Kaminyoon, Pamilya, ug mga Anak

Elder Neil L. Andersen: Kitang tanan natandog kaayo sa mensahe ni Presidente Oaks sa miaging kinatibuk-ang komperensiya. Namulong siya sa dakong gahom bahin sa pamilya, kaminyoon, ug mga anak. Nakahinumdom mo dihang miingon siya, “Ang Simbahan ni Jesukristo usahay mailhan isip simbahan nga nakasentro sa pamilya. Tinuod kini!” Tan-awon nato kining mubo nga bidyo ug ang among diskusyon uban sa mga young adult.

Presidente Dallin H. Oaks (2025): Ang atong relasyon sa Dios ug ang katuyoan sa mortal nga kinabuhi mapasabot kon maghisgot og pamilya. … Mahinungdanon nga ang mga Santos sa Ulahing mga Adlaw dili mawagtangan sa ilang pagsabot sa katuyoan sa kaminyoon ug sa bili sa mga anak. Mao kana ang kaugmaon nga atong gipaningkamotan.

Ang doktrina sa Ang Simbahan ni Jesukristo sa mga Santos sa Ulahing mga Adlaw nakasentro sa pamilya.

Kita usa ka pamilya nga simbahan.

Presidente Dallin H. Oaks (2023): Ang kaminyoon mahinungdanon sa katuyoan sa kinabuhing mortal ug kon unsay nagsunod. Mga anak kita sa mapinanggaong Langitnong Amahan nga naglalang kanato uban sa kapasidad nga makasunod sa Iyang sugo sa pagsanay ug pagpuno sa yuta. Kana nga gahom sa paglalang usa sa labing bililhong mga gasa kanato dinhi sa mortal nga kinabuhi. Apan ang mahinungdanon niana nga gasa mao ang balaod sa kaputli, ang sugo nga ang atong mga gahom sa paglalang ikapahayag lamang sulod sa kaminyoon tali sa lalaki ug sa babaye. …

Hunahunaa kon unsay mawala sa young adult nga mga Santos sa Ulahing Adlaw kon ituyo nila nga ilangay ang ilang pagminyo sa igong gidugayon: mawala ug malangay ang mga panalangin. Nagpasabot kini sa pagkalangay sa importanteng personal nga mga kalamboan nga manghitabo sa relasyon tali sa usa ka lalaki ug usa ka babaye, bana ug asawa, sa paglambo sama sa ingon niana nga mga kalidad sa pagsakripisyo ug pagpaubos. Nagpasabot kini nga mius-os ang mga oportunidad nga magkatinabangay sa pagtukod sa gingharian sa Dios. Labing importante, nagpasabot kini nga mas modiyotay ang mga anak nga matawo nga adunay mga panalangin sa ebanghelyo.

Hinumdomi lamang, nga ang mapinanggaong Langitnong Amahan dunay plano alang sa Iyang mga young adult, ug kabahin niana nga plano mao ang pagminyo ug ang mga anak.

Elder Neil L. Andersen: Makatuo ba kamo niining matahom, matahom nga lugar dinhi mismo sa dalaygon nga talan-awon sa Washington D.C. Temple? Ug ania kita aron maghisgot bahin sa mga pamilya, sa kaminyoon, ug bahin sa mga anak.

Ug kauban nato sila si Max ug Nicole, nga minyo. Ug ania usab diri nga habig sila si Chris ug Lindsey, nga mga minyo usab. Unsay misantop sa inyong hunahuna dihang nakadungog mo ni Presidente Oaks nga namulong niining miaging komperensiya?

Max: Mapasalamaton kaayo ko ni Presidente Oaks ug sa iyang pagtudlo sa kaimportante sa pamilya. Para nako sa personal ug para ni Nicole, ang kaminyoon ngadto ni Nicole maoy usa sa labing hamili nga mga panalangin sa akong kinabuhi. Usab, ang pagbaton og pamilya. Naa mi tres anyos nga anak, si Enoch.

Nicole: Mapasalamaton ko sa mga pagtulun-an sa mga propeta ug mga apostoles bahin sa importansiya sa pamilya. Tingali sa among inadlaw-adlaw, pwedeng lisod ang pagtino kon unsay dagan sa among kinabuhi nga dunay mga trabaho ug usab pamilya. Nahibalo ko para nako, gusto ko nga makatapos og mga taas nga kurso, usa ka graduate degree, ug gusto usab ko nga dunay pamilya. Ug ang dalan sa pagbuhat niining duha dili klaro para nako. Ug si Max ug ako naggahin og daghang panahon sa pagpuasa ug pag-ampo ug pag-adto sa templo aron mosulay sa pagkat-on sa pagbalanse nianang duha ka butang. Ug gibati namo ang pag-aghat nga kon among unahon ang pamilya, mahimo ra ang tanan.

Ug wala mi mahibalo usahay samtang molabay ang mga bulan kon sa unsang paagi nga mahimo ni, apan nahimo ra. Ug dako ang akong pagpamatuod sa importansiya sa pamilya ug paghimo sa pamilya nga prayoridad.

Elder Neil L. Andersen: Lindsay, sultihi mi bahin sa imong kaminyoon ngadto ni Kris.

Lindsay: Naminyo mi dinhi niiini mismo nga templo. Ug ang pagkaselyo lamang ngadto ni Chris, sa tawo nga sama ka talagsaon ug mapinanggaon ni Chris, dako kaayo nga panalangin ang pagkahibalo nga magkauban mi, apan dili lang kaming duha, nga kami usa ka pamilya ug nakasentro ni Kristo, ug bisan unsa pa ang moabot nga mga hagit, ang pagbayad man sa student loan o pag-establisar og mga karera, nahibalo lang mi nga magtinabangay uban ni Kristo dinhi.

Chris: Tingali naminyo mi nga mas edaran na, apan tingali dili ni tungod sa kakulang sa paningkamot. Sa akong hunahuna ang Ginoo adunay tukmang panahon sa tanang butang, ug naghunahuna ko nga kaming duha nagmatinud-anon ug may pagsalig nga ang Ginoo adunay plano para namo. Ug kon magkugi mi sa pagtuman sa mga sugo, ang among panahon moabot ra gihapon.

Elder Neil L. Andersen: Kauban nato sila si Ethan, Joy, Olivia, Zach, Sameeta, Lindsey, ug Kelson. Ug maghisgot kita og gamay bahin niining tulo ka pulong: pamilya, kaminyoon, mga anak.

Kelson: Murag daghang tawo nga adunay lain-laing mga sirkumstansiya sa pamilya. Ug gibati nako ang personal nga panalangin nga nahatagan og pamilya nga naghatag nako og daghang giya, direksiyon, katuyoan, pag-ila sa kaugalingon, ug pagbati nga luwas.

Ganahan kong mamalandong lamang sa tanang panalangin nga akong nadawat nga nahimong kabahin sa usa ka pamilya, ug magtan-aw sa akong mga igsoon ug sa ilang mga pamilya, ug kon unsa kaanindot ang kinabuhi sa pamilya. Daghan kong kaila nga mga tawo. Nahibalo ko nga walay perpekto nga pamilya, apan daghan ang—sa higayon nga matilawan nimo ang kalipay nga anaa sa pamilya, makadasig ni nimo nga mangandoy ka usab niini.

Sameeta: Dili pa ko minyo, apan nagpaabot ko nga maminyo sa templo. Nahibalo ko nga ang kaminyoon mahinungdanon sa plano sa Dios, ug ang ebanghelyo mismo nagtudlo nato—nagpanalangin nato ug mohatag nato og kahimayaan sa kahangtoran. Usahay gusto nato nga mahitabo ang mga butang, apan dili.

Apan usa ka butang nga akong nakat-onan sa akong kinabuhi mao ang pagbaton og pagtuo sa tukmang panahon sa Dios. Ug nasayod ko nga may plano Siya sa matag usa kanato, ug nakaila Siya ug nahigugma kanato sa tagsa-tagsa. Bisan unsa ka dugay kini moabot, salig lang Niya.

Ug ang ikaduha nga akong nakat-onan mao ang pagpangandam sa akong kaugalingon sa espirituwal ug personal nga paagi. Ang pagpangandam sa mahangtorong kaminyoon dili magsugod sa higayon nga makakaplag ka og kauban. Makasugod ka sa imong personal nga panaw karon.

Elder Neil L. Andersen: Karon, Joy, hinaot nga OK ra nimo nga maghisgot ko niini. Mipasakop ka sa Simbahan mga duha pa ka tuig human sa pagsinati og makapasubo nga kaminyoon. Unsay imong tan-aw sa pamilya, kaminyoon karon? Unsay imong baroganan karon isip usa ka miyembro sa Simbahan?

Joy: Ganahan kaayo ko giunsa ni Presidente Oaks pagpakigsulti sa tanan, ug ganahan ko nga iyang giila nga dili ang tanang sitwasyon malipayon. Ug ganahan ko nga nakigsulti siya sa mga inahan, kay inahan ko karon gikan niana nga kaminyoon ug adunay kwatro anyos nga anak nga lalaki.

Ug ganahan ko sa iyang gisulti nga, bisan dili ka minyo karon, makatudlo gihapon ka sa imong mga anak nga maglantaw sa mga panalangin sa pamilya ug pagpaselyo diha sa templo. Gibati nako nga nakita niya pinaagi sa pagpakigsulti sa mga tawo sa dili kasarangan nga sitwasyon, o sama sa mga inahan nga dili minyo.

Elder Neil L. Andersen: Maayo kaayo nga pagkasulti.

Ethan: Usa sa mga butang nga gisulti ni Presidente Oaks kaniadto sa debosyonal sa BYU mao nga dili nimo mapugos ang espirituwal nga mga butang. Ug gibasa nako kana nga linya ug naigo gyod ko niini kay ganahan mi og espirituwal nga kaminyoon, ug ganahan mi og espirituwal nga pamilya. Ganahan mi og pamilya nga nakasentro ni Kristo. Ganahan mi og kauban nga adunay pagtuo nga among maserbisyohan, nga among masuportahan. Ug kana makaplagan lamang kon atong itutok ang atong kinabuhi ngadto ni Jesukristo. Ug murag usahay dunay pagbati sa kapakyasan dihang bata pa ta, di ba, nga “O, nahimo unta to nako,” o kini o kana, o bisan unsa. Ug sa tinuod, dili nimo mapugos ang espirituwal nga mga butang.

Elder Neil L. Andersen: Ganahan ko sa imong gisulti. Hagiton lang ka nako og gamay. Dili ka makapugos og espirituwal nga mga butang, apan makadapit ka og dugang pa nga pagpakigsulti sa mga young women. Kumusta man ang imong paghimo niana?

Ethan: Na, nahibalo ka, dunay daghang paagi dinhi. Kahibalo ka, pirmi nakong sulayan ang pagtan-aw sa tanan nga anaa sa room. Tingali usa ka app o duha ba. Apan sa tinuod, nagtuo ko nga labing importante ang pagsabot nga kana nga tinguha maoy labing importante nga butang nga atong mabatonan.

Ang paghalubilo ug pagbaton og kaisog sa pagsulti nga, nahibalo ka, anak ko sa Dios, daghan ko og maayong mga butang para nimo. Mogawas ko ug mopaila sa akong kaugalingon sa laing tawo ug basta mahibalo og dugang bahin nila ug magkat-on pa kon kinsa sila ug unsay ilang gituhoan ug unsay ilang gihimo sa ilang kinabuhi. Samtang makahibalo ka bahin sa laing tawo, mas makahibalo ka bahin sa imong kaugalingon.

Elder Neil L. Andersen: Olivia. Samtang nangita ka og tawo nga posible nimong minyoan, unsay imong gipangita?

Olivia: Murag una ug labaw sa tanan, nangita ko og tawo nga nagtuman sa iyang pakigsaad.

Elder Neil L. Andersen: Zach, may nahibaloan ka medyo daghan ang gipamulong ni Presidente Oaks mahitungod sa pamahayag sa pamilya. Unsay imong gibati mahitungod sa lahilahi nga mga baroganan nga anaa niini? Naghunahuna ka ba mahitungd niini bag-ohay lang?

Zach: Tingali duna koy duha ka hunahuna. Ug ang una mao nga lisod ang pagpaminaw sa mga lider sa Simbahan o pagbasa sa pamahayag sa pamilya ug makita nga ang akong kinabuhi wala mahiangay karong panahona, ug malisod kaayo kana. Apan tungod kay lisod dili ipasabot nga dili kana tinuod. Ug ang ikaduhang hunahuna, samtang naminaw mi sa bidyo, si Presidente Oaks naghisgot nga ang labing dako nga kalamboan moabot diha sa kaminyoon ug sa relasyon sa kaminyoon, ug ang pagkahibalo nga tinuod kana—pagtuo, pagsalig nga tinuod kana—dili ipasabot nga wala ko kinahanglan, isip dili minyo, nga makatutok sa mga pakigsaad nga akong gihimo ug pagpaningkamot nga mahimong mas Kristohanon kutob sa akong mahimo.

Elder Neil L. Andersen: Sakto. Salamat nianang maanindot nga panglantaw.

Pwede ba duna tay kataposan nga pagpadayag sa gugma alang ni Presidente Oaks sa dili pa hisgotan ang atong ikatulo nga hisgotanan?

Mga Young Adult gikan sa Tonga: Nag-ampo kami alang kanimo gikan sa matahom nga isla sa Tonga.

Mga Young Adult gikan sa Korea: Among ipadangat ang among gugma gikan sa Korea! Gihigugma ka namo, Presidente Oaks!

Mga Young Adult gikan sa Brigham Young University–Idaho: Among pribilihiyo ang pagpaluyo nimo isip ang Propeta sa Simbahan atol sa sunod nga kapanahonan sa pagpangulo sa Simbahan, Presidente Oaks. Mahinamon mi nga mosunod kanimo og madasigon nga mosuporta nimo isip mga young adult sa tibuok kalibotan.