Revelesen

Elda Neil L. Andersen: Namba tri topik blong yumi hem i revelesen. Hem i wan topik we Presiden Oaks i no tokbaot nomo, be hem i laef folem. Olsem mi tokbaot finis, hem i talem, “Truaot long laef blong mi, fas tija blong mi hem i smol voes mo ol filing we i toktok long mi tru long Spirit blong Lod.”

Long wan toktok we hem i givim we i gat paoa, long 1992, hem i tokbaot wan eksperiens blong wan hadtaem we gaed blong Tabu Spirit i sevem hem mo wan yang man we hem i no save aot long wan nogud taem. Hem i stap laef long Jikago. Folem wan Jos miting we i finis let, hem mo Sista Oaks i stap ron blong dropem bak wan sista long wod we i stap long wan nogud eria long Jikago. Hem i helpem sista ia kasem fored blong doa blong hem.

Taem hem i stap gobak long trak blong hem, wan yang man i kamaot nomo olsem wetem wan pistol long han blong hem, mo i putum pistol long bel blong Elda Oaks. Yang man ia i askem mane long Elda Oaks, be masket i stap nomo long bel blong hem, mo afta long fulap toktok blong no agri, Elda Oaks i tokbaot se wan bas i stap kam mo i tokbaot insperesen ia we i kam long hem. Bae yumi wajem.

Presiden Dallin H. Oaks (1992): Taem hemia i stap hapen biaen long yang man blong stil ia, we hem i no luk, hem i fraet smol mo i lusum fokas. Pistol blong hem i kamaot smol long bel blong mi mo i poen i go long lef saed blong mi. Han blong mi i stap antap smol finis, mo wetem wan kwik muv bae mi save traem blong karemaot masket long wan wei we bae hem i no sutum mi. Mi longfala mo hevi bitim yangfala man ia mo long taem ia mi bin stap mekem spot. Mi sua se sapos mi karemaot pistol blong hem bae mi save winim hem long wan kwik faet .

Taem we mi rere blong mekem muv blong mi, mi gat wan spesel eksperiens. Mi no bin luk o harem eni samting, be mi save wan samting. Mi save wanem bae i hapen sapos mi karemaot masket ia. Bae mitufala i gat hadtaem mo bae mi tanem pistol ia i go long jes blong yangfala man ia. Bae mi sutum hem mo bae hem i ded. Mi bin andastanem tu se bae mi no mas mekem ded blong yang man ia i stap long tingting blong mi long ful laef blong mi.

Mi rilaks mo taem bas i pas i go, mi folem wan strong tingting blong putum raet han blong mi long solda blong hem mo givim hem wan tijing. Mi mo June i gat sam yangfala pikinini long taem ia, mo blong givim tijing i kam nomo olsem.

“Yu luk”, mi talem long hem, “hemia i no stret. Wanem we yu stap mekem i no stret nomo. Maet nekis trak bae i wan polis man, mo bae oli save kilim ded yu o sendem yu i go long prisen from hemia.”

Wetem pistol long bel blong mi bakegen, yangfala stil man ia i ansa bak long toktok blong mi mo askem wanem we hem i wantem blong nambatri taem. Be long tetaem ia, voes blong hem i kwaet. Taem hem i sakem las toktok blong kilim ded mi, saon blong voes blong hem i nomo blong winim tingting. Taem mi no akseptem bakegen, hem i stop blong smol taem, mo afta i pusum pistol i go long poket blong traoses blong hem mo i ronwe. June i openem doa, mo mitufala i draev aot, wetem wan prea blong tangkyu.

Elder Neil L. Andersen with Young Adults: Mo mifala i stap ia wetem Joy, Lindsey, Nicole, mo Max. Mo mifala i stap tokbaot revelesen. Yufala i harem Presiden Oaks long taem ia. Hem i talem se “mi no bin luk eni samting. Mi no bin harem wan samting, be mi save wan samting.” ?I gat eniwan long yufala i eksperiensem hemia bifo o wan samting we i semmak olsem?

Nicole: Wan we i kam long maen i desisen ia blong jusum blong gat wan famli. Long mi, mi ting se hemia i tekem plante prea mo fasin blong livim kakae. Mi bin wantem blong tekem ol pikinini i kam long wol. Mi no sua olsem wanem evri samting bae i save wok gud, mo mi tingbaot nomo se mi tekem tingting blong hat blong mi i go long Lod, mi letem Hem i save se mi wantem gat pikinini.

Mo hemia i tingting we mi bin gat long hat blong mi. Mo fulap taem mi filim bigfala pis we i kam long God se Hem i luk hat blong mi, Hem i luk wanem we mi stap filim, Hem i luksave tingting blong hat blong mi, mo se hemia i wan tingting blong hat we i klin inaf.

Elda Neil L. Andersen: Olivia, ?Wanem nao yu save talem long mifala?

Olivia: Mi ting se ol taem blong revelesen we mi bin kasem mo we oli moa kolosap long hat blong mi hem i insaed long tempol, mo mi slo blong andastanem evri samting long taem blong endaomen. Mi ting se hem i moa long wan—be i no blong andastanem evri samting long taem blong endaomen, hem i moa abaot wan andastaning o filing se Jisas Kraes i stap long taem ia blong odinens, se prishud blong Hem we i fulwan i stap long taem ia, mo se Hem nao i mekem mi mi kam klin mo letem mi blong filim andastaning ia.

Fevret hym blong mi i “My Shepherd Will Supply My Need.” Mo las ves i talem se, “I nomo wan man we oli no save long hem o wan ges, be olsem wan pikinini long hom.” Mo mi save se yumi ol ges insaed long tempol. Be mi kam blong andastanem gud wanem i minim blong filim olsem wan pikinini long hom, Taem mi sidaon insaed long tempol mo traem blong toktok wetem God.

Elda Neil L. Andersen: I gud tumas.