Mga Panimalay sa Apostoles

Sa tingpamulak sa 1837, si Joseph Smith mipasabot ni Heber C. Kimball nga siya gitawag nga mangulo sa unang grupo sa mga misyonaryo ngadto sa England. Ang kauban niyang Apostol nga si Orson Hyde mikuyog ni Heber. Nagsunod og espirituwal nga pag-aghat, sila ug ang ilang mga kauban nagsangyaw didto sa Preston ug sa walog sa River Ribble sa Lancashire. Kining unang paningkamot mipahiluna sa dugang nga misyonaryo nga buhat samtang ang Simbahan mibalhin ngadto sa Nauvoo, Illinois.

Samtang didto sila si Heber Kimball ug Orson Hyde sa England, usa ka nasodnong krisis sa panalapi ang mibanlas sa Amerika, ug ang gipasiugdahan sa Simbahan nga bangko sa Kirtland nahagsa. Daghang tawo, lakip ang kaugalingong mga sakop sa pamilya ni Marinda Hyde, mibiya sa Simbahan tungod sa kasagmuyo. Misulat si Miranda sa iyang bana mahitungod sa kagubot ug kalibog niadtong mga panahona ug dayon mipakigbahin sa iyang kaugalingong pagpamatuod:

“Akong Minahal nga Orson, wala ko kahibalo unsay akong isulat kon duna koy panahon ug luna, kay ang mga panahon sa Kirtland wala ka pa makasaksi og sama sa among nasinati karon. Apan, akong nakat-onan pinaagi sa kasinatian nga ang matag usa kanato kinahanglang magbantay ug mag-ampo ug mahibalo sa atong kaugalingon, kay murag nawala na ang tanang pagsalig sa usag usa.”¹

Ang ikaduhang misyon ni Heber C. Kimball sa gawas sa nasod gipili na usab pinaagi sa pagpadayag.² Niining higayona, laing unom ka Apostoles mibiyahe uban kaniya gikan sa Far West, Missouri, ngadto sa Liverpool ug misugod sa pagsangyaw sa ebanghelyo sa tibuok nga Kaislahan sa Britanya. Kauban niini nga grupo mao sila si Brigham Young, John Taylor, Parley ug Orson Pratt, George A. Smith, ug Wilford Woodruff, apan wala si Orson Hyde. Si Orson miadto sa England wala madugay, pagka-Abril 1841. Nianang bulana, sa usa ka komperensiya sa Simbahan sa Manchester, nasayran ni Orson nga si Willard Richards gitawag ngadto sa Korum sa Napulog Duha, kapin sa 7,000 ka mga tawo ang nabunyagan, ug daghang mga pamilya ang naghimo og mga plano nga magpundok sa Nauvoo.

Si Vilate Kimball nagpaabot og balita mahitungod sa iyang bana sa England. Niadtong Disyembre 1840, nahimamat niya ang pipila ka taga-Britanya nga mga sister nga bag-o lang miabot sa Nauvoo. Misulat nga siya “wala pay sama niadto ka makalipay nga paghimamat. … Nalipay sila nga nakakita nako nga murag dugay na mi nga managkaila.”³ Gitugotan ni Vilate ang 21 anyos nga si Elizabeth Ravenscroft nga mopuyo sa panimalay sa mga Kimball, ug ang duha ka babaye “nakomportable kaayo” samtang naghulat si Vilate sa pagbalik ni Heber.

Human sa Abril nga komperensiya, samtang si Heber Kimball, Wilford Woodruff, ug ubang mga Apostoles nangandam sa pagpamauli, si Orson Hyde mibiyaheng nag-inusara tabok sa Uropa ngadto sa Palestina. Samtang nagbiyahe, nakigkita siya sa mga lider sa relihiyon ug mipahibalo sa katuyoan sa iyang misyon. Niadtong Oktubre 24, 1841, gikatkat niya ang Bukid sa mga Olibo ug mituman sa iyang calling sa pagpahinungod sa Jerusalem alang sa pagpundok sa Israel sa ulahing mga adlaw, ingon nga gipanagna sa karaan ug modernong mga propeta.

Pamilya Gisangkapan sa Panginahanglan

Samtang didto sa layo si Orson, si Marinda miapil sa Nauvoo Female Relief Society ug miapil sa mga paningkamot sa pag-atiman sa mga nanginahanglan. Agig pasalamat sa misyon ni Orson ngadto sa Palestina, ang mga Santos sa Ulahing mga Adlaw sa Nauvoo midonar og trabaho ug mga suplay aron sa pagtukod og panimalay alang sa pamilyang Hyde.

Ang kataposang misyon sa gawas sa nasod miabot mga katuigan ang milabay, human sa kamatayon ni Joseph Smith. Samtang nagpundok ang Korum sa Napulog Duha ka Apostoles sa Nauvoo, naghisgot sila og mga paagi sa pagtabang sa mga miyembro sa Simbahan nga nagpuyo layo sa punoang buhatan aron magpabiling mapasaligon sa ebanghelyo. Nagkauyon sila nga usa kanila kinahanglang moadto sa Uropa aron sa pagdumala sa nagtubo nga mga branch didto. Si Wilford Woodruff gipili nga moserbisyo. Ang iyang asawa, si Phebe, gitawag usab sa pag-uban sa iyang bana isip usa ka misyonaryo, naghimo og usa ka pasiuna alang sa umaabot nga pagpangulo sa mga misyon sa Simbahan.

Pamilya Gisangkapan sa Panginahanglan

Ang mga sakop sa pamilya sa Connecticut ug bag-ong mga kinabig sa England miatiman sa mga anak ni Woodruff samtang ang ilang mga ginikanan wala sa panimalay. Ang igsoong babaye ni Wilford nga si Eunice Webster ug ang iyang pamilya nagpuyo sa wala pa mahuman nga panimalay sa Woodruff sa Nauvoo. Samtang nagserbisyo isip kompanyon sa misyon sa iyang bana, si Phebe Woodruff nanganak og usa ka lalaki nga ginganlan og Joseph.

Ang mga panimalay ni Orson Hyde, Heber C. Kimball, ug Wilford Woodruff nagpakita lamang og pipila ka panig-ingnan sa mga paagi nga ang Korum sa Napulog Duha mibuhat sa pagtuman sa sugo sa Dios sa paghimo sa Nauvoo nga usa ka tukoranan nga bato sa Zion ug pagtabang sa pagpundok sa nagkatibulaag nga Israel. Ang pagtuo, kaisog, ug sakripisyo nga gipakita niini nga mga Apostoles sa pagbiyahe sa gawas sa nasod giparehasan sa mga silingan ug mga sakop sa pamilya nga nagsunod sa ilang relihiyon sa ilang kaugalingong dapit.