Ang Imong Kinabuhi Adunay Katuyoan ug Kahulogan

Naghunahuna ka ba sukad kon nganong ania ka dinhi?

Kami nagtuo nga kita nabuhi sa wala pa gihimo ang yuta ug nga kita nagpuyo uban sa Dios isip Iyang espiritu nga mga anak. Ang atong Langitnong Amahan mipadala sa matag usa kanato dinhi aron kita makadawat og usa ka lawas, makakat-on, ug molambo aron mas mahisama Kaniya. Kon kita mosunod sa plano sa Dios, kita makabalik sa pagpuyo didto sa Iyang presensiya.

Kon gibati gayod nimo nga ikaw adunay mas dako nga katuyoan kay sa magpakabuhi lang, husto ka. Ikaw makakaplag sa imong katuyoan pinaagi sa pagdangop ngadto sa Dios.

Ang ebanghelyo ni Jesukristo nagsaad og kalinaw, kalig-on, ug hingpit nga kalipay niadtong mosunod sa mga sugo sa Dios ug mabunyagan ngadto sa Simbahan ni Kristo.

Apan sa unsang paagi nga ang hingpit nga kalipay mahimong atong katuyoan kon ang kinabuhi puno sa daghan kaayong panlimbasog? Ang tubag mao si Jesukristo.

Pinaagi ni Jesukristo, kita makakaplag og kahupay diha sa atong kasub-anan ug mapalig-on pinaagi sa kalisdanan. Makabati kita og pagkamapasalamaton alang sa daghang matahom nga mga butang nga matagamtam dinhi sa yuta. Kita mahimong makapalambo sa mga relasyon uban niadtong atong gimahal pinaagi sa pagsunod sa mga baroganan nga Iyang gitudlo diha sa Biblia: kapuangod, serbisyo, pagpasaylo, ug gugma.

Pinaagi sa paghatag og usa ka Manluluwas, ang Dios naghimo og usa ka paagi aron ang tanan Niyang mga anak makakaplag og hingpit nga kalipay.

Sa higayon nga moagi og lisod nga mga panahon, kini makatabang sa paghinumdom nga ang plano sa Dios alang nimo gilugwayan lapas sa imong mortal nga kinabuhi. Kon imong buhaton ang imong labing maayo sa pagsunod Kaniya, ang tanang butang nga imong masinati mahimong husto ugma damlag pinaagi ni Jesukristo. Ang Biblia nagsaad nga “Iyang pagapahiran ang tanang luha gikan sa ilang mga mata; ug ang kamatayon wala na, ug wala na usab unyay pagminatay, ni paghilak, ni kasakit” (Pinadayag 21:4).

Ang kinabuhi naglakip sa sakit nga mga kasinatian tungod kay diha sa plano sa Dios, ang mga pagsulay nga gihatag kanato mahimong atong kaayohan ug kalamboan. Kini nga mga panlimbasog makatabang kanato sa pagbaton og mga hiyas sama sa:

• Kalig-on. Sama nga ang pisikal nga pag-ehersisyo makapalig-on kanato sa pisikal nga paagi, ang mga pagbatok nga atong gisagubang sa tibuok natong kinabuhi makapalig-on kanato sa espirituwal, mental, ug emosyonal nga paagi. Kini nga kalig-on makatabang kanato sa pagbuntog sa mga unos sa kinabuhi.
• Impatiya. Kon ikaw moagi og mga hagit, ang imong impatiya motubo. Ug kon ikaw mogamit sa imong kasinatian sa pagtabang sa uban sa susama nga kahimtang, ikaw nagtabang sa buhat sa Dios dinhi sa yuta.
• Pailob. Kon daghan kaayong butang nga dili makontrolar, lakip sa mga aksiyon sa uban, kita “makasalig sa Ginoo” (Mga Salmo 27:14). Kita makatuo nga ang tanang butang nga dili makiangayon natong giantos sa kataposan matarong pinaagi ni Jesukristo.

Ang Dios kanunay nga nakahibalo nga ikaw makahimo og kasaypanan ug magkinahanglan og tabang sa pagbuntog sa kasubo ug sala. Isip kabahin sa plano sa Dios, Siya mihatag og usa ka Manluluwas ug Manunubos, si Jesukristo, aron mag-antos ug mamatay alang kanimo ug alang sa matag tawo nga nabuhi sukad. Tungod sa sakripisyo ni Jesukristo, makakaplag ka og kapasayloan ug pagkaayo.

Uban sa tabang sa Manluluwas, ikaw makabuntog sa sala, mga kahuyang, mga dili maayo nga batasan, ug mga pagkaadik nga nakapugong kanimo. Ikaw mamahimong mas manggihatagon, mapasayloon, mapainubsanon, ug mapailobon kaysa kaniadto. Samtang ikaw mas mahimong Kristohanon, ikaw makabaton og mas dakong tinguha sa pagpadayon sa dalan aron makabalik sa pagpuyo uban sa Dios.