Si Jesukristo Mitudlo Kanato sa Paghigugma sa Usag Usa

Gitudlo ni Jesukristo nga ang duha ka labing dako nga mga sugo mao ang paghigugma sa Dios ug ang paghigugma sa uban.

Giklaro sa Manluluwas nga ang paghigugma sa imong silingan labaw pa kay sa pagbinuotan sa mga tawo nga napuyo duol kanimo. Kabahin sa responsibilidad sa Iyang mga sumusunod mao ang pagpakita og gugmang putli—ang tiunay nga gugma ni Kristo—ngadto sa tanan, lakip niadtong tingali imong giisip nga mga kaaway.

Kami nagtuo nga ang pagtinabangay sa pagpakita og Kristohanon nga gugmang putli mao ang usa sa labing makapaayo, makapalipay, ug makapahiusa nga mga butang nga mahimo sa usa ka kongregasyon. Ania ang pipila ka paagi nga kami naghatag og serbisyo, ug ganahan kaayo mi kon ikaw moapil!

Mga Serbisyo alang sa Kaayohan

Sa tibuok Simbahan, ang mga miyembro giawhag sa pagpuasa kada bulan, ang dili pagkaon ug pag-inom sulod sa mga 24 oras (kon ang ilang lawas makahimo). Dayon ang mga miyembro sa Simbahan modonar sa kwarta nga unta gigamit alang niadto nga mga pagkaon aron itabang niadtong nanginahanglan.

Gamit niini nga mga donasyon, ang lokal nga mga lider makatabang niadtong nanginahanglan og pinansyal nga tabang alang sa pagkaon, panimalay, ug transportasyon. Ang mga lider motabang usab sa mga indibidwal sa pagdawat og hinabang sa paghimo og plano aron molambo ang ilang sitwasyon, kasagaran gamit ang dugang nga kapanguhaan sama sa employment services, pagpakigtambag pinaagi sa Family Services, mga kurso sa pagbarog pinaagi sa kinaugalingong paningkamot, ug dugang pa.

Kini nga hinabang motugot niadtong anaa sa panginahanglan nga mobati sa gugma sa Manluluwas, ingon man sa gugma sa ilang komunidad—ilabi na kon lisod ang panahon.

Paghupay gikan sa Katalagman

Kon ang natural nga mga katalagman, gubat, ug uban pang mga kalaglagan mahitabo, ang Simbahan ug ang mga miyembro niini molihok aron sa paghatag og pagkaon, kagamitang pangmedikal, sinina, ug uban pang mga gikinahanglan.

Ang Simbahan nakigtambayayong sa sinaligan nga mga organisasyon aron sa pagtubag sa talagsaon nga mga panginahanglan nga mitumaw gikan sa matag sitwasyon, mogamit sa lokal nga mga kongregasyon aron sa pagbuhat sa mga butang sama sa pagtapok ug paghan-ay sa mga donasyon, mohawan sa mga natumpag, ug mohatag og pagkaon, sinina, kapasilongan, ug emosyonal nga suporta kon gikinahaglan.

Makitawhanon nga Tabang

Ang Simbahan molihok sa pag-atiman alang niadtong anaa sa panginahanglan sa tibuok kalibotan pinaagi sa nagkadaiyang mga programa ug mga proyekto.

Kini nga buhat magdepende base sa piho nga mga panginahanglan sa lainlaing srea. Ang Simbahan piho nga nakatutok sa pagpalambo sa makuhaan og limpyo nga tubig ug sanitasyon, pag-amuma sa inahan ug bag-ong gipanganak, pag-atiman sa kahimsog, edukasyon, seguridad sa pagkaon, ug abag alang sa mga bakwit.

Ang pagpakigtambayayong sa kasaligan nga mga organisasyon sa pagpatuman niini nga mga inisyatiba makatabang sa Simbahan aron mapadako ang mga paningkamot sa pagserbisyo.

Pagpangalagad

Sulod sa atong mga kongregasyon, ang mga miyembro gibahin-bahin ngadto sa mga managkauban ug gitahasan og pipila ka tawo nga “pangalagaran”. Ang pagpangalagad mahitungod gayod sa pagmugna og Kristohanong mga panaghigala. Hunahunaa kini sama sa usa ka sistema sa pagkahigala—ang imong mga tigpangalagad usa ka anaa na daan nga sistema sa suporta nga imong ikauban sa maayong mga panahon ug kadangpan sa mga panahon sa panginahanglan.

Unsa kahay hulagway sa imong paghigugma sa imong silingan alang kanimo mismo? Ania ang pipila ka ideya kon unsaon sa paghigugma sa imong silingan:

• Pag-ampo alang sa mga oportunidad sa pagpakita og pagkamabination sa tibuok adlaw nimo.
• Paningkamot sa pagpasaylo niadtong nakahimo kanimo og sayop.
• Mobarog batok sa pagdaogdaog, pagpihig sa kaliwatan, ug ubang mga matang sa diskriminasyon
• Ipakatap ang positibo nga mga mensahe ug magmabination ngadto sa uban diha sa social media.
• Kumustaha ang mga higala nga nakasinati og malisod nga panahon sa kinabuhi.
• Paghatag og sinsero nga komplimento.
• Suportahi ang mga paningkamot ug mga organisasyon sa pag-amuma alang niadtong nanginahanglan.

Makakita usab ka og mga proyekto sa pagserbisyo sa inyong area o mga paagi sa pagserbisyo bisan dili pisikal nga anaa sa lokasyon [serve remotely] pinaagi sa pagbisita sa JustServe.org.