Mared, Famli, mo Pikinini
Elda Neil L. Andersen: Mesej blong Presiden Oaks long las jeneral konfrens ia i tajem hat blong yumi evriwan. Hem i toktok wetem bigfala paoa abaot famli, mared, mo ol pikinini. Yufala i tingbaot taem hem i talem se, “Jos Ia blong Jisas Kraes samtaem oli save gud long hem olsem wan famli jos. “Yes!” Bae yumi wajem sot vidio ia mo storian blong mifala wetem ol yang adalt blong yumi.
Presiden Dallin H. Oaks (2025): Yumi eksplenem rilesensip blong yumi wetem God mo stamba tingting blong laef blong yumi long wol ia tru long famli. … Hem i impoten se ol Lata-dei Sent oli no lusum andastaning blong olgeta long stamba tingting blong mared mo valiu blong ol pikinini. Hemia i fiuja we yumi stap traehad from.
Famli i stamba blong doktrin blong Jos Ia blong Jisas Kraes blong Ol Lata-dei Sent.
Presiden Dallin H. Oaks (2023): Mared hem i impoten long stamba tingting blong laef long wol ia mo olgeta samting we i folem. Yumi ol pikinini blong Papa long Heven we Hem i lavem mo krietem yumi wetem paoa blong folem komanmen blong Hem blong fulumap wol ia. Paoa blong mekem kriesen i wan long ol naesfala presen we yumi gat long wol ia. Be long presen ia loa blong jastiti i impoten, komanmen ia se paoa blong yumi blong krietem pikinini bae i aplae nomo insaed long mared bitwin man mo woman. …
Tingting long wanem ol yang adalt oli mestem taem oli stap pulum taem blong mared blong wan longfala taem: oli stap lusum ol janis mo oli stap muvumbak ol blesing. Hemia i minim se yumi stap pulpulum taem long impoten taem blong stap gro long rilesensip bitwin wan man mo wan woman, hasban wetem waef, fasin blong gro long kaen kwaliti ia i kam sakrifaes blong yumi mo i mekem yumi sem. Hem i minim se yumi sloem ol janis blong wok tugeta blong bildimap kingdom blong God. Mo moa impotem, hem i se namba blong ol pikinini we oli bon blong gro wetem ol blesing blong gospel i stap kam smol.
Tingbaot nomo, wan Papa long Heven we i gat lav, i gat wan plan blong ol yang adalt blong Hem, mo pat blong plan ia i blong mared mo gat pikinini.
Elda Neil L. Andersen: ?Yu bilivim hemia? Hemia i naes tumas, naesfala ples ia stret long ples we yumi save luk Washington D.C. Tempol. Mo yumi stap ia blong tokbaot famli, mared, mo ol pikinini.
Mo yumi gat wetem yumi long ples ia, Max mo Nicole, we tufala i mared. Mo yumi gat tu long saed ia Chris mo Lindsay, we tufala tu i mared. Wanem i kam long maen blong yufala taem yufala i harem Presiden Oaks i toktok long las jeneral konfrens?
Max: Mi glad tumas long Presiden Oaks mo from hem i tijim hamas famli hem i impoten. Long miwan wetem Nicole, blong maredem Nicole i wan blesing blong joes long laef blong mi. Mo tu, blong gat wan famli. Mitufala i gat Enoch we hem i gat 3 yia.
Nicole: Mi glad tumas long ol tijing blong ol profet mo aposol abaot hamas famli hem i impoten. Mi ting se long dei blong yumi tedei, samtaem i had blong traem blong faenemaot se laef bae i olsem wanem wetem ol wok mo tu wetem wan famli. Mi save long mi, mi save se mi wantem blong kasem ol graduet digri, wan graduet digri, mo tu mi wantem blong gat wan famli. Mo blong mekem tugeta i no stret gud long mi. Mo mi mo Max i spenem fulap taem blong livim kakae mo prea mo go long tempol blong traem blong lanem olsem wanem blong balensem tufala samting ia. Mo mitufala i filim se sapos mitufala i putum famli i kam faswan, evri samting bae i kam gud.
Samtaem, manis i pas, mitufala i no save hao bae ol ting i go gud, be long en, evri samting i go gud. Mo mi gat wan strong testemoni abaot hamas famli i impoten mo blong putum famli i kam faswan.
Elda Neil L. Andersen: Nao Lindsaey, talem long mifala olsem wanem yu filim blong maredem Chris.
Lindsay: Mitufala i bin mared long tempol ia stret long ples ia. Mo semmak olsem we mi bin sil wetem Chris, wan man we i gud mo i kaen olsem Chris, i wan bigfala blesing blong save se mitufala i stap ia blong sapotem mitufala, be i no mitufala nomo, se mitufala i wan famli mo Kraes i stap long medel blong mitufala, mo se wanem jalenj we bae i kam long laef blong mitufala, sapos i blong pemaot ol studen lon o lukaotem o kasem wan wok, mitufala i save nomo se bae mitufala i mekem tugeta wetem Kraes we i stap long medel blong mitufala.
Chris: Maet mitufala i mared i let tumas long laef, be mi ting se i no from se mitufala i no bin traem. Mi ting se Lod i gat wan taem long evri samting, mo mi ting se, mitufala tugeta i bin fetful mo gat strong tingting se Lod i gat wan plan blong mitufala. Mo sapos mitufala i gat strong tingting blong kipim ol komanmen blong Hem, long en, bae taem blong mitufala i kam.
Elda Neil L. Andersen: Yumi gat Ethan, Joy, Olivia, Zach, Sameeta, Lindsey, mo Kelson. Mo bae yumi tokbaot smol abaot trifala toktok ia: famli, mared, pikinini.
Kelson: Mi ting se i gat plante pipol we oli gat ol defren kaen famli situesen. Mo mi filim long miwan se mi gat blesing blong gat wan famli we oli givim mi fulap gaed, daereksen, stamba tingting, aedentiti, mo wan filing blong stap sef.
Mi laekem blong tingtingbak long evri blesing we mi bin kasem blong stap pat long wan famli miwan, mo taem mi luk ol brata mo sista blong mi mo famli blong olgeta, hem i jes naes nomo. Mi save plante pipol. Mi save se i nogat wan famli i stret gud, be i gat fulap—taem yu testem glad ia we i save stap long wan famli, hemia i save pusum yu blong wantem gat wan famli tu.
Sameeta: Mi no mared yet, be mi stap luk fored from wan tempol mared. Mi save se mared i impoten long plan blong God, mo gospel hemwan i tijim yumi—i blesem mo leftemap yumi blong oltaem. Samtaem yumi wantem ol samting blong i wok gud, be nogat nomo.
Be wan samting we mi lanem long laef blong mi i blong gat fet long taem blong God. Mo mi save se Hem i gat wan plan blong wanwan long yumi, mo Hem i save mo lavem yumi wanwan. Mo nomata se bae i tekem taem olsem wanem, yumi trastem Hem nomo.
Mo nambatu samting we mi lanem i blong rere long miwan mo long saed blong spirit. Stap rere from mared we i no save finis i no stat taem yu faenem wan kompanion. Yu save statem rod ia blong yuwan naoia.
Elda Neil L. Andersen: Naoia, Joy, mi hop se i oraet wetem yu blong mi talem hemia. Yu joenem Jos sam yia i pas afta we yu bin go tru long wan mared we i nogud. ?Olsem wanem nao yu yu lukluk long famli, mared naoia? ?Yu stanap wea naoia olsem wan memba blong Jos?
Joy: Okei, mi laekem tumas olsem wanem Presiden Oaks i toktok long evriwan, mo mi laekem olsem wanem hem i luksave se i no evri situesen oli hapi. Mo mi laekem tumas olsem wanem hem i toktok long ol mama, from se mi mi wan mama long mared ia mo mi gat wan smol boe blong 4 yia.
Mo mi laekem olsem wanem hem i talem, iven sapos yu no mared yet naoia, yu save tijim ol pikinini blong yu blong lukluk long ol blesing blong famli mo go sil long tempol. Mi filim se oli luk mi tru long toktok blong hem long ol pipol we situesen blong olgeta i no folem olfala tradisen, o olsem ol mama we oli no mared.
Elda Neil L. Andersen: Yu talem i gud tumas.
Ethan: Wan long ol samting we Presiden Oaks i bin talem bifo long wan BYY divosen i we yu no save fosem ol samting long saed blong spirit. Mo mi ridim laen ia, i bin tajem mi bigwan from se yumi wantem wan mared long saed blong spirit, yumi wantem wan famli long saed blong spirit. Yumi wantem wan famli we i putum Kraes i kam faswan. Yumi wantem wan kompanion we i gat fet blong yumi save givhan long hem mo sapotem hem. Mo yumi faenem hemia nomo taem laef blong yumi i lukluk long Jisas Kraes. Mo mi ting se samtaem i gat fasin blong harem nogud taem yumi yang yet, wetem ol tingting olsem, “O, mi sapos blong mekem hemia i hapen,” o ol narafala tingting. Mo long ril laef, yu no save fosem ol samting long saed blong spirit.
Elda Neil L. Andersen: Mi laekem wanem we yu stap talem. Bae mi jalenjem yu smol long saed ia. Yu no save fosem ol samting long saed blong spirit be yu save mekem moa blong toktok wetem ol yang woman. ?Olsem wanem nao yu stap mekem hemia?
Ethan: Yes, i gat plante wei blong mekem hemia. Oltaem mi stap traem stael ia blong stil ae, yu kasem. Maet bae i tru long wan o tu ap. Be long ril laef, mi ting se i impoten blong andastanem se fasin blong go from mo traehad from wan samting hem i wan moa impoten samting we yumi save gat.
Blong putum yuwan long ples ia mo gat strong tingting blong talem se, mi mi wan pikinini boe blong God, mi kasem fulap gudfala samting we i stap kam blong yu. Bae mi go aot mo introdiusum miwan long wan, mo, lanem abaot olgeta mo lanem moa abaot huia olgeta mo, wanem biliv blong olgeta mo, wanem nao oli stap mekem long laef blong olgeta. Taem yu mekem hemia long narawan, bae yu save lanem moa abaot yuwan.
Elda Neil L. Andersen: Olivia. Taem yu stap lukluk long wan we yu save maredem, ?wanem nao yu stap lukaotem?
Olivia: Faswan, mi ting se, mi stap lukaotem wan we i stap kipim ol kavenan blong hem.
Elda Neil L. Andersen: Zach, yu save, wan samting we Presiden Oaks i stap tokbaot plante taem hem i Ofisol Toktok ia blong Famli. ?Hao nao yu filim abaot ol defren prinsipol insaed? ?Mo yu bin tingting long hem samtaem?
Zach: Ating mi gat tu tingting blong serem. Mo faswan i we samtaem i save had blong lisin long ol Jos lida o blong ridim ofisol toktok blong famli mo blong luk se laef blong mi i no folem ol samting ia, mo samtaem hemia i had tumas. . Be from se i had mo i strong blong mekem i no minim se i no tru o i no trutok. Mo mi ting se seken tingting i we, taem yumi lisin long vidio ia, Presiden Oaks i talem se yumi gro bigwan insaed long mared mo long mared rilesensip, mo wetem save ia se hemia i tru—bilivim, trastem se hemia i tru—i no stopem mi olsem wan we i singgel, blong lukluk long ol kavenan we mi mekem mo traem blong gro moa long fasin olsem hemia blong Kraes long evri wei we yumi save mekem.
Elder Neil L. Andersen: Hemia i tru. Tangkyu long naesfala lukluk ia.
?Yumi save gat wan las toktok blong lav blong Presiden Oaks bifo yumi tokbaot namba tri topik blong yumi?
Ol Yang Adalt blong Tonga: Mifala i stap prea from yu long naesfala aelan blong Tonga.
Ol Yang Adalt blong Korea: !Mifala i sendem lav blong mifala i kam long Korea! !Mifala i lavem yu, Presiden Oaks!
Ol Yang Adalt blong Brigham Yang Yunivesiti–Aedaho: Hem i wan spesel janis blong mifala blong sastenem yu olsem Profet blong Jos long nekis sisen ia blong Jos lidasip, Presiden Oaks. Mifala i luk fored blong folem yu mo glad blong sapotem yu olsem ol yang adalt raon long wol.