakararavi ga Vua.

Kei na ikarua ni ka au sa vulica sai koya meu vakarautaki au vakayalo ka vakayago tale ga. Na vakavakarau ki na vakamau tawamudu e sega ni tekivu ena gauna o kunea kina e dua na itokani. Sa rawa mo tekivuna oqo na nomu ilakolako vakataki iko.

Elder Neil L. Andersen: Io, Joy, au nuitaka ni ko na ciqoma meu tukuna oqo. O a mai lewena na Lotu ena vica ga na yabaki sa oti ni oti nomu sotava e dua na vakamau rarawa. Na cava na nomu rai baleta na matavuvale, kei na vakamau ena gauna oqo? Na cava na itovo ni nomu rai vaka dua na lewe ni Lotu?

Joy: Ia, au taleitaka dina na vosa nei Peresitedi Oaks vei ira na tamata yadua, kau taleitaka na sala a vakaraitaka kina ni na sega na marau ena veigauna kecega. Kau taleitaka na sala e vosa kina vei ira na tina, baleta niu dua na tina ni gonetagane lailai yabaki va mai na vakamau oya.

Kau taleitaka na nona tukuna, kevaka mada ga o sega ni vakamau tiko qo, se rawa tiko ga mo vakavulici ira na luvemu mera rai ki na veivakalougatataki ni vakamatavuvale ka lai vauci e valetabu. Au vakila ni vaka au kauwaitaki ena nona vosa vei ira e sega ni taucoko tu nodra bula, se vakataki ira na tina era sega ni vakamau.

Elder Neil L. Andersen: Totoka sara na kena tukuni.

Ethan: Edua na ka a kaya oti o Peresitedi Oaks ena dua na lotu e BYU oya ni sega ni rawa ni vakasaurarataki na veika vakayalo. Niu wilika na malanivosa oya e tarai au dina baleta eda vinakata e dua na vakamau vakayalo, eda vinakata e dua na matavuvale vakayalo. Eda vinakata edua na matavuvale ka yavutaki vei Karisito. Eda vinakata edua na itokani ka tiko vua na vakabauta eda rawa ni qarava, ka tokona. Ka na kunei ga oqori ni vakanamata na noda bula vei Jisu Karisito. Kau nanuma ni so na gauna edau tiko na cudru nida se gone, kemuni kila, ya, “O, au rawa meu cakava oya,” se qo se oya se cava ga. Ia na kena dina, o sega ni rawa ni vakasaurarataka na veika vakayalo.

Elder Neil L. Andersen: Au taleitaka na ka o tukuna tiko. Au na bolei iko ga vakalailai eke. Ena sega ni rawa mo vakasaurarataka na veika vakayalo, ia o rawa ni sureta e levu cake na veitaratara kei ira na goneyalewa. O cakava tiko beka vakacava qori?

Ethan: Io, mo kila, ni levu tu na kena iwalewale. Kila, au dau tovolea na veisotari mata ena rumu, iko kila. E rairai dua se rua na app. Ia na kena dina qo, au nanuma ni bibi me kilai ni sasaga oya e ka bibi duadua me na tiko vei keda.

Na nomu dolavi iko kei na kena tiko vei iko na yalodei mo kaya, iko kila, o au e dua na luve ni Kalou, ka tiko vei au e levu na ka vinaka ena yaga vei iko. Au na lako yani ka vakaveikilaitaki au vua edua ka vulica na veika baleti ira ka vulica e levu cake na ka baleti ira kei na ka era vakabauta kei na cava era cakava tiko ena nodra bula. Nio vakanamata vua na tamata kadua, ona rawa ni vulica e levu cake na ka me baleti iko.

Elder Neil L. Andersen: Olivia. Nio vaqara tiko e dua ena rawa mo vakamautaka, na cava o vakasaqara tiko?

Olivia: Au nanuma ni imatai ka bibi duadua, au na vakasaqara e dua e maroroya tiko na nona veiyalayalati.

Elder Neil L. Andersen: Zach, iko o kila e dua na ka a tukuna vakalailai o Peresitedi Oaks me baleta na ivakaro raraba ni matavuvale. Na cava e nomu nanuma me baleta na duidui ni ivakavuvuli era tiko kina? O sa bau vakasamataka ena gauna qo?

Zach: Au vakabauta ni rua na noqu vakasama. Kena imatai sai koya e rawa ni dau dredre na vakarogoci ira na iliuliu ni Lotu se meda wilika na ivakaro raraba ni matavuvale ka raica na vanua e sega ni tautauvata kina na noqu bula, ka dau dredre saraga o ya. Ia, baleta ni dau dredre e sega ni kena ibalebale ni sega ni dina. Na ikarua ni vakasama, me vaka eda rogoca ena vidio, e kaya o Peresitedi Oaks na tubu levu duadua e yaco ena vakamau kei na veisemati ni vakamau, ka kilai ni dina—noda vakabauta tiko, nuitaka tiko ni dina—e sega ni vagalalataki au mai kina, baleta niu sega ni vakamau, ena noqu vakanamata ki na veiyalayalati au sa vakayacora kei na noqu sasaga vakataki Karisito vakalevu cake.

Elder Neil L. Andersen: Donu vinaka. Vinaka vakalevu na vakasama totoka oya.

E rawa beka ni da vakaraitaka na iotioti ni noda loloma vei Peresitedi Oaks ni bera ni da lakova yani na ikatolu ni noda ulutaga?

iTabagone Qasecake mai Tonga: Keimami sa masulaki kemuni tiko mai na veiyanuyanu totoka mai Tonga.

iTabagone Qasecake mai Korea: Sa loloma tu yani mai Korea! Keimami lomani kemuni, Peresitedi Oaks.

iTabagone Qasecake mai na Brigham Young University–Idaho: Sa neimami madigi oqo me keimami tokoni kemuni nio sa Parofita ni Lotu ena gauna tarava oqo ni veiliutaki ena Lotu, Peresitedi Oaks. Keimami sa vakanamata tu me muri kemuni ka marau me tokoni kemuni vaka itabagone qase cake e vuravura taucoko.