Naan in Kōppeļļo̧k ko
Eļap an kabwilōn̄lōn̄ im aiboojoj presentation in. Im ij ļōmņake kiiō ippān pija in eaiboojoj pijan Rilo̧mo̧o̧r, Christus, im ijeļā ke pā ko Pein rej erļo̧k n̄an kwe. Im kommool kōn am̧ kwaļo̧k jekjek in eaiboojoj kōn iakwe eo an Rilo̧mo̧o̧r. Kwolukkuun in em̧ool.
Ro jeiū im jatū ipeļaakin laļin, n̄aij kwaļo̧k aō iakwe kom̧, im n̄aij boktok n̄an kom̧ iakwe eo an Būreejtōnji eo Kein Kajuon ekāāl kar ejaake an Kabun̄ in—Būreejtōn Dallin H. Oaks, Būreejtōn Henry B. Eyring, Būreejtōn D. Todd Christofferson.
Barāinwōt, ij bōktok n̄an kom̧, em̧ool, iakwe eo an Doulul eo an Jon̄oulruo Rijilōk ro. Komro Kathy—kōm lukkun kam̧m̧oolol n̄an pād ijin ilo Washington D.C. Temple Visitor Center eo, eo ej pād ilo aelooror in im̧win aiboojoj im̧ōn Irooj.
Kōm lukkun m̧ōņōņō in pād ippami, kōm rūm̧m̧an ded ro reaiboojoj nejim, ijin im ipeļaakin laļin. Kōmij iakwe kom̧. Kōmij kam̧m̧oolol kōn wūjlepļo̧k eo ami n̄an Jisōs Kraist im ami ro rikaļoor An.
Ij jar bwe ilo awa eo ej peddo tok Jetōb eo an Irooj enaaj pād ippad im bwe tōmak ko ad ilo Rilo̧mo̧o̧r im gospel eo An em̧ōj an jepļaak tok enaaj kajoorļo̧k im pen. Jotenin, jenaaj kōnono kōn rikanaan im tampeļ im ekōjkan aer jitōn̄ļo̧k kōj n̄an Rilo̧mo̧o̧r, Jisōs Kraist.
Ak m̧oktata, juon kein kwaļo̧k iakwe n̄an Būreejtōn Oaks jān rūm̧m̧an ded ro rettoļo̧k jān ijin.
Rūm̧m̧an Ded ro jān Northern Canada: Iakwe, Būreejtōn Oaks. Kōm kōņaan bwe kwōn jeļā bwe kōmij ļōmņak kake eok im Sister Oaks. Kōmij jilkinwaj n̄an komiro am jar im iakwe jān northern Canada. Bar lo eok.
Rūm̧m̧an Ded ro jān Ensign College: Būreejtōn Oaks, kōmij lukkuun kam̧m̧oolol kōn waanjon̄ak eo am̧ im kōn katak ko am̧. Kōmij reim̧aanļo̧k n̄an am ekkatak jān kwe.
Rūm̧m̧an Ded ro jān South Africa: Iakwe jān Johannesburg, South Africa. Kōmij iakwe eok, Būreejtōn Oaks.
Rūm̧m̧an Ded ro jān Philippines: Iakwe, Būreejtōn Oaks, jān Philippines. Kōmij lukkuun m̧ōņōņō in katak jān ennaan ko am̧
Elder Neil L. Andersen: Aolepān peļaakin laļ in. Ikōņaan ijjino ilo aō ba n̄an kom̧ kōn juon en̄jake kwojarjar jejjo wōt raan ko remootļo̧k, Juje, Oktoba 14.
Kar ilo raan eo ke kōm Rijilōk ro em̧ōj kapit er kar iioon doon in jitlo̧k im jar kōn kōjeraam̧m̧an eo an Irooj ilo bar ejaake Būreejtōnji eo Kein Kajuon. Ej juon iien me ej kobaik lan̄ im laļ.
Eļap aō kam̧m̧oolol kōn kam̧ool in jetōb im kapene eo ekajoor im kakeememej me ekar itok n̄an n̄a im kajjojo iaam, n̄an juon make im ippān doon. Kōn pā ko pein aolep 13 Rijilōk ro ioon bōran Būreejtōn Dallin H. Oaks, Būreejtōn Jeffrey R. Holland kar kōjenolo̧k Rijilōk eo Eto Tata An Jerbal āinwōt Būreejtōn eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata.
N̄aij lewaj kam̧ool eo aō em̧ool im etta ke e ej rikanaan eo an Irooj ioon laļin. Ejeļā ainikien Irooj. Enaaj tōl kōj ilo m̧ool im jitōn̄ļo̧k kōj n̄an Irooj Jisōs Kraist. Ilo ad ikdeelel, ilo ad kōņaan katak, kōļmenļo̧kjen ko ad im jetōb ko ad reļapļo̧k, im kajoor an lan̄ enaaj kōjeraam̧m̧an mour ko ad.
Ki ko an priesthood eo an Anij rej kiiō kabwijer ilo tarlep eo aer, kōn mālim eo n̄an kōjerbal ki kein kabwijeri jān Būreejtōn Dallin H. Oaks. Kwomaron̄ keememej naan ko an Jisōs n̄an Pita, Rijilōk eo An.
Eaar ba, “Im Inaaj lewōj n̄an eok ki ko ki in aelōn̄ in lan̄: im jabdewōt men eo kwo naaj liāpe ioon laļ naaj liāpe ilan̄: im jabdewōt men eo kwo naaj kōtļo̧k ioon laļ, naaj kōtļo̧ke ilan̄.”
Irooj ekar ba kōn rikanaan Josep: “Bwe naan an kom̧ naaj bōke, āinwōt n̄e jān Lo̧n̄iiū make, ilo aolep kōmmaanwa im tōmak.” Naan kein rej barāinwōt m̧ool kōn rikanaan eo ad, Būreejtōn Dallin H. Oaks. Ļōmņak kake.
Ium̧win 41 iiō ilo kūr eo an ekwojarjar, Būreejtōn Oaks ar kam̧ool āinwōt juon rikam̧ool eo ejenolo̧k an Irooj Jisōs Kraist. Jen lale.
Būreejtōn Dallin H. Oaks (1984): M̧ōttan in kein karuo an kweilo̧k eo ej iien eo em̧m̧an tata aō kein kajuon n̄an kōnono n̄an aolepān membōr in Kabun̄ in, n̄an kwaļo̧k bwe ij bōk kūr eo aō n̄an Ko̧o̧njeļ eo an Jon̄oulruo eo. … Inaaj wūjlep aolepān būruō, aō maron̄, aō kōļmenļo̧kjen, im aō kajoor n̄an lōke in ippa, eļaptata n̄an eddo ko aō āinwōt juon rikam̧ool ejenolo̧k kōn etan Jisōs Kraist ilo aolepān laļ in.
Būreejtōn Dallin H. Oaks (1987): Jej iakwe Irooj Jisōs Kraist. E ej Messaia eo, ad Rilo̧mo̧o̧r, im ad Ripinmuur. Etan ej āt eo wōt me jemaron̄ mour.
Būreejtōnt Dallin H. Oaks (1994): Tōmak ilo Irooj Jisōs Kraist ej kōpooj eok n̄an jabdewōt men mour ej bōktok. Kain tōmak in ej kōpooj eok n̄an ņa mejļan iien ko rem̧m̧an an mour—n̄an bōk wōr tokjān eo an ko me rej būki im n̄an dim ilo inepata ko an ro me rej jebwābwe.
Būreejtōn Dallin H. Oaks (2000, “Kraist Eo Emour”): Kōmij kwaļo̧k kam̧ool āinwōt an Rijilōk ro kar ekkapit—bwe Jisōs Kraist ej Kraist eo Emour, eo ejjab wabanban Nejin Anij. Ej Kiin̄ Immanuel eo ekajoor potata, eo ej jutak rainin ituanbwijmaron̄ in Jemān. E ej meram eo, mour eo, im kōjatdikdik eo an laļ in.
Būreejtōn Dallin H. Oaks (2006): Ij kam̧ool bwe Jisōs Kraist, ad Rilo̧mo̧o̧r, eo karuwanene kōj aolep n̄an itok n̄an E im weeppān ilo E. E enaaj kor kineej ko ad im E enaaj kōmour ro rej eddodo.
Būreejtōn Dallin H. Oaks (2013): Ļo̧o̧r Kraist ejjab juon men bajjōk ak imminene an jet iien ak ej juon kien ej wōnm̧aanļo̧k wōt ilo wāween mour me ekitbuuj ilo aolep iien im ilo aolep jikin ko.
Būreetōn Dallin H. Oaks (2025): Ij kam̧ool bwe Irooj Jisōs Kraist, eo ej Make Wōt Jitōnbōro Nejin Anij Jemād Indeeo. E ej kūr kōj n̄an ļoor iaļ in bujen eo me ej tōlļo̧k n̄an juon ippān doon eo an baam̧le ilan̄. Kajoor ko an liāp an priesthood eo, kar tōl kōn kii ko kar kōjpeļaaktok ilo Kirtland Tampeļ, rej kobaik baam̧le ko n̄an indeeo Rej kiiō kōjerbali ilo aolep tampeļ ko an Irooj ilo aolepān laļ in. Menin em̧ool. Jen erom m̧ōttan.
Būreejtōņ Dallin H. Oaks (2025): Ijeļā eļapļo̧k jān lōke eo ilo mour eo aō bwe en̄n ej Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ij kam̧ool kōn Jisōs Kraist, eo ej bōran Kabun̄ in, im ej leļo̧k kōjeram̧m̧an ko An n̄an aolep ro rej kappukot n̄an jerbal n̄an E. Ilo etan Jisōs Kraist, amen.
Elder Neil L. Andersen: Rainin, jekōņaan kōnono kōn jet iaan katak ko rekajoor jekar buki jān Būreejtōn Oaks, im jekōņaan ļōmņak kōn ekōjkan an katak kein kōjeraam̧m̧an mour ko ad. Ilo jikin in ekwojarjar ilo tampeļ in, jekōņaan bwe kōnono kōn ekōjkan an m̧weo im̧ōn Irooj boktok kajoor, aenōm̧m̧an, im revelesōn ilo iien in eaorōk n̄an mour kein ad.
Kathy eaar wōr juon an en̄jake ilo iien eo kar kōjeļļā kōn Washington D.C. Temple me ikōņaan bwe kom̧ en ron̄ jāne. Kathy.
Sister Kathy Andersen: Tampeļ in, Washington D.C. Tampeļ, ej lukkuun aorōk n̄an n̄a. Ke iar juon leddik, iar rūttoļo̧k ilo Florida, epād ilo Southern United States, im tampeļ eo ekar epaaktata n̄an kōm kar 2,300 m̧aiļ ettoļo̧k ilo Salt Lake City.
Ke ar emen aō iiō, baam̧le eo aō kar etal n̄an Salt Lake City bwe kōmin maron̄ liāp ippān doon āinwōt juon baam̧le. Ke ar 12 aō iiō, kar kōm̧m̧ane kōjeļļā eo ke Washington D.C. Temple enaaj kar ekkal. Kōm kar m̧ōņōņō in ļōmņak ke juon tampeļ enaaj ke 900 m̧ail ettoļo̧k jān kōm.
Ilukkun keememej juon Jabōt ke bisop eo eaar kajjitōk bwe aolep m̧am̧a im baba ro ren pād wōt ālkin jar im pād ilo juon kweilo̧k ippan. Ke iar juon ajri, iar kejakļo̧kjen—āinwōt iar mijak kōn etke bisop ekar kweilo̧k ippan aolep m̧am̧a im baba ro.
Ke raar diwōjtok jān kweilo̧k eo, kōm kar uwe ilo wa eo in rool, im jinō im jema raar jiron̄ eō, “Bisop ar kajjitōk, im ritōl ran an Kabun̄ in rej kajjitōk ippād, n̄an jipan̄ kōn jāān n̄an kalōk Washington D.C. Temple.”
Baam̧le eo aō ejjab lukkun kar ļap am jāān, im eļap jon̄an jāān in kar kajjitōk bwe kōmin leļo̧k. Ak M̧am̧a im Baba raar ba, “Jenaaj aikuj kaarmejet jet men āinwōt juon baam̧le n̄an menin. Ak kwōn m̧ōk ļōmņak ke kōm naaj jeraam̧m̧an kōn juon tampeļ 900 wōt m̧ail ettoļo̧k jān kōj? Tampeļ in ejenolo̧k ilo būruō im im n̄an baam̧le eo aō.
Elder Neil L. Andersen: Kom̧m̧ool. Aiboojoj. Kom̧m̧ool, Kathy.
Rikanaan eo im tampeļ rej jitōn̄ļo̧k kōj n̄an Rilo̧mo̧o̧r. Ilo juon laļ n̄urbōktak, tarpok, im elōn̄ kain kein kōm̧ad ko, rikanaan eo im tampeļ rej dāpij kōj bwe jen emjak wōt n̄an pedped ko ad ilo jetōb.
Ilo an laļin jekadļo̧k jān jikin emjak eo an ilo jetōb, Irooj ej jilkintok jipan̄ ko rekajoor n̄an kom̧, rikaļoor ro An. Ruo iaan kōjeraam̧m̧an in jipan̄ kein reļļap n̄an ro rejim̧we rej katak ko an rikanaan ro im mennin letok ko an m̧weo im̧ōn Irooj.
Būreejtōn Dallin H. Oaks kar kōjparoke, kōpooje, im kōkajoorļo̧k iumin elōn̄ļo̧k jān ruwatimjuonn̄oul iiō ko. Ilo kweilo̧k eo eļap allōn̄ eo ļo̧k, eaar kōnono kōn būrom̧ōj eo eļap an ke ekar 7 an iiō ke jemān ekar mej. Eaar rūttoļo̧k ippān jinen eo eaar make iaan, juon rūkaki in jikuul an kien.
Ke ej jodikdik, kōlmenļo̧kjen im jetōb eo an raar eddōkļo̧k, im ekar deļo̧n̄ ilo juon university in law eļap ilo United States, University of Chicago. Ekar ļap an mālōtlōt ke Chief Justice eo an United States Supreme Court, Justice Earl Warren, eo eaar kabwijer opiij in ekajet eo ilōn̄ tata ilo aolepen laļ eo, eaar kāālet Dallin H. Oaks jān jikuul in kien n̄an erom juon an rijjipan̄ im juon an clerk.
Menin eaar jino juon iaļ me eaar waļo̧k n̄an likao in jeļāļo̧kjen im maron̄ iaļan jeraam̧m̧an ko reļļap ilo laļin. Būreejtōn Oaks eaar jab ettoļo̧k jān karōk eo an Irooj n̄an e jān mennin letok kein ikijeen jāān im nebar an laļin.
Ijelo̧kin, eaar ļoor unoojdikdik ko remera ilo an Irooj kar tōlļo̧ke. Eaar ba, “Ilo aolepān mour e aō, rūkaki eo aō eļaptata eaar ainikien eo elur im dik im en̄jake ko jān Jetōb eo an Irooj.” Ke ej 38 iiō dettan, kar kūri bwe en būreejtōn n̄an Brigham Young University.
Būreejtōn Oaks im katak ko an raar katakin eō im im̧we eō ium̧win elōn̄ļo̧k jen 50 iiō. Jinoin aō jeļā kajjeen Būreejtōn Oaks ej ke ij rooltok jān mijen eo aō im e eō ekar būreejtōn eo an BYU eloļo̧kjen im ekideelel. Eaar jouj im jeļā ņae im rijikuuļ ro raar iakwe.
En̄in ej juon pija jidikdik jen enaan eo eaar letok ilo iiō eo iaar kadiwōjļo̧k.
Būreejtōn Dallin H. Oaks (1975): Ilo iiō in, emakijkij aō loļo̧k juon iaan jikin m̧ōn̄ā ko, bōk juon tray, im kōrālep ippān jet kurup in rijikuuļ. Ij lo iien in ej iien em̧m̧antata n̄an lale ta kobban kōlmenļo̧kjen ko an rijikuul ro am. Juon jijen in fall jejjo iiō remootļo̧k iaar kobaļo̧k ilo juon tebōļ an ļaddik ro rej pād ilo iiō eo kein kajuon lo college ilo Cannon Center. Ijelo̧kin aō kwaļo̧k kadkadū, iaar jino kajjitōk ippān kurub eo kōn en̄jake im kejakļo̧kjen ko aer kōn BYU. Ejjab to, juon iaan likao ro, āinwōt n̄e eaar kūtōtō kōn abņōņō in jān juon eo ejaje kajjeen, eaar ba, “Kwōj jerbal ijin ke ta?” Ke iar uwaak ke ij jerbal ijo, ļein ar bar kajjitōk jejjo kajjitōk: “Kwōj jerbal rōt?” “N̄a ij būreejtōn eo,” ikar uwaak. Jab ello̧k n̄an an eo iturin den̄ōtn̄ōt eļbo eo an, ekar wōnm̧aanļo̧k wōt, “Kwōj būreejtōn n̄an ta?” Ikar kōmeļeļeiki im kōm ar ettōn̄ ippān doon. Innām ar ba naan in me ijamin meļo̧kļo̧k. “O,” ļein ar ba, “Ij etal n̄an aolep nokon ko im lo eok, ak kolukun ettoļo̧k ijjab loe mejām̧.”
Ke laddik in freshman in eaar ba naan in, iaar lale bwe jet iien in kajjieon̄ jipan̄ rijikuul ro loe meja. Ļōmņak in eaar jerbal tokelik ke iaar jiron̄ juon rijikuuļ ke komro lio ippa im ajri ro nejin kar ļap am kāām, im kar jokwe in bon̄ ilo tent ko am, im kiki laļ ilo ron̄oul-lalem state in union ko. Ekar jab tōmak. “M̧ool ke komij kōm̧m̧ane menin?” ļein ekar kajjitōk. “Ijjab maron̄ pijaik an juon būreejtōn kōm̧m̧an jabdewōt men āinwōt ņe.”
Bar juon alen, kar kakeememej eō mejatoto im ettoļo̧k eo an opiij eo ekar juon ļap ke baam̧le eo aō im n̄a kar āinwōt ke ejjab kōm moolin armej n̄an elōn̄. Ajri ro nejū raar bar en̄jake menin ālkin aer lo aō jijōt ijo m̧aan n̄an juon iaan ekkōnono ko aō. Juon iaan leddik ro neju rūttoļo̧k eaar ba, “Baba, koreitok in ke kollu im nana tamm̧um̧. N̄e kōm kar jaje kajjeem, kom en kar ba wōt kollu.” Menin eaar kakeememej eō ke ro repaak eō wōt em̧ōj aer ron̄ aō ettōn̄ ak jeļā ke ewōr jidik kalimomo ippa jekdoon ilo jekjek ko relukkun kainepata. Iaar kōņaan ņa mejļan menin kōnke n̄a juon rūkaki im ejjab jejjōt n̄e juon rūkaki en ettoļo̧k jān ro jet ke āinwōt n̄e ejjab m̧oolin armej. Eaorōk bwe kom̧win loe meja, āinwōt aō kajjion̄ loe mejami.
Elder Neil L. Andersen: Ke kar pād ilo BYU, jān juon kōro̧ro in m̧akūtkūt ko, ikar maron̄, jān iien n̄an iien, n̄an iaio ippān. Iar en̄jake tōmak eo an im kejakļo̧kjen eo an ejim̧we, ļōmņak em̧m̧an, im ikdeelel eo an ilo armej ro kajjojo. Ekoņ pād lo, n̄e emaron̄, kejota ko an m̧are ko an elōn̄ rijikuuļ ro ilo university eo.
Ijin ej pād ippān Sister June Oaks ilo kejota in m̧are eo am. Ilo m̧ool, iien eo kar jejjo wōt wiik m̧okta jān ļotak eo an ajri ro kein kajiljilijno nejin Oaks ro, rekōjan̄jan̄ violin eo ebun̄bun̄ Jenny Oaks Baker.
Ālkin BYU, iaar katak jen enaan im katak ko an. Ak 16 iiō tokelik, ilo 1991, āinwōt juon uwaan Doulul eo an Jon̄oulruo ro, kūr eo an eaar bōke n̄an Bordeaux, France, ijo iaar jerbal āinwōt juon mijen būreejtōn.
Ilo 32 iiō ko aō āinwōt juon Ritōl Eutiej, n̄a, āinwōt ritōl ro jet, kar jeraam̧m̧an jen kōņaan eo an n̄an katakin eō, n̄an ron̄jake eō, im jeere meletlet eo an ekabwilōn̄lōn̄ ippa. En̄iin ej juon pijaan Būreejtōn im Sister Kristen Oaks ippamro Kathy ilo Latin America jejjo iiō rem̧ootļo̧k.
Ilo 93 iiō in mour eo an Būreejtōn Oaks, em̧ōj an tōpar elōn̄ kōttōpar ko, barāinwōt iien būrom̧ōj im inepata ko. Iaar jeļā kajjeen ke iaar juon Jiljilimjuonn̄oul im ekar juon Jon̄oulruo ke kōrā pāleen, Sister June Oaks, ekar jako 27 iiō ko remootļo̧k. Iaar loe metak im en̄taan eo an ilo allōn̄ ko tokelik. N̄an kautiej jitōnbōro eo an June, eaar je juon bok ekabwilōn̄lōn̄ kōn mour eo an im iakwe eo an im pija in n̄an jeere ippān baam̧le eo an.
Ekar jab m̧ae ruo iiō tokelik ke eaar kōpeļļo̧k boro eo erup būruōn im iioon Sister Kristen McMain. Liin ekar boktok eļap iakwe im m̧ōņōņō n̄an mour eo an iumin iiō kein 25. Kathy, kwomaron ke ba jidik kōn em̧m̧an eo an Sister Kristen Oaks?
Sister Kathy Andersen: Im̧ōņōņō in ba jet men ko kōn Sister Oaks. N̄a ij iakwe Sister Kristen Oaks. Im n̄e kojanin jeļā kajjeen, konaaj bar iakwe. Ļe ippa eaar itok n̄an m̧weo jejjo raan remootļo̧k im ikar ba, “Kwaar ke loe video eo kōn Būreejtōn im Sister Oaks?
Im e—ijaje n̄e kwar ba n̄an n̄a ne kwar ak kwar jab—ak iaar ba, “Ekwe, elukkuun emman menin, im enaaj em̧m̧an ippan rum̧m̧an ded ro.” Im eaar ba, “Ekwe, rum̧m̧an ded ro jon̄an ne em̧ōj aer loe.”
Ikar ba, “Jekdoon ta. Renaaj bar m̧ōņōņō in loe kōnke em̧m̧an ippa alooje aolep raan. Elukkun aibojooj.” Kōn menin eaar errā.
Būreejtōn Dallin H. Oaks: Kwaar ke ba ren kōm̧m̧ane menin?
Sister Kristen Oaks: Ikar jab ba ren kōm̧m̧ane menin.
Būreejtōņ Dallin H. Oaks: Ilo raan in ļotak in am̧, ikōņaan kam̧m̧oolol eok kōn am̧ kam̧ōņōņōik eō, kōm̧m̧an bwe in juon em̧m̧aan em̧m̧anļo̧k, im juon ritōl an Kabun̄ in emeļeļeļo̧k, im juon jim̧m̧a im jim̧m̧aan-jim̧m̧a eo eo em̧m̧an. Ewōr 29 jibūm̧ro ajri ro im 75 jibūm̧-jibum̧ ajri ro im ruo—ejjab to enaaj jilu—jibūm̧-jibūm̧ ro ajri ro. En̄in ej juon kōrā eo, ke ej 28 iiō dettan, kar tōl ilo juon jarlepju eļap.
Sister Kristen Oaks: Im ekar juon aō iien em̧m̧an. Ij ļōmņak men eo em̧m̧antata n̄an n̄a ej n̄an lōn̄ aō baamle im juon baam̧le eo repaake doon, im juon pāleem̧ kōrā.
Būreejtōn Dallin H. Oaks: Kom̧mol.
Sister Kristen Oaks: Aolep iien ij ba n̄ane bwe e ej armej eo em̧m̧an tata ippa ilo aolepān laļ in.
Būreejtōn Dallin H. Oaks: Im liin ej aō.
Sister Kathy Andersen: Kwoj iakwe ke menin? Elukun ke aiboojoj? Siste Kristen Oaks ej juon rikaļoor ekijejeto an Jisōs Kraist. Mour eo an eobrak kōn tōmak im iakwe. Elukun em̧m̧an būruōn, im ij ļōmņak liin ej juon enjeļ ioon laļin.
Elder Neil L. Andersen: Eļap aō kam̧m̧oolol bwe Irooj ekar kōjparok Dallin Harris Oaks iumwin elōn̄ iiō, katakni, im kōpooje n̄an iiō kein āliktata ilo mour eo an.
M̧okta ilo mour eo an, eaar kōtmane ke enaaj kar ejaake juon jibadbad me ej ba: ‘“Kom̧win pukot m̧okta aelōn̄ in Anij, im kwōjarjar eo An; im naaj korļo̧k men kein otemjej n̄an kom̧.”
Menin eaar kōm̧m̧ane ijelo̧kin kappok kabun̄bun̄ im jeraam̧m̧an an laļin. Irooj eaar ļōme būruōn im naaj kōjerbale n̄an jipan̄ ļōm kajjojo iaad ilo ad jerbal āinwōt rikanaan eo an Anij ioon laļin.
N̄an lewaj n̄an kom jidik en̄jake kōn rikanaan in ad, jin̄a in jān Maynard Dixon ekar ettoto ilo opiij en an elōn̄ļo̧k jān 40 iiō. Taitōļ eo an Forgotten Man.
Jin̄a in ej kwaļo̧k juon em̧m̧aan ilo jem̧ļo̧k in iaļ eo ej jijjōt im ebbweer. Tulikin, laļin ej wōnm̧anļo̧k wōt, ilo ejjeļo̧k ņa e.
Būreejtōn Oaks ej iakwe aolep ļaddik im leddik ro nejin Anij, im jin̄a in ekar kakeememeje ke ej aikuj jibadōkļo̧k ro rej en̄jake ajimakeke, ro rej ebbweer, ro rej jeļā aorōkier, im iakwe eo an Jemāer Ilan̄.
Būreejtōn Oaks eaar kwaļo̧k bwe ilo an em̧m̧aan eo ilo jin̄a eo en̄jake ke jemeļokļo̧ke, aļ ej romaak ibōran, meļeļein bwe Jemān Ilan̄ ejeļā en̄taan ko an. Būreejtōn Oaks eaar ba kōn jin̄a in bwe ej kōnono n̄ane im kakeememeje kōn men ko ej aikuj keememeji. Ij iakwe būruōn Būreejtōn Dallin H. Oaks.
Ippān rūm̧m̧an ded ro ad ilo Washington D.C. in, jaar kōnono kōn jilu unin kōnono ko raorōk me ekka an kar Būreejtōn Oaks kōnnaan kaki. Ak m̧okta, rum̧m̧an ded jān peļaakin laļin rej bar kwaļo̧k aer iakwe Būreejtōn Oaks.
Kumi in Rūm̧m̧an Ded ro jān Hawaii: Iakwe, Būreejtōn im Sister Oaks! Jej kam̧m̧oolol kōn waanjon̄ak eo amiro jimor n̄an kōm im Kabun̄ in. Kōmij iakwe im rejetake eok.
Kumi in Rūm̧m̧an Ded ro jān Odgen, Utah Iakwe, jān Ogden, Utah. Būreejtōn Oaks, kōmij kam̧m̧oolol kōn kapilōk eo am̧, eļaptata kōn an kwōjarjar ilōn̄tata jerbal an baam̧le. Kōm̧ij iakwe im rejetak eok.
Rūm̧m̧an Ded ro jān Rome, Itay: Iakwe, Būreejtōn Oaks. Kōmij lewaj iakwe eo am jān Rome, Italy. Kōmij iakwe katak ko am̧ kōn baam̧le indeeo, im kōmij reim̧aanļo̧k n̄an lo eok ijin ilo Eternal City. Bar iakwe! Kōmij iakwe kom̧!
Elder Neil L. Andersen: Unin kōnono ko am̧ rainin rej m̧oktata, jutak kōn m̧ool; kein karuo, baam̧le, m̧are, im ajri; kein kajilu, revelesōn.