Taukaveʻi ʻa e Moʻoní

ʻEletā Neil L. Andersen: Tau kamata ʻaki e taukaveʻi ʻa e moʻoní. Hangē ko ia ʻoku mou ʻiloʻi ʻi he fanongo kia Palesiteni Oaks ʻi he ngaahi taʻu kuohilí, ʻoku ʻikai ke ne ilifia ke lea ʻaki ʻa e moʻoní ʻi he ʻofa. ʻOku ou tanganeʻia ʻi heʻene loto-toʻá. ʻOkú ne angaʻofa mo faʻa fakakaukau maʻu pē ʻi heʻene leá, ka ʻokú ne fakapatonu ʻi hono tokoniʻi kitautolu ke tau ʻiloʻi ʻa e meʻa ʻoku totonú.

Mamata ʻi he ʻuluaki vitiō miniti ʻe taha meia Palesiteni Oaks pea mo ʻemau fealeaʻaki mo ha niʻihi ʻo ʻetau kakai lalahi kei talavou ʻoku ʻi heni mo kitautolú.

Palesiteni Dallin H. Oaks (2024): Ko e Muimui ʻia Kalaisí ʻoku ʻikai ko ha ngāue noa pē pe fakataimi. Ko ha tukupā hokohoko ia mo ha tōʻonga moʻui ʻoku totonu ke ne tataki kitautolu ʻi he taimi kotoa pē pea ʻi he feituʻu kotoa pē. ʻOku tofa ʻe Heʻene ngaahi akonakí mo e sīpingá ʻa e halá maʻá e ākonga kotoa pē ʻa Sīsū Kalaisi.

Palesiteni Dallin H. Oaks (2022): ʻOku tau moʻui ʻi ha taimi fakatuʻutāmaki, ko ha taimi ʻoku ui ai e koví ko e leleí, pea leleí ko e kovi. Kuo pau ke tau tuʻu maʻu ʻo fakafepakiʻi e ngaahi ʻulungaanga mo e angafai ʻokú ne tohoakiʻi kitautolu mei he ngaahi akonaki ʻa e ʻEikí pea mo ʻetau ngaahi fuakavá, faingamālié mo e fatongiá. Te tau lava ʻo fai ʻeni ʻi he ʻofa.

Palesiteni Dallin H. Oaks (2023): Te tau kei lava pē ʻo ʻofa ʻi he niʻihi kehé mo maʻu ha meʻa ʻoku tau faitatau ai, taʻe te tau sītuʻa mei he ngaahi moʻoni ʻoku tau ʻiló.

ʻEletā Neil L. Andersen: ʻOkú ke tui nai ki he feituʻu fakaʻofoʻofa ko ʻení? Pea te mau talanoa fekauʻaki mo hono taukaveʻi ʻa e moʻoní.

ʻOku ou ʻi heni mo ha kakai lalahi kei talavou fakaʻofoʻofa ʻe toko fā mei he ʻēlia Uāsingatoni D.C. ʻOku ʻi heni ʻa Siaki, Samita; mo Soi; mo ʻĪteni. Pea te mau kiʻi talanoa fekauʻaki mo e meʻa naʻa tau toki mamata ai ʻi he ngaahi akonaki ʻa Palesiteni Oaks.

Ko e hā ʻa e meʻa naʻa mou fakakaukau ki aí ʻi he taimi naʻa tau fanongo ai ki heʻene leá? ʻI ai ha taha ʻe fie kamata?

Ethan: Ko ha fili fakapotopoto pē ia ke pehē, “Te u hoko ko ha ākonga ʻa Kalaisi. Te u fili ʻa Kalaisi ʻo aʻu pē ki he taimi ʻoku faingataʻa aí, pe naʻa mo e taimi ʻoku taʻofi ai au ʻe hoku tūkungá pe meʻa ʻoku ou ongoʻí. ʻOku ou ʻiloʻi te Ne lava ʻo ikunaʻi ia mo tokoniʻi au.”

Zach: Kiate au, ʻe lava ke faingataʻa ange ke fili ʻa Kalaisi ʻi he taimi ʻoku ʻikai sio mai ai ha tahá. Pea ʻe pau ke u fakapapauʻi pē ʻiate au, ʻe founga fēfē haʻaku fakaʻaongaʻi ʻa e taimí pe fili ke hoko ko ha ākonga ʻa Sīsū Kalaisi ʻi he momeniti ko iá?

ʻEletā Neil L. Andersen: ʻOku ʻi heni mo kitautolu ʻi he ʻahó ni ʻa Kulisi, ʻOlivia; Linisī, mo Kelisoni. Pea ʻoku mau vēkeveke ke fanongo ki hoʻomou ngaahi fakakaukau fekauʻaki mo e meʻa naʻa mou toki fanongoa meia Palesiteni Oaks. Linisī, ko e hā ʻa e meʻa naʻá ke fakakaukau ki ai ʻi hoʻo fanongo ki he ngaahi lea ko ʻení?

Lindsey: ʻOku ou ʻiloʻi ʻe lava ke faingataʻa hono taukaveʻi ʻa e moʻoní ʻi he māmani ko ʻení, ka ʻokú te ʻiloʻi ʻoku ʻikai ke te tuenoa. ʻOkú ke maʻu ʻa e Laumālié, pea te u pehē kapau te ke kolea ʻa e Laumālié ke ʻiate koe ʻi he ngaahi tūkunga pelepelengesi ko ʻení, te Ne lava leva ʻo tataki koe mo ʻoatu ʻa e ngaahi lea ʻoku fiemaʻu ke ke vahevahé he ʻoku ʻikai ke ke tuenoa; ʻokú ke hoko ko ha konga ʻo e ngāue maʻongoʻonga taha ʻi he māmaní, ʻa ia ko e hoko ko ha ākonga ʻa Kalaisi pea mo fakafofongaʻi Ia.

Chris: ʻOku ou fakakaukau ko ha meʻa ʻoku fakahaaʻi ʻi he kupuʻi lea “taukaveʻi ʻa e moʻoní” ko e foʻi moʻoni ko ia ʻoku ʻi ai ha faʻahinga fakafepaki, pea ko e meʻa ia ʻokú ne ʻai ʻa hono taukaveʻi ʻo e moʻoní ke faingataʻa ʻi he taimi ʻe niʻihi. Ka ʻoku ou tui ko ha meʻa kuo tokoni ke u manatuʻi ʻa e ongo fekau lalahi ʻe uá: ʻuluakí ke ʻofa ki he ʻOtuá, ʻa ia ʻoku tau fakahaaʻi ʻi heʻetau muimui ki he ngaahi fekaú, ka ke ʻofa foki ki hotau kaungāʻapí. Pea ʻoku ou tui ko e founga lelei taha ke taukaveʻi ai ʻa e moʻoní ko hono faʻu ha ʻātakai ʻokú ne fakaafeʻi ʻa e Laumālié ke fakamoʻoni ki he meʻa ʻokú ke talanoa ki aí. Pea ko e founga lelei taha ke fakaafeʻi ai ʻa e Laumālié ko hono fakahaaʻi ʻa e ʻofá.

ʻEletā Neil L. Andersen: Kimuʻa pea tau talanoa ki heʻetau tefito hono uá, ʻe lava nai ke tau sio ki ha pōpoaki ʻofa ʻe taha mei ha feituʻu ʻi he funga ʻo e māmaní?

Kakai Lalahi Kei Talavou mei Mōsemipiiki: ʻOku mau ʻi Munhahva, Mozambique. ʻOfa atu, Palesiteni Oaks.

Kakai Lalahi Kei Talavou mei BYU: ʻOku mau ʻofa atu, Palesiteni Oaks. ʻOku mau houngaʻia ʻaupito ʻi hoʻo tā-sīpinga ʻo e tuí ʻi hoʻo moʻuí kotoa. ʻOfa atu, Palesiteni Oaks.

Kakai Lalahi Kei Talavou mei Sipeini: Mālō e lelei Palesiteni mo Sisitā Oaks! Ko kimautolú mei Madrid, Sipeini. Fakamālō atu ʻi hoʻomo ngaahi akonakí. ʻOku mau ʻofa atu! Kisses!