Panimalay nila ni Wilford ug Phebe Woodruff

Ang gipahiuli nga Panimalay sa Woodruff nagrepresentar sa kinabuhi sa maong pamilya sa Nauvoo, usa ka panahon nga si Wilford ug ang iyang asawa si Phebe migahin og daghang panahon nga nagkalagyo sa usag usa tungod sa iyang misyonaryo nga pagserbisyo. Ang pamilyang Woodruff, sama sa ubang mga pamilya sa nag-unang mga misyonaryo, mipalig-on sa ilang pagtuo samtang hingpit silang misalig sa Ginoo atol sa mga panahon nga nagkalagyo sila.

Si Wilford Woodruff mibalhin dinhi niining balay nga tisa kuyog sa iyang pamilya niadtong Mayo 4, 1844. Paglabay sa lima ka adlaw, mibiya siya alang sa usa ka misyon sa pagpangampanya para ni Joseph Smith, nga mipahayag sa iyang kandidatora alang sa Pagkapresidente sa Estados Unidos. Ang balay wala mahuman—walay kwartong nahuman ug gamayng bahin lamang sa salog ang napahimutang—apan pwede nang mapuy-an alang ni Phebe ug sa ilang mga anak. Trabahoon ni Wilford ang balay kutob sa iyang mahimo kon mauli siya, apan gitawag siya og balik nga malayo sulod sa pipila ka bulan wala madugay human makaserbisyo isip Presidente sa British Mission. Ang balay wala gihapon mahuman pagka-1846 dihang mibiya ang pamilya aron mobiyahe ngadto sa kasadpan uban sa mga Santos.

Si Wilford ug Phebe Woodruf parehong mapahinungoron nga mga miyembro sa Ang Simbahan ni Jesukristo sa mga Santos sa Ulahing mga Adlaw. Si Wilford, nga nahimong ikaupat nga Presidente sa Simbahan, giorden nga sakop sa Korum sa Napulog Duha ka Apostoles didto sa Kirtland, Ohio, sa Abril 1839 ni Brigham Young. Si Wilford nakaserbisyo og daghan nga misyon, didto sa Estados Unidos ug sa England. Kini nga mga misyon labihan ka dako nga sakripisyo ni Phebe mao usab ni Wilford. Atol sa duha ka tuig nga pagmisyon ni Wilford sa England sa wala pa sila mamalhin dinhi niini nga panimalay, dili lang kay nanganak si Phebe kang Wilford Jr., apan nagsagubang usab siya sa pagkamatay sa iyang dos anyos nga anak nga babaye, si Sarah Emma, paglabay sa upat ka bulan. Samtang ang mga silingan miatiman sa pamilyang Woodruff sa panahon nga wala si Wilford, gipangandoy gihapon ni Phebe ang iyang bana atol niining mga panahon sa pagsulay. Hinoon, ang ubang misyon mihiusa usab sa managtiayon. Nakaserbisyo si Phebe isip misyonaryo kauban sa iyang bana dihang si Wilford nagdumala sa mga Santos sa Ulahing Adlaw sa Uropa.

Basaha ang mahitungod sa misyon ni Wilford ug Phebe Woodruff sa England diha sa Mga Santos, Volume 1, Kapitulo 45.

Unsay Malaoman

Ang Panimalay ni Wilford ug Phebe Woodruff mao ang kataposang hunonganan sa paglibot sa Mga Panimalay sa Apostoles, nga magsugod sa Panimalay ni Orson ug Marinda Hyde. Ang paglibot sa Panimalay ni Wilford ug Phebe Woodruff mao ang paglibot sa unom ka andana nga adunay tiggiya ngadto sa sala, kusina, kwarto nga kan-anan, kwarto nga trabahoanan, master bedroom, ug kwarto sa mga bata. Human makalibot sa Panimalay sa Woodruff, abiabihon ka sa pagsuhid sa tanan pa nga dapit sa Nauvoo.

Atol sa ting-init, tingali makasugat ka og misyonaryo nga mopakigbahin og daghan mahitungod sa pamilyang Woodruff sumala sa kasinatian sa igsoong babaye ni Phebe o ni Wilford, si Eunice, kinsa nagpuyo sa balay niadtong 1845.

360° nga Pag-aninaw sa Tibuok Palibot