Pagpangandam ug Pagtudlo sa mga Leksiyon sa Pagpangandam sa Kinabuhi: Inservice uban sa mga Magtutudlo

Brother Jaren Dyreng: Nan, mahinamon kami nga ania dinhi karon, ug alang sa oportunidad nga aduna kita nga magkauban nga mag-istoryahanay. Tingali nakadungog kamo og daghan mahitungod niining mga leksiyon sa Pagpangandam sa Kinabuhi ug sa mga butang nga atong hisgotan karon. Ang mga kahanas nga atong hisgotan kon buhaton mahimong usa ka dako nga tabang samtang kita mangandam sa pagtudlo niining mga leksiyon sa Pagpangandam sa Kinabuhi karong sunod tuig.

Ablihan ang PDF

Mao nga sa pagpaila sa atong inservice karon, gusto nakong dapiton si Brother Cavanaugh sa pagbasa sa pasiuna. Ang matag usa kaninyo gihatagan og handout, ug gusto nakong dapiton si Brother Cavanaugh sa pagbasa sa pasiuna niana, nga maghatag kanato og murag konteksto sa unsay atong magkauban nga hisgotan karon. Sige padayon.

Brother Cavanaugh: Ang mga leksiyon sa Pagpangandam sa Kinabuhi makatabang sa pagsangkap sa mga estudyante sa mga abilidad sa pagpangandam alang sa mga hagit sa kinabuhi ug sa talagsaon nga mga oportunidad. Sama sa tanang ubang mga leksiyon sa kurso sa kasulatan, ang mga leksiyon sa Pagpangandam sa Kinabuhi gidisenyo sa pagtabang sa kabatan-onan nga mapalawman ang ilang pagkakabig ngadto ni Jesukristo ug sa Iyang gipahiuli nga ebanghelyo, mahimong sarang sa mga panalangin sa templo, ug makaandam sa ilang kaugalingon, sa ilang mga pamilya, ug sa uban alang sa kinabuhing dayon kauban sa ilang Amahan sa Langit.

Kini nga mga leksiyon nakasentro ni Jesukristo, nakagamot sa pulong sa Dios, ug nakatutok sa pagtubag sa mga panginahanglan sa estudyante. Adunay pipila ka importante nga mga kahanas nga makatabang kaninyo sa epektibong pagpangandam sa pagtudlo aron matuman ang tumong sa S&I. Ikonsiderar ang mosunod nga analohiya: Ang usa ka coach sa pagpana nga nangandam sa pagtudlo kinahanglang mohatag og puntarya, usa ka gapasan ug pana, ug mga oportunidad alang sa matag estudyante sa pagpraktis.

Atong gamiton kini nga analohiya sa pagpangandam sa pagtudlo og leksiyon sa seminary.

Brother Dyreng: Salamat kaayo. Busa ako moawhag kanatong tanan sa pag-andam og usa ka pag-ampo diha sa atong mga kasingkasing samtang kita aduna niini nga panaghisgotan karon. Sama sa akong giingon, mahinamon kaayo ko bahin niini nga oportunidad ug nasayod nga kini mahimong usa ka dako nga panalangin alang kanato ug sa atong mga estudyante samtang ipatuman nato kini nga mga kahanas. Mao nga magsugod kita pinaagi sa paghisgot bahin sa katuyoan ug kon unsa ang girepresentar niana dinhi niini nga analohiya.

Gusto kong dapiton si Brother Simmons sa pagbasa sa labing unang bahin sa handout didto ubos sa katuyoan sa leksiyon.

Brother Simmons: Ang katuyoan sa leksiyon naghatag og klaro nga tumong alang sa unsay atong gilaoman nga mahibaloan, mabati, o mabuhat sa mga estudyante isip resulta sa kasinatian sa pagkat-on. Kon kita adunay klaro nga katuyoan sa leksiyon alang sa pagkat-on sa estudyante, mas makatutok kita sa unsay atong giplano nga himoon sa mga estudyante atol sa leksiyon. Kahanas numero uno: tinoa ug markahi ang katuyoan sa leksiyon nga makita diha sa kataposang kapahayag sa pasiuna nga parapo sa leksiyon.

Brother Dyreng: Sige, busa sa pagpangandam sa leksiyon 177, nga mao ang “Pagdumala sa Teknolohiya,” matag usa kaninyo adunay kopya niana. Gitan-aw nako ang pasiuna nga parapo ug ang labing kataposan nga kapahayag nagsulti sa katuyoan niini nga leksiyon. Ug kini nag-ingon, “Kini nga leksiyon makatabang sa mga estudyante sa paggamit sa panalipod ug sa pagdumala sa ilang paggamit sa teknolohiya.” Busa klaro nakong gimarkahan kana diha sa leksiyon.

Karon atong praktison kining yano nga kahanas. Ang Leksiyon 185 mao ang sunod nga leksiyon sa atong giya sa gipaspason, ug kana mao ang “Pagtukod og Emosyonal nga Kalig-on diha sa Ginoo.” Busa gusto kong mohatag og higayon sa matag usa kaninyo sa pagtan-aw sa pasiuna nga parapo ug tinoon ug klaro nga markahan ang katuyoan niini nga leksiyon.

Brother Dyreng: Mopadayon kita karon sa ikaduhang kahanas. Mao nga dapiton nako si Brother Alcala, mahimo ba nimong basahon ang kahulogan sa atong ikaduhang kahanas ubos sa gihatagan og gibug-aton nga kamatuoran? Mopadayon na kita karon ngadto sa gapasan ug pana.

Brother Alcala: Ang gihatagan og gibug-aton nga kamatuoran nga makita diha sa mga kasulatan ug sa mga pagtulun-an sa mga lider sa Simbahan, sama sa bayanan ug pana, mohatag sa mga estudyante sa mga himan nga gikinahanglan aron matuman ang katuyoan sa leksiyon. Kon ang kasinatian sa pagkat-on nakaangkla sa pulong sa Dios, atong madugangan ang kalagmitan nga ang mga estudyante makakat-on pinaagi sa gahom sa Espiritu Santo. Ikaduha nga kahanas: pangitaa ang gihatagan og gibug-aton nga kamatuoran diha sa leksiyon ug markahi kon asa kini makita diha sa mga kasulatan ug sa mga pagtulun-an sa mga lider sa Simbahan.

Brother Dyreng: Salamat kaayo. Mobalik kita sa leksiyon 177. Samtang mag-andam ako niini nga leksiyon, akong tinoon ang gihatagan og gibug-aton nga mga kamatuoran, ug akong namatikdan nga niini nga partikular nga leksiyon, adunay duha ka kamatuoran. Ang una nag-ingon, “Gitinguha sa Ginoo nga matinguhaon kitang moapil sa pagbuhat og maayo ug dili mag-usik-usik sa atong panahon.” Ug ang ikaduhang kamatuoran nag-ingon, “Kadtong makapalig-on ug makapadani sa pagbuhat ug maayo nagagikan sa Dios.”

Dayon magtuon ko sa mga kasulatan ug sa duha ka kinutlo gikan ni Elder Bednar, ug markahan ang mga pulong ug mga hugpong sa mga pulong nga nagtudlo niini nga mga kamatuoran dinhi niini nga mga tinubdan. Busa, isip ehemplo, atong tan-awon kanang unang kamatuoran: “Ang Ginoo nagtinguha nga kita magmatinguhaon nga moapil sa pagbuhat og maayo ug dili mag-usik-usik sa atong panahon.” Ug atong basahon ang mga kasulatan nga may kalabotan niini nga kamatuoran.

Busa kon kamo mahimong modungan uban kanako, atong adtoon ang Doktrina ug mga Pakigsaad, seksiyon 58, mga bersikulo 26 ug 27.

Ug samtang akong basahon kini nga mga kasulatan, akong markahan ang hugpong sa mga pulong nga “ang mga tawo kinahanglang matinguhaon nga moapil sa maayo nga katuyoan, ug mobuhat og daghang butang pinaagi sa ilang kaugalingong gawasnon nga kabubut-on.” Karon, atong adtoon ang sunod nga kasulatan, nga mao ang Doktrina ug mga Pakigsaad, seksiyon 60, bersikulo 13. Ug niini nga kasulatan, akong gimarkahan ang hugpong sa mga pulong nga “dili ninyo usikan ang inyong panahon.” Ug dayon, akong buhaton kini sa ubang mga kasulatan nga gilista diha sa leksiyon.

Karon, atong adtoon ang kinutlo gikan ni Elder Bednar nga may kalabotan niana nga kamatuoran. Ug samtang ako nagtan-aw niini nga kinutlo ug ako nagtan-aw sa kamatuoran, ako mipili sa pagmarka sa duha ka hugpong sa mga pulong. Ang una mao ang diin si Elder Bednar mipahayag, “Ang bata-bataon o wala magiyahi nga [indibidwal] mahimong mogahin og daghang mga oras sa pagdula og mga video game, mag-chat online, o sa bisan unsang mga pamaagi nga nagtugot sa digital nga mga butang nga mopatigbabaw sa mga butang ingon nga sila gayod mao.”

Ug dayon sa kataposan gayod niana nga kinutlo, akong markahan usab diin kini nag-ingon, “Sa ngadto-ngadto, ang daw limpyo nga kalingawan mahimong usa ka porma sa makadaot nga pagkabihag.” Karon mobalik kita sa leksiyon 185 ug hatagan kamo karon og oportunidad sa pagpraktis niini nga kahanas. Busa kon inyong tinoon ang gihatagan og gibug-aton nga kamatuoran niini nga leksiyon ug dayon ang mga kasulatan ug mga pulong sa mga propeta nga may kalabotan niana nga kamatuoran, ug markahan diin sa pulong sa Dios kana nga kamatuoran klaro nga gitudlo.

Nindot, kana modala kanato ngadto sa atong ikatulo nga kahanas. Gusto kong dapiton si Sister Robbins, kon mahimo, sa pagbasa sa kahulogan atong ikatulong kahanas.

Sister Robbins: Ipakita ang nakat-onan. Ang kalihokan sa pagkat-on duol sa kataposan sa leksiyon nagtugot sa matag estudyante sa pagpakita sa ilang pagkat-on, o usa ka oportunidad sa pagsulay sa pagtira og pana sa puntarya. Pipila ka mga ehemplo sa unsay mahimong buhaton sa mga estudyante niini nga kalihokan sa pagkat-on mahimong maglakip sa pagsulat diha sa journal, pagpasabot, pagpakigbahin, paghimo og plano, pagbansay sa usa ka kahanas, o pagmugna og usa ka butang. Ang kahanas numero tres mao ang pagtino ug pagmarka sa kalihokan sa leksiyon diin ang mga estudyante gihatagan og kahigayonan sa pagpakita sa ilang nakat-onan sumala sa katuyoan sa leksiyon.

Brother Dyreng: Mao nga nakaestablisar kita og puntarya. Kita adunay ekipo—ang bayanan ug ang pana. Ug karon ang mga estudyante pagahatagan sa oportunidad sa pagtira sa maong pana ngadto sa puntarya. Busa sa pagtan-aw og balik sa leksiyon 177, motan-aw ko duol sa kataposan sa leksiyon ug tinoon kon asa ang matag estudyante gihatagan og oportunidad sa pagpakita sa katuyoan sa leksiyon. Ug akong namatikdan nga niining partikular nga leksiyon, adunay duha nga nagtabang sa mga estudyante sa paggamit sa mga panalipod alang sa ilang paggamit sa teknolohiya.

Ang usa niini makatabang sa mga estudyante sa pagpraktis sa paghimo og plano daan kon unsaon nila pagdumala ang ilang paggamit sa teknolohiya. Ug dayon ang lain mao ang usa ka kahigayonan alang kanila nga maghimo og usa ka plano kon unsaon nila paghunong sa ilang paggamit sa teknolohiya kon makasugat sila og dili angay nga media. Ug busa klaro nakong gimarkahan diha sa leksiyon ang duha niana nga mga oportunidad alang sa mga estudyante.

Karon mobalik kita sa leksiyon 185 ug hatagan kamo og kahigayonan sa pagpraktis niini nga kahanas. Busa kon mahimo ninyo tan-awa ang duol sa kataposan sa leksiyon ug tinoa kon asa ang mga estudyante gihatagan og oportunidad sa pagpakita sa katuyoan sa leksiyon ug dayon markahi kana. Hatagan ko kamo og usa ka minuto sa pagpangita niana.

Gusto nakong dapiton ang matag usa kaninyo. Kamo ba, sa inyong pagpangandam ug pagtudlo niining mga leksiyon sa Pagpangandam sa Kinabuhi karong tuiga, mopatuman niining tulo ka kahanas nga atong gihisgotan karon?

TANAN: Oo.

Brother Dyreng: Nasayod ko nga samtang kita mobuhat niini, kita motabang sa atong mga estudyante sa pagpalawom sa ilang pagkakabig ngadto sa Manluluwas, si Jesukristo. Ug niana nga proseso, adunay mahitabo usab sa atong mga kasingkasing.

Ako adunay pagpamatuod nga kita gipangulohan ug gigiyahan sa atong Amahan sa Langit ug sa atong Manluluwas, si Jesukristo, ug nga Sila mopanalangin kanato samtang kita mosunod ug maminaw sa mga lider nga gitudlo Nila sa pagpangulo ug paggiya kanato niining ulahing mga adlaw. Mapasalamaton ko alang niini nga kurikulom nga gihatag kanato ug sa oportunidad nga gihatag niini kanato sa pagtabang sa pagpalawom sa pagkakabig ngadto sa Manluluwas, si Jesukristo.

Ug kini akong ibilin diha kaninyo sa ngalan ni Jesukristo, amen.