Pagbarog alang sa Kamatuoran
Elder Neil L. Andersen: Sugdan nato kini sa pagbarog alang sa kamatuoran. Kahibalo mo sa pagpaminaw ni Presidente Oaks latas sa katuigan, wala siyay kahadlok nga mosulti sa tinuod inubanan sa gugma. Nakadayeg ko sa iyang kaisog. Kanunay siyang mabination ug mahunahunaon sa iyang pakigpulong, apan direkta siya sa pagtabang nato nga makasabot unsa ang husto.
Tan-awa ang atong unang usa ka minuto nga clip gikan ni Presidente Oaks ug dayon ang atong diskusyon uban sa pipila ka young adult nga ania uban kanato.
Presidente Dallin H. Oaks (2024): Ang pagsunod ni Kristo dili usa ka kaswal o panalagsa nga buluhaton. Usa kini ka padayon nga pasalig ug pagkinabuhi nga kinahanglang mogiya kanato sa tanang higayon ug sa tanang lugar. Ang Iyang mga pagtulun-an ug ang Iyang ehemplo nagtino sa dalan alang sa matag disipulo ni Jesukristo.
Presidente Dallin H. Oaks (2022): Kita nagpuyo sa peligro nga mga panahon, diin ang daotan gitawag og maayo, ug ang maayo gitawag og daotan. Kinahanglan mobarog kita nga lig-on batok sa mga gawi ug mga binuhatan nga mopalayo nato gikan sa mga pagtulun-an sa Ginoo ug sa atong mga pakigsaad, mga pribilihiyo, ug mga obligasyon. Makahimo kita niini uban sa gugma.
Presidente Dallin H. Oaks (2023): Makahigugma gihapon kita sa uban ug makapangita og kaparehas nga opinyon nga walay pagkompromiso sa mga kamatuoran nga atong nahibaloan.
Elder Neil L. Andersen: Makatuo ba kamo niining matahom nga dapit? Ug maghisgot kita bahin sa pagbarog alang sa kamatuoran.
Kauban nako ang upat ka talagsaong young adult gikan dinhi sa Washington D.C. area. Ania si Zach, Sameeta; ania si Joy; ania si Ethan. Ug maghisgot kami og gamay bahin sa among nakita bahin sa mga pagtulun-an ni Presidente Oaks.
Unsay misantop sa inyong hunahuna sa dihang naminaw kita sa iyang mga pulong? Dunay gustong mouna?
Ethan: Murag tinuyo ang pagpili nga mosulti og, “Mamahimo kong disipulo ni Kristo. Akong pilion si Kristo bisan kon malisod, o gani bisan kon ang akong mga sitwasyon o unsay akong gibati nagpugong nako. Nahibalo ko nga makabuntog Siya niana ug makatabang nako.”
Zach: Para nako, mas lisod ang pagpili ni Kristo kon walay magtan-aw. Ug kinahanglan akong tinoon sa akong kaugalingon, unsaon nako paggamit ang akong panahon o pagpili nga mahimong disipulo ni Jesukristo nianang taknaa?
Elder Neil L. Andersen: Ania uban kanato karon si Chris, Olivia; ania sa Lindsey, ug ania si Kelson. Ug mahinamon mi nga makadungog sa inyong mga hunahuna bahin sa unsay inyong nadungog gikan ni Presidente Oaks. Lindsey, unsay misantop sa imong hunahuna sa dihang nakadungog ka niini nga mga pulong?
Lindsey: Nahibalo ko nga ang pagbarog alang sa kamatuoran usa ka butang nga, niining kalibotan, malisod, apan nahibalo ka nga wala ka mag-inusara. Anaa kanimo ang Espiritu, ug moingon ko nga kon mohangyo ka sa Espiritu nga mouban nimo niining tingali delikado nga mga sitwasyon, makahimo Siya sa paggiya nimo ug mohatag nimo sa mga pulong nga kinahanglan nimong ipakigbahin kay wala ka mag-inusara; kabahin ka sa labing mahinungdanon nga kawsa sa yuta, nga mahimong disipulo ni Kristo ug sa pagrepresentar Kaniya.
Chris: Tingali usa ka butang nga gipasabot sa mga pulong nga “barogan ang kamatuoran” mao ang kamatuoran nga adunay maingon tang kalisdanan, ug kana ang naghimo sa pagbarog alang sa kamatuoran nga malisod usahay. Apan tingali ang usa ka butang nga nakatabang nako mao ang paghinumdom sa duha ka dagkong sugo: una ang paghigugma sa Dios, nga atong mapakita pinaagi sa pagsunod sa mga sugo, apan ang paghigugma usab sa atong mga silingan. Ug sa akong hunahuna ang labing maayong paagi sa pagbarog alang sa kamatuoran mao ang pagmugna og kalikopan nga modapit sa Espiritu aron mopamatuod sa unsay inyong gihisgotan. Ug ang labing maayong paagi sa pagdapit sa Espiritu mao ang pagpakita og gugma.
Elder Neil L. Andersen: Sa dili pa ang akong ikaduhang hisgotanan, pwede bang duna tay laing pagpadayag sa gugma gikan sa bisan asa sa tibuok kalibotan?
Mga Young Adult gikan sa Mozambique: Kami taga-Munhahva, Mozambique. Gihigugma ka namo, Presidente Oaks.
Young Adult gikan sa BYU: Gihigugma ka namo, Presidente Oaks. Mapasalamaton kaayo kami sa inyong tibuok kinabuhi nga ehemplo sa pagtuo. Gihigugma ka namo, Presidente Oaks.
Mga Young Adult gikan sa Spain: Hi, Presidente ug Sister Oaks! Taga Madrid, Spain kami. Salamat sa imong mga pagtulun-an. Gihigugma ka namo! Mga halok!