Si Jesukristo Mao ang Imong Manluluwas

Sa dihang ang Dios mipadala kanato dinhi sa yuta aron magkat-on ug molambo, Siya nasayod nga kita makahimo og kasaypanan. Busa Siya mipadala kanato og usa ka Manluluwas, si Jesukristo, sa paghatag og paagi alang kanato aron maghinulsol ug aron maluwas gikan sa pisikal nga kamatayon.

Kita nagtuo sa pagkabalaan ni Jesukristo isip ang tinuod nga Anak sa Dios ug usa ka lahi nga sakop sa Dios nga kapangulohan uban sa Dios nga Amahan ug sa Espiritu Santo. Si Jesus mianhi sa yuta sa pagsinati og mga pagsulay sa mortal nga kinabuhi, pagtudlo ug sa pagpamatuod sa Dios, naghimo og gamhanang mga milagro, ug gikompleto ang Iyang maulaon nga sakripisyo, nga nagtugot kanato nga malimpyohan gikan sa sala ug mabanhaw.

Gibuhat Niya kining tanan alang kanato—alang kanimo.

Ang ehemplo ni Jesus mao ang usa sa putli nga gugma. Iyang gipakita kanato kon unsaon sa paghigugma ang Dios pinaagi sa pagpaningkamot sa pagbuhat sa Iyang kabubut-on labaw sa tanang butang. Mapuangoron Siya nga miayo sa masakiton ug sa may kakulangan, mipakaon sa gutom, mibuhi sa patay, miamuma sa kabos, midawat sa sinalikway sa katilingban, ug nangalagad sa tanan nga matinud-anong nangita Kaniya.

Ikaw makabaton og hugot nga pagtuo nga ang Manluluwas milugway nianang samang gugma ug kapuangod nganha kanimo.

Isip mga Kristiyano, kita maningkamot nga mahisama ni Jesus ug mamalandong sa Iyang gugma.

Si Jesus mao ang labing maayo nga Magtutudlo. Sa edad nga 12, nakiglingkod Siya uban sa tinahod nga relihiyosong mga magtutudlo didto sa templo sa Jerusalem, ug “ang tanan nga nakadungog kaniya nahibulong sa iyang maalamong mga tubag” (Lucas 2:47).

Sa kadugayan, liboan ka tawo ang mihugop sa pagpaminaw sa Iyang mga wali—mga wali nga nagdasig gihapon sa katawhan sa tibuok kalibotan sa paggiya sa mas maayong kinabuhi karon. Ang Biblia nagpakita nga si Jesus migahin usab og panahon sa tagsa-tagsa nga pagpakig-istorya sa mga tawo sa mga leksiyon nga kinahanglan personal nilang madunggan. Ang Basahon ni Mormon nagdugang sa atong kahibalo bahin sa Manluluwas ug sa Iyang mga pagtulun-an.

Makakaplag ka og mas dakong kalinaw ug kalipay pinaagi sa pagsunod mismo sa mga pagtulun-an ni Jesus. Ang imong lokal nga kongregasyon sa Ang Simbahan ni Jesukristo sa mga Santos sa Ulahing mga Adlaw mao ang talagsaong dapit sa pagkat-on og dugang mahitungod sa Iyang mga pagtulun-an ug sa unsang paagi kini magamit nganha nimo.

Bisan og si Jesus nagpakabuhi og hingpit nga kinabuhi, daghan ang mibati nga nahulga sa Iyang impluwensiya o nangasuko samtang siya mitawag kanila sa ilang pagkamaot. Nagkonsabo sila aron ipapatay si Jesus.

Sa gabii sa wala pa Siya gilansang, si Jesus miadto sa Tanaman sa Getsemane aron mag-ampo. Didto Iyang giantos ang mga kasakit sa matag usa sa anak sa Dios, lakip ang imong kasakit. Dayon gibudhian Siya, gidakop, gidagmalan, gibiaybiay, ug gibitay sa krus aron mamatay. Ang tanang butang nga nasinati ni Jesukristo sa tibuok Niyang kinabuhi ug ang maulaon nga sakpripisyo nakapahimo niining posible alang Kaniya nga makasabot sa hingpit sa matag usa kanato sa matag kahimtang.

Tungod sa sakripisyo ni Jesus alang kanimo, ikaw makahinulsol ug hingpit nga mapasaylo. Agi og dugang, ang matag tipik sa pagkadili makiangayon nga imong giantos matul-id ra sa umaabot pinaagi ni Jesukristo.

Kita makabuntog dili lang sa espirituhanong kamatayon sa sala apan sa pisikal nga kamatayon usab pinaagi ni Jesus. Tungod kay Siya mibangon gikan sa patay sa ikatulo nga adlaw human sa Iyang Pagpalansang, ikaw usab ugma damlag mabanhaw ug mabuhi uban sa Dios ug sa imong mga minahal diha sa usa ka nahingpit nga lawas, gawasnon gikan sa balatian ug sakit.

Si Jesus nakasabot kanimo. Iyang nabati ang kabug-at sa tanan nimong labing lisod nga mga pagsulay ug miantos alang sa imong mga sala. Nagdapit siya kanimo sa pagsunod Kaniya ug sa pagkaplag og kalinaw.