Panimalay ni Orson ug Marinda Hyde

Ang Panimalay sa Hyde naghulagway sa pagkahiusa sa komunidad nga importante kaayo sa pagtukod sa Nauvoo. Sa pagpasalamat sa misyonaryo nga pagserbisyo ni Orson ug sa mga sakripisyo ni Marinda nianang panahona, ang mga silingan mitukod niini nga panimalay alang sa pamilyang Hyde niadtong 1843.

Ang pamilyang Hyde nagpuyo dinhi gikan sa 1843 hangtod sa 1846. Bisan og ang kadaghan sa mga panimalay sa Nauvoo sa kasaysayan hinimo sa kahoy, kini mao ang usa sa duha lang ka gipahiuli nga balay nga hinimo sa kahoy sa Makasaysayanong Nauvoo karon. Samtang daghang mga bilding nga hinimo sa tisa [bricks] gikan sa mga 1840 nagpabilin nga nagbarog sa siyudad, kadaghanan sa mga panimalay nga hinimo sa kahoy wala makalahutay. Agig og dugang ngadto ni Orson, Marinda, ug sa ilang mga anak, si Mary Ann Price ug si Martha Browett, pulos bag-ong kinabig gikan sa England, nagpuyo dinhi uban sa mga Hyde hangtod ang pamilya mibalhin ngadto sa kasadpan niadtong Mayo 1846.

Si Orson Hyde nakigminyo ni Marinda Johnson didto sa Kirtland Ohio niadtong 1834. Mga bulan human niadto, gitawag si Orson nga moserbisyo isip sakop sa Korum sa Napulog Duha ka Apostoles. Samtang ang uban diha sa korum mibiyahe gikan sa Nauvoo ngadto sa Europe, si Orson miadto sa Jerusalem aron ipahinungod ang yuta alang sa pagbalik sa katawhan nga Judeo ug alang sa panalangin sa mga kaliwat ni Abraham. Niadtong Oktubre 24, 1841, si Orson Hyde mihalad og usa ka dinasig nga pagpahinungod nga pag-ampo sa Bukid sa mga Oliba. Mibalik siya ngadto sa Nauvoo human sa sobra sa duha ka tuig nga pagkahilayo. Samtang wala siya, si Marinda miapil sa Nauvoo Female Relief Society ug nahupay sa pagserbisyo ug pagkadawat og serbisyo sa iyang mga silingan.

Unsay Malaoman

Ang Panimalay ni Orson ug Marinda Hyde naglangkob sa duha ka kwarto nga paglibot. Ang panimalay naglakip sa giniyahan sa kaugalingon nga eksibit nga magpakita sa unang upat ka langyaw nga mga misyon sa mga Apostol, samtang ang sala usa ka paglibot nga giniyahan sa mga misyonaryo. Human sa paglibot sa Panimalay sa Hyde, molakaw ka o modrayb ngadto sa Panimalay ni Heber ug Vilate Kimball aron mopadayon sa paglibot sa mga Panimalay sa Apostoles.

360° nga Pag-aninaw sa Tibuok Palibot