Ang mga Pamilya Mahimong Magkauban sa Kahangtoran

Ang kasuod sa pamilya nga inyong giporma niining kinabuhia mahimong molungtad lapas sa lubnganan. Ang pagpalig-on sa imong relasyon uban sa Dios mosangpot ngadto sa mas lig-on nga mga relasyon uban sa imong pamilya.
Dinhi niini nga pahina
A family enjoys their time together as they walk down a sidewalk.

Ang mga Pamilya Sentro sa Plano sa Dios

Isip imong mahigugmaong Amahan sa Langit, ang Dios gusto nga ikaw makat-on ug molambo sa kinabuhi. Ang mga pamilya adunay mahinungdanong katungdanan niana nga kalamboan. Kami nagtuo:
  • Ang mga pamilya mao ang igtutukod nga bloke sa lig-on nga katilingban.
  • Ang panimalay mahimong usa ka dapit diin kita makabati og suporta, kahilwasan, ug gugma.
  • Ang pagkonektar ngadto sa Dios makahimo og lig-on nga mga pamilya diin ang espirituhanon, emosyonal, ug pisikal nga mga panginahanglan nakab-ot na.
A mother bakes cookies with her three children in the kitchen.

Ikaw Mahimong Makauban sa Imong Pamilya sa Kahangtoran

Kon ang imong pamilya usa ka talagsaong tinubdan sa gugma ug kalipay sa imong kinabuhi, mahimong lisod kaayong hunahunaon ang bisan unsang paghulagway sa langit nga dili maglakip sa relasyon niadto nga mga tawo. Kabahin sa maayong mga balita sa ebanghelyo ni Jesukristo mao nga ang mga pamilya mahimong magkauban sa kahangtoran.

Diha sa Biblia, si Jesus mihatag sa Napulog duha ka Apostoles sa awtoridad sa pagkapari, nagsaad nga “bisan unsay imong pagabugkoson dinhi sa yuta, didto sa langit pagailhon kini nga binugkos” (Mateo 18:18). Kanang samang awtoridad gikan sa Dios mohiusa—o moselyo—sa mga bana ug mga asawa ug sa mga ginikanan ug sa mga anak hangtod sa kahangtoran.

Family life in Hong Kong. Images include: Family at ocean, laughing together, reading, praying, playing games etc.
Ang mga seremonya sa kaminyoon gipahigayon sa mga templo pinaagi niining sama nga awtoridad nagsaad nga ang mga kaminyoon niadtong kinsa matinud-anon sa Dios ug sa usag usa mahimong molungtad sa kahangtoran imbes motapos diha sa kamatayon.

Kita mopahigayon niining sama nga mga seremonya sa pagselyo alang sa atong mga katigulangan, kinsa atong gituohan nga makapili sa pagdawat o pagsalikway sa mga pagselyo.

Ang mga relasyon sa pamilya ug ang mga sirkumstansiya mahimong komplikado, ug kita wala gayod masayod kon unsa gayod ang mahitabo sa tanan sa sunod nga kinabuhi. Apan kita adunay hugot nga pagtuo sa hingpit nga kaalam ug gugma sa Dios, ug kita nagtuo nga ang langit mao ang usa ka dapit sa dili mahandoraw nga kalipay.

Makakaplag ka og Tabang sa Pagpalig-on sa Imong Pamilya

Julie Hillyard On Family
Julie Hillyard kabahin sa mga relasyon sa pamilya
Pagkaplag og Hingpit nga Kalipay diha sa Pamilya nga Lahi Tan-awon
Ang mahigugmaong mga relasyon sa pamilya lagmit makab-ot kon natukod diha sa mga baroganan nga gitudlo ni Jesuskristo, sama sa:
  • Gugma nga putli
  • Pagpasaylo
  • Pagkamatinuoron
  • Pagpasalamat
  • Pag-ampo
  • Mag-uban sa Pagsimba
Samtang ang imong pamilya mas masuod ngadto sa Dios pinaagi niining mga pamatasan, kamo mas masuod ngadto sa usag usa.

Tungod kay kita nagtuo nga ang mga pamilya hilabihan kaimportante niining kinabuhia ug sa sunod, Ang Simbahan ni Jesukristo sa mga Santos sa Ulahing mga Adlaw naningkamot og maayo sa pagsuporta sa himsog nga mga relasyon sa pamilya. Ania ang pipila ka paagi nga imong makaplagan ang suporta alang sa imong pamilya.

Mga Kapanguhaan sa Simbahan alang sa mga Pamilya

Ang Simbahan nagtanyag og mga kapanguhaan alang sa mga indibidwal ug mga pamilya aron magamit samtang sila magtuon sa ebanghelyo ni Jesukristo. Kining mga kapanguhaan sa pagtuon naghatag kaninyo sa mga oportunidad aron magamit kon unsay inyong nakat-onan ug mopalambo sa inyong pagtuo. Ang mga baroganan gipalig-on sa matag semana diha sa simbahan.

Moakses sa mga plano sa pagtuon, nga gitawag og Dali, Sunod Kanako.
Ang programa sa Simbahan alang sa kabatan-onan nagsuporta sa mga ginikanan sa pagtudlo og Kristohanong mga mithi ngadto sa ilang mga anak, ug ilang gitugotan ang ilang mga tin-edyer sa pagkonektar sa uban nga adunay managsama nga mga mithi. Ang pipila sa mga oportunidad alang sa kabatan-onan naglakip sa:
  • Mga klase sa relihiyon
  • Sinemana nga mga kalihokan sa grupo sa kabatan-onan
  • Mga proyekto sa pagserbisyo
  • Mga sayaw
  • Mga pagkampo sa summer
  • Mga komperensiya
Ang home evening mao ang usa ka tradisyon diin ang mga pamilya giawhag sa pagpahinungod og usa ka gabii sa usa ka semana aron mag-uban sa paggahin og panahon. Kini mahimong nagpasabot sa pagtuon sa ebanghelyo, magdula, malingaw sa pagkaon, ug moapil sa ubang mga kalihokan nga makapalig-on sa panaghiusa. Bisan unsa man ang labing angay alang sa inyong pamilya maoy labing maayo! Ang importanteng butang mao ang pagprayoridad sa paghimo og de kalidad nga panahon sa pamilya. Kini mahimo usab nga usa ka panahon nga magkauban sa mga higala, mga silingan, ug mga miyembro sa inyong kongregasyon.
Ang mga miyembro gitahasan sa pagpangalagad ngadto sa pipila ka mga tawo sulod sa ilang mga kongregasyon. Kon kita mangalagad sa uban, kita maningkamot sa pagserbisyo kanila sama sa gibuhat sa Manluluwas. Kini nakapaseguro nga ang tanang miyembro sa kongregasyon adunay usa ka tawo nga nag-atiman alang kanila ug tawo nga ilang kadangpan kon sila nagkinahanglan og bisan unsang butang. Pananglitan, usa ka tigpangalagad nga brother o sister lagmit motanyag og kasakyan ngadto sa simbahan, makigsabot alang sa mga pagkaon nga madala kon ang usa ka pamilya adunay bag-ong anak nga bata, o magmahigalaon lang diha sa mga lingkoranan sa simbahan.
Kon ang mga pamilya o mga indibidwal nanglimbasog sa paghatag alang sa ilang panginahanglan, ang programa sa kaayohan sa Simbahan makatabang sa mga kapanguhaan sama sa mga grocery. Ang mga serbisyo sa panarbaho sa Simbahan makatabang sa mga tawo sa pagpangita og bag-ong trabaho o sa pagpalambo sa mga kahanas sa pagpangita og trabaho. Kami motanyag og mga klase nga giesponsoran sa Simbahan, nga bukas alang sa tanan, kabahin sa personal nga panalapi, emosyonal nga kalig-on, ug pagsugod og usa ka negosyo.
Matag indibidwal kabahin sa pamilya sa atong langitnong mga ginikanan. Dili tanan kinsa moadto sa simbahan nagpuyo uban sa pamilya, apan ang tanan makakaplag og espirituhanon nga suporta ug komunidad sa simbahan. Ang mga single adult makapili sa pagsimba diha sa usa ka kongregasyon nga naglakip sa mga pamilya ug mga anak—o, sa ubang pipila ka dapit sa kalibotan, sila mahimong motambong sa mga kongregasyon nga piho lang sa mga single adult sa ilang grupo nga kaedad. Ang pagtambong og mga klase sa relihiyon ug mga katilingbanon nga mga kalihokan nga piho ngadto sa mga single adult makahatag og lahi nga mga oportunidad alang sa panaghigalaay ug espirituhanong paglambo.

Hisgotan Nato ang Mahitungod sa Pamilya

Ang simbahan makatabang kanimo sa paglig-on sa imong pamilya ug sa pagpatunhay nianang bililhong mga relasyon alang sa kahangtoran. Makakat-on ka og dugang pa pinaagi sa pagpakig-istorya sa mga misyonaryo sa online o mag-atubang mismo.