E Na o le Faaeletonika: O Aoaoga a Taitai o le Ekalesia mai Ala o Faasalalauga Faaagafesootai
O le Toetu o Iesu Keriso e Aumaia ia i Tatou le Faamoemoe
Tagai po o a vaega na aoaoina mai e perofeta soifua ma isi taitai o le Ekalesia i luga o ala o faasalalauga faaagafesootai e uiga i le toetu
O Le Keriso Toetu, saunia e Walter Rane
O le Eseta e avea o se faamanatu o lenei olaga, e ui lava e i ai sona iuga, ae e le o le mutaaga lea. Ona o Iesu Keriso, o le a tatou toe faatasia ai ma o tatou tino faaletino ma mafai ai ona toe faatasia ma e pele ia i tatou. O Lana taulaga e le gata o le faamoemoe silisili lea o loo maua i le taimi o la tatou malaga i le olaga nei.
Na aoao mai Peresitene Russell M. Nelson:
“Ou te faafetai sa ou i ai i le fale i lena Aso Toonai i le 2005. Sa ma faamaeaina ma lo’u toalua muamua, o Dantzel, a ma feau i le fale ma filifili ai e malolo mo ni nai minute. Sa ma saofafai i luga o le nofoa, uu lima, ma amata ona matamata i se polokalama i le televise.
“I totonu o ni nai minute, sa faafuasei ma e le’i mafaufauina ona mou filemu atu Dantzel i le faavavau. O a’u taumafaiga e toe faaola o ia na faamaonia le lē faamanuiaina. O le faate’ia ma le faanoanoa na lofituina ai a’u. O la’u uo mamae i le toeitiiti atoa le 60 tausaga ua leai.
“I le sefulu tausaga na muamua atu, na maliu ai lo’u afafine i le kanesa. Sa na o le 37 tausaga o Emily. I le 2019, sa maliu ai lo’u afafine faapelepele lona lua i lena faama’i matautia. Sa na o le 67 tausaga o Wendy.
“I na taimi o le faanoanoa, ma’eu lo’u lotofaafetai tele mo la’u molimau i le Alii o Iesu Keriso. I Lona manumalo i le tuugamau, ua tatou vaaia ai le folafolaga o lo tatou lava toetutu.
“‘Ua tuuina mai ia te a’u le pule uma lava i le lagi ma le lalolagi’ (Mataio 28:18), na tautino mai e le Faaola ina ua mavae Lona Toetu. O lena mana e aofia ai ki o le Toetu. Ou te iloa o le a Ia faaaogaina na ki e faatuina ai Dantzel, Emily, ma Wendy, e pei lava ona Ia faaaogaina na ki e siitia ai le vaega o totoe o le aiga o tagata.
“Mo fanau a le Atua, o le toetu o lona uiga o le matua, vaivai, ma le pala o le a aveesea. “O lenei tino pala o le a faaofuina i le tino le pala” (Mosaea 16:10), ma “o le a toe faatasia le agaga ma le tino i ona foliga atoatoa” (Alema 11:43).
“O le toetu e mafai ai foi ona toe faatasia—le toe faatasia o aiga. Tatou te nonofo faatasi i le alofa, o lea tatou te fetagisi ai pe a maliu se tasi e pele (tagai i le Mataupu Faavae ma Feagaiga 42:45). Ae e pei o Maria le Makatala, e mafai ona tatou liua o tatou loimata o le faanoanoa i loimata o le olioli a o tatou faatalitali atu i le lumanai mai le vaaiga o se aiga e faavavau.”
Na saunoa taitai o le Ekalesia i le konafesi aoao e uiga i le Toetuo Iesu Keriso. Ua latou faasoa mai foi ni savali e uiga i nei autu i luga o ala o faasalalauga faaleagafesootai, e aofia ai mea nei:
O Le Toetu Moni o Iesu Keriso
[Vitio]: “I le Eseta, tatou te faatasi ai ma Kerisiano uma i le faamanatuina o le Toetu moni o Iesu Keriso. I le faaali atu i Ana Aposetolo ina ua mavae Lona maliu, sa Ia faamautinoa atu ai ia i latou e le o Ia o se agaga. I upu na lipotia mai e Luka, o se fomai i na aso, na fetalai atu Iesu, ’Ia outou tagotago mai ia te au, ma ia vaavaai mai; aua o le agaga e leai sona aano ma ni ivi, pei o au nei ua outou vaavaai i ai’ [Luka 24:39].
“Ae pe o le a toetutu ea tagata uma ma se tino? O tusitusiga paia o le Toefuataiga ua tuuina mai ai se manino lea e tuufaatasia ai i tatou i le talitonuga mausali ma le folafolaga o le a toetutu tagata uma i se tino ua atoatoa. Ua aoao mai le Tusi a Mamona o le a toe faatasia le agaga ma le tino. O faaaliga i ona po nei ua faamatalaina ai agelu o ni tagata toetutu o e ua i ai tino o aano ma ivi. O le mea aupito sili ona patino o mea nei mai le Tusi a Mamona.
“Na aoao mai le perofeta o Alema, ‘O le agaga o le a toefuataia i le tino, ma le tino i le agaga; ioe, ma o le a toefuataia vae ma lima ma sooga uma i lona tino; ioe, e oo i se lauulu o le ulu o le a le leiloa; ae o le a toefuataia mea uma i o latou autino tatau ai ma atoatoa’ [Alema 40:23].
“Ua ia i tatou uma lava se mafuaaga faapitoa e tulimatai atu ai i le toetu o se tino ua atoatoa.”
Peresitene Dallin H. Oaks, Fesoasoani Muamua i le Au Peresitene Sili, Facebook, 6 Ape., 2023, facebook.com/dallin.h.oaks.
O Le Toetu o se Punavai o le Faamoemoe ma le Naunautai
“O se molimau i le moni o le Toetu o Iesu Keriso o se puna lea o le faamoemoe ma le naunautai. O loo soifua o Ia, ma ona o Lana taulaga, o le a tatou toetutu ai ma faapaiaina. O Iesu o le Keriso toetu, o lo tatou Faaola, ma o lo tatou faataitaiga atoatoa ma le taiala i le ola faavavau. Ou te tatalo ina ia mafai ona tatou manatua, ma o tatou loto atoa mo o tatou olaga atoa, Lana taulaga ma Lona alofa ia i tatou”
Peresitene Henry B. Eyring, Fesoasoani Lua i le Au Peresitene Sili, Facebook, 4 Ape., 2023, facebook.com/henry.b.eyring.
Lona Faamoemoe, Lona Filemu, ma Lona Alofa
“Ou te molimau atu i le atoatoa ma le moni a’ia’i o le taulaga togiola e le mafaatusalia a le Faaola ma Lona Toetu mamalu. A o tatou taulai atu o tatou olaga i lenei manatu, ou te folafola atu o le a tatou lagonaina Lona faamoemoe, Lona filemu, ma Lona alofa.
“Pe a faafuasei ona maliu se tasi tatou te alolofa i ai, e mafai ona lofituina le faanoanoa ma le faavauvau.
“I le faaiuga o le tausaga ua tea, na faafuasei lava ona faamutaina le soifua o le tamaitiiti fou susulu o le Iunivesite o Polika Iaga o Ana Peterson ina ua mavae se faalavelave matautia i le faaseega i le aisa. O Ana o se soo lotomaualalo, alofa, ma agalelei o Iesu Keriso. Sa ia sailia ni auala e fesoasoani ai i isi ia lagona le alofa o le Atua. O le mea moni, faatoa uma lava lana talosaga e avea ma se faifeautalai faamisiona.
“E ui ina sa toatele na leiloloa se uo ina ua maliu Ana, ae sa leiloa se malamalama matagofie i ona matua, o John ma Julie, lea sa la tausia, tatalo i ai, ma alolofa i ai mo le 18 tausaga. O le maliu o se afafine ua lava lea e ufitia ai soo se tasi i le faavauvau. Ae peitai, e ui lava i le faanoanoa loloto ua la lagonaina, ae ua filifili John ma Julie e faalagolago i le Alii o Iesu Keriso.
“Sa ou fesili atu ia John—o le sa auauna faatasi ma au o se faifeautalai ina ua ou pulefaamalumalu i le Misiona a Farani Bordeaux—ma Julie e faasoa mai ia te au o latou manatu a o faaauau pea ona la faatinoina le faatuatua ia Iesu Keriso i le feagai ai ma lenei faalavelave. O le mea lenei na la faasoa mai ia te au:
“John: ‘O le maliu faafuasei ma le matautia o Ana na sasaeina ai le lagona e pei o se manua tele i lo‘u fatafata. Ae o loo i ai se pulupasama i Kiliata, ma a o ma faalagolago atu i le agaga faafetai mo le Togiola a le Faaola ma taimi matagofie ma le ofoofogia sa matou maua i le 18 tausaga o Ana, sa faatumulia i matou i le alofa mutimutivale. Ua ia i matou le malosi e fetaomi atu ai.’
“Julie: ‘E lei leva ona mavae le faalavelave a Ana, ae uunaia au e fai le autu o a matou taumafaiga ‘Ia Liliu Atu i le Malamalama, Lo Tatou Faaola.’ A o matou faasoa atu i le tasi ma le isi nei avanoa e filifili ai le malamalama nai lo le filifilia o le pogisa e taulimaina ai, matou te faamalolosia le tasi ma le isi, ma e tauaveina i matou e le Alii i lo matou faavauvau. O a’u/Matou te filifili e faatuatuaina le Alii.’
“Ou te faamemelo moni lava i le faatuatua o John ma Julie ia Iesu Keriso. O i laua o se faataitaiga matagofie ia te au. I lenei vaitau o le Eseta, ou te molimau atu na motusia e Iesu Keriso noataga o le oti, ma faatagaina tagata uma e ola i tua atu o le tuugamau, ma, o le mea e sili ona taua, ua Ia folafola mai ia i tatou taitoatasi a tatou talitonu ma mulimuli ia te Ia, e mafai ona tatou nonofo faatasi ma Ia e faavavau—ioe, e faavavau!”
Elder Neil L. Andersen, Korama a Aposetolo e Toasefululua, Facebook, 7 Ape., 2023, facebook.com/neill.andersen.
E Mafai Ona E Maua le Talitonuga ia Keriso
“A o latalata mai le Eseta, sa ou toe mafaufau i se aafiaga na ma maua ma lo’u toalua i a ma malaga talu ai nei i Amerika Tutotonu. I lo ma aso mulimuli i le Aai o Kuatemala, sa ma auai ai i se faigalotu lea sa faasoa mai ai e aufaipese e fa a le Peraimeri a le siteki ni molimau faamusika ma upu e uiga ia Iesu Keriso.
‘Sa o se aso matagofie, ma mafanafana o le tautotogo. O le a le galo lava ia te au le molimau faamaoni ma le faigofie a Uso Ángel Zúñiga. A o ia tuuina mai se molimau faigofie ia Iesu Keriso, sa ou lagonaina se molimau mamana i lo‘u loto e faapea, ua iloa moni lava e Ángel o Iesu Keriso o lona Faaola. O se taimi o le a le galo vave ia te au.
“Mulimuli ane, ina ua mae’a le faigalotu, sa matou faatalofa atu i tamaiti taitoatasi. Sa fesili mai se tasi tamaitiiti laitiiti ia te au, ‘O a mai Iesu?’ Sa ou tali atu, ‘E alofa Iesu ia te oe, ma e talitonu o Ia ia te oe, ma e mafai ona e mautinoa ia te Ia.’ Sa tali mai lenei tamaitiiti i se ataata tele, ma le iloa lea na faatumulia ai lo‘u agaga i le olioli.
“A o tatou mafaufau i mea na faia e lo tatou Faaola mo i tatou i le vaiaso a o lumanai le Eseta, ou te valaaulia outou taitoatasi e faatumu o outou agaga i le malamalama e alofa Iesu ia te outou, e talitonu o Ia ia te outou, ma e mafai ona outou maua le talitonuga ia te Ia.”
Elder Dale G. Renlund, Korama a Aposetolo e Toasefululua, Facebook, 5 Ape, 2023, facebook.com/DaleGRelund.
Ona o Ia, e I Ai Pea le Faamoemoe
“Ou te faamoemoe ia outou uma lava ia maua se faaiuga matagofie o le vaiaso o le Eseta, ia manatua pea o le mafuaaga tatou te faamanatuina ai le Eseta ona o le taulaga togiola ma le Toetu a lo tatou Faaola pele. A aunoa ma lena, a aunoa ma Ia, o le a leai se mafuaaga e faamanatu ai aua o le a leai se faamoemoe mo i tatou i lenei lalolagi po o le lalolagi a sau. E tatau ona tatou manatua pea o Ia; ona o Ia, o loo i ai pea le faamoemoe.
“Ou te fiafia pea i lenei upusii mai ia Elder Jeffrey R. Holland: ‘O se tasi o faamafanafanaga sili o lenei vaitau o le Eseta o le, ona sa savalia e Iesu se ala umi ma le pagatia na o ia lava, tatou te le tau faia ai lena mea. … O loo ili mai i le tumutumu o Kalevaria le upumoni o le a le tuulafoaiina lava i tatou e aunoa ma se fesoasoani, tusa lava pe i ai nisi taimi tatou te lagona ai ua tuulafoaiina. E moni lava na fetalai mai le Togiola o i tatou uma: ‘Ou te le tuua lava outou ua matuaoti.’ …
“ … Ao tatou agai atu i lenei vaiaso paia … tau ina ia tatou tautino atu i tatou lava ia avea atili ma ni soo atoatoa o le Alii o Iesu Keriso, ia le na o le upu, ma ia lē na o le mafanafana o taimi logolelei, ae i galuega ma le lototoa ma i le faatuatua, e aofia ai le taimi e tuua toatasi ai lo tatou ala ma pe a faigata ona onosaia lo tatou satauro. O lenei vaiaso o le Eseta ma taimi uma lava, talosia ia tatou tutu i autafa o Iesu Keriso “i taimi uma ma i mea uma, ma i nofoaga uma [tatou] te i ai, e oo lava i le oti,’ aua e moni lava o le ala lea sa Ia tu ai i o tatou autafa ina ua oo i le oti ma ina ua tu na o Ia lava’ (konafesi aoao, Aperila 2009).
“Ou te faaopoopo atu la’u molimau i lana molimau faapea ona o lo tatou Faaola o Iesu Keriso, e leai se tasi o i tatou o le a savali na o ia. E pei ona saunoa matagofie mai Peresitene Camille N. Johnson i lana lauga i le konafesi, ‘O Iesu Keriso o le toomaga!’ Tau ina ia tatou maua lena toomaga e ala mai ia te Ia, ma tau ina ia tatou maua taitoatasi a tatou lava molimau mautinoa e faapea, tatou te le o savavali na o i tatou i le taimi nei pe o le a tatou le savavali lava na o i tatou. Ia Maua se Eseta Fiafia!”
Sister J. Anette Dennis, Facebook, 9 Ape., 2023, facebook.com/RS1stCounselor.