Ol Las Toktok

Elda Neil L. Andersen: Mi glad blong stap wetem yufala we i bin tekpat long ol storian ia mo mi filim gud tumas from komitmen mo fasin blong yufala blong stap wan disaepol. Long olgeta we oli laekem blong luk moa storian olsem, bae ol storian ia oli stap long lektronik vesen blong divosen ia.

Ol dia brata mo sista blong mi, mi mo Kathy i glad tumas blong stap wetem yufala long naet ia. Kathy, ?yu save serem sam las tingting we maet yu gat taem yumi stap long divosen ia?

Sista Kathy Andersen: Tangkyu. Mi glad tumas long janis ia blong stap ia wetem hasban blong mi long naet ia, mo blong stap wetem yufala evriwan. Hem i wan spesel naet, mo yumi filim hemia insaed long hat blong yumi.

Mi glad tumas long ol janis ia we i stap kam kolosap, long wan stek konfrens o taem yumi wajem jeneral konfrens, blong mi save leftemap han blong mi mo sastenem Presiden Dallin H. Oaks olsem wan profet, sia, mo reveleta, mo olsem Presiden blong Jos Ia blong Jisas Kraes blong Ol Lata-dei Sent.

Mo kasem taem ia, we mi save leftemap gud han blong mi i go antap, long hat mo prea blong mi, mi talem tangkyu long Papa long Heven from man ia we yumi lavem we naoia i profet blong God. I gat wan skripja we mi mo hasban blong mi i tokbaot oltaem taem mitufala i tingting long Presiden Oaks. Skripja ia i stap long Doktrin mo Ol Kavenan, taem Lod i stap tokbaot Haerum Smit

Hem i talem, “Mi… lavem hem from hat blong hem i stap tru, mo from we hem i laekem tumas wanem we i stret long ae blong mi.” Mo mi ting se mitufala i talem hemia fulap taem long laef blong mitufala, hemia i hat blong Presiden Dallin H. Oaks

Mi lavem Papa blong mi long Heven, mo mi lavem Sevya blong mi Jisas Kraes. Bae mi givim testemoni blong mi long ol toktok blong naesfala miusik we yumi harem long naet ia we i kam long kwaea: “Presem Lod, we I Gat Olgeta Paoa, King blong kriesen.” Mo afta nara ves i talem: “Presem Lod. O, letem mi presem hem fulwan.” Mi lavem Hem, wosipim Hem wetem ful hat mo sol blong mi. Long nem blong Jisas Kraes, amen.

Elda Neil L. Andersen: Bae mi go putum yu longwe.

Mi lavem yu.

Mifala i glad long gud fasin blong yufala mo fet blong yufala long Lod Jisas Kraes. Mifala i glad blong mitim yufala mo evriwan raon long wol—ol yang man mo yang woman, ol boe mo gel blong God, ol pikinini blong kavenan, ol disaepol blong Jisas Kraes. Mifala i sapraes long fetfulnes blong yufala long Sevya, mo mifala i talem tangkyu long God we yufala i stap wetem mifala taem yumi stap rere from Seken Kaming blong Lod.

Yumi stap laef long ol taem we i denja tumas—ol taem we i nomo gat kontrol long temtesen, taem ol standet blong wol oli defren tumas long ol standet blong gospel blong Jisas Kraes. Yumi stap laef long wan taem we yumi no save tekem fasin blong disaepol blong yumiwan i nating. Taem mi mi olsem yufala, wan profet blong God i talem, “[Fet blong wanwan] bae i rives i gobak biaen long wol blong fet, mo long ples ia … [hem] i mas mekem joes blong hem.” Mi save se hemia i tru.

Wan nara profet blong God i talem, “Wan i no save jenis fulwan kasem taem hem i luk paoa blong God we i stap long ol lida blong Jos, mo kasem we hemia i godaon long hat blong [hem] olsem faea.” Hemia tu i tru.

Ol profet mo ol tempol oli poenem yumi i go long Jisas Kraes. Olsem ol disaepol blong Hem long ol las dei ia, we oli stap rere long kambak blong Hem, yumi kasem paoa long ol wei we i nogat limit tru long witnes blong yumi long profet blong Lod mo haos blong Lod.

Wetem paoa blong Spirit blong Hem, profet mo ol tempol i tufala blesing we i gat paoa we Lod i givim long yumi long trabol wol ia blong yumi blong seraotem gud aot long sin, blong andastanem tru stamba tingting blong yumi long laef ia, mo blong kam ol tru disaepol blong Hem.

Mi serem witnes abaot Presiden Dallin H. Oaks. Hem i bin stap rere mo kam klin tru long faea blong hadtaem, i kam niu long bodi mo maen blong hem blong lidim yumi long taem ia mo blong toktok long nem blong Lod.

Mi serem witnes blong mi se tempol we i stap long fored blong yumi, mo evri tabu haos blong Lod oli fulap long paoa, pis, kamfot, mo revelesen, we i kam tru long ol ki blong prishud mo i letem ol samting we oli silim long wol ia blong oli silim long heven. Yumi talem tangkyu from ol namba blong ol tempol we naoia oli stap bildim raon long wol.

Hemia i wan gudfala taem blong stap laef, wan taem blong stap pat mo rere from kambak blong Sevya. Mo Hem i leftemap tingting blong yumi: “Be yufala i no fraet. Mi mi winim paoa blong olgeta samting blong wol ia finis.”

Long atoriti mo paoa blong mi olsem wan aposol, mi blesem yufala taem yufala i lukaotem blong stap rere long yufalawan from kambak blong Sevya, se bae yufala i kasem konfemesen blong witnes blong profet blong Lod mo blong tabu paoa blong tabu haos blong Hem. Mi promesem yufala se bae ol enjel blong heven i blesem yufala taem yufala i stap traehad blong stap wan tru disaepol blong Jisas Kraes.

Mi testifae se Jisas Kraes i Pikinini blong God, i Sevya mo i Ridima blong evri man. Hemia i witnes blong mi, long nem blong Jisas Kraes, amen.