2025
O le a le Uiga o le Toetu ia te Oe?
Aperila 2025

Na o Tusiga Faatekinolosi

O le a le Uiga o le Toetu ia te Oe?

Saunia e Trent Hortin

Mekasini a le Ekalesia

O le Toetu o Keriso ua faamautinoa ai o le a tatou toetutu uma ma ni tino faafouina.

o le tuugamau gaogao

I le vaitau o le Eseta tatou te talanoa soo ai e uiga i le vaiaso mulimuli o Keriso, Lona maliu, ma Lona Toetu. A o faamanatuina nei mea na tutupu, e mafai ona lelei le fesili atu, “O le a le uiga o lenei mea mo au?”

O Le Toetu o se Vaega o le Fuafuaga a le Atua

Na saunoa Peresitene Dallin H. Oaks, Fesoasoani Muamua i le Au Peresitene Sili: “Ina ia toe maua mai i tatou mai le oti ma le agasala, o le fuafuaga a lo tatou Tama Faalelagi o le a saunia ai se Faaola. O Lona Toetu o le a togiolaina ai tagata uma mai le oti.”

I le taimi o le olaga faaletino, e vavaeeseina ai i tatou faaletino ma faaleagaga mai le afioaga o le Atua (tagai Alema 42:6–9). Na auina mai Keriso e ola i se olaga faaletino i le lalolagi o se vaega o le fuafuaga o le faaolataga, e saunia ai se ala mo i tatou taitoatasi e toe foi atu ai i le afioaga o le Tama Faalelagi. “Aua e faapei ona oti uma ia Atamu, e faapea foi ona faaolaina uma ia Keriso” (1 Korinito 15:22). Na aoao mai e Elder D. Todd Christofferson o le Korama a Aposetolo e Toasefululua, “Ua faia e le Faaola mea uma ia sa’o. E lē tumau ni faamasinogalētonu i le olaga faaletino, e oo lava i le oti, auā na Ia toefuatai mai le ola. E leai se manu’a, lē atoatoa, faalataina, po o le sauāina e lē tauia i le iuga ona o Lana faamasinotonu mulimuli ma le alofa mutimutivale.”

E faapefea e le mauaina o le malamalama i le matafaioi a le Faaola i le fuafuaga a le Atua ona fesoasoani ia te oe e liliu atu ai ia Keriso?

Fautuaga mo Suesuega:

Ua Ofoina Mai e Keriso le Mana Faamama

Pe a tatou agasala, atonu tatou te lagona le tausalaina po o le maasiasi, ae e mafai e Keriso ona “faamama mai ia i tatou i amioletonu uma” (1 Ioane 1:9) pe a tatou salamo. Ona o Lana Togiola ma le Toetu, ua i ai ia Keriso le mana o lē “tunu ma faamama” (Malaki 3:3).

Na fesili Elder Ronald A. Rasband o le Korama a Aposetolo e Toasefululua, “Pe o tatou faaauau pea ona faafetai mo le Togiola e le mafaatusalia a Iesu Keriso? Pe o tatou lagonaina ea lona mana faamamā, i le taimi nei?”

Na faapefea ona e lagonaina le mana faamama o Iesu Keriso i lou olaga?

Fautuaga mo Suesuega:

  • Henry B. Eyring, “Ia Manatua Pea o Ia,” Liahona, Me. 1995, 25–26

  • Boyd K. Packer, “Faamamaina,” Liahona, Me. 1997, 9–11

  • Iakopo 4:8

O Le Toetu o se Punavai o le Faamoemoe

Ona sa faatoilaloina e Iesu Keriso le oti, “ua leai se manumalo i le tuugamau” (Mosaea 16:8).

Na saunoa Elder Gerrit W. Gong o le Korama a Aposetolo e Toasefululua: “O le toetu e aofia ai le toefuataiga faaletino o o tatou ‘vae ma lima ma sooga uma,’ ‘e oo i se lauulu o le ulu o le a le leiloa; ae o le a toefuataia mea uma i o latou autino tatau ai ma atoatoa’ [Alema 40:23]. O lea folafolaga ua maua ai le faamoemoe e i latou o e ua leai ni aao; o e ua le mafai ona pupula, faalogo, pe savavali; po o e ua manatu ua leiloloa i faama’i ogaoga, faama’i o le mafaufau, po o isi gafatia ua faaitiitia. Na te sueina i tatou ia maua. Na te faaatoatoaina i tatou.”

E mafai faapefea ona e faaaogaina lelei le faamoemoe o le Toetu i lou olaga?

Fautuaga mo Suesuega: