Mahimong Angayan sa mga Panalangin sa Templo

Brother Chad H Webb: Mapasalamaton kaayo ko alang niining pagbansay bahin sa mga leksiyon sa Pagpangandam sa Kinabuhi. Sa akong hunahuna kitang tanan makadayeg kon unsa ka importante kini nga mga leksiyon alang sa atong kabatan-onan. Ug samtang nagtan-aw kita sa bidyo, napahinumdoman ko kon unsa ka sentro ni Kristo kini nga mga leksiyon. Gamit ang hingpit nga ehemplo sa Manluluwas sa pagsunod niini nga mga baroganan sa ebanghelyo ug paghisgot kon sa unsang paagi nga Siya makahimo sa pagtabang sa atong mga estudyante sa ilang mga kahimtang gamhanan gayod.

Ganahan usab ko nga ang pundasyon sa mga leksiyon mao ang pulong sa Dios, naggamit og mga ehemplo gikan sa mga kasulatan ug gikan sa mga pagtulun-an sa modernong mga propeta. Nagtuo ko nga ang samang mga pamaagi nga makatabang nato sa epektibong pagtudlo sa mga kasulatan mahimong ipahiangay sa epektibong pagtudlo sa dinasig nga mga mensahe sa mga lider sa Simbahan. Salamat nianang talagsaong modelo ug talagsaong pagbansay.

Karon, gusto kong mobalhin sa laing hilisgotan nga nagpabug-at sa akong hunahuna ug kasingkasing. Kitang tanan napanalanginan sa mga pagtulun-an ug pangalagad ni Presidente Russell M. Nelson. Mapasalamaton kaayo ko kaniya ug mopamatuod nga siya ang pinili nga propeta sa Ginoo. Mapasalamaton ko sa Ginoo sa pagpreserbar kaniya ug sa kahibalo, direksiyon, ug kalig-on nga personal nakong nadawat pinaagi sa inspirasyon nga gikan sa Ginoo ngadto ni Presidente Nelson.

Usa sa mga imbitasyon nga gibalik-balik ni Presidente Nelson mao nga kita makakat-on sa paggamit sa gahom sa Ginoo pinaagi sa mga pakigsaad ug mga templo. Busa diha sa among labing bag-o nga Kombensiyon sa mga Direktor sa Area, nakahukom kami nga sugdan matag buntag ang pagtuon kon unsa ang gitudlo ni Presidente Nelson ug sa ubang mga lider sa Simbahan bahin sa mga pakigsaad ug sa balay sa Ginoo. Natandog kaayo ko nianang kasinatian nga akong gihangyo ang pipila sa mga partisipante sa pagpakigbahin kon unsay ilang nakat-onan.

Brother: Sama sa gitudlo ni Presidente Nelson kon unsay ipasabot nga maanaa sa usa ka pakigsaad ngadto sa Dios, akong nakat-onan nga dili ko moisip kaniya nga usa ka CEO o corporate executive sa langit nga naghulat kanako nga tingali molapas og kontrata. Hinunoa, kini usa ka pakigsaad nga relasyon sa usa ka mahigugmaong Amahan, ug tungod niana Siya dili gayod kapoyon sa Iyang mga paningkamot sa pagsuporta kanako ug dili gyod nako usikan ang Iyang maluluy-on nga pailob. Tungod kay akong nakat-onan nga tungod sa pakigsaad, ako adunay usa ka espesyal nga luna diha sa kasingkasing sa Dios. Nakausab kini sa paagi sa akong paglantaw sa mga butang sama sa akong mga pag-ampo, diin kaysa mobati nga moluhod ako sa kataposan sa adlaw ug maghinulsol ug kini mahimong usa ka palas-anon ngadto Kaniya, nadani ako ngadto Kaniya, ug gusto nako nga makigsulti Kaniya, ug nakahibalo ko nga ang tanan nga gusto nakong buhaton mao ang pagbalos sa gugma nga Iyang gipakita kanako.

Sister: Kon maghunahuna ko sa mga pakigsaad, maghunahuna ko sa unsay gitudlo ni Presidente Nelson kanato, nga ang tanan nga atong gituohan ug matag saad nga gihimo sa Dios ngadto sa Iyang mga katawhan sa pakigsaad magkahiusa sa templo. Dili nako mabulag ang templo gikan sa akong mga pakigsaad tungod kay diha nako makat-onan ang kahulogan niadtong mga pakigsaad nga akong gihimo ngadto sa Langitnong Amahan ug sa Iyang Anak, si Jesukristo. Pinaagi kini niadtong mga saad sa pakigsaad nga gihimo diha sa templo nga ang tanang panalangin sa langit ihatag kanako isip anak nga babaye sa Dios. Ug kana mitubo sulod sa mga katuigan samtang mas nasabtan nako ang pagtuga ug kanang espesyal kaayo nga gasa gikan sa atong Langitnong Amahan ngari kanato.

Brother: Busa akong nakat-onan gikan ni Presidente Nelson nga kon mohimo kita og pakigsaad ngadto sa atong Langitnong Amahan, ang atong relasyon Kaniya mausab sa kahangtoran. Ug kana mahinungdanon ngari kanako kay ako nasayod nga ang Langitnong Amahan nahigugma kanako, ug ang kamatuoran nga Siya naghimo og dalan diin ako mas makapaduol ngadto Kaniya, mas makaila Kaniya, ug sa kataposan makabaton og potensyal nga mahisama Kaniya. Ang butang mahitungod sa mga pakigsaad mao nga bisan unsa pa ang inyong giagian sa kinabuhi, ang Langitnong Amahan anaa kaninyo, Siya nag-abay kaninyo, Siya naggunit sa inyong kamot, Siya naggiya kaninyo subay sa dalan. Ug kanang tanan tungod sa mga pakigsaad.

Brother: Mapasalamaton kaayo ko sa mga panalangin nga adunay usa ka propeta. Pinaagi sa iyang mga pagtulun-an ako makabaton og mas maayong pagsabot sa espesyal nga gugma nga anaa sa Dios alang niadtong misulod sa pakigsaad ngadto Kaniya. Ug kana nga kamatuoran nga Siya dili gayod mobiya niana nga relasyon; dugang pa, Siya dili gayod mohunong sa paghatag kanato og mga oportunidad nga maghinulsol ug mag-usab. Ang pagkahibalo sa kinaiyahan sa Dios usa ka hugpong sa paglaom ug pag-ayo sa akong kasingkasing.

Brother: Kon kita nabugkos ngadto ni Kristo, nga sa tinuoray gitudlo ni Presidente Nelson, kita moadto kon asa Siya paingon, kita mobuhat sa unsay Iyang buhaton. Kon ugaling ako nakayugo ngadto kaniya ug Siya mao man ang labing taas nga mga torong baka, pananglitan, nan, ako moadto asa Siya moadto, ako mosulti unsay Iyang isulti, ug ang ako mobuhat unsay Iyang buhaton—sa kaulahian. Nanghinaot ko nga kini nga asosasyon makatabang kanako nga mahimong unsa Siya karon. Labaw pa kay sa bisan unsang butang sa akong kinabuhi gusto ko nga mopahimuot Kaniya. Gusto nako nga makaabot sa punto diin, sa akong kaugalingon nga kinabuhi ug kasingkasing, ang tanan kong gibuhat makapahimuot Kaniya. Dili ko kahibalo unsaon sa pagbayad sa Manluluwas alang sa unsay Iyang nabuhat alang kanako, gawas sa pagbuhat unsa ang Iyang gisugo kanako nga buhaton.

Brother: Sa dihang naminaw ko ni Presidente Nelson, akong nadungog nga kon kita mosulod ngadto sa usa ka pakigsaad nga relasyon uban sa atong Langitnong Amahan, nga kita gihatagan og dugang nga gahom sa atong kinabuhi. Usa kini ka makita nga gahom. Kini usa ka butang nga makahatag kanato og paglaom ug pagkaayo ug hugot nga pagtuo, ug mahimong butang nga makabayaw kanato sa atong labing lisod nga mga gutlo. Ang nindot nga bahin niining pakigsaad nga bugkos mao nga kita adunay Langitnong Amahan nga dili gayod mobiya kanato. Kon kita manlimbasog sa pagduhaduha, Siya motabang kanato nga mapulihan kana og hugot nga pagtuo. Kon kita manlimbasog sa adiksiyon, Siya motabang kanato nga mapulihan kana sa pagkagawasnon. Kon kita nanglimbasog sa kawalay paglaom, Siya motabang nga mopuno sa atong mga kalag sa kahayag. Ang milagro sa Manluluwas nga si Jesukristo mao nga Siya nagtanyag kanato og espesyal nga matang sa gugma ug kaluoy nga kanunay modala kanato balik ngadto Kaniya.

Brother Webb: Lagmit kamo nakabaton og daghan sa mga pagtulun-an ni Presidente Nelson o piho nga mga pamahayag nga nahimo ninyong personal nga mga paborito. Sama pananglit, inyong mahinumdoman nga sa iyang unang press conference isip presidente sa Simbahan niadtong 2018, si Presidente Nelson mihangyo kanato nga mosugod nga maghunahuna sa tumong. Namulong gikan sa Templo sa Salt Lake siya miingon, “Ang tumong nga gipaningkamutan sa matag usa nato mao ang matugahan og gahum diha sa balay sa Ginoo.”

Niadtong 2021 siya miingon, “Ang labing luwas nga dapit sa pagkaespirituwal mao ang pagtuman sulod sa inyong mga pakigsaad sa templo.”

Niadtong 2024 siya nagtudlo: “Walay laing mas makatabang kaninyo sa paggunit sa gunitanan nga puthaw kaysa pagsimba sa templo …. Walay laing mas makapanalipod kaninyo. … Walay laing makapalig-on sa inyong pagpamatuod alang ni Ginoong Jesukristo ug sa Iyang Pag-ula o makatabang kaninyo nga dugang makasabot sa talagsaong plano sa Dios og labaw pa.”

Atol sa iyang labing bag-o nga pakigpulong sa Kinatibuk-ang Komperensiya siya miingon, “Ania ang akong saad nganha kaninyo: Ang matag sinsero nga tigpangita ni Jesukristo makakaplag Kaniya diha sa templo.”

Ug sa kataposan sa iyang artikulo sa Liahona nga gitawag og “Ang Walay Kataposan nga Pakigsaad,” siya mitudlo, “Sa higayon nga kita mohimo na og usa ka pakigsaad uban sa Dios, kita mobiya na sa neyutral nga kahimtang hangtod sa kahangtoran. Ang Dios dili mobiya sa Iyang relasyon niadtong kinsa mimugna sa ingon nga bugkos uban Kaniya. Sa pagkatinuod, ang tanan niadtong kinsa mihimo og usa ka pakigsaad sa Dios adunay agianan ngadto sa usa ka espesyal nga matang sa gugma ug kaluoy. … Siya mopadayon sa pakigtambayayong kanila ug motanyag kanila og mga oportunidad sa pag-usab. Siya mopasaylo kanila kon sila maghinulsol. Ug kon mahisalaag man sila, Siya motabang kanila nga makatultol og balik ngadto Kaniya. … Tungod sa atong pakigsaad sa Dios, Siya dili gayod kapoyon sa Iyang mga paningkamot sa pagtabang kanato, ug kita dili gayod makabsan sa Iyang maluluy-on nga pailob ngari kanato.”

Dili lamang si Presidente Nelson ang mitudlo mahitungod sa templo ug sa mga pakigsaad isip presidente sa Simbahan, apan kapin sa 15 ka tuig na ang milabay, samtang nagkalisod kami sa mga pulong alang sa bag-ong S&I nga katuyoan nga pamahayag, si Elder Russell M. Nelson, nga niadtong panahona nagserbisyo isip Chair of the Executive Committee sa Board of Education, nagdasig kanamo sa paglakip sa ikaduhang hugpong sa mga pulong sa atong katuyoan, nga nag-ingon nga “Kita kinahanglan nga motabang sa mga kabatan-onan ug mga young adult nga mahimong sarang alang sa mga panalangin sa templo.”

Naghunahuna ko kon sa among mga paningkamot nga mapamubo ang atong katuyoan nga pahayag nga gihisgotan lamang namo ang pagpalawom sa pagkakabig? Samtang ang pag-uswag nga atong gihimo nindot kaayo, ug kana nga paghatag og gibug-aton kinahanglan nga magpadayon, nagtuo ko nga daghan pa ang atong mabuhat aron usab mapasiugda ang ikaduhang bahin sa atong tumong ug matabangan ang dugang nga mga kabatan-onan ug mga young adult nga mahimong sarang alang sa mga panalangin sa templo. Wala ko magsugyot nga kamong tanan magsulat og bag-ong leksiyon o maghimo og bag-ong mga programa, apan hangyoon ko kamo nga magmahunahunaon, gani mainampoon, kon unsa pa ang personal ninyong mabuhat sulod sa konteksto sa inyong nabuhat na.

Samtang ako nangutana sa mga tawo bahin niini nga pangutana, nakadungog ko og daghang dagkong mga tubag. Lakip niini mao kining mga sugyot: Una, hibaloi ang bag-o sa propetikanhong mga gihatagan og gibug-aton ug mga pagtulun-an kalabot sa mga pakigsaad ug sa balay sa Ginoo. Ikaduha, tuyoa ang pagkonektar sa atong gugma ug hugot nga pagtuo ni Jesukristo ngadto sa pagkahimong takos alang sa mga panalangin sa templo. Ikatulo, magtamod sa mga pangutana sa rekomend sa templo kon angay. Ikaupat, tan-awa ang piho nga mga pakigsaad samtang kita nagtudlo sa mga baroganan sa ebanghelyo, nagtabang sa mga estudyante nga makasabot sa doktrina sa mga pakigsaad. Ug ikalima, ipaambit ang atong kaugalingong gugma ug pasalamat sa templo ug tabangi ang mga estudyante nga makaila sa mga panalangin nga miabot sa ilang mga kinabuhi pinaagi sa paghupot sa ilang mga pakigsaad. Kamo makabaton og daghan pang mga ideya, palihog ipadayon ang paghisgot niini isip mga faculty ug sa mga grupo sa pagserbisyo ug ipakigbahin unsa ang inyong nakat-onan.

Pinaagi sa ehemplo sa unsay akong gituohan nga makahimo ug mahitabo, gusto kong mopakigbahin kaninyo og usa lamang ka bag-ohay nga kalamboan. Pipila ka tuig ang milabay, didto ko sa Guam kauban sa atong mga direktor sa area ug rehiyon gikan sa Asya ug Pasipiko. Sa usa sa mga miting, among gihisgotan kon unsaon namo pagtabang ang daghan pang estudyante nga mahimong takos alang sa mga panalangin sa templo. Human nianang mga miting, ang atong area director sa Pilipinas, si Julius Barrientos, nakigkita sa iyang mga Direktor nga Konseho sa Region ug sila mitino nga sila mas makigtambayayong sa mga lider sa Simbahan aron makatabang og mas daghang kabatan-onan ug mga young adult nga maghupot og magamit nga rekomend sa templo. Sila gidasig sa ilang Kapangulohan sa Area, kinsa aduna nay tumong sa pagpadaghan sa mga rekomend sa templo isip kabahin sa ilang plano sa area. Ang S&I nga mga lider ug mga koordinator nakigkita usab sa lokal nga mga lider sa Simbahan sa tanang ang-ang, ug nag-uban sila sa paghisgot sa ilang mga paningkamot ug mi-report sa ilang pag-uswag.

Gusto nakong klarohon kini nga punto: wala sila molihok nga independente sa mga lider sa Simbahan. Mitabang sila sa mga lider nga aduna nay tumong ug plano ug nagsunod sa direksiyon sa ilang Kapangulohan sa Area. Apan ang S&I mitabang pinaagi sa pagtutok sa mga pakigsaad ug sa templo pinaagi sa pagtudlo niini nga mga butang sa natural nga paagi sa matag oportunidad ug pinaagi sa kanunay nga paghisgot sa mga panalangin sa templo.

Sa tulo ka tuig, sa hiniusang paningkamot sa mga lider sa Simbahan, mga ginikanan, ug sa mga magtutudlo sa S&I, ang gidaghanon sa mga batan-on nga naghupot og rekomend sa Pilipinas misaka og 277 porsiyento. Apan ang panalangin dili makita diha lamang sa gidaghanon, ang epekto diha sa kabatan-onan ug sa ilang mga pamilya hilabihan ka dako. Sama sa nahitabo alang sa pamilyang Topyador gikan sa Bayambang Stake, nga gihulagway dinhi. Sama sa ubang pamilya sa Pilipinas, ang mga Topyador karon kanunay nang mag-uban sa pagtambong sa templo. Ang panalangin sa usa ka pamilya nga mag-uban nga moadto sa templo adunay mahangtorong kamahinungdanon ug mao ang sentro sa unsay gusto sa Ginoo alang sa Iyang mga anak. Nagtuo ko nga pinaagi sa atong mga paningkamot sa pagtutok sa mga panalangin sa balay sa Ginoo, kita makatabang og mas daghang kabatan-onan ug mga young adult sa tibuok kalibotan sa paghimo ug pagtuman sa mga pakigsaad ngadto sa Ginoo.

Sa pagtapos, gusto kong mopakigbahin og usa ka yano nga praktikal nga paghulagway sa leksiyon. Naghunahuna ko mahitungod sa gahom sa mga pakigsaad ug unsaon nato kini nga mapasabot og klaro kaayo nga bisan ang bata makasabot. Samtang naghunahuna ko, nahinumdoman nako ang usa ka praktikal nga paghulagway sa leksiyon nga ang pipila ninyo nakakita na. Nagtuo ko nga una nakong nakita si Brother Chad Wilkinson nga naggamit niini.

Kon hangyoon ko ang usa ka tawo nga moanhi ug balion kining lapis, bisan kinsa kaninyo makahimo niana. Apan unsa kaha kon magkuha ko og lapis ug i-tape kini niining baseball bat? Karon, makabali ba kamo sa lapis? Niining yano nga paghulagway, unsa o kinsa ang lapis? Unsa o kinsa ang bat? Ug unsa man ang tape? Ang praktikal nga paghulagway sa leksiyon nagsugyot nga ang lapis nagrepresentar kanimo ug kanako, ang bat nagrepresentar sa Manluluwas nga si Jesukristo, ug ang tape nagsimbolo sa atong mga pakigsaad.

Ang gahom sa mga pakigsaad mao nga kini nagbugkos kanato ngadto ni Jesukristo. Hinumdomi, walay bisan unsa nga mopanalipod kaninyo og labaw pa. Ang labing luwas nga dapit mao ang pagpuyo sulod sa atong mga pakigsaad. Ug kon bag-ohon nato ang atong mga pakigsaad og kadaghan, mas molig-on ang bugkos. Ug bisan kon ang lapis mabali, pinaagi sa mga pakigsaad, ang Manluluwas makaayo kanato. Ug kon ang duha ka tawo gusto nga magkahiusa sa kahangtoran, ang mga pakigsaad mohiusa kanila ug ngadto sa Ginoo.

Mapasalamaton kaayo ako nga ang Ginoo nahigugma kanato og igo aron sa pagpanalangin kanato uban sa mga pakigsaad. Hinaot nga kita mahimong mga tigtuman sa pakigsaad, ug hinaot nga makatabang kita sa mas daghang kabatan-onan ug mga young adult nga mahimong takos alang sa mga panalangin sa balay sa Ginoo, diin ang matag sinsero nga nangita ni Jesukristo makakaplag Kaniya. Sa ngalan ni Jesukristo, amen.

Akong kahigayonan karon ang pagpaila ni Elder Clark G. Gilbert. Si Elder Gilbert natawag isip usa ka Kinatibuk-ang Awtoridad nga Seventy niadtong 2021. Siya kasamtangang nagserbisyo isip commissioner sa Church Educational System. Nakadawat siya og mga degree gikan sa BYU, Stanford, ug Harvard, ug nagsugod sa iyang panarbaho isip usa ka propesor sa Harvard University. Siya kaniadto ang Chief Executive Officer sa Deseret News ug Deseret Digital Media. Miserbisyo usab siya isip Presidente sa BYU–Idaho ug BYU–Pathway. Naminyo siya ngadto ni Christine Calder, ug sila mga ginikanan sa walo ka anak.

Mapasalamaton usab ko ni Elder Gilbert. Nahimo siyang dalaygon nga tigtudlo. Nagpakabana siya pag-ayo sa buhat sa Seminaries and Institutes. Gidayeg nako kon unsa siya ka nahiuyon kang Presidente Nelson ug sa ubang mga lider sa Simbahan, ug sa unsang paagi siya kanunay nga nangita og mga oportunidad sa pagpalambo sa ilang mga pagtulun-an. Siya nahigugma sa Ginoo ug nagtrabaho nga walay kakapoy sa pagserbisyo Kaniya ug naggamit sa matag oportunidad sa pagpamatuod mahitungod sa Manluluwas nga si Jesukristo. Mahinamon ako ug mapasalamaton karon alang sa oportunidad nga makakat-on gikan kaniya.