Pandayanan sa Puthaw ni Webb

Dinhi ang Pandayanan sa Puthaw ni Webb, hanas pagtrabaho nga mga tawo mipakita sa ilang pasalig sa pagtabang sa ilang komunidad. Gikan sa mga ehe ug boha sa ligid ngadto sa pag-welding og puthaw nga mga ligid ngadto sa pagporma og mga sapatos sa kabayo, ang mga panday sa puthaw, mga tighimo og ligid nga kahoy, mga tigsapsap sa sapatos sa kabayo, ug ang mga tighimo ug tig-ayo og mga karwahe miandam og paagi alang sa mga Santos sa Ulahing mga Adlaw aron mobiyahe ngadto sa kasadpan.

Si Edwin Webb miabli sa iyang pandayan sa ting-init sa 1843. Siya ug ang iyang upat ka igsoong lalaki—si Chauncey, Edward, Pardon, ug James Wesley—nagtrabaho niini nga pandayan, kay gitudloan niini nga pangita sa ilang amahan nga si James.

Ang mga trabahante niini nga buhatan mihatag og kada adlaw nga panginahanglan sa pagpanday og puthaw ngadto sa mga residente sa Nauvoo, apan ang kamahinungdanon niini nagagikan sa ilang dedikasyon sa pagtabang sa paghimo og mga karomata alang sa panaw sa mga Santos padulong sa kasadpan. Sa tingtugnaw sa 1845–46, ang mga Santos nga nangandam sa pagbiya sa Nauvoo migamit sa Parley Street sa pag-assemble ug sa pagmontar sa ilang mga karomata kon ang mga pisa gikan niini ug sa ubang pandayanan andam na. Ang mga Webb nakauban sa kataposang mibiya sa Nauvoo; mipasalig sila sa pagtabang sa komunidad sa pagseguro sa transportasyon nga gikinahanglan alang sa ilang panaw sa kasadpan.

Unsa ang Mapaabot

Ang Pandayanan sa Puthaw ni Webb kabahin sa paglibot sa Pioneer Trail, nga magsugod sa Seventies Hall ug matapos sa Panimalay ni Brigham ug Mary Ann Young. Ang giniyahan nga paglibot naglakip sa duha ka kwarto—usa ka pandayanan ug mohimo ug moayo og karomata. Ang paglibot sa pandayanan naglakip sa pagpakita sa pagsalsal sa gagmay nga replica sa sapatos sa kabayo. Ang paglibot sa himoan ug ayohanan sa karomata naglakip sa pagpakita sa pag-assemble sa ligid sa karomata.

360° nga Pag-aninaw sa Tibuok Palibot