Panimalay nila ni Heber ug Vilate Kimball

Didto sa ilang panimalay, si Heber ug Vilate Kimball mipakita og pagtuo nga gikinahanglan alang sa pagsunod ni Propeta Joseph Smith. Si Heber ug Vilate misunod sa pagpadayag ug nagtambayayong sa pagtukod sa gingharian sa Dios, bisan og nagkinahanglan kini og dagkong sakripisyo para kanilang duha ug sa ilang pamilya.

Ang panimalay sa mga Kimball nakompleto pagka-Nobiyembre 12, 1845, human sa mga unom ka bulan nga pagtukod. Ang dakong balay nga tisa gipuli sa troso nga balay nga gipuy-an sa pamilya sukad niadtong 1841. Hinoon, ang mga Kimball wala makatagamtam sa ilang bag-ong panimalay sa taas nga panahon. Mga tulo lamang ka bulan human niadto, sa Pebrero 1846, mibiya sila sa Nauvoo kauban sa daghan pang uban nga mga Santos nga mibiya padulong sa kasadpan.

Si Heber C. Kimball usa ka sakop sa gipahiuli nga Simbahan sa orihinal nga Korum sa Napulog Duha ka Apostoles, gi-orden sa Kirtland, Ohio, pagka-1835 ni Propeta Joseph Smith. Si Kimball lig-on nga miyembro sa Simbahan ug sumusunod sa propeta. Ang iyang asawa nga si Vilate, usa usab ka mapahinungoron nga Santos sa Ulahing Adlaw nga nagpabiling lig-on bisan sa mga pagsulay. Mipasakop siya sa Relief Society sa mga Babaye sa Nauvoo usa ka semana human sa pagkaorganisar niini ug usa sa unang mga babaye nga nakapahigayon og mga ordinansa sa Templo sa Nauvoo. Dihang si Heber naa layo sa panimalay nga nagserbisyo isip misyonaryo sa Simbahan, si Vilate ang miatiman sa ilang pamilya.

Basaha ang mahitungod sa sakripisyo nga gihimo ni Heber ug ni Vilate dihang mibiya si Heber alang sa usa ka misyon ngadto sa England diha sa Mga Santos Volume 1, Kapitulo 34.

Unsay Malaoman

Ang Panimalay nila ni Heber ug Vilate Kimball usa ka bahin sa paglibot sa Mga Panimalay sa Apostoles, nga magsugod didto sa Panimalay nila ni Orson ug Marinda Hyde ug mahuman ngadto sa Panimalay nila ni Wilford ug Phebe Woodruff. Ang paglibot niini nga panimalay mao ang paglibot sa tulo ka kwarto nga adunay tiggiya nga maglakip sa pormal nga sala, tun-anan, ug kan-anan nga kwarto. Ang ibabaw nga mga andana sa kasamtangan sarado sa publiko.

360° nga Pag-aninaw sa Tibuok Palibot