Ang Dios Mao ang Tinubdan sa Tanang Kamatuoran

Usahay, kita mobati og kalibog mahitungod sa atong kinabuhi o walay kasegurohan mahitungod sa umaabot. Kita makauswag uban sa atong mahigugmaon nga Langitnong Amahan ug sa Iyang Anak, nga si Jesukristo, kinsa mao ang tinubdan sa kamatuoran.

Ang kamatuoran mao ang kahibalo sa mga butang ingon nga sila mao gayod. Sama pananglit, tinuod nga ang Dios nahigugma kanimo ug makatabang sa pag-usab sa imong kinabuhi. Ang Dios personal nga nakaila kanato, ug Siya naggamit sa Balaang Espiritu sa pagtabang kanato nga makaila sa unsay tinuod.

Ang Langitnong Amahan mipadala sa Iyang Anak, nga si Jesukristo, aron sa pagtudlo kanato kon unsaon nga mahimong malipayon ug makakaplag og kahulogan sa atong kinabuhi.

Si Jesus mao ang atong hingpit nga ehemplo kon unsaon sa pagpakabuhi. Ang Iyang mga pagtulun-an naglihok isip usa ka giya nga kahayag nga makagiya kanato ngadto sa kalinaw. Si bisan kinsa nga gusto nga mosunod ni Jesukristo mahimong makabaton niini nga kahayag; Siya misaad nga ang tanan nga magtinguha Kaniya makakaplag Kaniya.

Ang Balaang Espiritu, o ang Espiritu Santo, mao ang mensahero sa Langitnong Amahan ug ni Jesukristo. Adunay pipila ka paagi nga ang Espiritu Santo makatabang sa pagdala kanato nga mas mapaduol ngadto sa Dios. Ang Espiritu Santo:

• Mohupay (tan-awa sa Juan 14:16–17, 26; Moroni 8:26; Doktrina ug mga Pakigsaad 36:2).
• Mopadayag ug mopamatuod sa kamatuoran (tan-awa sa 2 Nephi 32:4–5; Alma 5:46–47; Doktrina ug mga Pakigsaad 8:2–3).
• Mohatag og pagsaksi sa Amahan ug sa Anak (tan-awa sa Juan 15:26; 3 Nephi 11:32, 36).
• Mopalunsay ug molimpyo (tan-awa sa Alma 13:10–12; 3 Nephi 27:19–20; Moroni 6:4).

Pag-ampo ngadto sa Imong Mahigugmaong Langitnong Amahan

Ang Dios nahigugma kanato ug gustong makadungog gikan kanato. Siya nagsaad nga kon kita mag-ampo, Siya mohatag kanato og mga tubag ug giya.

Si Jesus mitudlo kanato diha sa Biblia (Mateo 6:9–13) ug sa Basahon ni Mormon (3 Nephi 18:19) kon unsaon sa pag-ampo.

Pagmatinud-anon

Ang Biblia nagtudlo nga “ang pagtuo mao ang pasalig kanato sa mga butang nga atong ginapaabot, ug ang panghimatuod sa pagkaanaa sa mga butang nga dili nato makita” (Mga Hebreo 11:1). Kon kita matinud-anon, kita mopili sa pagtuo nga ang Langitnong Amahan ug si Jesukristo motabang kanato nga makakaplag og kalipay og kahulogan sa atong kinabuhi.

Ilha ang Balaang Espiritu

Ang Dios nakigsulti kanato pinaagi sa Balaang Espiritu sa nagkalainlaing mga paagi. Diha sa Biblia, kini sa kasagaran gihulagway nga “hinay hinagawhaw nga tingog” (tan-awa sa 1 Mga Hari 19:11–12), apan ang matag usa mobati sa Balaang Espiritu sa ilang kaugalingong paagi. Alang kaninyo, ang Balaang Espiritu mahimong mabati sama sa:

• Mga pagbati sa gugma, hingpit nga kalipay, kalinaw, ug kamaayo (Mga Taga-Galacia 5:22-23).
• Katin-awan ug giya alang sa imong kinabuhi (Doktrina ug mga Pakigsaad 8:2–3).
• Mga ideya diha sa imong hunahuna ug mga pagbati diha sa imong kasingkasing (1 Mga Taga-Corinto 2:9–11).
• Ang kangitngit gipulihan sa kahayag (Alma 19:6).

Sunda ang Ehemplo sa Manluluwas

Gipakita ni Jesus ang hingpit nga ehemplo alang kanatong tanan. Kon gusto kita masayod kon unsay tinuod, kita makasunod sa Iyang ehemplo ug makabuhat sa unsay Iyang gibuhat.

Unsa kaha kini sama?

• Pagpakita og gugma ug gugmang putli ngadto sa uban ug ngadto sa Dios.
• Tan-awa kon sa unsang paagi kadto nga mga aksiyon mopabati kanimo.
• Pamalandongi kon sa unsang paagi kadto nga mga aksiyon mousab sa imong kinabuhi.