Ol Fas Toktok

Hemia i gud mo i naes tumas. Mo mi tingting long hemia stret long ples ia wetem naesfala foto ia blong Sevya, Kraesia, mo mi save se Hem i stretem ol han blong Hem i kam long yufala. Mo mi talem tangkyu long naesfala toktok ia blong lav long Sevya. Tangkyu we tangkyu tumas.

Ol dia brata mo sista blong mi raon long wol, mi talemaot lav blong mi long yufala, mo mi givim long yufala lav blong niufala Fas Presidensi blong Jos—Presiden Dallin H. Oaks, Presiden Henry B. Eyring, Presiden D. Todd Christofferson.

Yes, mo tu, mi givim long yufala lav blong kworom blong mi, Ol Kworom blong Olgeta Twelef Aposol. Mi mo Kathy—mitufala i glad tumas blong stap ia long Washington D.C. Tempol Visita Senta, long sado blong naesfala haos ia blong Lod.

Mi glad tumas blong stap wetem yufala, ol naesfala yang adalt blong mifala, long ples ia mo raon long wol. Mifala i lavem yufala. Mifala i talem tangkyu from fetfulnes blong yufala long Jisas Kraes mo blong stap ol disaepol blong Hem.

Wetem tru tingting, mi prea se long nekis aoa, Spirit blong Lod bae i stap wetem yumi mo se bae yumi konfemem mo mekem fet blong yumi long Sevya mo long gospel blong Hem we i kambak, i kam strong moa. Long naet ia, bae yumi tokbaot profet mo tempol mo, olsem wanem oli poenem yumi i go long Sevya blong yumi, Jisas Kraes.

Be faswan, wan toktok blong lav we i go long Presiden Oaks, we i kam long ol yang adalt we oli stap longwe long ples ia.

Yang Adalt blong Not Kanada: Halo, Presiden Oaks. Mifala i wantem blong talem nomo se mifala i stap tingbaot yu mo sista Oaks. Mifala i stap prea from yutufala mo sendem lav blong mifala we i kam long not Kanada. Tata.

Yang Adalt Grup blong Ensign Kolej: Presiden Oaks, mifala i talem tangkyu long gudfala eksampol blong yu mo ol tijing blong yu. Mifala i lukluk fored blong stap lanem samting tru long yu.

Ol Yang Adalt long Saot Afrika: Halo i kam long Johannesburg, Saot Afrika. Mifala i lavem yu, Presiden Oaks.

Ol Yang Adalt blong Philippines: Griting, Presiden Oaks, i kam long Philippines. Mifala i glad tumas blong lanem samting tru long ol mesej blong yu.

Elda Neil L. Andersen: Evri ples raon long wol. Mi wantem statem wetem wan tabu eksperiens blong sam dei we i jes pas nomo, long Tiusdei, 14 Oktoba.

Hem i long dei ia we mifala i mit olsem ol 14 oden Aposol, blong livim kakae mo prea wetem tru tingting mo ful hat from blesing blong Lod blong oganaesem niu Fas Presidensi bakegen. Hem i wan taem we heven mo wol i joen.

Mi glad tumas long bigfala paoa mo witnes long saed blong spirit we bae mi no save fogetem mo konfemesen we i kam long mi mo wanwan long mifala, long wanwan Aposol mo mifala evriwan. Wetem ol han blong evri 13 Aposol we oli putum antap long hed blong Presiden Dallin H. Oaks, Presiden Jeffrey R. Holland i set apat long Senia Aposol blong Lod olsem Presiden blong Jos Ia blong Jisas Kraes blong Ol Lata-dei Sent.

Wetem tingting i stap daon mi givim tabu witnes blong mi se hem i profet blong Lod long wol ia. Hem i save voes blong Lod. Hem bae i lidim yumi long trutok mo poenem yumi i go long Lod Jisas Kraes. Sapos yumi wiling mo wantem blong lanem samting, maen mo spirit blong yumi bae i gro, mo ol paoa blong heven bae i blesem laef blong yumi.

Naoia Presiden Dallin H. Oaks i holem ol ki blong prishud blong God we oli fulwan, wetem atoriti blong yusum ol ki ia . Bae yu tingbaot ol toktok blong Jisas long Pita, Aposol blong Hem.

Hem talem, “Bambae mi mi givim long yu, ol ki blong niufala wol ya we God i king long hem. Nao wanem samting we yu yu blokem long wol ya, bambae God we i stap long heven, hem tu bambae i blokem, mo wanem samting we yu yu letem long wol ya bambae hem tu i letem olsem.”

Lod i talem abaot profet Josef: “From toktok blong hem, bambae yufala i kasem, semmak olsem se hem i kamaot long maot blong miwan, wetem fasin blong save wet longtaem mo wetem fet.” Ol toktok ia oli tru tu abaot profet blong yumi, Presiden Dallin H. Oaks. Tingting long hemia.

Blong 41 yia long tabu koling blong hem, Presiden Oaks i bin testifae olsem wan spesel witnes blong Lod Jisas Kraes. Bae yumi wajem.

Presiden Dallin H. Oaks (1984): Medel yia konfrens ia, hem i fas janis blong mi blong toktok long jeneral membasip blong Jos, blong talemaot se mi akseptem koling blong mi long Kaonsel blong Olgeta Twelef. … Bae mi givim ful hat, paoa blong tingting, maen mo paoa blong mi i go long bigfala tras we yufala i gat long mi, speseli long ol responsabiliti blong wan spesel witnes long nem blong Jisas Kraes long evri ples raon long wol.

Presiden Dallin H. Oaks (1987): Yumi lavem Lod Jisas Kraes. Hem i Mesaea, Sevya blong yumi, mo Ridima blong yumi. Hem i nem ia nomo we tru long Hem yumi save sef.

Presiden Dallin H. Oaks (1994): Fet long Lod Jisas Kraes i mekem yu rere long wanem we laef bae i givim long yu. Kaen fet ia i mekem yu rere blong handelem ol janis blong laef ia—blong mekem yus long ol janis we yu kasem mo harem nogud from ol janis we yu lusum.

Presiden Dallin H. Oaks (2000, “Kraes we i Laef”): Mifala i serem witnes olsem ol Aposol blong Hem we oli odenem mifala folem stret fasin we Hem i mekem—se Jisas Kraes, Hem i Kraes we i Laef, Pikinini blong God we i laef blong oltaem. Hem i bigfala King Imanuel, we i stanap tedei long raet han blong Papa blong Hem. Hem i laet, laef, mo hop blong wol.

Presiden Dallin H. Oaks (2006): Mi testifae abaot Jisas Kraes, Sevya blong yumi, we i invaetem yumi evriwan blong kam long Hem mo kam stret gud evriwan long Hem. Hem bae i hilim ol soa blong yumi mo Hem bae i mekem ol hevi samting i kam laet.

Presiden Dallin H. Oaks (2013): Blong stap folem Kraes i no wan praktis blong wanwan taem be i wan komitmen we i gogohed mo i wei blong laef we yumi save folem long evri taem mo long evri ples.

Presiden Dallin H. Oaks (2025): Mi testifae long Lod Jisas Kraes we i Stret Pikinini Ia Nomo blong God, Papa blong yumi we i no save finis. Hem i invaetem yumi blong folem kavenan rod ia we i lidim yumi i go blong joenem wan famli long heven we i no save finis. Ol siling paoa blong prishud, we oli daerektem tru long ol ki we oli kambak long Ketlan Tempol, i mekem ol famli oli kam tugeta blong taem we i no save finis. Hemia i stap hapen tru long namba blong ol tempol blong Lod, we i stap kam antap, raon long wol. Hemia i tru. Letem yumi stap pat long hem.

Presiden Dallin H. Oaks (2025): Mi save gud long laef blong mi se hemia i Jos Ia blong Jisas Kraes blong ol Lata dei Sent. Mi testifae abaot Lod Jisas Kraes, we i hed blong Jos Ia, mo mi prea from ol blesing blong Hem long yumi evriwan taem yumi lukaotem blong givim seves long Hem. Long nem blong Jisas Kraes, amen.

Elda Neil L. Andersen: Tedei, yumi wantem blong tokbaot sam long ol tijing we i gat paoa we yumi kasem long Presiden Oaks, mo yumi wantem blong tingting abaot olsem wanem ol tijing ia oli save blesem laef blong yumi. Mo long tabu ples ia long tempol, yumi wantem tu blong tokbaot olsem wanem haos blong Lod i givim paoa, pis, mo revelesen long impoten taem ia long laef blong yufala.

Kathy i bin gat wan eksperiens long taem we oli anaonsem Washington D.C. Tempol mo mi wantem blong hem i tokbaot long yufala. Kathy.

Sista Kathy Andersen: Tempol ia, Washington D.C. Tempol i spesel tumas long mi. Taem mi smol, mi groap long Florida, we i stap long Saot blong Yunaeted Stet, mo tempol we i stap kolosap long mifala i stap 2,300 mael longwe aot long Sol Lek Siti.

Taem mi gat 4 yia, famli blong mi i travel i go long Sol Lek Siti blong mekem se mifala i save sil tugeta olsem wan famli. Taem mi gat 12 yia, oli anaonsem se bae oli bildim Washington D.C. Tempol. Mifala i bin glad tumas taem mifala i save se naoia bae i gat wan tempol we bae i stap 900 mael nomo longwe long mifala.

Mi tingbaot gud wan Sandei taem bisop i askem blong evri paren oli stap afta long jos blong gat wan spesel miting wetem hem. Olsem wan pikinini, mi bin stap tingting—mi ting se mi fraet smol, abaot from wanem bisop i mas mit wetem evri papa mo mama.

Mo taem oli kamaot long miting, mifala i go insaed long trak blong go hom, mo mama mo papa blong mi i talem long mi, “Bisop i bin askem, mo ol Jos lida oli askem yumi blong donetem wan bigfala amaon blong mane blong bildim Washington D.C. Tempol.”

Famli blong mi i nogat mane tumas, mo i luk olsem amaon blong mane we oli askem i bigwan tumas. Be mama mo papa blong mi i talem, “Yumi nid blong sakrifaesem sam samting olsem wan famli from hemia.” ?Be traem tingbaot blesing ia blong gat wan tempol we bae i stap 900 mael nomo longwe long mifala? Tempol ia i gat wan spesel ples insaed long hat blong mi mo famli blong mi.

Elda Neil L. Andersen: Tangkyu. I naes tumas. Tangkyu, Kathy.

Profet mo tempol i poenem yumi i go long Sevya. Long wan wol we i muvmuv, i konfius, mo i gat plante samting blong pulum tingting, ol profet mo tempol oli kipim yumi i stanap long fandesen blong yumi long saed blong spirit.

Taem wol ia i stap lusum koneksen blong hem wetem fandesen mo valiu blong hem long saed blong spirit, Lod i sendembak paoa i kam long yufala, ol disaepol blong Hem. Tu bigfala blesing we oli givim i kambak long olgeta we oli stret gud i ol tijing blong ol profet mo presen blong haos blong Lod.

Presiden Dallin H. Oaks, oli bin lukaot gud long hem, priperem hem, mo mekem hem i kam klin moa blong naenti yia. Long jeneral konfrens blong wan manis we i pas, hem i tokbaot bigfala harem nogud blong hem taem hem i gat 7 yia mo papa blong hem i ded. Singgel mama blong hem i lukaotem hem, hem i wan tija blong wan lokol pablik skul.

Long yut blong hem, maen mo spirit blong hem i gro, mo oli akseptem hem long wan long ol top yunivesiti blong loa long Yunaeted Stet, Yunivesiti blong Jikago. Hem i gat bigfala save mekem se Jif Jastis blong Yunaeted Stet Suprim Kot, Jastis Earl Waren we i gat hae posisen long ofis long ful kantri, i jusum Dallin Oaks aot long loa skul blong kam wan asisten mo klak blong hem.

Hemia i statem wan rod we bae i soem ol bigfala janis blong wol long waes yang man ia we i gat bigfala paoa long saed blong save. Presiden Oaks i no bin letem janis blong kasem plante mane mo janis blong wol i presem hem, i mekem hem i go longwe long plan ia blong Lod long hem.

Be, hem i folem ol kwaet smol voes taem Lod i lidim hem long laef. Hem i talem, “Truaot long laef blong mi, fas tija blong mi hem i smol voes mo ol filing we i toktok long mi tru long Spirit blong Lod.” Taem hem i gat 38 yia, oli singaotem hem olsem Presiden blong Brigham Yang Yunivesiti.

Ol tijing blong Presiden Oaks i jenisim miwan blong moa long 50 yia. Fas taem we mi luk Presiden Oaks hem i long taem we mi jes kambak long misin blong mi mo hem i presiden ia blong BYY, we i strong mo i gat visen. Hem i kaen, i gat gudfala fasin, mo ol studen oli laekem hem.

Hemia wan sot vidio blong wan toktok we hem i givim long semmak yia we mi bin graduet.

Presiden Dallin H. Oaks (1975): Truaot long yia, plante taem mi stap visitim wan long ol kampas kijin blong mifala, mi tekem wan trei mo stap glad long lanj blong mi wetem sam grup blong ol studen, mo hemia i mekem oli sapraes. Mi luk se hemia i wan long ol bes janis blong mi blong faenemaot wanem we i stap long maen blong ol studen blong yumi. Long wan taem we ples i stat blong kolkol, sam yia i pas, mi joenem wan tebol blong sam niu boe long Kanon Senta. Mi no introdiusum mi, be mi stat blong askem kwestin long grup ia abaot ol eksperiens mo lukluk blong olgeta long BYY. Kwiktaem, wan long ol yangfala ia, i klia se hem i no glad tumas long wan we hem i no save be i stap askem tumas kwestin, i talem, “?Yu wok long ples ia o olsem wanem?” Taem mi ansa se yes mi wok ia, hem i askem sam kwestin blong hemwan: “?Wanem nao yu yu mekem?” Mi ansa se, “Mi mi presiden.” Hem i no kea long ol fren blong hem we oli stap mekem saen long elbo blong olgeta, mo i gohed, “?Yu yu presiden blong wanem?” Mi bin eksplenem mo mifala evriwan i ded laf tugeta. Mo afta hem i talem toktok ia we bae mi neva fogetem. “O” hem i talem “mi go long evri miting mo mi luk yu yu stap, be yu stap longwe tumas, mi no save luk fes blong yu.”

Taem niu boe ia i talem toktok ia, mi gat strong tingting ia se samtaem bae mi traem blong helpem grup blong ol studen blong luk fes blong mi. Strong tingting ia i kambak samtaem afta, taem mi talem long wan studen se mi mo waef blong mi mo ol pikinini, mifala i bin mekem plante kamping, mo i tru mifala i slip long tenet truaot long naet, mo slip long graon long twantefaef defren stet blong yunion. Hem i no bilivim. “?I tru se yu stap mekem hemia?” hem i askem. “Mi no ting se wan presiden i stap mekem ol samting olsem.”

Bakegen, hem i rimaenem mi se taetol mo rod blong kasem ofis oli bigwan tumas i mekem se fulap man oli luk olsem se mi mo famli blong mi, mifala i no ol ril man. Iven ol pikinini blong mi oli filim longwe long mi afta we oli luk mi mi stap sidaon antap long fored blong givim wan long ol toktok blong mi. Wan long tufala bigfala gel blong mi i talem, “Papa, yu luk olsem se yu kros mo yu no hapi. Sapos mifala i no bin save yu, bae mifala i ting se yu kros.” Hemia i rimaenem mi se olgeta we mi kolosap nomo wetem olgeta oli bin harem mi mi laf o save se mi gat sam gudfala fasin blong gat gud taem iven long medel blong sam situesen we tingting blong mi i fasfas. Mi wantem stretem hemia from se mi bin wan tija mo i no waes blong wan tija i stap longwe long ol narawan mo blong oli luk se hem i no wan man we i ril. Hem i impoten blong yufala i luk fes blong mi semmak olsem we mi stap traem blong luk fes blong yufala.

Elda Neil L. Andersen: Taem mi stap long BYY, truaot long ol defren taem, mi gat taem blong toktok wetem hem samtaem fes tu fes. Mi eksperiensem fet mo fasin blong hem blong stap kaen mo tritim gud ol narawan. Hem i atendem, olsem we hem i save mekem, mared blong plante studen long yunivesiti.

Hem hemia wetem Sista June Oaks long mared blong mitufala. Wanem we i intresting i we, hemia i sam wik nomo bifo namba sikis pikinini blong famli Oaks i bon, Jenny Oaks Baker we i stap plei vaelen.

Tru long BYY, mi lanem samting tru long ol toktok mo tijing blong hem. Be 16 yia afta, long 1991, olsem wan memba blong Kworom blong Olgeta Twelef, oli sendem hem i go long Bordeaux, Franis, ples we mi stap givim seves olsem misin presiden long hem.

Long 32 yia blong mi olsem wan Jeneral Atoriti, mi, semmak olsem ol brata blong mi, mi bin kasem blesing tru long fasin blong hem we i wiling blong tijim, lisin long mi, mo serem bigfala waes blong hem wetem mi. Hemia i wan foto blong Presiden mo Sista Kristen Oaks wetem Kathy mo mi long Latin Amerika sam yia i pas.

Long 93 yia blong laef blong Presiden Oaks, hem i bin kasem bigfala sakses, mo tu hem i gotru ol taem blong harem nogud. Mi save hem from mi bin stap long Olgeta Seventi mo hem i stap long Olgeta Twelef taem waef blong hem, Sista June Oaks i ded, 27 yia pas. Mi wajem hem i harem nogud mo safa long ol manis we i folem. Blong givim ona long waef blong hem we hem i lavem, hem i raetem wan naesfala buk abaot laef blong sista June wetem lav mo ol tingting we hem i gat abaot waef blong hem, blong i serem wetem famli blong hem.

Afta long tu yia, hem i openem hat blong hem we i harem nogud mo i mitim Sista Kristen McMain. Sista ia i givim bigfala lav mo hapines long laef blong hem long ol 25 yia we i pas. Kathy, ?Yu save talem wan samting abaot gudfala Sista Kristen Oaks?

Sista Kathy Andersen: Mi wantem talem wan samting abaot Sista Oaks. Mi lavem Sista Kristen Oaks. Mo sapos yu save hem, bae yu laekem hem tu. Hasban blong mi i kam hom sam dei i pas, mo mi talem, “?Yu luk vidio blong Presiden mo Sista Oaks?”

Mo hem—mi no save se u bin talem long mi se yu luk o no—be mi talem, “Gud, hemia i naes tumas, mo ol yang adalt bae oli laekem hemia.” Mo hem i talem, “Yes, ating ol yang adalt i luk finis.”

Mi talem, “Be i nomata. Bae oli laekem blong wajem bakegen from se mi laekem blong wajem evri dei. I naes tumas.” Mekem se hem i agri.

Presiden Dallin H. Oaks: ?Yu yu askem blong oli mekem hemia?

Sista Kristen Oaks: Mi no askem olgeta blong mekem hemia.

Presiden Dallin H. Oaks: Long betdei blong yu, mi wantem talem tangkyu long yu blong mekem mi hapi, blong mekem mi kam wan man we i gud moa, mo wan Jos lida we i gud moa wetem plante infomesen, mo wan gudfala apu man blong tri jeneresen. Yumitu gat 29 apu pikinini mo 75 smol apu pikinini mo tu—i no longtaem bae i gat 3 — apu pikinini blong nambatri jeneresen. Hemia i woman we long 28 yia blong hem, i prisaed ova long wan bigfala populesen.

Sista Kristen Oaks: Mo mi hapi blong mekem hemia. Mi ting se wan gudfala samting long mi i blong save gat wan famli mo blong gat wan famli we i kolosap mo blong stap olsem waef blong yu.

Presiden Dallin H. Oaks: Tangkyu.

Sista Kristen Oaks: Oltaem mi talem long hem se hem i fevret wan blong mi long ful wol.

Presiden Dallin H. Oaks: Mo hem i blong mi.

Sista Kathy Andersen: ?Yufala i laekem hemia? ?Hemia i naes? Sista Kristen Oaks i wan fetful disaepol blong Jisas Kraes. Laef blong hem i fulap wetem fet mo lav. Hem i gat wan kaen hat, mo mi ting se hem i wan gudfala enjel ia we oli sendem i kam long wol.

Elda Neil L. Andersen: Mi talem tangkyu we Lod i priperem Dallin Harris Oaks truaot long plante yia i pas, i tijim hem, i givim instraksen long hem, mo i mekem hem i rere from ol las yia ia blong laef blong hem.

Long eli laef blong hem, hem i mekem wan moto blong hemwan we i : ‘“Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu long yufala.”

Hemia hem i mekem i no blong pulum ae blong wol o rij samting. Lod i bin sepem hat blong hem mo bae i yusum hem blong help sepem wanwan long yumi taem hem i stap givim seves olsem profet blong God long wol ia.

Blong talem long yufala abaot profet blong yumi, intresting peinting ia we i kam long Maynard Dixon i hang long ofis blong hem blong moa long 40 yia. Taetol blong hem i Forgotten Man.

Peinting ia i soem wan man i sidaon long step mo i harem nogud. Biaen long hem, wol i wokbaot bitim hem, oli no wantem save long hem.

Presiden Oaks i lavem evri pikinini boe mo gel blong God, mo peinting ia i rimaenem hem blong helpem olgeta we oli filim se oli stap olgetawan, oli harem nogud, oli nidim blong save hamas oli gat valiu, mo save lav blong Papa blong olgeta long Heven.

Presiden Oaks i poenemaot se taem man ia long peinting i filim se oli fogetem hem, san i stap saen long hed blong hem, i minim se Papa blong hem long Heven i save ol hadtaem blong hem. Presiden Oaks i talem se peinting ia i tijim mo rimaenem hem abaot ol samting we hem i nid blong tingbaot. Mi laekem hat blong Presiden Dallin H. Oaks.

Wetem ol yang adalt blong yumi long ples ia long Washing D.C., mifala i tokbaot tri impoten topik we Presiden Oaks i tokbaot oltaem. Be bifo hemia, bae yumi welkamem wan nara toktok blong lav blong Presiden Oaks we i kam long ol yang adalt raon long wol.

Yang Adalt Grup blong Hawae: Halo, Presiden mo Sista Oaks! Mifala i talem tangkyu from eksampol blong yutufala long mifala mo long Jos. Mifala i lavem mo sastenem yu.

Yang Adalt Grup blong Ogden, Yuta: Halo, i kam long Ogden, Yuta. Presiden Oaks, mifala i talem tangkyu from kaonsel blong yu, speseli abaot fasin blong kam olsem wan god we i wok blong wan famli. Mifala i lavem yu mo sastenem yu.

Ol Yang Adalt blong Rom, Itali: Halo, Presiden Oaks. Mifala i sendem lav blong mifala i kam long Rom Itali. Mifala i laekem ol tijing blong yu abaot famli we i no save finis, mo mifala i lukluk fored blong luk yu long ples ia long Siti We I No Save Finis. !Ta-ta! !Mifala i lavem yu!

Elda Neil L. Andersen: Ol topik blong yumi tedei, faswan hem i fasin blong stanap from trutok; seken, famli, mared, mo ol pikinini; mo nambatri revelesen.