Pagpangandam ug Pagtudlo sa mga Leksiyon sa Pagpangandam sa Kinabuhi: Pasiuna

Brother Jason Willard: Hi, ako si Jason Willard. Sama ninyo, akong gihigugma ang Langitnong Amahan ug ang Iyang Anak, si Jesukristo, sa tibuok nakong kasingkasing. Gihigugma nako ang kabatan-onan ug ang mga young adult sa tibuok kalibotan. Sama ninyo, ang akong labing dako nga tinguha mao ang pagtabang nila nga mapalawman ang ilang pagkakabig ngadto ni Jesukristo ug sa Iyang gipahiuli nga ebanghelyo, mahimong sarang alang sa mga panalangin sa templo, ug maandam ang ilang mga kaugalingon, ilang mga pamilya, ug ang uban alang sa kinabuhing dayon uban sa ilang Amahan sa Langit.

Alang niana nga katuyoan, gusto kong mopakigbahin og pipila ka hunahuna nga makapasayon alang kaninyo sa pag-andam ug pagtudlo sa mga leksiyon sa Pagpangandam sa Kinabuhi. Niadtong Enero 2024, gipaila ni Brother Chad Webb kining may kalabotan [thematic] nga mga leksiyon nga itudlo usa hangtod sa duha ka higayon matag semana. Naugmad gikan sa mga hilisgotan sama sa misyon, pagpangandam sa templo ug sa edukasyon; mga kahanas sa pagtuon sa kasulatan; emosyonal nga kalig-on; mga kahanas sa kinabuhi; ug mga pagtulun-an sa mga propeta sa ulahing mga adlaw.

Gipakigbahin usab niya kanato ang panglantaw ug katuyoan niining mga leksiyon sa Pagpangandam sa Kinabuhi sa dihang miingon siya:

Brother Chad H Webb: Ang atong panghinaot mao ang pagtabang sa pag-andam og henerasyon sa kabatan-onan nga masayod kon unsaon sa pagtuon sa mga kasulatan ug madani sa mga pagtulun-an sa buhing mga propeta. Usa ka henerasyon sa kabatan-onan nga adunay emosyonal nga kalig-on, kinsa adunay mga kahanas ug kapasidad nga molampos sa pag-eskwela, mahimong matarong nga mga amahan ug mga inahan, ug kinsa mangulo sa Simbahan ug sa ilang mga komunidad. Ang atong panghinaot mao ang pagtabang sa pag-andam og henerasyon sa kabatan-onan nga makasabot sa mga pakigsaad sa templo, kinsa adunay lawom nga pasalig sa pagsunod niini, ug henerasyon sa mga misyonaryo kinsa mga takos, kwalipikado, ug adunay espirtuhanong kadasig, ug andam nga morepresentar sa Manluluwas sa pagdapit sa kalibotan aron moduol Kaniya.

Ang atong panghinaot mao ang pag-andam og henerasyon sa mga disipulo ni Jesukristo kinsa lawom ang pagkakabig ngadto sa Iyang gipahiuli nga ebanghelyo sa tibuok nilang kinabuhi.

Brother Jason Willard: Samtang mibisita kami sa mga magtutudlo nga nagtudlo niining may kalabotan [thematic] nga mga leksiyon sa miaging tuig, nakita namo nga kini nga paglaom nahimong tinuod. Ang mga magtutudlo nga nagsugod niini nga katuyoan sa hunahuna, kini nga panglantaw kon kinsa mamahimo nga atong gilaoman ang nagtubo nga henerasyon, nakakita sa mga milagro nga gipanglantawan ni Brother Webb. Uban sa hinungdan sa mga leksiyon sa Pagpangandam sa Kinabuhi nga klaro nga nasilsil sa atong mga hunahuna, hisgotan nato kon unsaon ang pag-andam ug pagtudlo niining may kalabotan nga mga leksiyon. Bag-ohay lang, miadto ko sa usa ka klase sa seminary aron sa pagtudlo sa usa niini nga mga leksiyon sa Pagpangandam sa Kinabuhi. Tungod kay ako usa ka giorden nga patriyarka sa akong stake, naghunahuna ko nga sayon lang ang pagtudlo sa leksiyon mahitungod sa patriyarkal nga mga panalangin. Busa miadto ko sa klase uban sa tuyo sa pagtudlo mahitungod sa patriyarkal nga mga panalangin.

Nindot kadto nga kasinatian. Pagkahuman nakog tudlo sa klase, mibisita ko uban sa usa sa atong mga manunulat sa kurikulum ug akong nasayran nga kini nga leksiyon, kuyog sa ubang mga leksiyon sa Pagpangandam sa Kinabuhi, gisulat sa paagi nga makatabang sa magtutudlo sa pagbuhat og labaw pa kay sa pagtudlo lamang mahitungod sa usa ka hilisgotan. Akong nadiskobrehan nga ang matag leksiyon adunay tulo ka sukaranang mga elemento: usa ka piho nga katuyoan, usa ka gipabaga [bolded] nga kamatuoran nga makita diha sa pulong sa Dios, ug usa ka kalihokan diin ang matag estudyante makabaton og oportunidad sa pagpakita sa ilang nakat-onan.

Uban niining tulo ka mahinungdanon nga mga butang diha sa hunahuna, nangandam ko sa pagtudlo sa samang leksiyon ngadto sa lahi nga klase sa seminary pipila ka semana ang milabay. Ang kalainan sa kasinatian sa pagkat-on makapahingangha. Ang mga estudyante kinsa nakadawat na sa ilang patriyarkal nga panalangin mipahayag og usa ka sinsero nga tinguha sa pagtuon sa ilang panalangin nga mas makugihon. Usa ka batan-ong lalaki nga dili gayod nako makalimtan mipakigbahin sa klase sa iyang tinguha sa pag-andam og mas makugihon alang sa misyon nga gihisgotan sa iyang panalangin.

Taliwala sa mga estudyante nga wala pa makadawat sa ilang patriyarkal nga panalangin dihay usa ka batan-ong babaye kinsa mipakigbahin uban sa mga luha diha sa iyang mga mata sa dinalian nga panginahanglan nga iyang gibati nga makadawat dayon sa iyang panalangin. Dili na ako ang eksperto—ang patriyarka—nga nagtudlo mahitungod sa patriyarkal nga mga panalangin. Gibuhat nako kon unsa ang mahimo sa bisan kinsa nga magtutudlo bisan asang dapita sa kalibotan tungod niining tulo ka sukaranan nga kahanas. Aron matabangan kamo ug ang inyong mga estudyante nga adunay makapausab sa kinabuhi nga mga leksiyon sa Pagpangandam sa Kinabuhi, atong tan-awon kon unsa kini sama diha sa usa ka in-service nga leksiyon, personal nga pag-andam sa leksiyon sa usa ka magtutudlo, ug sa kataposan diha sa usa ka lawak-klasehanan uban sa mga estudyante.