ការរៀបចំ និងការបង្រៀនមេរៀននៃការរៀបចំជីវិត ៖ ការបំពាក់បំប៉នគ្រូបង្រៀន
ការចាក់ផ្សាយការបំពាក់បំប៉នថ្នាក់ ស&វ ប្រចាំឆ្នាំ២០២៥
ថ្ងៃទី២៣ ខែមករា ឆ្នាំ២០២៥
បងប្រុស យ៉ារ៉េន ដាយរ៉េង ៖ មែនហើយ យើងពិតជារំភើបណាស់ដែលបានមកទីនេះនៅថ្ងៃនេះ ហើយសម្រាប់ឱកាសដែលយើងត្រូវជជែកជាមួយគ្នា ។ បងប្អូនប្រហែលជាបានឮច្រើនហើយអំពីមេរៀននៃការរៀបចំជីវិតទាំងនេះ និងរឿងដែលយើងនឹងនិយាយអំពីនៅថ្ងៃនេះ ។ ជំនាញដែលយើងនឹងពិភាក្សាក្នុងការអនុវត្តនឹងក្លាយជាជំនួយដ៏ធំ នៅពេលយើងរៀបចំបង្រៀនមេរៀននៃការរៀបចំជីវិតទាំងនេះនៅឆ្នាំក្រោយ ។
ដើម្បីណែនាំពីការបំពាក់បំប៉នរបស់យើងនៅថ្ងៃនេះ ខ្ញុំចង់អញ្ជើញប្អូនប្រុស ខាវិនណ័រ ឲ្យអានការណែនាំនេះ ។ បងប្អូនបានទទួលសំណៅចែកមួយច្បាប់ ហើយខ្ញុំចង់អញ្ជើញប្អូនប្រុស ខាវិនណ័រ ឲ្យអានសេចក្ដីណែនាំអំពីការណ៍នោះ ដែលនឹងផ្ដល់ឲ្យយើងនូវបរិបទនៃអ្វីដែលយើងនឹងពិភាក្សានៅថ្ងៃនេះជាមួយគ្នា ។ សូមអញ្ជើញ !
ប្អូនប្រុស ខាវិនណ័រ ៖ មេរៀននៃការរៀបចំជីវិតជួយបំពាក់ឲ្យសិស្សមានសមត្ថភាពក្នុងការរៀបចំខ្លួនសម្រាប់ទាំងឧបសគ្គក្នុងជីវិត និងឱកាសដ៏អស្ចារ្យ ។ ដូចជាវគ្គសិក្សាមេរៀនបទគម្ពីរទាំងអស់ផ្សេងទៀតដែរ មេរៀនរៀបចំជីវិតគឺត្រូវបានរៀបរៀងឡើងដើម្បីជួយយុវវ័យពង្រឹងការប្រែចិត្តជឿរបស់ពួកគេលើព្រះយេស៊ូវគ្រីស្ទ និងដំណឹងល្អដែលបានស្ដារឡើងវិញរបស់ទ្រង់ ដើម្បីមានភាពស័ក្តិសមទទួលពរជ័យនៃព្រះវិហារបរិសុទ្ធ និងរៀបចំពួកគេ ក្រុមគ្រួសារពួកគេ និងអ្នកដទៃទៀតដើម្បីទទួលបានជីវិតដ៏នៅអស់កល្បជានិច្ចជាមួយព្រះវរបិតារបស់ពួកគេដែលគង់នៅស្ថានសួគ៌ ។
មេរៀនទាំងនេះផ្តោតសំខាន់លើព្រះយេស៊ូវគ្រីស្ទ ចាក់ឫសនៅក្នុងព្រះបន្ទូលនៃព្រះ ហើយផ្តោតលើការបំពេញតម្រូវការរបស់សិស្ស ។ មានជំនាញសំខាន់ៗពីរបីដែលអាចជួយបងប្អូនរៀបចំបង្រៀនដោយមានប្រសិទ្ធភាពដើម្បីសម្រេចបាននូវគោលដៅរបស់របស់ថ្នាក់ ស&វ ។ សូមពិចារណាអំពីការប្រៀបធៀបខាងក្រោម ៖ គ្រូបង្វឹកបាញ់ធ្នូម្នាក់ដែលរៀបចំខ្លួនបង្រៀននឹងត្រូវផ្តល់ផ្ទាំងស៊ីប ធ្នូ និងព្រួញ ព្រមទាំងផ្តល់ឱកាសឲ្យសិស្សគ្រប់រូបដើម្បីហាត់សម ។
សូមអនុវត្តការប្រៀបធៀបនេះទៅនឹងការរៀបចំខ្លួនដើម្បីបង្រៀនមេរៀនថ្នាក់សិក្ខាសាលា ។
បងប្រុស ដាយរ៉េង ៖ អរគុណច្រើន ។ ដូច្នេះ ខ្ញុំសូមលើកទឹកចិត្តយើងទាំងអស់គ្នាឲ្យរក្សាការអធិស្ឋានក្នុងចិត្តរបស់យើង នៅពេលយើងពិភាក្សានៅថ្ងៃនេះ ។ ដូចអ្វីដែលខ្ញុំបាននិយាយ ខ្ញុំពិតជារំភើបចំពោះឱកាសនេះខ្លាំងណាស់ ហើយដឹងថាវានឹងក្លាយជាពរជ័យដ៏អស្ចារ្យសម្រាប់យើង និងសិស្សរបស់យើង នៅពេលដែលយើងអនុវត្តជំនាញទាំងនេះ ។ ដូច្នេះ សូមចាប់ផ្តើមដោយនិយាយអំពីគោលដៅ និងអ្វីដែលតំណាងឲ្យនៅក្នុងការប្រៀបធៀបនេះ ។
ខ្ញុំសូមអញ្ជើញប្អូនប្រុស សាយមិន ឲ្យអានផ្នែកដំបូងបំផុតនៃសំណៅចែកនៅទីនោះ នៅក្រោមគោលបំណងមេរៀន ។
ប្អូនប្រុស សាយមិន ៖ គោលបំណងនៃមេរៀននេះផ្តល់នូវគោលដៅច្បាស់លាស់សម្រាប់អ្វីដែលយើងសង្ឃឹមថាសិស្សនឹងដឹង ទទួលអារម្មណ៍ ឬធ្វើ ដែលជាលទ្ធផលនៃបទពិសោធន៍រៀនសូត្រ ។ នៅពេលយើងមានគោលបំណងមេរៀនច្បាស់លាស់សម្រាប់ការរៀនសូត្ររបស់សិស្ស យើងអាចផ្តោតកាន់តែខ្លាំងលើអ្វីដែលយើងមានផែនការអញ្ជើញសិស្សឲ្យធ្វើក្នុងអំឡុងមេរៀននេះ ។ ជំនាញទីមួយ ៖ ស្វែងយល់ និងគូសចំណាំគោលបំណងមេរៀនដែលមាននៅក្នុងប្រយោគចុងក្រោយនៃកថាខណ្ឌបុព្វកថាពីមេរៀននោះ ។
បងប្រុស ដាយរ៉េង ៖ បាទ ដូច្នេះនៅក្នុងការរៀបចំមេរៀនទី ១៧៧ ដែលជា « ការទទួលខុសត្រូវលើផ្នែកបច្ចេកវិទ្យា » បងប្អូនម្នាក់ៗមានច្បាប់ចម្លងនៃឯកសារនោះ ។ ខ្ញុំមើលកថាខណ្ឌបុព្វកថានោះ ហើយប្រយោគចុងក្រោយប្រាប់ពីគោលបំណងនៃមេរៀននេះ ។ ហើយសំណេរថា « មេរៀននេះអាចជួយសិស្សឲ្យអនុវត្តការការពារសុវត្ថិភាពដើម្បីទទួលខុសត្រូវលើការប្រើប្រាស់បច្ចេកវិទ្យារបស់ពួកគេ » ។ ដូច្នេះ ខ្ញុំគូសចំណាំវាយ៉ាងច្បាស់ក្នុងមេរៀននេះ ។
ឥឡូវនេះ យើងនឹងអនុវត្តជំនាញដ៏សាមញ្ញនេះ ។ មេរៀនទី ១៨៥ គឺជាមេរៀនបន្ទាប់អំពីសេចក្ដីណែនាំអំពីល្បឿនបង្រៀនរបស់យើង ហើយនោះគឺ « ការស្ថាបនាភាពរឹងមាំខាងសតិអារម្មណ៍នៅក្នុងព្រះអម្ចាស់ » ។ ដូច្នេះ ខ្ញុំសូមទុកពេលឲ្យបងប្អូនម្នាក់ៗមើលកថាខណ្ឌបុព្វកថានេះ ហើយកំណត់ និងគូសចំណាំគោលបំណងមេរៀននេះឲ្យបានច្បាស់ ។
បងប្រុស ដាយរ៉េង ៖ យើងនឹងបន្តទៅជំនាញទីពីរឥឡូវនេះ ។ ដូច្នេះ ខ្ញុំនឹងអញ្ជើញប្អូនប្រុស អាល់ខាឡា តើប្អូនអាចអាននិយមន័យនៃជំនាញទីពីររបស់យើងនៅក្រោមសេចក្តីពិតដែលមានអក្សរដិតបានទេ ? ឥឡូវនេះយើងបន្តទៅធ្នូ និងព្រួញ ។
ប្អូនប្រុស អាល់ខាឡា ៖ សេចក្តីពិតសំខាន់ៗដែលមាននៅក្នុងព្រះគម្ពីរ និងការបង្រៀនរបស់ថ្នាក់ដឹកនាំសាសនាចក្រដូចជាធ្នូ និងព្រួញ ផ្តល់ឲ្យសិស្សនូវឧបករណ៍ចាំបាច់ដើម្បីសម្រេចគោលបំណងមេរៀននេះ ។ នៅពេលបទពិសោធន៍នៃការរៀនសូត្រត្រូវបានផ្ដោតទៅលើព្រះបន្ទូលនៃព្រះ យើងបង្កើនលទ្ធភាពដែលសិស្សនឹងរៀនដោយព្រះចេស្ដានៃព្រះវិញ្ញាណបរិសុទ្ធ ។ ជំនាញទីពីរ ៖ ស្វែងរកសេចក្តីពិតសំខាន់ៗនៅក្នុងមេរៀន ហើយគូសចំណាំកន្លែងដែលសេចក្តីពិតនោះត្រូវបានរកឃើញនៅក្នុងព្រះគម្ពីរ និងការបង្រៀនរបស់ថ្នាក់ដឹកនាំសាសនាចក្រ ។
បងប្រុស ដាយរ៉េង ៖ អរគុណច្រើន ។ ដូច្នេះ សូមត្រឡប់ទៅមេរៀនទី ១៧៧ វិញ ។ នៅពេលខ្ញុំរៀបចំមេរៀននេះ ខ្ញុំស្វែងរកសេចក្តីពិតដែលមានអក្សរដិត ហើយខ្ញុំសង្កេតឃើញថា នៅក្នុងមេរៀនជាក់លាក់នេះមានសេចក្តីពិតពីរ ។ ទីមួយថ្លែង « ព្រះអម្ចាស់មានព្រះទ័យចង់ឲ្យយើងឧស្សាហ៍ចូលរួមក្នុងប្រយោជន៍ល្អ ហើយមិនបង្ខាតពេលវេលារបស់យើងឡើយ » ។ ហើយសេចក្ដីពិតទីពីរថ្លែង « អ្វីដែលពង្រឹង និងបញ្ចុះបញ្ចូលឲ្យធ្វើល្អគឺមកពីព្រះ » ។
បន្ទាប់មក ខ្ញុំសិក្សាបទគម្ពីរ និងសម្រង់ពីរមកពីអែលឌើរ បែដណា ហើយគូសចំណាំពាក្យ និងឃ្លាដែលបង្រៀនសេចក្ដីពិតទាំងនេះនៅក្នុងប្រភពទាំងនេះ ។ ដូច្នេះ ជាឧទាហរណ៍ សូមក្រឡេកមើលសេចក្តីពិតដំបូងនោះ ៖ « ព្រះអម្ចាស់មានព្រះទ័យចង់ឲ្យយើងឧស្សាហ៍ចូលរួមក្នុងប្រយោជន៍ល្អ ហើយមិនបង្ខាតពេលវេលារបស់យើងឡើយ » ។ ហើយយើងនឹងអានបទគម្ពីរដែលទាក់ទងនឹងសេចក្ដីពិតនេះ ។
ដូច្នេះ ប្រសិនបើបងប្អូនអាចបើកទៅជាមួយខ្ញុំ សូមបើកទៅកាន់ គោលលទ្ធិ និងសេចក្តីសញ្ញា កណ្ឌទី ៥៨ ខទី ២៦ និង ២៧ ។
ហើយនៅពេលខ្ញុំអានបទគម្ពីរទាំងនេះ ខ្ញុំគូសចំណាំឃ្លា « មនុស្សលោកត្រូវឧស្សាហ៍ចូលរួមក្នុងប្រយោជន៍ល្អ ហើយប្រព្រឹត្តអ្វីៗជាច្រើន តាមបំណងចិត្តរបស់ខ្លួន » ។ ឥឡូវនេះ សូមយើងបើកទៅបទគម្ពីរបន្ទាប់ ដែលជា គោលលទ្ធិ និងសេចក្តីសញ្ញា កណ្ឌទី ៦០ ខទី ១៣ ។ ហើយនៅក្នុងបទគម្ពីរនេះ ខ្ញុំគូសចំណាំឃ្លា « អ្នកមិនត្រូវបង្ខាតពេលវេលារបស់ខ្លួន … នោះឡើយ » ។ ហើយបន្ទាប់មក ខ្ញុំធ្វើបែបនេះជាមួយនឹងបទគម្ពីរផ្សេងទៀតដែលមានក្នុងមេរៀននេះ ។
ឥឡូវនេះ សូមទៅមើលសម្រង់មកពីអែលឌើរ បែដណា ដែលទាក់ទងនឹងសេចក្ដីពិតនោះ ។ ហើយនៅពេលខ្ញុំមើលសម្រង់នេះ ហើយខ្ញុំមើលសេចក្តីពិតនេះ ខ្ញុំបានជ្រើសរើសគូសចំណាំឃ្លាពីរ ។ ទីមួយគឺកន្លែងដែលអែលឌើរ បែដណា ថ្លែងថា « បុគ្គលម្នាក់ដែលមិនទាន់ពេញវ័យ ឬមានការយល់ខុសអាចចំណាយពេលវេលាមិនសមហេតុផលក្នុងការលេងហ្គេម មើលវីដេអូ ឈែតតាមអនឡាញ ឬតាមរបៀបផ្សេងទៀតដែលអនុញ្ញាតឲ្យឌីជីថលគ្រប់គ្រងរឿងទាំងឡាយតាមដែលមាន » ។
ហើយបន្ទាប់មកនៅចុងបញ្ចប់នៃសម្រង់នោះ ខ្ញុំក៏គូសចំណាំកន្លែងដែលវានិយាយថា « បន្ដិចម្ដងៗ ការកម្សាន្តដែលហាក់ដូចជាគ្មានកំហុសអ្វីសោះអាចក្លាយជាទម្រង់នៃការធ្វើជាទាសករដ៏អាក្រក់ » ។ ឥឡូវនេះ សូមត្រឡប់ទៅមេរៀនទី ១៨៥ ហើយផ្តល់ឲ្យបងប្អូននូវឱកាសដើម្បីអនុវត្តជំនាញនេះ ។ ដូច្នេះបើបងប្អូនអាចរកឃើញសេចក្តីពិតដែលមានអក្សរដិតនៅក្នុងមេរៀននេះ ហើយបន្ទាប់មកអាចរកឃើញបទគម្ពីរ និងប្រសាសន៍របស់ព្យាការីដែលទាក់ទងនឹងសេចក្ដីពិតនោះ ហើយគូសចំណាំកន្លែងណានៅក្នុងព្រះបន្ទូលនៃព្រះដែលសេចក្ដីពិតនោះត្រូវបានបង្រៀនយ៉ាងច្បាស់ ។
មែនហើយ ការណ៍នោះនាំយើងទៅកាន់ជំនាញទីបីរបស់យើង ។ ខ្ញុំចង់អញ្ជើញស៊ីស្ទើរ រ៉ូប៊ីនស៍ ឲ្យអាននិយមន័យជំនាញទីបីរបស់យើង ។
ស៊ីស្ទើរ រ៉ូប៊ីនស៍ ៖ បង្ហាញការរៀនសូត្រ ។ សកម្មភាពរៀនសូត្រនៅជិតចុងបញ្ចប់នៃមេរៀននេះអនុញ្ញាតឲ្យសិស្សម្នាក់ៗបង្ហាញពីការរៀនសូត្ររបស់ពួកគេ ឬជាឱកាសដើម្បីសាកល្បងអនុវត្តជាក់ស្តែង ។ ឧទាហរណ៍មួយចំនួននៃអ្វីដែលសិស្សអាចធ្វើនៅក្នុងសកម្មភាពរៀនសូត្រនេះអាចរួមបញ្ចូលការសរសេរនៅក្នុងសៀវភៅកំណត់ហេតុ ការពន្យល់ ការចែកចាយ ការដាក់ផែនការ ការអនុវត្តជំនាញ ឬការបង្កើតអ្វីមួយ ។ ជំនាញទីបីគឺកំណត់ និងគូសចំណាំសកម្មភាពនៅក្នុងមេរៀន ដែលសិស្សទទួលបានឱកាសដើម្បីបង្ហាញការរៀនសូត្ររបស់ពួកគេតាមគោលបំណងមេរៀននេះ ។
បងប្រុស ដាយរ៉េង ៖ ដូច្នេះ យើងបានបង្កើតផ្ទាំងស៊ីបមួយ ។ យើងមានឧបករណ៍—ធ្នូ និងព្រួញ ។ ហើយឥឡូវនេះ សិស្សនឹងទទួលបានឱកាសបាញ់ព្រួញនោះនៅឯផ្ទាំងស៊ីប ។ ដូច្នេះ ក្រឡេកមើលទៅមេរៀនទី ១៧៧ វិញខ្ញុំមើលទៅជិតចុងបញ្ចប់នៃមេរៀននេះ ហើយស្វែងរកកន្លែងដែលសិស្សគ្រប់គ្នាត្រូវបានផ្តល់ឱកាសឲ្យបង្ហាញគោលបំណងមេរៀន ។ ហើយខ្ញុំកត់សម្គាល់ថានៅក្នុងមេរៀនជាក់លាក់នេះមានកន្លែងពីរដែលជួយសិស្សឲ្យអនុវត្តការការពារសុវត្ថិភាពសម្រាប់ការប្រើប្រាស់បច្ចេកវិទ្យារបស់ពួកគេ ។
កន្លែងមួយក្នុងចំណោមនេះជួយសិស្សឲ្យអនុវត្តផែនការជាមុនសម្រាប់របៀបដែលពួកគេនឹងទទួលខុសត្រូវលើការប្រើប្រាស់បច្ចេកវិទ្យារបស់ពួកគេ ។ ហើយបន្ទាប់មក កន្លែងមួយទៀតគឺជាឱកាសមួយសម្រាប់ពួកគេដើម្បីធ្វើផែនការអំពីរបៀបដែលពួកគេនឹងផ្អាកការប្រើប្រាស់បច្ចេកវិទ្យារបស់ពួកគេ នៅពេលដែលពួកគេជួបប៉ះនឹងប្រព័ន្ធផ្សព្វផ្សាយដែលមិនសមរម្យ ។ ដូច្នេះហើយ ខ្ញុំគូសចំណាំយ៉ាងច្បាស់នៅក្នុងមេរៀនទាំងពីរនៃឱកាសទាំងនោះសម្រាប់សិស្ស ។
ឥឡូវនេះ យើងនឹងត្រឡប់ទៅមេរៀនទី ១៨៥ វិញ ហើយផ្តល់ឲ្យឱកាសមួយឲ្យបងប្អូនដើម្បីអនុវត្តជំនាញនេះ ។ ដូច្នេះ បើបងប្អូនមើលនៅជិតចុងបញ្ចប់មេរៀននេះ ហើយស្វែងរកកន្លែងដែលសិស្សត្រូវបានផ្តល់ឱកាសឲ្យបង្ហាញគោលបំណងមេរៀន ហើយបន្ទាប់មកគូសចំណាំត្រង់នោះ ។ ខ្ញុំនឹងផ្តល់ឲ្យបងប្អូនមួយនាទីដើម្បីរកមើលវា ។
ខ្ញុំចង់អញ្ជើញបងប្អូនម្នាក់ៗ ។ នៅពេលបងប្អូនរៀបចំខ្លួន និងបង្រៀនមេរៀននៃការរៀបចំជីវិតទាំងនេះនៅឆ្នាំនេះ តើបងប្អូននឹងអនុវត្តជំនាញទាំងបីដែលយើងបានពិភាក្សានៅថ្ងៃនេះឬទេ ?
ទាំងអស់គ្នា ៖ យល់ព្រម !
បងប្រុស ដាយរ៉េង ៖ ខ្ញុំដឹងថា នៅពេលយើងធ្វើដូច្នេះ យើងនឹងជួយសិស្សរបស់យើងឲ្យកាន់តែពង្រឹងការប្រែចិត្តជឿរបស់ពួកគេចំពោះព្រះអង្គសង្គ្រោះ គឺព្រះយេស៊ូវគ្រីស្ទ ។ ហើយនៅក្នុងដំណើរការនោះ អ្វីមួយនឹងកើតឡើងនៅក្នុងចិត្តរបស់យើងផងដែរ ។
ខ្ញុំមានទីបន្ទាល់មួយថា យើងត្រូវបានដឹកនាំ និងណែនាំដោយព្រះវរបិតាសួគ៌ និងព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ហើយថាទ្រង់នឹងប្រទានពរដល់យើង នៅពេលយើងធ្វើតាម ហើយស្តាប់ថ្នាក់ដឹកនាំដែលទ្រង់ទាំងទ្វេបានតែងតាំងឲ្យដឹកនាំ និងណែនាំយើងនៅថ្ងៃចុងក្រោយនេះ ។ ខ្ញុំមានអំណរគុណចំពោះកម្មវិធីសិក្សានេះដែលយើងទទួលបាន និងឱកាសដែលផ្តល់ឲ្យយើងដើម្បីជួយពង្រឹងការប្រែចិត្តជឿចំពោះព្រះអង្គសង្គ្រោះ ព្រះយេស៊ូវគ្រីស្ទ ។
ហើយខ្ញុំសូមថ្លែងទីបន្ទាល់នេះជាមួយនឹងបងប្អូននៅថ្ងៃនេះ ក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ។