Faaaogaina o le Mataupu Faavae ma Feagaiga i Lou Olaga
Na Aoaoina A’u e se Lesona mai le Talafaasolopito o le Ekalesia e Faapea, O A Tatou Mea Sese e Le Faauigaina ai i Tatou
O le tala ia William W. Phelps na aoaoina ai a’u e mafai ona faamagaloina a’u agasala e ala i le alofa ma le taulaga a Iesu Keriso.
Pe na i ai se taimi na e faia ai se mea sese e te moomoo maimau pe ana mafai ona faafoi i tua? Pe na e fai atu se tala e te moomoo maimau pe ana mafai ona e tapeeseina? Pe sa tatalo mo se faamagaloga ae sa le’i lagonaina ua lava?
Ua tatou oo uma lava i ai.
Ia te a’u lava ia, e le o se mea e seāseā ona ou aioi atu i le Tama Faalelagi mo se faamagaloga. Sa i ai taimi sa ou lagona ai le maasiasi tele e le mafai e soo se tasi, e oo lava i le Faaola, ona faamagaloina a’u.
Ina ua ou suesueina aafiaga i le talafaasolopito o le Ekalesia, sa ou iloaina ai atonu e le na o a’u le tagata na mauaina lenei lagona. Sa ou maua le faamoemoe i le tala ia Viliamu W. Phelps, o lē sa avea ma se tusitala, faifeautalai, ma se taitai o le uluai Toefuataiga. O ia o se tagata lelei. Sa ia talai atu le talalelei i soo se mea sa ia malaga ai ma avea ai ma se sui faatuatuaina o le Aufono Maualuga a Misuri. O Viliamu foi o se uo mamae a Iosefa Samita.
O le mafuaaga lea na faapitoa ai le tiga o lona faalataina o Iosefa.
Faamagaloina e Pei o le Atalii Faamaumau Oa
I le 1838, na osofaia ai e tagata faatupu vevesi ma fitafita le Au Paia i Misuri, faatamaia fale ma sasaina tagata e tetee. I le mavae ai o lena mea, na pue faapagotaina ai Iosefa Samita ma isi taitai o le Ekalesia mo solitulafono e le faavaea. I le fefe ina ne’i molia faatasi ma i latou, sa faia ai e Viliamu W. Phelps ma nisi se maliega ma le loia: molimau atu e faasaga ia Iosefa Samita ma o saoloto.
I lalo o le tautoga, sa faatasi ai Viliamu ma isi i le tuuina atu o molimau sese e faasaga i le Perofeta. Ina ua mae’a le faamasinoga, sa faafalepuipuiina Iosefa ma isi taitai o le Ekalesia i le Falepuipui o Liperate. A o tuua e Viliamu le falefaamasino o se tagata saoloto, sa ia lagonaina le mamafa o ana amioga i ona tauau. I ni nai tausaga mulimuli ane, na maua ai e Iosefa Samita se tusi mai ia Viliamu e talosaga atu ai ia Iosefa mo se faamagaloga.
“Ua pei lava a’u o le atalii faamaumau oa,” na tusia ai e Viliamu. “Ua matua faamaualaloina ma faalotomaualaloina lava au.”
Na tusi atu le Perofeta, “I le talitonuina o lau faatoesega o se mea moni, ma le moni aiai o lou salamo, ou te fiafia ai e toe tuuina atu le limataumatau o le faauo, ma olioli i le toe foi mai o le atalii faamaumau oa.”
Sa faatumulia Iosefa Samita i le agaalofa mo Viliamu. E pei lava ona patipatia e le tamā le toe foi mai o le tama faamaumau oa i tusitusiga paia (tagai Luka 15:11–32), sa faapena foi ona toe talia e le Au Paia ia Viliamu Phelps i le lafu.
O le salamo ma le faamagaloga mo Viliamu—lea atonu na foliga mai e le mafai mo ia—ua avea nei ma se mea moni. Ma e mafai foi ona avea ma mea moni mo i tatou!
Na tatalo mai Elder Dieter F. Uchtdorf o le Korama a Aposetolo e Toasefululua ia i tatou:
“O i ai se tasi o tatou e le’i tuua le ala o le paia, ma mafaufau faavalevalea e mafai ona tatou maua le fiafia tele atu i lo tatou o i o tatou lava ala manatu faapito?
“E i ai se tasi o i tatou e le’i lagonaina le faalotomaualaloina, lotonutimomoia, ma naunau mo le faamagaloga ma le alofa mutimutivale?”
Atonu tatou te lagona le maasiasi tele i a tatou mea sese e talitonu ai e mafai ona faamagaloina i tatou. Ua faamautinoa mai e Elder Uchtdorf ia i tatou, “O le a tamoe mai lo tatou Tama Faalelagi ia i tatou, ua faatumulia Lona finagalo i le alofa ma le agalelei.”
O le Alofa o Keriso e Sili Atu
Na faailoa mai e Iosefa Samita le tiga na faia e Viliamu: “E moni ua matou mafatia tele ona o le taunuuga o au amioga—o le ipu oona ua tumu mo le tagata soifua e inumia, ua taumasuasua ina ua e faasagatau mai ia te i matou.”
Ae sa faaauau pea Iosefa, “Ae ua inumia le ipu, ua faia le finagalo o lo tatou Tama.”
Na iloa e Iosefa ua totogiina agasala a Viliamu ma ua le toe manaomia ona toe mafatia Viliamu. O le salamo o Viliamu i le Tama Faalelagi e mafai ona faasaolotoina ai o ia mai le tausalaina.
Na fetalai Keriso, “Ma ua ou inu i lena ipu oona lea na tuuina mai e le Tamā ia te a’u, ma ua ou faamamaluina le Tamā i lo’u aveina i o’u luga o agasala a le lalolagi”(3 Nifae 11:11).
Sa feagai ma le alofa le Faaola ma mafatiaga uma e tatau ai e totogi ai a tatou agasala ma mea sese. O lea la, a tatou salamo ma faia le galuega e suia ai o tatou olaga, e finagalo o Ia ia tatou agai i luma ma le olioli ua Ia faamautinoaina mo i tatou. E le manao o Ia ia tatou tumau i le tiga. Sa Ia inuina “le ipu oona” ina ia lava lo tatou salamo faamaoni!
I Ketesemane, sa lagona ai e Iesu Keriso le faalataina, maasiasi, faalumaina, ma le tiga o le a lagonaina e soo se tasi. Ona sa leai ni uo i Ona tafatafa, sa auina atu ai o Ia e faasatauroina. Sa Ia silafia e tatau ona i ai Lana taulaga, o lea na maliu ai ma le naunautai o Ia mo oe ma a’u. Ae i le taeao o le Eseta, sa toetu mai ai ma le manumalo o Ia.
Sa saunoa mai Peresitene Jeffrey R. Holland, Sui Peresitene o le Korama a Aposetolo e Toasefululua, “O se tasi o faamafanafanaga sili o lenei vaitau o le Eseta ona sa savalia e Iesu se ala umi ma le pagatia mafatia na o ia lava, ua tatou le faia o lena mea.”
Po o a lava agasala po o mea sese ua tatou faia, e sili atu le alofa o Keriso. E le gata o le a Ia fesoasoani ia i tatou e agai i luma pe a tatou salamo faamaoni, a o tatou aoao mai ia Viliamu W. Phelps, ae e mafai foi ona Ia fesoasoani ia i tatou e faamagalo atu i isi o e na faia ni mea sese ia i tatou, e pei ona sa faia e Iosefa Samita.
E leai se isi faatinoga sili atu o le alofa ua faia i le talafaasolopito o le lalolagi nai lo le Togiola a Keriso. E pei lava o le atalii faamaumau oa, o le a taliaina i tatou e lo tatou Faaola ma le Tama Faalelagi i taimi uma tatou te toe foi atu ai ia i laua.
O lea la, afai e te lagonaina e le mafai ona e maua le faamagaloga, aapa atu mo i Laua. O loo La faatali pea mo oe.