Giagian sa Pioneer

Sulod sa sobra sa lima ka tuig, ang mga lumulupyo sa Nauvoo matinguhaon nga miapil sa pagtukod og usa ka siyudad. Hinuon, niadtong Enero 1845, gibakwi sa lehislatura sa Illinois ang charter sa siyudad sa Nauvoo, nga nagbungkag sa pwersa sa kapolisan, mga korte, ug sa Nauvoo Legion. Ang tanang normal legal nga pamaagi sa pagpanalipod sa mga Santos sa Ulahing mga Adlaw gibakwi. Sa samang higayon, ang bakak nga mga hungihong ug kapintasan batok sa mga miyembro sa Simbahan nagkadaghan.

Sa sinugdanan, mitawag si Brigham Young og mga misyonaryo gikan sa mga Korum sa Seventy aron mobiyahe ngadto sa silingang mga lalawigan ug motabang nga mapapas ang mga sayop nga impresyon mahitungod sa mga miyembro sa Simbahan. Gihangyo usab niya ang gobernador sa estado nga manginlabot tungod og alang sa mga Santos sa Ulahing mga Adlaw. Ang tambag sa gobernador mao nga tibulaagon [sila] gikan sa Nauvoo o pabiyaon sa estado. Ang pagpili nga sundon ang sugo sa Ginoo nga magpundok isip katawhan nagpasabot nga ang pagbiya sa Illinois mao lamang ang makataronganong alternatibo sa kapintas sa manggugubot nga panon. Mihangyo ang mga lider sa Simbahan nga hatagan og panahon ug misaad nga mobiya sa Nauvoo sa ting-init sa 1846.

Ang pagpalihok sa liboan ka tawo nagkinahanglan og oras, kwarta, kakugi, kooperasyon, ug daghang inspirasyon. Ang Korum sa Napulog Duha nagkita samtang nagdagan ang tuig 1845. Mipatawag usab sila og mas dakong katigoman sa Council of Fifty samtang nangita sila og impormasyon ug balaanong direksiyon kon asa moadto ug sa unsang paagi nga bisan ang labing kabos nga mga Santos sa Ulahing mga Adlaw sa Nauvoo makabiyahe uban kanila. Daghan sa mga miting sa konseho nahitabo sa taas didto sa Pundokanan nga Lawak sa mga Seventy, diin sila makakonsulta sa daghang mga libro ug mga mapa samtang magtimbang-timbang sila sa ilang mga opsiyon. Pagka Mayo 1845, ang Konseho adunay plano sa pagbiyahe ngadto sa Great Basin sa Batoong Kabungtoran.

Si Chauncy, Edwin, Edward, Pardon, ug Wesley Webb mga igsoon nga nakakat-on sa pagpanday og puthaw gikan sa ilang amahan. Si Edwin ug si Chauncy nagdumala og usa ka pandayanan sa puthaw ug buhatan sa pagpanghimo ug pagpang-ayo og mga karwahi tupad sa Pundokanan nga Lawak sa mga Seventy. Sa dihang gipahibalo na ang desisyon alang sa pagbiya sa Nauvoo, ang mga kahanas sa maong mga managsoon ug ang mga kahanas niadtong daghang mga panday sa puthaw ug sa mga karpentero gikinahanglan tungod kay nagkadaghan ang panginahanglan sa lig-ong mga karomata aron makatabok sa mga kapatagan. Sulod sa daghang mga bulan ang ilang mga pandayan miporma sa mga ligid nga puthaw, mga boha sa ligid, ug ubang mga piyesa nga puthaw sa karomata nga gi-assemble sulod sa ilang mga buhatan ug ayohanan sa karomata. Pagka-Enero 1846, ang pagpang-assemble didto sa pandayanan sa mga Webb milapas na ngadto sa ubang mga bakante nga luna, lakip sa unang andana sa Pundokanan nga Lawak sa mga Seventy.

Kay daghan kaayong angay ihan-ay pinaagi sa pagtinabangay kay ang oras sa pagbiya nagkaduol na, gigahin ni Brigham Young ang kadaghanan sa iyang oras nga layo sa panimalay aron makigmiting sa uban o magserbisyo sa hapit na mahuman nga templo. Tungod niana ang iyang asawa, si Mary Ann Angell Young, sa kadaghanang panahon mag-inusarang magdumala sa mga pagpangandam sa panimalay. Sulod sa mga semana siya ug ang lima ka anak sa balay—nag-edad og 1 ngadto sa 11—nagtigom sa gisugyot nga gidaghanon sa pagkaon, mga himan, sinina, ug ubang mga suplay. Niadtong Pebrero 15, 1846, ilang gisirad-an ang mga pultahan sa ilang balay nga tisa [brick] sa Nauvoo sa kataposang higayon ug gipadagan ang kargado nga karomata ngadto sa Parley Street sa wala pa motabok sa Mississippi River. Walay gihimong diary si Mary Ann niadtong mga semanaha, mao nga wala kita mahibalo kon unsay iyang gibati mahitungod sa mga sakripisyo nga iyang gihimo. Apan daghang tuig ang milabay, nahinumdom si Emmeline B. Wells sa positibo nga ehemplo ni Sister Young ngadto kaniya:

Ang giagian sa pioneer sa mga Santos sa Ulahing mga Adlaw nagsubay sa samang rota sa uban nga milabang sa Amihanang Amerika aron sa pagpangita og tambok nga yuta ug bulawan sa California. Apan kadtong mibiya sa Nauvoo niadtong 1846 wala lamang mangita og yuta. Mga relihiyoso sila nga mga bakwit nga determinadong magpabilin sa dalan sa pakigsaad. Kadtong maglakaw-lakaw sa Parley Street sa Nauvoo karon makapamalandong kon unsa nga pagtuo, kaisog, ug sakripisyo ang gikinahanglan aron makasunod sa propetikanhong mga lider ngadto sa wala mailhi nga kamingawan sa pagpangita og kalinaw.