Panimalay ni Brigham ug Mary Ann Young

Sa panimalay ni Brigham ug Mary Ann Young, ang mga bisita makadungog og mga istorya mahitungod sa pagpangulo ni Brigham Young didto sa Nauvoo isip presidente sa Korum sa Napulog Duha ka Apostoles. Nakahibalo usab sila sa mga detalye mahitungod sa kinabuhi sa pamilya sa panimalay didto sa Nauvoo, sa ilang desisyon sa pagbiya sa ilang panimalay ug siyudad, ug sa ilang mga paningkamot sa pag-andam alang sa bag-ong kinabuhi didto sa Kasadpan.

Kining balay nga bika mao ang ikaduhang balay sa pamilyang Young sa Nauvoo. Ang unang balay sa Nauvoo, nga gibalhinan ni Mary Ann ug sa ilang mga anak niadtong Septiyembre 1840 sa dihang si Brigham didto sa layo nga nagserbisyo og misyon sa England, mao ang wala mahuman nga balay nga troso. Sa dihang si Brigham mipauli niadtong 1841, mitrabaho siya aron mahuman ang estraktura. Sa kasamtangan, ang konstruksiyon nagpadayon sa balay nga bika sa pamilya. Ang mga Young mibalhin ngadto niining bag-ong balay niadtong Mayo 31, 1843, ug nagpuyo didto hangtod nga sila mibiya sa Nauvoo niadtong Pebrero 1846.

Ang pagpangulo ni Brigham Young sa Simbahan milapad samtang ang mga Santos nagpuyo sa Nauvoo. Niadtong Abril 14, 1840, samtang nagserbisyo sa England, gipaluyohan siya isip presidente sa Korum sa Napulog Duha. Samtang nagpuyo niini nga balay, si Brigham nakigkita sa ubang mga sakop sa Korum sa Napulog Duha, ingon man usab sa sibil nga mga awtoridad, bag-ong mga kinabig, ug mga misyonaryo nga miuli. Pagkahuman sa pagkamartir ni Joseph Smith niadtong Hunyo 27, 1844, si Brigham Young nahimong senior nga lider sa Simbahan. Samtang ang tensiyon midako didto sa Nauvoo pagkahuman sa pagkamartir, ang mga responsibilidad ni Brigham nadugangan pa. Siya ug ang ubang mga lider sa Simbahan nangandam sa pagbalhin sa mga Santos ngadto sa mao na karon ang Utah. Kini nga mga pagpangandam naglakip sa paghatag og temporal nga mga panginahanglan sama sa mga karomata ug mga suplay. Ang mas importante, ang komunidad nagdali sa pagtrabaho sa paghuman sa Templo sa Nauvoo aron nga ang mga miyembro makadawat sa ilang mga ordinansa sa templo. Sa wala pa ang mga Santos mobiya, si Brigham ug ang ubang apostoles mipahigayon og mga pagtuga ug mga pagselyo alang sa liboan ka tawo diha sa Balay sa Ginoo.

Basaha ang tahas ni Brigham Young sa pag-andam sa mga Santos sa pagbalhin ngadto sa Walog sa Salt Lake diha sa Mga Santos, Volume 2, Kapitulo 1.

Unsay Malaoman

Ang paglibot sa Giagian sa Pioneer usa ka giniyahan nga paglibot nga magsugod sa Pundokanan nga Lawak sa mga Seveny ug matapos sa Panimalay ni Brigham ug Mary Ann Young. Ang paglibot sa Panimalay ni Brigham ug Mary Ann Young usa ka paglibot sa daghang kwarto nga adunay tiggiya nga maglakip sa kusina ug kwarto nga katulganan. Human sa paglibot sa Panimalay sa Young, libre ka nga mosuhid sa ubang mga dapit sa Nauvoo. Tingali interesado ka sa ubang mga kasinatian sa Giagian sa Pioneer sama sa Dalan sa Paglaom o sa Handomanan ug Exodo sa Pioneer ngadto sa Pagkabantogan.