Stanap From Trutok

Elda Neil L. Andersen: Bae yumi stat wetem fasin blong stanap from trutok. Olsem yufala i save taem yufala i stap lisin long Presiden Oaks truaot long ol yia, hem i no fraet blong talemaot trutok wetem lav. Mi laekem tumas strong tingting ia blong hem. Oltaem hem i kaen mo gat longfala tingting long ol toktok blong hem, be hem i tok stret blong helpem yumi save wanem i stret.

Wajem fas wan-minit vidio blong yumi we i kam long Presiden Oaks, mo afta storian blong mifala wetem sam long ol yang adalt blong yumi we oli stap tedei wetem yumi.

Presiden Dallin H. Oaks (2024): Blong stap folem Kraes, i no blong tingting nating long hem o we yumi praktisim wanwan taem nomo. Hem i wan komitmen we i gogohed mo wan wei blong laef we i lidim yumi long evri taem mo long evri ples. Ol tijing mo eksampol blong Hem i soem rod long evri disaepol blong Jisas Kraes.

Presiden Dallin H. Oaks (2022): Yumi laef long wan taem we i denja, taem oli singaotem ol nogud samting se oli gud, mo ol gud samting oli nogud. Yumi mas stanap strong agensem ol valiu mo praktis we oli mekem yumi i go longwe long ol tijing blong Lod mo ol kavenan, janis mo responsabiliti blong yumi. Yumi save mekem hemia wetem lav.

Presiden Dallin H. Oaks (2023): Yet yumi save lavem ol narawan mo faenem ol samting we yumi agri long hem be yumi holemtaet ol trutok we yumi save.

Elda Neil L. Andersen: Ples ia i naes tumas. Mo bae yumi tokbaot fasin blong stanap from trutok.

I gat fo naesfala yang adalt wetem mi long ples ia, we oli blong ples ia long Washington D.C. eria. Yumi gat Zack, Sameeta; mo yumi gat Joy; mo Ethan. Mo bae yumi tokbaot smol abaot wanem yumi jes wajem long ol tijing blong Presiden Oaks.

?Wanem i kam long maen blong yufala taem yumi stap lisin long ol toktok blong hem? ? Eniwan i wantem stat?

Ethan: Bae mi talem se hem i olsem wan joes we yumi jusum blong talem, “Bae mi mi kam wan disaepol blong Kraes. Bae mi jusum Kraes iven taem i had, o iven taem ol situesen blong mi o olsem wanem mi filim i stap holembak mi. Mi save se hem i save winim hemia mo helpem mi.”

Zach: Long mi, i save had bigwan blong jusum Kraes taem i nogat wan i stap wajem yu. Mo miwan mi mas tingting strong long, ?olsem wanem bae mi save fulumap taem o jusum blong stap wan disaepol blong Jisas Kraes long taem ia?

Elda Neil L. Andersen: Tedei yumi gat wetem yumi, Chris, Olivia; Lindsey, mo Kelson. Mo mifala i no save wet blong harem ol tingting blong yufala abaot wanem yufala i jes harem long Presiden Oaks. ?Lindsay, wanem i kam long maen blong yu taem yu harem ol toktok ia?

Lindsey: Mi save se, blong stanap from trutok i wan samting we, long wol ia bae i save had, be yu mas save se yu no stap yuwan. Yu gat Spirit, mo bae mi talem se sapos yu askem blong Spirit i stap wetem yu long ol had situesen ia, bae Hem i save gaedem yu mo givim yu ol toktok we yu nid blong serem from yu no stap yuwan; yu yu pat long bigfala wok ia long wol, we i blong stap wan disaepol blong Kraes mo ripresentem Hem.

Chris: Mi ting se wan samting we i fasfas smol long toktok ia “stanap from trutok” i we i gat fasin blong agens, mo hemia nao i mekem se blong stanap from trutok i had samtaem. Be mi ting se wanem we i helpem mi i blong tingbaot tufala bigfala komanmen: wan i blong lavem God, we yumi soem taem yumi folem ol komanmen, mo tu blong lavem ol neba blong yumi. Mo mi ting se bes wei blong stanap from trutok i blong krietem wan envaeromen we i invaetem Spirit blong testifae long wanem we yu stap tokbaot. Mo bes wei blong invaetem Spirit i taem yu soem lav blong yu.

Elda Neil L. Andersen: Bifo yumi tokbaot seken topik blong yumi, ?yumi save gat wan nara toktok blong lav we i kam samples raon long wol?

Ol Yang Adalt blong Mozambique: Mifala i stap long Munhahva, Mosabik. Mifala i lavem yu, Presiden Oaks.

Ol Yang Adalt blong BYY: Mifala i lavem yu, Presiden Oaks. Mifala i talem tangkyu from eksampol blong fet blong yu truaot long laef blong yu. Mifala i lavem yu, Presiden Oaks.

Ol Yang Adalt blong Spain: Halo, Presiden mo Sista Oaks! Mifala blong Madrid long Spen. Tangkyu long ol tijing blong yu. !Mifala i lavem yu! !Tata!