Ang Gahom Anaa Kanila

Pagkaanindot nga mensahe gikan ni Brother Webb. Makapahinam kaayo kini nga panahon sa mga Seminary ug mga Institute. Ania na ang bag-ong kurikulom nga Pagpangandam sa Kinabuhi. Ania na ang Bag-ong Inisyatiba sa Institute. Nagkadaghan ang enrollment sa seminary; ug sa institute. Ug nagtuo ko nga kining tanan nga atong gibuhat nakatabang sa paglig-on ug paghimong talagsaon sa atong mga klase ug sa kasinatian sa mga estudyante. Apan uyon ko ni Brother Webb; adunay dugang nga kalig-on nga moabot pinaagi sa mga pakigsaad. Ug samtang ang mga batan-on—kabatan-onan ug mga young adult—mosulod, mohimo, ug mobag-o sa ilang mga pakigsaad, adunay kalig-on sa atong buhat nga makapalambo sa tanan nga atong gihimo.

Maghisgot ko’g gamay karon mahitungod sa pagpalawom sa pagkat-on sulod sa atong mga classroom. Isip Kinatibuk-ang Awtoridad, magpahigayon ko sa gitawag nga paglibot sa misyon diin among rebyohon ang kalamboan sa usa ka misyon, mag-obserba sa mga lider sa misyon, ug magsusi sa kultura ug sa kadasig sa mga misyonaryo.

Sa usa niini nga pagbisita, aduna koy makatandog nga higayon sa pag-obserba sa Konseho sa Pagpangulo sa Misyon, giapilan sa mga misyonaryo nga adunay mga tahas sa pagpangulo sa tibuok misyon. Kining batan-ong mga lider mga matinud-anon, apan naglisod sila sa desisyon kon apilon ba ang ubang mga misyonaryo nga dili pa kaayo sinati sa mga katungdanan nga gihatag sa presidente sa misyon ngadto sa tibuok misyon. Usa sa mga misyonaryo mipadayag og kabalaka nga ang ubang mga misyonaryo dili masaligan niining tag-as nga mga ekspektasyon. Dili siya segurado kon ang uban may abilidad ba sa paghimo sa tahas ug kulang sila sa espirituwal nga kahamtong aron mahimong epektibo. Para sa uban, ang pagpaapil sa dili pa kaayo sinati nga mga misyonaryo daw dako ra kaayo nga buluhaton, ug naghunahuna sila nga basin mas dali nga ang grupo na lang sa mga nangulo ang moangkon sa responsibilidad.

Nakapahiyom ko samtang nagtan-aw niining batan-ong mga misyonaryo nga, kon lantawon sumala sa kasinatian sa Simbahan, dili kaayo dakog labaw ang kasinatian kay sa ilang mga kauban nga naghatag nila og dakong kabalaka. Mihangyo dayon ko sa grupo sa mga nangulo sa paghunahuna sa oportunidad nga gihatag sa Langitnong Amahan sa tanan Niyang mga anak sa paglihok ug pag-uswag ug pagdawat og responsibilidad sa ebanghelyo. Nakita nako nga gikan sa ilang panglantaw tingali makita nga dunay dakong kalainan tali sa ilang kasinatian ug sa ilang mga kapabilidad kon itandi sa uban nga anaa sa misyon. Gipangutana dayon nako sila sa pagkonsiderar kon unsa kaha ang panglantaw sa Dios samtang nagtan-aw siya natong tanan.

Ang kalainan tali sa mga lider sa misyon ug sa uban nga aana sa misyon posibleng dili makita kon itandi sa taas nga estado sa Dios nga nagtan-aw natong tanan. Apan, kanunay Niyang gidelegar ang dagkong responsibilidad ug gipaapil ang daghan kanato isip mga bishop, mga presidente sa Relief Society, mga presidente sa elders quorum, ug, oo, mga zone leader ug mga sister training leader.

Sa Doktrina ug mga Pakigsaad, atong mabasa, “Sa pagkatinuod moingon ko, ang mga tawo kinahanglang matinguhaon nga moapil sa maayo nga katuyoan, ug mobuhat og daghang butang pinaagi sa ilang kaugalingong gawasnon nga kabubut-on, ug mopahitabo sa daghang pagkamatarong; Kay ang gahom anaa kanila, diin sila mao ang mga tinugyanan sa ilang mga kaugalingon. Ug kon ang mga tawo nagbuhat og maayo sila dili mawad-an sa ilang ganti.”

Karon maghisgot ko mahitungod sa pagsalig nga gikinahanglan sa mga magtutudlo nga tugotan ang ilang mga estudyante sa paggamit sa ilang kabubut-on sa pagpalawom sa ilang pagkat-on ug personal nga pagkakabig. Mokuha ko og daghan gikan sa Pagtudlo Sumala sa Pamaagi sa Manluluwas sa seksiyon nga giulohan og “Pagdapit og Makugihon nga Pagkat-on.”

Sa Ether kapitulo 3, ang igsoon ni Jared mihangyo sa Ginoo, “Hikapa kining mga bato, O Ginoo, sa imong tudlo, ug andama kini nga kini mohayag sa ngitngit, … aron aduna kami kahayag samtang motabok kami sa dagat.” Dugay ko nang gibasa kini nga istorya ug personal nga pag-istoryahanay isip lihok sa kinaugalingong kabubut-on gikan sa igsoon ni Jared, nga tinuod gayod. Apan hangtod karong bag-o, wala ko makamatikod sa papel sa Ginoo sa pagdapit sa igsoon ni Jared sa pag-ako sa responsibilidad. Sa wala pa kining propeta sa Basahon ni Mormon mag-andam og mga bato nga posibleng pahayagon, ang Ginoo maoy midapit niya sa pagpakaresponsable, dili lamang sa paghimo sa mga barko, apan usab sa posibleng solusyon ug sa pagkaplag og solusyon sa pagpahayag sa mga barko.

Sa wala pa itanyag sa igsoon ni Jared ang gisugyot nga solusyon, ang Ginoo maoy nangutana niining mosunod: “Unsay gusto nimo nga akong andamon alang kaninyo aron makabaton kamo og kahayag sa higayon nga kamo lamyon sa mga kahiladman sa dagat?“ Didto ra, mismo sa akong atubangan. Wala gayod ako makamatikod niini sa una. Apan sa wala pa lihoka sa igsoon ni Jared kadtong iyang gihimo nga gidayeg kaayo nato, gidapit siya sa paglihok, sa pagpangita og solusyon. Oo, ang igsoon ni Jared maoy mipasiugda, apan ang Batid nga Magtutudlo midugang sa oportunidad ug kalagmitan aron mahitabo kini pinaagi sa pagdapit kaniya sa paghunahuna, paglihok, ug pagkaplag og solusyon.

Diha sa Pagtudlo Sumala sa Pamaagi sa Manluluwas, atong mabasa, “Kini sa tinuod makapahingangha nga magtan-aw sa Manluluwas nga naglakaw sa tubig. Apan dili pa kadto igo para ni Pedro. Gusto niya nga buhaton unsa ang gibuhat sa Manluluwas, kon hain Siya atua siya, ug magbaton og samang kasinatian sa iyang kaugalingon.” Sa laing pulong, ang Manluluwas midapit og makugihong pagkat-on gikan sa Iyang mga disipulo, sama sa Iyang gihimo alang sa matag usa kanato.

Karon akong gamiton ang tulo ka paagi nga kita makadapit og makugihong pagkat-on sama sa gilatid diha sa Pagtudlo Sumala sa Pamaagi sa Manluluwas. Una, “dapita ang mga tigkat-on sa pagpangandam sa pagkat-on.” Ikaduha, “awhaga ang mga tigkat-on sa pagpakigbahin sa mga kamatuoran nga ilang nakat-onan.” Ug ikatulo, “dapita ang mga tigkat-on nga puy-an ang ilang mga nakat-onan.”

Samtang akong hisgotan ang matag usa niining mga paningkamot sa pagdapit og makugihong pagkat-on, hinaot mabuhat nato ang duha ka butang: Una, Hinaot atong makita ang atong mga estudyante sama sa pagtan-aw sa Dios kanila, moila nga ang gahom anaa kanila, ug nga sa panglantaw sa Dios kitang tanan adunay katakos sa pagkat-on kon hatagan og patas nga oportunidad sa paglihok ug paggamit sa atong kabubut-on. Ikaduha, manghinaot ko nga mamalandong kamo sa mga paagi nga makadapit og makugihong pagkat-on, nga daw adunay mga dapit nga inyong mapalambo. Ug mag-ampo ko nga ang Espiritu motabang sa pagpasabot niana nga mga oportunidad sa inyong kaugalingong pagtudlo.

Diha sa Isangyaw sa Akong Ebanghelyo atong mabasa, “Ang pagkat-on gikan sa usa ka maayo nga magtutudlo importante, apan importante usab nga ikaw makabaton og makahuloganon nga mga kasinatian sa pagkat-on gikan sa imong kaugalingong pagtuon sa mga kasulatan.” Usa sa mga paagi sa pagdapit sa atong mga estudyante sa pagpangandam sa pagkat-on mao ang pagdapit nila sa pagtuon sa mga kasulatan. Kinahanglan kitang magtabang sa atong mga estudyante nga dili kaayo magsalig lamang sa klase alang sa personal nga pag-uswag sa kahibalo samtang magkat-on sila sa pag-ugmad og direkta nga personal nga relasyon sa Ginoo pinaagi sa mga kasulatan. Gawas sa atong kinatibuk-ang pagdapit sa pagtambong sa seminary o institute, atong dapiton ang mga estudyante sa pagbasa sa mga kasulatan ug sa ubang propetikanhong mga mensahe. Mas epektibo kini kon mahitabo atubangan sa diskusyon sa klase, kay ang pagpangandam makapalawom sa pagkat-on ug makapauswag sa personal o online nga diskusyon.

Daghan kaayong paagi sa pagtabang sa mga estudyante nga maandam sa pagkat-on. Usa sa mga paagi sa akong pagbuhat niini mao ang pagtapos sa matag leksiyon pinaagi sa pagpahinumdom sa basahonon para sa sunod nga klase. Kon anaa ko sa classroom, kanunay nakong buhaton kini pinaagi sa pagsulat sa sunod nga basahonon sa ibabaw nga tuo nga bahin sa pisara ug hisgotan kini sa kataposan sa klase. Siyempre, sa usa ka online nga setting, mahimo kining i-program sa disenyo sa kurso mismo. Ang ubang paagi sa pagdapit sa pagtuon sa kasulatan sa wala pa ang klase mahimong maglakip sa pagpadala og mga pahinumdom pinaagi sa email o text ngadto sa mga estudyante sa wala pa ang diskusyon sa classroom. Mahimo usab ninyong suportahan ang umaabot nga pagtuon sa kasulatan pinaagi sa pagpasidungog sa gihimong pagpangandam sa inyong mga estudyante pinaagi sa pagtawag og usa ka tawo nga mopakigbahin og butang nga iyang nakat-onan gikan sa iyang pagbasa sa kasulatan o usa ka pangutana nga iyang gilaoman nga matubag sa iyang pag-adto sa klase nianang gabhiona.

Gawas sa pagtuon sa kasulatan, adunay laing mga paagi sa pagdapit sa mga estudyante nga mangandam sa pagkat-on. Nakakita ko og epektibong mga magtutudlo nga nagpadala sa ilang mga estudyante og mga pangutana nga pamalandongan sa wala pa ang diskusyon sa classroom. Laing epektibo nga kapanguhaan sa pagpangandam mao ang pinili nga pagdapit og mga estudyante sa pag-andam daan alang sa klase aron magtudlo og usa sa mga konsepto sa leksiyon o mopakigbahin og kasinatian nga mahimong makapalawom sa pagkat-on sa uban. Kini nga mga paningkamot nagkinahanglan og mas dakong panahon ug paningkamot sa instruktor, ug kini sa kasagaran nagkinahanglan nga mas daghan kamo og mahibaloan mahitungod sa mga panginahanglan ug mga kasinatian sa inyong mga estudyante, apan makahimo kini og dakong epekto sa pagpalawom sa mga kasinatian sa pagkat-on sa tibuok klase.

Kanunay kong makahibalo kon ang mga magtutudlo nagdapit sa mga tigkat-on sa pag-andam daan, kay kana nga mga pagdapit balosan sa paningkamot sa estudyante; ang diskusyon mas lawom, mas makahuloganon, ug adunay kinatibuk-an nga tabang sa Espiritu. Palihog ikonsiderar kon unsaon ninyo sa pagdapit ang mga tigkat-on nga mangandam sa dili pa ang diskusyon o ang kalihokan sa classroom.

Karon, ang lawom nga pagkat-on nanginahanglan og mas labaw pa kay sa basta lang maminaw. Kinahanglan nato nga ang atong mga estudyante molingkod nga mag-abante ug mahimong madasigon nga mga tigkat-on. Usa sa mga paagi nga mahitabo kini kon tugotan ang mga estudyante sa pagpakigbahin unsay ilang nakat-onan sa uban. Kon mahibaloan ninyo nga gilaoman kamo nga mopakigbahin sa inyong nakat-onan, mas lahi ang inyong pagpangandam. Kini nga pagdahom makatabang usab kaninyo nga maminaw sa lahi nga paagi ug mahimong mas aktibo sa inyong pagpaminaw. Siyempre, ang mismong buhat sa pagpahayag sa inyong nakat-onan makapalawom sa maong mga panabot ug mopatin-aw kon unsa ang nakat-onan ug nasinati sa usa ka estudyante.

Diha sa Doktrina ug mga Pakigsaad, gitambagan kita, “Pagpili taliwala kaninyo og usa ka magtutudlo, ug dili ang tanan magdungan sa pagpamulong; apan himoa nga ang usa mamulong sa tagsa-tagsa ka higayon ug himoa nga ang tanan maminaw ngadto sa iyang mga gipamulong, [ug] sa diha nga ang tanan mahuman sa pagpamulong nga ang tanan unta mahatagan og kaayohan sa tanan, ug nga ang matag tawo makabaton og managsama nga kahigayonan.”

Siyempre, ang gisangonan nga instruktor kasagaran adunay mas daghang kasinatian ug lagmit nagtuon sa materyal sa mas lawom nga lebel kaysa kadaghanan sa mga estudyante. Apan hinumdomi ang kasinatian nga akong gipakigbahin sa sinugdanan sa akong mensahe mahitungod sa mga misyonaryo nga wala mosalig sa uban sa pag-ako sa responsibilidad alang sa ilang kaugalingong kalamboan? Kon ang magtutudlo modominar sa kasinatian sa pagkat-on, tingali may pagbati siya nga usa siya ka epektibong magtutudlo tungod kay ang iyang mensahe mabati nga makapadani ug nahiuyon sa iyang kaugalingong mga pagbati. Bisan pa, pinaagi sa dili pagpa-apil sa mga estudyante, lagmit wala siya mahibalo kon sa unsang paagi ang instruksiyon sa tinuod nakaapekto sa ilang pagkat-on. Dugang pa, ang nag-inusara nga tinubdan sa instruksiyon sa kasagaran mohikaw sa ubang mga tigkat-on sa samang lawom nga mga oportunidad sa pagpakigbahin sa ilang nakat-onan.

Adunay daghang paagi sa pagtugot sa mga estudyante nga mopakigbahin sa ilang nakat-onan. Usa sa labing simple nga pagbuhat niini mao ang paghatag og panahon sa pagpamalandong. Mahitabo kini pinaagi sa usa ka journal sa pagkat-on o bisan sa usa ka kalihokan sa pagpamalandong isip kabahin sa usa ka diskusyon. Mahimo usab kini pinaagi sa pagpresentar og usa ka sambingay, usa ka sitwasyon sa kinabuhi, o usa ka personal nga aplikasyon, ug dayon tugotan ang mga estudyante sa pagpamalandong pinaagi sa sinulat nga obserbasyon sa dili pa ipakigbahin ngadto sa uban.

Ang laing paagi nga ang tanan makadawat og patas nga pribilehiyo sa kasinatian sa pagkat-on mao ang paggiya og diskusyon sa mga pangutana nga makadapit sa mga estudyante sa paghunahuna ug pagpakigbahin sa ilang mga panabot. Kaniadto moingon ko nga kon duna lang koy tulo ka makapadani nga mga pangutana, makatudlo na ko og klase sulod sa usa ka oras. Sa akong pagpangandam sa pagtudlo, maghimo una ko og mga pangutana pinaagi sa pag-angkla sa hilisgotan ug sa mga tumong sa pagkat-on sa leksiyon. Mopili ko kon unsa nga mga tudling sa kasulatan, propetikanhong mga pamahayag, o personal nga kasinatian ang labing makatudlo nianang mga tumong sa pagkat-on, dayon magsulat ko ug magsulat pag-usab og daghang lain-laing mga bersiyon sa mga pangutana nga akong gibati nga makatabang sa mga estudyante sa pagdiskobre sa mga kamatuoran mahitungod nianang mga tumong sa pagkat-on. Ang ubang mga pangutana nga akong isulat mas makapadani kay sa uban, apan ang uban epektibo sa pagpalawom sa mga pangutana alang sa akong nakaangkla sa unang mga baroganan nga hilisgotan o tema.

May mga paagi usab nga mahimo ninyo nga mas epektibo ang inyong mga pangutana ug mga pamaagi sa paghisgot. Ang pagtugot sa usa o duha ka estudyante nga maoy magpasulabi sa diskusyon walay kalainan sa magtutudlo nga maoy modominar sa mga instruksiyon. Kon mangutana ko diha sa grupo, kanunay kong mohatag og panahon human sa akong pagpangutana sa dili pa nako tawagon ang mga estudyante sa pagtubag. Mahimong dili kini komportable sa usa ka magtutudlo nga kanunayng ganahan og paspas nga tubag, apan ang paghatag og panahon sa paghulat makahimo og labing minos duha ka butang. Una, maghatag kini og panahon sa mga estudyante sa pagpamalandong. Ikaduha, maghatag kini sa magtutudlo og dugang panahon sa pagpadaghan sa mga tawo nga motubag sa panaghisgotan. Hinumdomi, dili ninyo kinahanglang tawagon ang miisa og una sa kamot. Nadiskobrehan usab nako nga ang pagpangutana daan sa mga estudyante kon unsay inyong posibleng ipangutana sa klase makatabang nila sa pag-andam ug mahimong epektibo kaayo alang sa mga estudyante nga maulawon o mobati nga ang ilang mga komento tingali dili hatagan og bili. Hinumdomi usab nga ang pagdapit nga moapil nanginahanglan nga ang palibot sa pagkat-on mabati nga luwas sa tanang paagi. Ang pagpalambo sa komento sa estudyante o bisan ang pagpadala og mubo nga sulat pagkahuman mao ang mga paagi sa pagpalig-on sa partisipasyon ug makatabang sa mga estudyante nga mobati nga ang ilang partisipasyon gihatagan og bili.

Sa kataposan, bisan ang labing maayo nga mga diskusyon sa grupo mahimong dili motugot sa tanan o bisan sa kadaghanan sa mga estudyante nga makaapil sa usa ka limitado nga oras. Kanunay nakong gamiton ang usa sa akong labing unang mga pangutana ug hangyoon ang mga estudyante sa pagpakigbahin nga magpares o pinaagi sa gagmay nga mga grupo sa mga paagi nga makaseguro nga ang tibuok klase adunay labing menos usa ka oportunidad sa pagpakigbahin ngadto sa uban sa mga kamatuoran nga ilang nakat-onan. Kon atong awhagon ang mga tigkat-on sa pagpakigbahin sa mga kamatuoran nga ilang nakat-onan, kita nagdapit kanila nga angkonon nila ang responsibilidad sa ilang pagkat-on.

Nagtudlo si Nephi nga ang gahom sa kabubut-on maoy nagtugot kanato nga kita mismo sa atong kaugalingon maoy molihok ug dili kay palihokon. Ang mga pamaagi ba sa atong classroom mga paagi nga ang mga estudyante molihok ug mahimong responsable sa ilang pagkat-on, o kini ba dili aktibong mga palibot diin ang mga estudyante yano nga gikontrol samtang hilom sila nga naminaw? Kon adunay mobisita sa inyong classroom karong semanaha, makakita ba sila sa mga estudyante nga mahatagan og oportunidad nga moapil sa proseso sa pagkat-on? Lisod ang pagdapit og makugihong pagkat-on kon dili nato tugotan ang mga estudyante sa pagpakigbahin sa ilang kaugalingong mga panabot, inspirasyon, ug pag-obserbar sa mga kamatuoran. Palihog awhaga ang mga estudyante nga ipakigbahin ang mga kamatuoran nga ilang nakat-onan ug himoon kana nga kabahin sa kasinatian sa inyong classroom.

Si Elder David A. Bednar nagtudlo, “Ang pagdapit sa paglihok importante tungod kay ang pagtuo diha sa Manluluwas usa ka baroganan sa aksiyon ug gahom. Isip alagad sa Ginoo, ang akong tahas dili lang sa pagpakatap sa impormasyon. Kon ang mga tawo molambo sa pagtuo kang Jesukristo, nan kinahanglan silang molihok sumala sa mga pagtulun-an sa Manluluwas.”

Ang katuyoan sa relihiyosong edukasyon sa Sistema sa Edukasyon sa Simbahan [Church Educational System] mao ang “pagtudlo sa gipahiuli nga ebanghelyo ni Jesukristo … sa mga [paagi] nga [makatabang] sa matag estudyante nga mahimong tibuok kinabuhi nga mga disipulo ni Jesukristo kinsa mohimo ug motuman sa mga pakigsaad, kinsa nahigugma sa Dios ug sa uban, ug kinsa adunay katakos, andam, ug mapasaligon sa pagpundok sa Israel sa duha ka habig sa tabil.” Kana nga matang sa pagkadisipulo dili mahitabo gawas kon ang atong pagtudlo maglakip sa mga pagdapit nga mahimong mas maayo ug magkinabuhi sa unsay atong nakat-onan.

Ang mosunod nga tudling direkta nga naggikan sa Pagtudlo Sumala sa Pamaagi sa Manluluwas: “‘Ipadan-ag ang inyong kahayag sa atubangan sa mga tawo.’ ‘Higugmaa ang inyong mga kaaway.’ ‘Pangayo, ug kamo hatagan.’ ‘Sulod kamo sa higpit nga ganghaan.’ [Mateo 5:16, 44; 7:7, 13.] Ang pipila sa labing tin-aw, halandomon nga mga pagdapit sa tibuok yutan-on nga pagpangalagad sa Manluluwas gipamulong samtang gitudloan Niya ang Iyang mga disipulo diha sa daplin sa bukid nga nagdung-aw sa Dagat sa Galilea. Ang katuyoan sa Manluluwas mao ang pag-usab sa mga kinabuhi, ingon nga gihimong tataw pinaagi sa Iyang panapos nga pagdapit: “Bisan kinsa nga magapatalinghog niining akong mga pulong ug magatuman niini, mahisama siya sa usa ka tawong but-an nga nagatukod sa iyang balay ibabaw sa bato’ [Mateo 7:24].” Palihog dapita ang mga tigkat-on sa inyong classroom nga puy-an ang ilang nakat-onan.

Agi og pagpangandam sa akong mensahe, gihangyo ko ang matag usa kaninyo nga mangandam pinaagi sa pagtuon sa seksiyon sa “Pagdapit og Makugihon nga Pagkat-on” diha sa Pagtudlo Sumala sa Pamaagi sa Manluluwas. Tungod kay wala man kita magkapundok sa personal, ug ang uban kaninyo tingali nagtagsa-tagsa sa pagtan-aw niini, awhagon ko kamo sa pagpakigbahin sa inyong mga panabot bahin sa mosunod nga mga pangutana ngadto sa inyong in-service nga mga grupo [mga grupo sa mga anaa sa serbisyo] atol sa panagpundok o sa online nga pamaagi nga among ihangyo nga buhaton sa inyong mga lider nga anaa sa serbisyo. Kining mga pangutana maglakip sa:

• Ngano nga ang pagkat-on sa ebanghelyo mas epektibo man kon kini naglakip sa personal nga aksiyon, pagpangandam, pagpakigbahin, ug pagtubag sa personal nga mga pagdapit?

• Unsa nga mga nakabase sa kasulatan ug propetikanhong mga pamahayag ang nagpamatuod sa inyong mga obserbasyon sa miaging pangutana?

• Ug asa niini nga mga pamahayag ang personal nga nakatandog ninyo?

Sa kataposan, palihog ikonsiderar ang matag usa sa mosunod nga mga baroganan nga atong girebyo ug sa unsang paagi kini makadapit og makugihong pagkat-on sa inyong mga estudyante: usa, dapita ang mga tigkat-on sa pagpangandam sa pagkat-on; ikaduha, awhaga ang mga tigkat-on sa pagpakigbahin sa mga kamatuoran nga ilang nakat-onan; ug ikatulo, dapita ang mga tigkat-on sa pagsunod sa unsay ilang nakat-onan.

Ang akong panapos nga pagdapit mao ang pagkonsiderar kon unsaon ninyo pagpalambo ang inyong kaugalingong pagtudlo sa matag usa niining tulo ka bahin:

• Unsaon nako nga mas makanunayon ug mas epektibong makadapit sa akong mga estudyante sa pagpangandam sa wala pa ang kasinatian sa pagkat-on?

• Sa unsang mga paagi nga akong madasig ang akong mga estudyante sa pagpakigbahin sa ilang nakat-onan ug mahimong aktibong partisipante sa akong klase?

• Sa kataposan, unsa nga mga imbitasyon ang makapalig-on sa akong mga estudyante ug makatabang nila sa pagbuhat sa unsay ilang nakat-onan?

Mga kaigsoonan, gihigugma namo kamo pag-ayo, ug kita adunay kahigayonan sa pagsunod sa sumbanan sa Manluluwas sa pagdapit og makugihong pagkat-on. Palihog og salig sa inyong mga estudyante. Kini lamang ang paagi aron sila mamahimong tawo nga maoy gikinahanglan sa Ginoo. Wala kita maghatag og impormasyon, Wala usab kita basta nagdasig lang sa atong mga estudyante sa makadasig nga personalidad ug makapadani nga mga leksiyon. Atong giandam ang mga estudyante aron mabuhi sa espirituhanong paagi sa nagkadugang nga mahagiton nga panahon. Ang espirituhanong paglahutay magdepende sa abilidad sa pag-ila sa direksiyon sa Espiritu Santo.

Si Presidente Russell M. Nelson nagtudlo, “Sa umaabot nga mga adlaw, dili na posible ang espirituhanong pagsugakod kon wala ang giya, direksyon, ug makahupay nga impluwensya sa Espiritu Santo.”

Kon atong tudloan ang atong mga estudyante sa pagkat-on nga makugihon pinaagi sa pagkahimong aktibong mga partisipante, gitudloan usab nato sila unsaon sa pagpangita ug pagdawat og direksyon gikan sa Espiritu Santo. Kini ang gikinahanglan nga mga kahanas nga makapanalangin kanila sa taas nga panahon human sila mobiya sa atong classroom. Samtang maningkamot kamo sa pagdapit niining makugihong pagkat-on, mosaad ko nga makita ninyo ang mga milagro nga mahitabo sa kinabuhi sa inyong mga estudyante. Ang gahom anaa kanila, niini ako mopamatuod, sa ngalan ni Jesukristo, amen.