Nganong Kita Anaa Dinhi sa Yuta ug Unsay Mahitabo Human Kita Mamatay

Ang Dios, ang atong mahigugmaong Langitnong Amahan, gusto nga kita mobati og kalipay ug hingpit nga kalipay. Siya mihimo og usa ka plano alang kanato aron moanhi sa yuta, molambo ug mobalik ngadto Kaniya hangtod sa kahangtoran. Ang Iyang plano mohatag og kahulogan ug konteksto sa atong mga kinabuhi ug motubag sa dagkong mga pangutana: “Diin ko gikan?” “Nganong ania ako dinhi?” ug “Unsa ang mahitabo human ako mamatay?”

Nagsugod ang imong istorya sa wala pa ka matawo. Didto sa langit, nabuhi na ka isip usa ka espiritu uban sa Dios ug sa nahibilin sa Iyang mga anak nga espiritu. Kitang tanan mga sakop sa Iyang pamilya, ug sa atong kinabuhi sa wala pa dinhi sa yuta, gipili nato nga mosunod sa plano sa Dios. Kini nagpasabot nga moanhi sa yuta aron kita mohimo sa sunod nga lakang sa atong mahangtoron nga kauswagan.

Ang Paglalang

Ubos sa direksyon sa Dios, si Jesukristo milalang sa yuta ug sa tanang buhi nga mga butang. Si Adan ug si Eva mao ang una sa mga espiritu nga mga anak sa Dios nga mianhi sa yuta. Ang Dios milalang sa ilang lawas nga sama tan-awon sa Iyang kaugalingon ug mibutang kanila diha sa Tanaman sa Eden.

Ang Pagkapukan ni Adan ug ni Eva

Samtang si Adan ug si Eva didto sa tanaman, ang Dios misugo kanila nga dili mokaon sa bunga nga gikan sa kahoy sa kahibalo sa maayo ug daotan.

Kon ilaha pang gituman kini nga sugo, sila nagpabilin unta sa tanaman, apan sila dili makahimo sa pag-uswag pinaagi sa pagkat-on gikan sa oposisyon ug mga hagit sa mortal nga kinabuhi. Dili gayod unta sila mahibalo sa hingpit nga kalipay tungod kay dili man sila makasinati og kasub-anan ug kasakit.

Si Satanas mitental nila ni Adan ug Eva sa pagkaon sa gidili nga bunga. Si Eva mipili sa pagkaon sa bunga ug mihatag ni Adan og pipila sa bunga. Mipili usab siya sa pagkaon niini. Tungod niini nga pagpili, sila gipapahawa gikan sa tanaman ug nabulag gikan sa presensiya sa Dios. Kini nga panghitabo gitawag og ang Pagkapukan.

Ang Pagkapukan mao ang usa ka lakang sa pag-uswag alang sa katawhan ug usa ka dako nga panalangin alang kanatong tanan. Ang Pagkapukan naghimo niining posible nga kita matawo sa yuta ug mouswag diha sa plano sa Langitnong Amahan.

Ang Pagkapukan usa ka lakang sa pag-uswag alang sa katawhan ug usa ka panalangin kanatong tanan. Ang mga panalangin sa Pagkapukan naglakip sa:

• Sila si Adan ug Eva nahimong mortal.
• Sila nakasinati ug makagamit sa ilang kabubut-on sa pagpili tali sa maayo ug sa dautan.
• Tungod kay si Adan ug si Eva nag-atubang og oposisyon, sila nakakat-on ug miuswag.
• Tungod kay sila nakasinati og kasub-anan, sila makasinati usab og kalipay.
• Ang Pagkapukan mihimo niining posible alang kanatong tanan nga matawo dinhi sa yuta ug molambo diha sa plano sa Langitnong Amahan.

Tungod sa Pagkapukan, kita napanalanginan og pisikal nga mga lawas, katungod sa pagpili tali sa maayo ug sa daotan, ug oportunidad nga makabaton og kinabuhing dayon. Walay untay usa niini nga posible kon si Adan ug si Eva nagpabilin pa sa tanaman.

Si Adan ug Eva mipahayag sa ilang pasalamat alang sa mga panalangin nga miabot isip resulta sa Pagkapukan:

“Si Adan mihimaya sa Dios ug natagbaw, ug misugod sa pagpanagna mahitungod sa tanan nga mga banay sa yuta, nag-ingon: Bulahan ang ngalan sa Dios, kay tungod sa akong kalapasan ang akong mga mata nabuka, ug niini nga kinabuhi ako adunay kalipay, ug usab sa unod ako makakita sa Dios.

“Ug si Eva, iyang asawa, nakadungog niining tanan nga mga butang ug nalipay, nag-ingon: Kon dili pa unta sa atong kalapasan kita dili unta makaangkon og binhi, ug dili gayod masayod sa maayo ug sa daotan, ug sa kalipay sa atong katubsanan, ug sa kinabuhi nga dayon nga gihatag sa Dios ngadto sa tanan nga masulundon.”

Ang kinabuhi dinhi sa yuta usa ka mahinungdanong bahin sa matahom nga plano sa Dios alang sa matag usa kanato. Ang mga kasinatian nga atong naangkon dinhi makatabang kanato nga makat-on, molambo, ug maandam sa pagbalik ngadto sa atong Amahan sa Langit.

Ang Pag-ula ni Jesukristo mao ang labing importante nga bahin sa Plano sa Dios bahin sa Kalipay

• Tungod sa Pagkapukan ni Adan ug ni Eva, kitang tanan mapaubos ngadto sa sala ug kamatayon.
• Tungod kay ang Dios nahigugma kanato, Siya mipadala sa Iyang Anak, si Jesukristo, dinhi sa yuta aron sa pagtubos kanato gikan sa sala ug kamatayon.
• Tungod sa maulaon nga sakripisyo ni Jesus, kita mahimong mapasaylo ug malimpyohan sa atong mga sala ug ang atong mga kasingkasing mahimong mausab. Kini nakapahimo niining posible nga kita makabalik ngadto sa presensiya sa Dios ug maangkon ang mahangtorong kalipay.

Si Jesukristo nagtanyag og kahupayan, paglaom ug pagkaayo. Ang Iyang maulaon nga sakripisyo mao ang kinadak-ang pagpadayag sa Iyang gugma. Ang tanang dili makiangayon sa kinabuhi mahimong mahusto pinaagi sa Pag-ula ni Jesukristo.

Sama ra nga kita nabuhi sa wala pa kita mianhi sa yuta, kita mopadayon sa pagkabuhi human kita mamatay. Ang pagkahibalo niini makahatag og kahupayan ug kalinaw kon kita o ang atong mga minahal mag-atubang sa kamatayon. Samtang kita nagbangotan alang niadtong nawala kanato, adunay paglaom tungod ni Jesukristo—ang kamatayon dili mao ang kataposan (tan-awa sa Juan 11:25–26).

Ang Kalibotan sa Espiritu

Kon kita mamatay, ang atong espiritu ug lawas magbulag. Bisan og ang atong lawas mamatay, ang atong espiritu—ang kamahinungdanon kon si kinsa kita—magpbadayon nga buhi. Ang atong espiritu moadto sa kalibotan sa espiritu, nga usa ka naghulat nga panahon sa pagkat-on ug pagpangandam hangtod nga madawat nato ang gasa sa pagkabanhaw.

Pagkabanhaw

Ang pagkabanhaw mao ang pagbalik sa atong lawas ug espiritu ug mao ang sunod nga lakang sa atong mahangtoron nga paglambo.

Kon kita mabanhaw, ang matag usa kanato makabaton og usa ka hingpit nga pisikal nga lawas, gawasnon sa kasakit ug balatian. Kita mahimong imortal, mabuhi hangtod sa kahangtoran.

Tungod sa Pag-ula ug Pagkabanhaw sa Manluluwas, matag tawo nga nabuhi sukad mabanhaw (Alma 11:42–44).

Ang Kaluwasan nahimong Posible Tungod ni Jesukristo

Tungod kay kitang tanan mabanhaw, kitang tanan maluwas—o makaangkon og kaluwasan—gikan sa pisikal nga kamatayon. Apan dili mahimong posible ang Pagkabanhaw ni ang kaluwasan gikan sa atong mga sala kon wala si Jesukristo.

Siya nag-antos alang sa atong mga sala aron kon kita mag-ampo alang sa kapasayloan ug maningkamot nga mausab, kita mahimong limpyo. Siya namatay usab diha sa krus ug nabanhaw gikan sa mga patay. Tungod ni Jesus, ang kamatayon dili mao ang kataposan.

Paghukom ug Mahangtorong Kahimayaan

Sa panahon sa pagkabanhaw, ang matag usa kanato pagahukman sa tagsa-tagsa pinaagi ni Jesus, ang atong Manluluwas. Kining kataposang paghukom ibase sa atong mga tinguha, mga buhat, ug mga pagpili.

Ang Dios lamang ug si Jesus ang hingpit nga nakahibalo sa atong mga kasingkasing ug sa atong mga kahimtang sa kinabuhi, mao nga sila lamang ang makahukom kanato sa hingpit. Kini nga paghukom adunay pagmahal, kaluoy, kaangayan, ug pagkamay-tulubagon (tan-awa sa 3 Nephi 27: 14– 15).

Ang kataposang tumong sa Dios mao ang pagtabang sa tanan Niyang mga anak nga makabalik sa pagpuyo uban Kaniya diha sa celestial nga gingharian.

Ang plano sa Dios alang kanato naghimo sa kinabuhing dayon uban Kaniya ug sa atong mga pamilya nga posible. Ang pagsunod sa plano sa Dios bahin sa kalipay naglakip sa:

• Pagtuo ngadto ni Jesukristo.
• Paghinulsol sa atong mga sala.
• Pagpabunyag diha sa Iyang ngalan.
• Pagdawat sa Gasa sa Balaang Espiritu.
• Pagtuman sa mga sugo sa Dios.
• Paghinulsol kon kita mapakyas.