Panapos nga Pakigpulong

Elder Neil L. Andersen: Nalipay kaayo ko nga nakauban ninyo nga miapil niini nga mga diskusyon ug nakadayeg kaayo sa inyong pasalig ug sa inyong pagkadisipulo. Niadtong gusto nga motan-aw pa og dugang niini nga mga pakigsultihanay, i-link kini sa elektronik nga bersiyon niini nga debosyonal.

Minahal nga kaigsoonan, si Kathy ug ako nalipay kaayo nga makauban kamo karong gabii. Kathy, puwede ba nga mopakigbahin ka og panapos nga mga pamalandong niini nga debosyonal?

Sister Kathy Andersen: Salamat. Mapasalamaton ko sa pribilihiyo sa pag-anhi uban sa akong bana karong gabii, ug makauban kamong tanan. Espesyal kaayo kini nga gabii, ug nabati nato kana sa kahiladman sa atong mga kasingkasing.

Mapasalamaton kaayo ko sa oportunidad sa umaabot nga mga adlaw, diha man sa komperensiya sa stake o magtan-aw sa kinatibuk-ang komperensiya, nga makaisa sa akong kamot ug mopaluyo ni Presidente Dallin H. Oaks isip usa ka propeta, manalagna, ug tigpadayag, ug isip ang Presidente sa Ang Simbahan ni Jesukristo sa mga Santos sa Ulahing mga Adlaw.

Ug hangtod nianang takna nga makaisa ko og taas sa akong kamot, taas kaayo sa akong kasingkasing ug mga pag-ampo, mapasalamaton ko sa akong Langitnong Amahan niining minahal nga tawo kinsa karon mao ang propeta sa Dios. Adunay kasulatan nga kanunay nga gipamulong sa akong bana ug nako kon maghunahuna mi bahin ni Presidente Oaks. Kana ang kasulatan nga anaa sa Doktrina ug mga Pakigsaad diin ang Ginoo namulong mahitungod ni Hyrum Smith.

Miingon siya, “Ako … nahigugma kaniya tungod sa kaligdong sa iyang kasingkasing, ug tungod kay siya nahigugma niana nga matarong sa akong atubangan.” Ug kana tingali nasulti namo sa makadaghan nga higayon sa among kinabuhi, mao ang kasingkasing ni Presidente Dallin H. Oaks.

Gihigugma nako ang Langitnong Amahan, ug gihigugma nako ang akong Manluluwas nga si Jesukristo. Mohatag ko sa akong pagpamatuod pinaagi sa mga pulong sa matahom, matahom nga musika nga atong nadungog karong gabhiona gikan sa choir: “Daygon ang Dios, ang Gamhanan ug Hari sa tanan.” Ug dayon laing bersikulo nga nag-ingon: Daygon ang Dios. Sa tanan nako simbahon Siya.” Gihigugma ko Siya, gisimba ko Siya sa tibuok kong kasingkasing ug sa tibuok kong kalag. Sa ngalan ni Jesukristo, amen.

Elder Neil L. Andersen: Ihatod ta ka diri.

Gimahal ko kamo.

Mapasalamaton mi sa inyong kaayo ug pagtuo ni Ginoong Jesukristo. Ganahan mi nga makauban ninyo ug sa tanan sa tibuok kalibotan—mga batan-ong lalaki ug mga batan-ong babaye, mga anak nga lalaki ug mga anak nga babaye sa Dios, mga anak sa pakigsaad, mga disipulo ni Jesukristo. Nahingangha mi sa inyong debosyon ngadto sa Manluluwas, ug nagpasalamat mi sa Dios nga nakauban namo kamo karon samtang nangandam kita sa Ikaduhang Pag-anhi sa Ginoo.

Nagpuyo kita sa makuyaw nga mga panahon—diin nagdagsang ang mga tentasyon, diin ang mga sumbanan sa kalibotan lahi ra kaayo kay sa mga sumbanan sa ebanghelyo ni Jesukristo. Nagpuyo kita sa panahon diin dili kita mahimong magyano-yano lang sa atong kaugalingong pagkadisipulo. Dihang parehas pa ko sa inyong pangedaron, usa ka propeta sa Dios miingon, “[Ang matag tawo sa pagtuo] sa kaulahian kinahanglang mosalig sa iyang hugot nga pagtuo, ug dinhi … kinahanglan siya nga mobarog.” Nasayod ko nga kini tinuod.

Laing propeta sa Dios miingon, “Ang tawo dili tinuod nga nakabig hangtod nga makita niya ang gahom sa Dios nga anaa sa mga pangulo niini nga simbahan, ug hangtod kana nga pagpamatuod modilaab diha sa [iyang] kasingkasing sama sa kalayo.” Kini usab tinuod.

Ang propeta ug ang templo motumong kanato ngadto ni Jesukristo. Isip Iyang mga disipulo niining ulahi nga mga adlaw, nga nangandam sa Iyang pagbalik, nalig-on kita sa dili masukod nga mga pamaagi pinaagi sa atong pagsaksi sa propeta sa Ginoo ug sa balay sa Ginoo.

Uban sa gahom sa Espiritu Santo, ang propeta ug ang templo maoy duha ka gamhanan nga magkauban nga mga panalangin nga gihatag sa Ginoo ngari kanato sa atong problemado nga kalibotan aron mopahimulag sa maayo gikan sa daotan, aron makasabot sa atong tinuod nga katuyoan sa atong mortalidad, ug tinuoray nga mahimong Iyang mga disipulo.

Ako mohatag sa akong pagsaksi bahin ni Presidente Dallin H. Oaks. Giandam siya ug gihinloan diha sa kalayo sa kalisod, nabag-o sa iyang lawas ug sa iyang kasingkasing aron mogiya kanato niining panahona aron mamulong sa ngalan sa Ginoo.

Ako mopamatuod nga kining templo nga anaa sa atong atubangan, ug ang tanang sagrado nga balay sa Ginoo puno sa gahom, kalinaw, kahupay, ug pagpadayag, nga gilangkoban sa mga yawe sa pagkapari nga motugot nianang mga butang nga naselyo dinhi sa yuta aron maselyo didto sa langit. Pagkamapasalamaton nato sa daghang templo karon nga gitukod sa tibuok yuta.

Usa kini ka maanindot nga panahon nga mabuhi, panahon sa pagpaabot ug pagpangandam alang sa pagbalik sa Manluluwas. Ug Siya miawhag kanato: “Ayaw kahadlok kay nabuntog ko na ang kalibotan.”

Pinaagi sa akong apostolikanhong katungod, ako mopanalangin kaninyo samtang nagtinguha sa pagpangandam sa inyong kaugalingon alang sa pagbalik sa atong Manluluwas, nga kamo mahatagan og lig-on nga pagsaksi sa propeta sa Ginoo ug sa sagradong gahom sa Iyang balaan nga balay. Mosaad ko nga ang mga anghel sa langit mopanalangin kaninyo samtang magtinguha kamo nga mahimong tinuod nga disipulo ni Jesukristo.

Mopamatuod ko nga si Jesukristo mao ang Anak sa Dios, ang Manluluwas ug Manunubos sa katawhan. Kini ang akong pagsaksi, sa ngalan ni Jesukristo, amen.