Pasiuna nga Pakigpulong
Talagsaon kana, matahom, makapahinangha. Ug naghunahuna ko dinhi uban niining matahom nga hulagway sa Manluluwas, ang Christus, ug nasayod ko nga ang Iyang mga kamot gipaabot kaninyo. Ug salamat nianang matahom nga pagpadayag sa gugma alang sa Manluluwas. Daghan kaayong salamat.
Minahal kong kaigsoonan sa tibuok kalibotan, akong ipadayag ang akong gugma ninyo, ug ang gugma sa bag-ong giorganisar nga Unang Kapangulohan sa Simbahan—sila si Presidente Dallin H. Oaks, Presidente Henry B. Eyring, Presidente D. Todd Christofferson.
Usab, akong ipaabot ang gugma sa akong korum, ang Korum sa Napulog Duha ka Apostoles. Si Kathy ug ako—mapasalamaton nga ania dinhi sa Washington D.C. Temple Visitors’ Center, ubos sa landong niining maanindot nga balay sa Ginoo.
Malipayon ko nga nakauban mo, among talagsaong mga young adult, dinhi ug sa tibuok kalibotan. Kami nagmahal kaninyo. Mapasalamaton kami sa inyong debosyon diha ni Jesukristo ug sa pagkahimong Iyang mga disipulo.
Matinuoron kong nag-ampo nga sa mosunod nga oras ang Espiritu sa Ginoo mag-uban nato ug ang atong pagtuo sa Manluluwas ug sa Iyang gipahiuli nga ebanghelyo malig-on ug mapamatud-an. Karon, maghisgot ta bahin sa propeta ug sa templo ug giunsa nila pagpunting nato ngadto sa Manluluwas, si Jesukristo.
Apan una, ang pagpadayag og gugma ngadto ni Presidente Oaks gikan sa mga young adult nga layo dinhi.
Mga Young Adult gikan sa Northern Canada: Hi, Presidente Oaks. Gusto lang namong mahibalo mo nga naghunahuna mi ninyo ug ni Sister Oaks. Among gipaabot ninyo ang among mga pag-ampo gikan sa northern Canada. Bye.
Grupo sa mga Young Adult gikan sa Ensign College: Presidente Oaks, mapasalamaton kaayo kami sa imong ehemplo ug mga pagtulun-an. Mahinamon mi nga makakat-on gikan nimo.
Mga Young Adult gikan sa South Africa: Hello gikan sa Johannesburg, South Africa. Gihigugma ka namo, Presidente Oaks.
Mga Young Adults gikan sa Pilipinas: Kumusta, Presidente Oaks, gikan sa Pilipinas. Naghinamhinam mi nga makakat-on gikan sa imong mga mensahe.
Elder Neil L. Andersen: Sa tibuok kalibotan. Gusto nakong sugdan pinaagi sa pagsugilon og sagrado kaayo nga kasinatian bag-ohay lang, Martes, Oktubre 14.
Adlaw kadto nga nagtigom mi isip 14 ka ordenado nga Apostoles, nagpuasa ug matinguhaong nag-ampo sa panalangin sa Ginoo alang sa pag-organisar og usab sa bag-ong Unang Kapangulohan. Panahon kadto nga nagtakdo sa langit ug yuta.
Mapasalamaton kaayo ko sa gamhanan ug dili malimtan nga espirituwal nga pagsaksi ug kompirmasyon nga miabot kanako ug sa matag usa kanamo ug sa tanan. Samtang ang mga kamot sa tanang 13 ka Apostoles anaa sa ulo ni Presidente Oaks, gi-set apart ni Presidente Jeffrey R. Holland ang Senior nga Apostol isip Presidente sa Ang Simbahan ni Jesukristo sa mga Santos sa Ulahing mga Adlaw.
Ako mohatag sa akong ligdong ug mapainubsanong pagsaksi nga siya ang propeta sa Ginoo dinhi sa yuta. Nakaila siya sa tingog sa Ginoo. Siya mogiya nato sa kamatuoran ug mopunting nato ngadto ni Ginoong Jesukristo. Kon kita matinguhaon, daling matudloan, ang atong hunahuna ug espiritu mapalapdan, ug ang mga gahom sa langit mopanalangin sa atong kinabuhi.
Ang mga yawe sa pagkapari sa Dios karon gihuptan na sa hingpit, uban sa awtoridad sa paggamit nianang mga yawe nga gigunitan ni Pesidente Dallin H. Oaks. Makahinumdom mo sa mga pulong ni Jesus ngadto ni Pedro, Iyang Apostol.
Miingon Siya, “Ug Ako mohatag nganha kanimo sa mga yawe sa gingharian sa langit: ug bisan unsa ang imong bugkuson dinhi sa yuta pagabugkuson didto sa langit; ug bisan unsa ang imong hubaron dinhi sa yuta pagahubaron didto sa langit.”
Ang Ginoo nagsulti bahin ni propeta Joseph; “Kay ang iyang pulong imong madawat, sama og gikan sa akong kaugalingon nga ba-ba, sa tumang pagpailob ug pagtuo.” Kini nga mga pulong tinuod usab bahin sa atong propeta, si Presidente Dallin H. Oaks. Hunahunaa kana.
Sa 41 ka tuig sa iyang sagrado nga tawag, si Presidente Oaks nagpamatuod isip usa ka espesyal nga saksi ni Ginoong Jesukristo. Atong tan-awon.
Presidente Dallin H. Oaks (1984): Kining matag tunga sa tuig nga komperensiya maoy akong unang higayon nga mamulong ngadto sa tanang sakop sa Simbahan, sa pagpadayag sa akong pagdawat sa tawag ngadto sa Konseho sa Napulog Duha. … Akong ihalad ang akong tibuok kasingkasing, gahom, hunahuna, ug kusog ngadto sa dakong pagsalig nga gihatag ngari kanako, labi na sa mga responsibilidad sa usa ka espesyal nga saksi sa ngalan ni Jesukristo sa tibuok kalibotan.
Presidente Dallin H. Oaks (1987): Gihigugma namo si Ginoong Jesukristo. Siya ang Mesiyas, atong Manluluwas, ug atong Manunubos. Ang Iyang ngalan lamang ang ngalan diin kita maluwas.
Presidente Dallin H. Oaks (1994): Ang pagtuo diha ni Jesukristo moandam kanato sa bisan unsay mahitabo sa kinabuhi. Kini nga matang sa pagtuo moandam kanato sa mga oportunidad sa kinabuhi—sa pagpahimulos niadtong atong madawat ug magpadayon agi sa kasagmuyo niadtong mawala kanato.
Presidente Dallin H. Oaks (2000, “Ang Buhi nga Kristo”): Kami mosaksi isip Iyang tinuod nga gi-orden nga Apostoles—nga si Jesukristo mao ang Buhi nga Kristo, ang imortal nga Anak sa Dios. Siya mao ang halangdong Hari Immanuel, kinsa nagbarog karon sa tuong kamot sa Iyang Amahan. Siya mao ang kahayag, ang kinabuhi, ug ang paglaom sa kalibotan.
Presidente Dallin H. Oaks (2006): Ako mopamatuod ni Jesukristo, atong Manluluwas, kinsa nagdapit kanato sa pagduol ngadto Kaniya ug mahimong hingpit diha Kaniya. Siya moayo sa atong mga samad ug Iyang papahulayon ang mga nag-antos.
Presidente Dallin H. Oaks (2013): Ang pagsunod ni Kristo dili panagsa ra nga buhat, apan padayon nga pasalig ug paagi sa kinabuhi nga buhaton sa tanang higayon ug sa tanang dapit.
Presidente Dallin H. Oaks (2025): Ako mopamatuod bahin ni Ginoong Jesukristo, nga mao ang Bugtong Anak sa Dios, atong Mahangtoron nga Amahan. Nagdapit Siya kanato sa pagsunod sa dalan sa pakigsaad nga maghatod ngadto sa panagtigom sa langitnong pamilya. Ang makaselyo nga mga gahom sa pagkapari, nga gidumala pinaagi sa gipahiuling mga yawe didto sa Kirtland Temple, mohiusa sa mga pamilya sa kahangtoran. Kini sa kasamtangan gigamit sa nagtubo nga gidaghanon nga mga templo sa Ginoo sa tibuok kalibotan. Tinuod kini. Atong himoon nga mahimo kitang kabahin niini.
Presidente Dallin H. Oaks (2025): Nahibalo ko labaw pa sa ubang butang nga kini ang Simbahan ni Jesukristo sa mga Santos sa Ulahing mga Adlaw. Ako mopamatuod ni Jesukristo, ang pangulo niini nga Simbahan, ug mohangyo sa Iyang mga panalangin ngadto sa tanan nga magtinguha sa pagserbisyo Kaniya. Sa ngalan ni Jesukristo, amen.
Elder Neil L. Andersen: Karon, gusto namong hisgotan ang ubang gamhanan nga mga pagtulun-an nga atong nadawat gikan ni Presidente Oaks, ug atong hunahunaon kon sa unsang paagi kini nga mga pagtulun-an makapanalangin sa atong kinabuhi. Ug niining sagrado nga dapit sa templo, gusto usab namong hisgotan sa unsang paagi ang balay sa Ginoo magdala og gahom, kalinaw, ug pagpadayag niining importanteng panahon sa inyong kinabuhi.
Si Kathy may kasinatian atol sa pag-anunsiyo sa Wasthington D.C. Temple nga gusto nakong madungog ninyo gikan niya. Kathy.
Sister Kathy Andersen: Kini nga templo, ang Washington D.C. Temple, espesyal kaayo para nako. Sa bata pa ko, nagdako ko sa Florida, nga anaa sa Kasadpan sa United States, ug ang among labing duol nga templo may gilay-on nga 3,701 ka kilometro didto sa Salt Lake City.
Dihang nag-edad ko og kwatro anyos, ang akong pamilya mibiyahe sa Salt Lake City aron maselyo mi isip usa ka pamilya. Dihang nag-edad ko og dose anyos, adunay pahibalo nga tukoron ang Washington D.C. Temple. Nalipay kaayo ming naghunahuna nga ang templo 1,448.41 ka kilometro na lang ang gilay-on gikan namo.
Nakahinumdom kaayo ko sa Dominggo nga mihangyo ang bishop nga ang tanang ginikanan mopabilin human sa pagsimba alang sa espesyal nga miting uban niya. Isip usa ka bata, nahibulong ko—nakuyawan ko nganong magmiting ang bishop sa tanang ginikanan.
Paggula nila gikan sa miting, misakay mi sa sakyanan aron mopauli, ug ang akong mama ug papa misulti nako, “Ang bishop naghangyo, ug kita gihangyo sa mga lider sa Simbahan, nga modonar og dako-dako nga kwarta alang sa pagtukod sa Washington D.C. Temple.”
Walay daghang kwarta ang akong pamilya, ug murag dako-dako ang gihangyo nga ilang ihatag. Apan si Mama ug si Papa miingon, “Kinahanglan mosakripisyo ta og ubang butang sa pamilya alang niini. Apan mahunahuna ba ninyo nga mabulahan kaayo mi nga dunay templo nga 1,448 kilometro ra ang gilay-on gikan namo?” Kini nga templo adunay espesyal nga dapit sa akong kasingkasing ug para sa akong pamilya.
Elder Neil L. Andersen: Salamat. Nindot. Salamat, Kathy.
Ang propeta ug ang templo nagpunting kanato ngadto sa Manluluwas. Dinhi sa kalibotan nga gubot, samok, ug daghang makabalda, ang propeta ug ang templo kanunayng moangkla nato ngadto sa atong espirituwal nga pundasyon.
Samtang nagpalayo ang kalibotan gikan sa espirituwal nga kasegurohan, ang Ginoo nagpadala kaninyo og makahulip nga gahom, Iyang mga disipulo. Ang duha sa dagkong makahulip nga panalangin alang sa mga matarong mao ang mga pagtulun-an sa mga propeta ug ang mga gasa sa balay sa Ginoo.
Si Presidente Dallin H. Oaks gigahin, giandam, ug gilunsay sulod sa sobra sa siyam ka dekada. Sa miaging bulan nga komperensiya, namulong siya bahin sa iyang dakong kasubo sa edad nga 7 dihang namatay ang iyang amahan. Gipadako siya sa nag-inusarang inahan, magtutudlo sa lokal nga publiko nga eskuwelahan.
Sa iyang pagkabatan-on, ang iyang pangisip ug espiritu milambo, ug nadawat siya sa usa sa labing inila nga unibersidad sa pamalaod sa United States, ang University of Chicago. Taas ang iyang grado nga ang chief justice sa United States Supreme Court, si Justice Earl Warren, nga naghupot sa labing taas nga opisina sa husgado sa tibuok nasod, mipili ni Dallin Oaks gikan sa law school aron mahimong iyang assistant ug clerk.
Kini ang sinugdan nga napaila kining batan-on nga adunay kinaadman ug kapasidad sa dagkong mga kahigayonan sa kalibotan. Si Presidente Oaks wala magpalayo sa plano sa Ginoo para niya bisan sa daghang tanyag sa pinansiyal nga kauswagan ug kalibotanong dungog.
Hinuon, gisunod niya kadtong hilom nga mga pagdasig samtang ang Ginoo migiya kaniya. Miingon siya, “Sa tibuok kong kinabuhi, ang akong unang magtutudlo mao ang hinay ug malumong tingog ug pagbati gikan sa Espiritu sa Ginoo.” Sa edad nga 38, gitawag siya nga presidente sa Brigham Young University.
Ako personal nga natudloan, nagiyahan, ug naimpluwensya ni Presidente Oaks ug sa iyang mga pagtulun-an sa sobra sa 50 ka tuig. Ang akong unang paghimamat ni Presidente Oaks nahitabo sa akong pagpauli gikan sa misyon ug siya ang madasigon ug may panglantaw nga presidente sa BYU. Siya mabination ug matinagdanon ug gihigugma sa mga estudyante.
Ania ang mubo nga bahin sa pakigpulong nga iyang gihatag sa tuig nga ako migradwar.
Presidente Dallin H. Oaks (1975): Atol sa tuig, kanunay kong mobisita sa mga kapetirya sa kampus, mokuha og tray, ug modungan og paniudto sa ubang nasorpresa nga grupo sa mga estudyante. Mao kini ang labing maayong higayon sa pagtino kon unsay anaa sa hunahuna sa mga estudyante. Usa ka tinglarag pipila ka tuig na ang milabay misagol ko sa lamesa sa freshman nga mga lalaki didto sa Cannon Center. Wala ko magpaila, misugod ko sa pagpangutana sa grupo bahin sa ilang kasinatian ug panglantaw sa BYU. Wala madugay, usa ka batan-ong lalaki, klaro nga nairita sa pag-imbestigar gikan sa usa ka estranghero, miingon, “Nagtrabaho ka dinhi o unsa ba?” Dihang misulti ko nga nagtrabaho ko, nangutana siya og pipila ka pangutana: “Unsay imong trabaho?” “Ako ang presidente,” mitubag ko. Wala manumbaling sa pagsiko sa iyang kauban, mipadayon siya, “Presidente ka sa unsa?” Mipasabot ko ug medyo nangatawa ming tanan. Dayon midugang siya niini nga komentaryo nga dili nako makalimtan. “Oh, miingon siya, “Pirmi ko motambong sa tanang panagtigom ug nakakita ko nimo, pero layo kaayo ka nga dili nako makita ang imong nawong.”
Dihang mikomentaryo kining freshman nga lalaki, akong giseguro nga usahay tabangan nako ang mga estudyante nga makakita sa akong nawong. Kana nga pasalig napamatud-an sa kadugayan dihang akong gisultihan ang usa ka estudyante nga ang akong asawa ug ako kadaghan na mag-kamping, ug magpalabay sa kagabhion sulod sa among tolda, maghigda sa yuta sa lima ka lain-laing estado. Hapit dili siya makatuo. “Inyo nang gibuhat?” nangutana siya. “Dili ko makatuo nga ang usa ka presidente mohimo og sama niana.”
Napahinumdoman na sab ko nga ang hulagway ug ang distansiya sa opisina layo kaayo nga ang akong pamilya ug ako dili makita sa kadaghanan isip tinuod nga mga tawo. Bisan gani ang akong mga anak mibati sa distansiya sa pagkakita nila nako nga naglingkod sa atubangan alang sa usa sa akong mga pakigpulong. Usa sa akong kamagulangang anak nga babaye miingon, “Daddy, mora kag nasuko ug gisapot. Kon wala pa mi makaila nimo, maghunahuna unta mi nga naglagot ka.” Nagpahinumdom ni nako nga kadto lang suod nako ang nakadungog sa akong katawa o nahibalo nga duna koy makapahimuot nga kinaiya bisan kon anaa sa malisod nga mga sirkumstansiya. Gusto nakong sulbaron kini kay titser ko ug dili maayo nga ang usa ka titser layo kaayo sa ubang tawo ug dili siya tinuod nga tawo para nila. Importante nga makita ninyo ang akong nawong, sama sa akong paningkamot nga makita inyong nawong.
Elder Neil L. Andersen: Samtang didto sa BYU, pinaagi sa nagsunod-sunod nga kalihokan, nakahimo ko, usahay, sa personal nga pagpakighinabi niya. Nasinati nako ang iyang pagtuo ug pagkamakiangayon, mahunahunaon, ug interes sa mga indibiduwal. Mitambong siya, kutob sa mahimo, sa mga resepsiyon sa kasal sa daghang estudyante sa unibersidad.
Dinhi kauban siya ni Sister June Oaks sa among resepsiyon sa kasal. Makapahimuot, kay nahitabo kadto pipila lang ka semana sa wala pa matawo ang ikaunom na anak sa mga Oaks, ang bantogan nga biyolinista nga si Jenny Oaks Baker.
Human sa BYU, nakakat-on ko gikan sa iyang mga pakigpulong ug mga pagtulun-an. Apan paglabay sa 16 ka tuig, sa 1991, isip sakop sa Korum sa Napulog Duha, ang iyang assignment midala niya ngadto sa Bordeaux, France diin nagserbisyo ko isip presidente sa misyon.
Sa akong 32 ka tuig isip Kinatibuk-ang Awtoridad, ako, sama sa akong kaigsoonan, nabulahan tungod sa iyang tinguha sa pagtudlo nako, pagpaminaw nako, ug pagpakigbahin sa iyang talagsaong kaalam. Ania ang litrato ni Presidente ug Sister Kristen Oaks uban ni Kathy ug nako didto sa Latin Amerika pipila ka tuig na.
Sa 93 ka tuig sa kinabuhi ni Presidente Oaks, nakasinati siya og dagkong kalamposan, ingon man usab mga takna sa kagul-anan ug kasagmuyo. Naa ko sa Seventy ug siya sa Napulog Duha dihang ang iyang asawa, si Sister June Oaks, namatay 27 ka tuig na ang milabay. Nakita nako ang iyang kasakit ug pag-antos sa misunod nga mga bulan. Agig pagtahod sa iyang pinangga nga si June, nagsulat siya og talagsaong basahon bahin sa iyang kinabuhi ug sa iyang gugma ug pamalandong bahin niya aron ipakigbahin sa iyang pamilya.
Human sa duha ka tuig diha pa niya gibuksan ang iyang nasakitan nga kasingkasing ug nahimamat si Sister Kristen McMain. Nagdala siya og dakong gugma ug kalipay sa iyang kinabuhi sa milabay nga 25 ka tuig. Kathy, pwede bang mosulti ka mahitungod sa talagsaong Sister Kristen Oaks?
Sister Kathy Andersen: Ganahan kong mosulti bahin ni Sister Oaks. Gihigugma nako si Sister Kristen Oaks. Kon wa pa mo kaila niya, mahigugma pud mo niya. Ang akong bana miabot sa balay sa miaging duha ka adlaw, ug miingon ko, “Nakakita ka sa bidyo ni Presidente ug Sister Oaks?”
Ug siya—wa ko kahibalo kon nagsulti ka nga nakakita na ka o wala pa—apan miingon ko, “Nindot kaayo ni, ug ang mga young adult ganahan kaayo niini.” Ug miingon siya, “Basin ang tanang young adult nakakita na niini.”
Miingon ko, “Bahala na. Ganahan sila nga motan-aw niini pag-usab kay ganahan kong motan-aw niini kada adlaw. Maanindot kaayo kini.” Mao nga miuyon siya.
Presidente Dallin H. Oaks: Imo ba silang gipugos sa pagbuhat niini?
Sister Kristen Oaks: Wala nako sila pugsa.
Presidente Dallin H. Oaks: Sa imong birthday, gusto kong magpasalamat sa imong paghimo nako nga malipayon, paghimo nimo nakong mas maayong tawo, mas may kahibalo nga lider sa Simbahan, ug mas epektibo nga apohan ug apohan sa mga apo, ug apohan sa mga apo sa mga apo. Duna mi 29 ka apo ug 75 ka apo sa tuhod ug duha—hapit na tulo—ka anak sa apo sa tuhod. Kini ang babaye nga, sa edad nga 28, nagdumala og dako kaayong populasyon.
Sister Kristen Oaks: Ug kini akong pribilihiyo. Tingali ang labing nindot nga butang para nako mao ang pag-angkon og pamilya ug adunay suod nga pamilya, ug mahimong imong asawa.
Presidente Dallin H. Oaks: Salamat.
Sister Kristen Oaks: Sultihan nako siya pirmi nga siya ang akong paborito nga tawo sa tibuok kalibotan.
Presidente Dallin H. Oaks: Ug siya akoa.
Sister Kathy Andersen: Dili ba kamo ganahan niana? Dili ba kana maanindot kaayo? Si Sister Kristen Oaks usa ka mapahinungoron nga disipulo ni Jesukristo. Ang iyang kinabuhi puno kaayo sa pagtuo ug gugma. Malumo kaayo siyag kasingkasing, ug mabination kaayo siya nga anghel sa kalibotan.
Elder Neil L. Andersen: Mapasalamaton kaayo ko nga giandam sa Ginoo si Dallin Harris Oaks latas niining daghang dekada, nagtudlo niya, naggiya niya, ug nag-andam niya alang niining kataposang mga tuig sa iyang kinabuhi.
Sa batan-on pa, iyang gitino nga mag-establisar siya og personal nga motto nga mao ang: ‘“Apan maoy unaha ninyo pagpangita ang gingharian ug ang pagkamatarong gikan sa Dios, ug unya kining tanang mga butanga igadugang ra kaninyo.”
Kini iyang gihimo nga walay pagtagad sa kalibotanong dungog o bahandi. Ang Ginoo mihulma sa iyang kasingkasing ug mogamit niya sa pagtabang sa paghulma sa matag usa kanato samtang siya magserbisyo isip propeta sa Dios dinhi sa yuta.
Aron mahatagan mo og panabot sa atong propeta, kining makadani nga painting ni Maynard Dixon nagbitay sa iyang opisina sa sobra sa 40 ka tuig. Ang ulohan niini Forgotten Man [Nakalimtan nga Tawo].
Kini nga painting naghulagway sa tawo nga naglingkod sa gater sa dalan, nawad-an og paglaom. Sa iyang likod, naglakaw ang mga tawo, walay pagpakabana kaniya.
Si Presidente Oaks naghigugma sa tanang anak sa Dios, ug kini nga painting nagpahinumdom niya nga siya kinahanglang moduol niadtong mibati nga nag-inusara, nawad-an og paglaom, nagkinahanglang masayod sa ilang bili ug sa gugma sa ilang Langitnong Amahan.
Si Presidente Oaks mitudlo nga samtang ang tawo nga anaa sa painting mibati nga nakalimtan, ang adlaw nagdan-ag sa iyang ulo, nagpasabot nga ang iyang Langitnong Amahan nahibalo sa iyang mga panlimbasog. Si Presidente Oaks nagsulti bahin sa painting nga nakigsulti kini kaniya ug nagpahinumdom sa mga butang nga angay niyang hinumdoman. Ganahan ko sa kasingkasing ni Presidente Dallin H. Oaks.
Kauban sa atong mga young adult dinhi sa Washington D.C., naghisgot mi og tulo ka importanteng hisgotanan nga kanunay hisgotan ni Presidente Oaks. Apan una, atong i-welcome ang laing pagpadayag og gugma alang ni Presidente Oaks gikan sa mga young adult sa tibuok kalibotan.
Grupo sa mga Young Adult gikan sa Hawaii: Aloha, Presidente ug Sister Oaks! Mapasalamaton kami sa mga ehemplo ninyong duha ngari namo ug sa Simbahan. Kamo among gihigugma ug gipaluyohan.
Grupo sa mga Young Adult gikan sa Ogden, Utah: Hi, gikan sa Ogden, Utah. Presidente Oaks, mapasalamaton kaayo kami sa imong tambag, ilabi na bahin sa kahimayaan nga kini buluhaton sa pamilya. Kami naghigugma kanimo ug magpaluyo kanimo.
Mga Young Adult gikan sa Rome, Italy: Hi, Presidente Oaks. Among gipadangat ang among gugma gikan sa Rome, Italy. Ganahan mi sa imong pagtulun-an bahin sa mahangtorong pamilya, ug magpaabot mi nga makakita ninyo dinhi sa Eternal City. Bye-bye! Gihigugma ka namo!
Elder Neil L. Andersen: Atong mga hilisgotan karon kay una, pagbarog alang sa kamatuoran; ikaduha, pamilya, kaminyoon, ug mga anak; ug ikatulo, pagpadayag.