Ua Na’o Tusiga Faatekinolosi: Talavou Matutua
Filifili e Toe Faatuatuaina le Atua ina ua Mavae le Feagai ai ma Luitau i La’u Misiona
E nofo le tusitala i Sepania.
E lei faapea la’u misiona e pei ona sa ou mafaufauina i taimi uma, ma o lena mea na ou lagona ai le le mautonu ma le tuuatoatasi—seia oo ina ou aoao e tuu lo’u faalagolago i le Atua.
Ina ua amata la’u misiona, sa maualuga ou faamoemoega. O le a ou auauna atu ma le faamaoni, papatiso le toatele o tagata, ma toe foi atu i le aiga ma le mautinoa ma tala musuia e faamatala. Ou te faia ia mitamita lo’u aiga.
Peitai, i le taimi atoa o la’u aoaoga faamasani, sa faafuasei lava ona faatumulia a’u i le popole. Sa ou fiafia i le talalelei—sa ou le malamalama pe aisea na matua faigata ai ia te a’u ona faasoa atu. O le tauivi e lagona le to’a a o aoao atu na amata ai ona ou masalosalo ia te a’u lava ia ma lo’u faatuatua.
A o faagasolo taimi, sa faasolo ina ou matua atuatuvale lava (sa le fesoasoani foi le KOVITI-19). Sa le masani lelei lo’u peresitene o le misiona i tauiviga o le soifua maloloina faalemafaufau, ma sa le’i lelei i taimi uma le ma fesootaiga i le taimi o a ma talanoaga. Sa amata ona ou vaaia se faufautua, lea sa fesoasoani tele, ae sa le’i mou atu o’u tauiviga ma le talalelei. Sa ou fefe e toe talanoa i lo’u peresitene o le misiona e uiga i o’u lagona ona sa ou fefe nei ia auina atu au i le fale, ma sa ou manao e faamae’a la’u misiona.
Sa ou talitonu sese e le tatau ona tauivi tagata i se misiona pe afai o latou taumafai foi e fai le mea sa’o, o lea na ou fenumiai ai i lo’u tulaga. Pe sa le tatau ea ona ou maua le olioli a o o’u faia le galuega a le Alii?
Faatuatua i le Lotolotoi o Faigata
Ina ua mae’a la’u misiona, sa ou tauivi e saili ni tali ma se lagolago e uiga i o’u lagona faigata. Sa le’i i ai ni a’u fesootaiga ma a’u soa po o le peresitene o le misiona, ma sa ou lagonaina le maasiasi tele i o’u lagona. Sa ou fefe e faasoa atu aua sa foliga mai e leai se isi tagata na tauivi i a latou misiona—pe sa latou le talanoa foi i ai.
I se tasi aso i le lotu, sa saunoa ai lo’u faiaoga o le Aoga Sa e uiga i le auala na faaauau ai pea ona feagai lana tama tama, o lē sa ola ma le faamaoni i le talalelei ma auauna atu i se misiona, ma luitau i lona olaga ma lagona ai e pei e le talafeagai. Sa ia faamatalaina le tulaga lava lea sa ou i ai!
Sa ia molimau mai o le i ai o le malamalama i le talalelei e le puipuia ai i tatou mai faigata ma luitau, ae o le i ai o le faatuatua ma le tausia o a tatou feagaiga e mafai ona fesoasoani ia i tatou e maua ai le malosi mai le Tama Faalelagi ma Iesu Keriso ma le faamafanafanaga a le Agaga Paia.
O le olaga e faatatau i le filifili e faatuatuaina le Tama Faalelagi i na taimi ma maua le filemu, tuputupu a’e, ma le faatuatua sili atu i le lotolotoi o faigata ma le le talafeagai.
Sa aoao mai Peresitene Henry B. Eyring, Fesoasoani Muamua i le Au Peresitene Sili: “Ou te fia faamalosiau atu ia i latou o loo i le lotolotoi o tofotofoga faigata, o e lagonaina atonu ua mou atu lo latou faatuatua i lalo o osofaiga o faafitauli. O le tofotofoga lava ia e mafai ona avea ma ou ala e faamalosia ai ma iu ai ina maua le faatuatua e le matineia.”
Sa ou iloaina o misiona, ma soo se mea lava e poloaiina i tatou e le Alii e fai, e le faigofie i taimi uma. Ma i le taimi atoa, o tofotofoga sa ou manatu na faavaivaia ai lo’u faatuatua o aafiaga ia e mafai ona faamalosia ai. Sa manaomia ona suia la’u vaaiga. E ala mai i lo’u Tama Faalelagi ma Lona Alo, o Iesu Keriso, na mafai ai ona ou faatagaina faigata na ou feagai ai i la’u misiona ma mulimuli ane ina ia faateleina ai lo’u faatuatua.
Toe Faatuatuaina
Na aoao talu ai nei Elder Dieter F. Uchtdorf o le Korama a Aposetolo e Toasefululua: “O le faatuatua e onosaia tofotofoga ma le le mautonu o le olaga aua ua mauaa mausali ia Keriso ma Lana aoaoga faavae. O Iesu Keriso ma lo tatou Tama oi le Lagi o lē na auina mai o Ia, o le faavae e tasi e le mafaagaeetia, ma faatuatuaina atoatoa o lo tatou [faamoemoe].”
Pe a ese le olaga nai lo le mea na faamoemoeina, nai lo le talitonu ua tuulafoaiina i tatou e le Tama Faalelagi pe e le moni foi le talalelei, e mafai ona tatou filifili e faatuatuaina o Ia.
Ua ou aoaoina foi le taua o le talanoa atu i tagata faatuatuaina ae aua le mafatia i le le tautala. E le o tagata uma o le a malamalama atoatoa i o tatou aafiaga, ae o fesootaiga anoa ma isi e taua tele i lo tatou soifua manuia faalemafaufau ma le faaleagaga.
E alofa atoatoa lo tatou Tama Faalelagi ia i tatou, ma e i ai so tatou Faaola e malamalama ia i tatou. La te mananao ia tatou manatua e mafai ona tatou faatuatuaina i Laua—i taimi uma.