Dalan sa Paglaom

Ang Dalan sa Paglaom mao ang sama nga dalan nga giagian sa mga Santos sa Ulahing mga Adlaw sa dihang mibiya sila sa Nauvoo ug misugod sa ilang panaw padulong sa kasadpan. Ang dalan nagpakita sa hugot nga pagtuo sa ordinaryo nga mga tawo kinsa matinud-anong misunod sa Korum sa Napulog Duha ka Apostoles ngadto sa bag-o nga kinabuhi sa walog sa Dakong Salt Lake (karon mao ang Utah sa Estados Unidos).

Niadtong Pebrero 4, 1846, ang unang mga karomata mibiya sa Nauvoo, mibiyahe sa daplin sa Suba sa Mississippi subay sa Parley Street, diin ang barko modala nila tabok sa suba ngadto sa Teritoryo sa Iowa. Ang mga Santos nagpadayon sa pagbiya sa Nauvoo subay sa samang dalan hangtod Septiyembre nianang tuiga.

Sobra sa 14,000 ka mga Santos sa Ulahing mga Adlaw ang mibiya sa Nauvoo atol niadtong walo ka bulan. Nagpadulong sila ngadto sa dili pamilyar nga sitwasyon ug misalig lang sa giya sa ilang mga lider. Daghan ang mirekord sa ilang mga kasinatian sa pagbiya sa Nauvoo diha sa ilang mga journal, ug ang uban nagpadayon sa pagpamalandong sa ilang pagbiya paglabay sa pipila ka tuig. Sa usa ka wali nga gihatag didto sa Siyudad sa Sallt Lake, Utah niadtong Hulyo 21, 1867, Si Apostol George Q. Cannon mipahayag, “Nagkinahanglan kini og hilabihan ka dakong hugot nga pagtuo sa mga tawo, sa pagpangahas ngadto sa wala masuhid ug desyerto nga nasod aron sa pagsulay pag-usab sa pagtukod og mga panimalay, ug sa pagpahigayon sa mga trabaho nga gisugo kanato sa Dios, ang atong Langitnong Amahan.”

Basaha ang mahitungod sa sinugdanan sa pagbiya gikan sa Nauvoo sa Mga Santos, Volume 1, Kapitulo 46.

Unsa ang Mapaabot

Ang Dalan sa Paglaom mao ang giniyahan sa kaugalingon nga kasinatian sa Pioneer Trail. Mahimo ra nga molakaw ka sa dalan ug mobasa sa may kahulogan nga mga timailhan. Kon sundon nimo ang Dalan sa Paglaom, moabot ka ngadto sa Suba sa Mississippi, ingon man usab sa Handomanan ug Exodo sa mga Pioneer ngadto sa Pagkabantogan.

Atol sa mga bulan sa ting-init, ang mga aktor motabang sa pagdala sa mga hunahuna, mga opinyon, o mga ideya sa mga pioneer nga nabuhi kaniadto pinaagi sa gabii nga pasundayag subay sa Dalan sa Paglaom.